2.2 - প্রজাপতিঃ প্রজা অসৃজত - কৃষ্ণ যজুর্বেদ তৈত্তিরীয় সংহিতা পাঠঃ
Kanda 2 - Krishna Yajurveda Taittiriya Samhita · প্রথাগত ভক্তিপাঠ
krishna yajurvedeeya taittireeya samhitaayaa-ndviteeyakaande dviteeyah prashnah - ishtividhaanam
o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥
pra̠jaapa̍tih pra̠jaa a̍srijata̠ taa-ssri̠shtaa̠ indraa̠gnee apaa̍goohataa̠gm̠ so̍-'chaaya-tpra̠jaapa̍tirindraa̠gnee vai me̎ pra̠jaa apaa̍ghukshataa̠miti̠ sa e̠tamai̎mdraa̠gna- mekaa̍dashakapaala-mapashya̠-tta-nnira̍vapa̠-ttaava̍smai pra̠jaah praasaa̍dhayataa- mindraa̠gnee vaa e̠tasya̍ pra̠jaamapa̍ goohato̠ yo-'lam̍ pra̠jaayai̠ sa-npra̠jaa-nna vi̠ndata̍ aindraa̠gna-mekaa̍dashakapaala̠-nnirva̍pet-pra̠jaakaa̍ma indraa̠gnee [ ] 1
e̠va svena̍ bhaaga̠dheye̠nopa̍ dhaavati̠ taave̠vaasmai̎ pra̠jaa-mpra saa̍dhayato vi̠ndate̎ pra̠jaa-mai̎mdraa̠gna-mekaa̍dashakapaala̠-nnirva̍pe̠-thspardha̍maana̠h, kshetre̍ vaa sajaa̠teshu̍ vendraa̠gnee e̠va svena̍ bhaaga̠dheye̠nopa̍ dhaavati̠ taabhyaa̍me̠vendri̠yam mvee̠rya̍-mbhraatri̍vyasya vrinkte̠ vi paa̠pmanaa̠ bhraatri̍vyena jaya̠te-'pa̠ vaa e̠tasmaa̍dindri̠yam vee̠rya̍-nkraamati̠ ya-ssa̍graa̠mma-mu̍papra̠yaatyai̎mdraa̠gna-mekaa̍dashakapaala̠-nni- [-mekaa̍dashakapaala̠-nnih, va̠pe̠-thsa̠ngraa̠ma-] 2
-rva̍pe-thsangraa̠ma-mu̍paprayaa̠sya-nni̍ndraa̠gnee e̠va svena̍ bhaaga̠dheye̠nopa̍ dhaavati̠ taave̠vaasmi̍-nnindri̠yam vee̠rya̍-ndhatta-ssa̠hendri̠yena̍ vee̠rye̍nopa̠ pra yaa̍ti̠ jaya̍ti̠ tagm sa̍graa̠mmam vi vaa e̠sha i̍ndri̠yena̍ vee̠rye̍nardhyate̠ ya-ssa̍graa̠mma-njaya̍tyaindraa̠gna-mekaa̍dashakapaala̠-nnirva̍pe-thsangraa̠ma-nji̠tvendraa̠gnee e̠va svena̍ bhaaga̠dheye̠nopa̍ dhaavati̠ taave̠vaasmi̍-nnidri̠yam vee̠rya̍n- [vee̠rya̎m, dha̠tto̠ nendri̠yena̍] 3
-dhatto̠ nendri̠yena̍ vee̠rye̍na̠ vyri̍ddhya̠te-'pa̠ vaa e̠tasmaa̍dindri̠yam vee̠rya̍-nkraamati̠ ya eti̍ ja̠nataa̍maindraa̠gna-mekaa̍dashakapaala̠-nnirva̍pe-jja̠nataa̍me̠shya-nni̍ndraa̠gnee e̠va svena̍ bhaaga̠dheye̠nopa̍ dhaavati̠ taave̠vaasmi̍-nnindri̠yam vee̠rya̍-ndhatta-ssa̠hendri̠yena̍ vee̠rye̍na ja̠nataa̍meti pau̠shna-ncha̠rumanu̠ nirva̍pe-tpoo̠shaa vaa i̍ndri̠yasya̍ vee̠rya̍syaa-'nupradaa̠taa poo̠shana̍me̠va [ ] 4
svena̍ bhaaga̠dheye̠nopa̍ dhaavati̠ sa e̠vaasmaa̍ indri̠yam vee̠rya̍manu̠ praya̍chchhati kshaitrapa̠tya-ncha̠ru-nnirva̍pe-jja̠nataa̍-maa̠gatye̠yam vai kshetra̍sya̠ pati̍ra̠syaame̠va prati̍ tishthatyaindraa̠gna-mekaa̍dashakapaala-mu̠pari̍shtaa̠-nnirva̍peda̠syaame̠va pra̍ti̠shthaaye̎mdri̠yam vee̠rya̍-mu̠pari̍shtaa-daa̠tma-ndha̍tte ॥ 5 ॥ (pra̠jaakaa̍ma indraa̠gnee - u̍papra̠yaatyai̎mdraa̠gnamekaa̍dashakapaala̠-nni- rvee̠ryam̍ - poo̠shana̍me̠ vai - kaa̠nnacha̍tvaari̠gm̠shachcha̍ ) (a. 1)
a̠gnaye̍ pathi̠krite̍ puro̠daasha̍-ma̠shtaaka̍paala̠-nnirva̍pe̠dyo da̍rshapoornamaasayaa̠jee sanna̍maavaa̠syaa̎m vaa paurnamaa̠seem vaa̍-'tipaa̠daye̎-tpa̠tho vaa e̠shoddhyapa̍thenaiti̠ yo da̍rshapoornamaasayaa̠jee sanna̍maavaa̠syaa̎m vaa paurnamaa̠seem vaa̍tipaa̠daya̍tya̠gnime̠va pa̍thi̠krita̠gg̠ svena̍ bhaaga̠dheye̠nopa̍ dhaavati̠ sa e̠vaina̠mapa̍thaa̠-tpanthaa̠mapi̍ nayatyana̠dvaa-ndakshi̍naa va̠hee hye̍sha samri̍ddhyaa a̠gnaye̎ vra̠tapa̍taye [vra̠tapa̍taye, pu̠ro̠daasha̍-] 6
puro̠daasha̍-ma̠shtaaka̍paala̠-nnirva̍pe̠dya aahi̍taagni̠-ssanna̍vra̠tyami̍va̠ chare̍da̠gnime̠va vra̠tapa̍ti̠gg̠ svena̍ bhaaga̠dheye̠nopa̍ dhaavati̠ sa e̠vaina̍m vra̠tamaa la̍bhamyati̠ vratyo̍ bhavatya̠gnaye̍ raksho̠ghne pu̍ro̠daasha̍-ma̠shtaaka̍paala̠-nnirva̍pe̠dyagm rakshaagm̍si̠ sache̍ranna̠gnime̠va ra̍ksho̠hana̠gg̠ svena̍ bhaaga̠dheye̠nopa̍ dhaavati̠ sa e̠vaasmaa̠-drakshaa̠g̠syapa̍ hanti̠ nishi̍taayaa̠-nnirva̍pe̠- [nirva̍pet, nishi̍taayaa̠gm̠ hi] 7
-nnishi̍taayaa̠gm̠ hi rakshaagm̍si pre̠rate̍ sa̠premrnaa̎nye̠vainaa̍ni hanti̠ pari̍shrite yaajaye̠-draksha̍saa̠-mana̍nvavachaaraaya raksho̠ghnee yaa̎jyaanuvaa̠kye̍ bhavato̠ raksha̍saa̠g̠ strityaa̍ a̠gnaye̍ ru̠drava̍te puro̠daasha̍-ma̠shtaaka̍paala̠-nnirva̍pe-dabhi̠chara̍-nne̠shaa vaa a̍sya gho̠raa ta̠noorya-dru̠drastasmaa̍ e̠vaina̠maavri̍shchati taa̠jagaarti̠-maarchchha̍tya̠gnaye̍ surabhi̠mate̍ puro̠daasha̍-ma̠shtaaka̍paala̠-nnirva̍pe̠dyasya̠ gaavo̍ vaa̠ puru̍shaa [vaa̠ puru̍shaah, vaa̠ pra̠meeye̍ra̠n̠] 8
vaa pra̠meeye̍ra̠n̠ yo vaa̍ bibhee̠yaade̠shaa vaa a̍sya bhesha̠jyaa̍ ta̠noorya-thsu̍rabhi̠matee̠-tayai̠vaa-'smai̍ bhesha̠ja-nka̍roti surabhi̠mate̍ bhavati pooteega̠ndhasyaa-'pa̍hatyaa a̠gnaye̠ kshaama̍vate puro̠daasha̍-ma̠shtaaka̍paala̠-nnirva̍pe-thsangraa̠me samya̍tte bhaaga̠dheye̍nai̠vainagm̍ shamayi̠tvaa paraa̍na̠bhi nirdi̍shati̠ yamava̍reshaa̠m viddhya̍nti̠ jeeva̍ti̠ sa ya-mpare̍shaa̠-mpra sa mee̍yate̠ jaya̍ti̠ tagm sa̍ngraa̠ma- [tagm sa̍ngraa̠mam, a̠bhi vaa e̠sha] 9
-ma̠bhi vaa e̠sha e̠taanu̍chyati̠ yeshaa̎-mpoorvaapa̠raa a̠nvancha̍h pra̠meeya̍nte purushaahu̠tir-hya̍sya pri̠yata̍maa̠-'gnaye̠ kshaama̍vate puro̠daasha̍-ma̠shtaaka̍paala̠-nnirva̍pe-dbhaaga̠dheye̍nai̠vainagm̍ shamayati̠ naishaa̎-mpu̠raa-''yu̠sho-'pa̍ra̠h pramee̍yate̠-'bhi vaa e̠sha e̠tasya̍ gri̠haanu̍chyati̠ yasya̍ gri̠haa-ndaha̍tya̠gnaye̠ kshaama̍vate puro̠daasha̍-ma̠shtaaka̍paala̠-nnirva̍pe-dbhaaga̠dheye̍nai̠vainagm̍ shamayati̠ naa-'syaapa̍ra-ngri̠haa-nda̍hati ॥ 10 ॥ (vra̠tapa̍taye̠ - nishi̍taayaa̠-nnirva̍pe̠t - puru̍shaah - sangraa̠mam - na - cha̠tvaari̍ cha) (a. 2)
a̠gnaye̠ kaamaa̍ya puro̠daasha̍-ma̠shtaaka̍paala̠-nnirva̍pe̠dya-nkaamo̠ nopa̠name̍-da̠gnime̠va kaama̠gg̠ svena̍ bhaaga̠dheye̠nopa̍ dhaavati̠ sa e̠vaina̠-nkaame̍na̠ sama̍rdhaya̠tyupai̍na̠-nkaamo̍ namatya̠gnaye̠ ya vi̍shthaaya puro̠daasha̍-ma̠shtaaka̍paala̠-nnirva̍pe̠-thspardha̍maana̠h, kshetre̍ vaa sajaa̠teshu̍ vaa̠-'gnime̠va yavi̍shtha̠gg̠ svena̍ bhaaga̠dheye̠nopa̍ dhaavati̠ tenai̠vendri̠yam vee̠rya̍-mbhraatri̍vyasya [bhraatri̍vyasya, yu̠va̠te̠ vipaa̠pmanaa̠] 11
yuvate̠ vipaa̠pmanaa̠ bhraatri̍vyena jayate̠-'gnaye̠ yavi̍shthaaya puro̠daasha̍-ma̠shtaaka̍paala̠-nnirva̍pe-dabhicha̠ryamaa̍no̠ 'gnime̠va yavi̍shtha̠gg̠ svena̍ bhaaga̠dheye̠nopa̍ dhaavati̠ sa e̠vaasmaa̠-drakshaagm̍si yavayati̠ naina̍-mabhi̠charan̎-thstrinute̠-'gnaya̠ aayu̍shmate puro̠daasha̍-ma̠shtaaka̍paala̠-nnirva̍pe̠dyah kaa̠maye̍ta̠ sarva̠-maayu̍-riyaa̠-mitya̠gni- me̠vaa-''yu̍shmanta̠gg̠ svena̍ bhaaga̠dheye̠nopa̍ dhaavati̠ sa e̠vaa-'smi̠- [e̠vaa-'sminn̍, aayu̍rdadhaati̠] 12
-nnaayu̍rdadhaati̠ sarva̠maayu̍-retya̠gnaye̍ jaa̠tave̍dase puro̠daasha̍-ma̠shtaaka̍paala̠-nnirva̍pe̠-dbhooti̍kaamo̠-'gnime̠va jaa̠tave̍dasa̠gg̠ svena̍ bhaaga̠dheye̠nopa̍ dhaavati̠ sa e̠vaina̠-mbhooti̍-ngamayati̠ bhava̍tye̠vaagnaye̠ rukma̍te puro̠daasha̍-ma̠shtaaka̍paala̠-nnirva̍pe̠-drukkaa̍mo̠-'gnime̠va rukma̍nta̠gg̠ svena̍ bhaaga̠dheye̠nopa̍ dhaavati̠ sa e̠vaasmi̠-nrucha̍-ndadhaati̠-rocha̍ta e̠vaagnaye̠ teja̍svate puro̠daasha̍- [puro̠daasha̎m, a̠shtaaka̍paala̠-nnirva̍pe̠t] 13
-ma̠shtaaka̍paala̠-nnirva̍pe̠-tteja̍skaamo̠-'gnime̠va teja̍svanta̠gg̠ svena̍ bhaaga̠dheye̠nopa̍ dhaavati̠ sa e̠vaasmi̠-ntejo̍ dadhaati teja̠svye̍va bha̍vatya̠gnaye̍ saaha̠ntyaaya̍ puro̠daasha̍ma̠shtaaka̍paala̠-nnirva̍pe̠-thseeksha̍maano̠ 'gnime̠va saa̍ha̠ntyagg svena̍ bhaaga̠dheye̠nopa̍ dhaavati̠ tenai̠va sa̍hate̠ yagm seeksha̍te ॥ 14 ॥ (bhraatri̍vyasyaa -smi̠n - teja̍svate puro̠dasha̍ - ma̠shtaatrigm̍shachcha) (a. 3)
a̠gnaye-'nna̍vate puro̠daasha̍-ma̠shtaaka̍paala̠-nnirva̍pe̠dyah kaa̠maye̠taa-'nna̍vaan-thsyaa̠mitya̠gni-me̠vaa-nna̍vanta̠gg̠ svena̍ bhaaga̠dheye̠nopa̍ dhaavati̠ sa e̠vaina̠manna̍vanta-nkaro̠tyanna̍vaane̠va bha̍vatya̠gnaye̎-'nnaa̠daaya̍ puro̠daasha̍-ma̠shtaaka̍paala̠-nnirva̍pe̠dyah kaa̠maye̍taa-'nnaa̠da-ssyaa̠mitya̠gni-me̠vaannaa̠dagg svena̍ bhaaga̠dheye̠nopa̍ dhaavati̠ sa e̠vaina̍-mannaa̠da-nka̍rotyannaa̠da - [-ka̍rotyannaa̠dah, e̠va bha̍vatya̠gnaye-'nna̍pataye] 15
e̠va bha̍vatya̠gnaye-'nna̍pataye puro̠daasha̍-ma̠shtaaka̍paala̠-nnirva̍pe̠dyah-kaa̠maye̠taa-'nna̍pati-ssyaa̠-mitya̠gni-me̠vaa-'nna̍pati̠gg̠ svena̍ bhaaga̠dheye̠nopa̍ dhaavati̠ sa e̠vaina̠-manna̍pati-nkaro̠tyanna̍pati-re̠va bha̍vatya̠gnaye̠ pava̍maanaaya puro̠daasha̍-ma̠shtaaka̍paala̠-nnirva̍peda̠gnaye̍ paava̠kaayaa̠gnaye̠ shucha̍ye̠ jyogaa̍mayaavee̠ yada̠gnaye̠ pava̍maanaaya ni̠rvapa̍ti praa̠na-me̠vaa-'smi̠-ntena̍ dadhaati̠ yada̠gnaye̍ - [yada̠gnaye̎, paa̠va̠kaaya̠ vacha̍-] 16
paava̠kaaya̠ vaacha̍-me̠vaa-'smi̠-ntena̍ dadhaati̠ yada̠gnaye̠ shucha̍ya̠ aayu̍-re̠vaa-'smi̠-ntena̍ dadhaatyu̠ta yadee̠taasu̠-rbhava̍ti̠ jeeva̍tye̠vaitaa-me̠va nirva̍pe̠-chchakshu̍shkaamo̠ yada̠gnaye̠ pava̍maanaaya ni̠rvapa̍ti praa̠na-me̠vaa-'smi̠-ntena̍ dadhaati̠ yada̠gnaye̍ paava̠kaaya̠ vaacha̍-me̠vaasmi̠-ntena̍ dadhaati̠ yada̠gnaye̠ shucha̍ye̠ chakshu̍-re̠vaasmi̠-ntena̍ dadhaa- [chakshu̍re̠vaasmi̠-ntena̍ dadhaati, u̠ta yadya̠ndho] 17
-tyu̠ta yadya̠ndho bhava̍ti̠ praiva pa̍shyatya̠gnaye̍ pu̠trava̍te puro̠daasha̍-ma̠shtaaka̍paala̠-nnirva̍pe̠-dindraa̍ya pu̠trine̍ puro̠daasha̠-mekaa̍dashakapaala-mpra̠jaakaa̍mo̠-'gni-re̠vaa-'smai̎ pra̠jaa-mpra̍ja̠naya̍ti vri̠ddhaa-mindra̠h pra ya̍chchhatya̠gnaye̠ rasa̍vate-'jakshee̠re cha̠ru-nnirva̍pe̠dyah kaa̠maye̍ta̠ rasa̍vaan-thsyaa̠-mitya̠gni-me̠va rasa̍vanta̠gg̠ svena̍ bhaaga̠dheye̠nopa̍ dhaavati̠ sa e̠vaina̠gm̠ rasa̍vanta-nkaroti̠ [rasa̍vanta-nkaroti, rasa̍vaane̠va] 18
rasa̍vaane̠va bha̍vatyajakshee̠re bha̍vatyaagne̠yee vaa e̠shaa yada̠jaa saa̠kshaade̠va rasa̠mava̍ rundhe̠-'gnaye̠ vasu̍mate puro̠daasha̍-ma̠shtaaka̍paala̠-nnirva̍pe̠dyah kaa̠maye̍ta̠ vasu̍maan-thsyaa̠mitya̠gni-me̠va vasu̍manta̠gg̠ svena̍ bhaaga̠dheye̠nopa̍ dhaavati̠ sa e̠vaina̠m vasu̍manta-nkaroti̠ vasu̍maane̠va bha̍vatya̠gnaye̍ vaaja̠srite̍ puro̠daasha̍-ma̠shtaaka̍paala̠-nniva̍rpe-thsangraa̠me sam ya̍tte̠ vaaja̠m- [sam ya̍tte̠ vaaja̎m, vaa e̠sha si̍seershati̠] 19
-mvaa e̠sha si̍seershati̠ ya-ssa̍graa̠mma-njigee̍shatya̠gnih khalu̠ vai de̠vaanaa̎m vaaja̠sri-da̠gni-me̠va vaa̍ja̠srita̠gg̠ svena̍ bhaaga̠dheye̠nopa̍ dhaavati̠ dhaava̍ti̠ vaaja̠gm̠ hanti̍ vri̠tra-njaya̍ti̠ tagm sa̍graa̠mma-matho̍ a̠gniri̍va̠ na pra̍ti̠dhrishe̍ bhavatya̠gnaye̎-'gni̠vate̍ puro̠daasha̍-ma̠shtaaka̍paala̠-nnirva̍pe̠-dyasyaa̠gnaa- va̠gni- ma̍bhyu̠ddhare̍yu̠-rnirdi̍shtabhaago̠ vaa e̠tayo̍-ra̠nyo-'ni̍rdishtabhaago̠-'nyastau sa̠bhamva̍ntau̠ yaja̍maana- [yaja̍maanam, a̠bhi] 20
-ma̠bhi sa-mbha̍vata̠-ssa ee̎shva̠ra aarti̠-maarto̠-rya-da̠gnaye̎-'gni̠vate̍ ni̠rvapa̍ti bhaaga̠dheye̍nai̠vainau̍ shamayati̠ naa-''rti̠maarchchha̍ti̠ yaja̍maano̠-'gnaye̠ jyoti̍shmate puro̠daasha̍-ma̠shtaaka̍paala̠-nnirva̍pe̠-dyasyaa̠-gniruddhri̠to-'hu̍te-'gniho̠tra u̠dvaaye̠dapa̍ra aa̠deepyaa̍-'noo̠ddhritya̠ ityaa̍hu̠sta-ttathaa̠ na kaa̠rya̍m ya-dbhaa̍ga̠dheya̍ma̠bhi poorva̍ uddhri̠yate̠ kimapa̍ro̠-'bhyu- [kimapa̍ro̠-'bhyut, hri̠ye̠teti̠ taanye̠vaa] 21
-ddhri̍ye̠teti̠ taanye̠vaa va̠kshaanaa̍ni sanni̠dhaaya̍ manthedi̠tah pra̍tha̠ma-nja̍jne a̠gni-ssvaadyone̠radhi̍ jaa̠tave̍daah । sa gaa̍yatri̠yaa tri̠shtubhaa̠ jaga̍tyaa de̠vebhyo̍ ha̠vyam va̍hatu prajaa̠nanniti̠ chhando̍bhi-re̠vaina̠gg̠ svaadyone̠h praja̍nayatye̠sha vaa va so̎-'gnirityaa̍hu̠ rjyoti̠stvaa a̍sya̠ paraa̍patita̠-miti̠ yada̠gnaye̠ jyoti̍shmate ni̠rvapa̍ti̠ yade̠vaasya̠ jyoti̠h paraa̍patita̠-ntade̠vaava̍ rundhe ॥ 22 ॥ (ka̠ro̠tya̠nnaa̠do - da̍dhaati̠ yada̠gnaye̠ - shucha̍ye̠ chakshu̍re̠vaasmi̠-ntena̍ dadhaati -karoti̠ - vaaja̠m -myaja̍maana̠ - mu - de̠vaasya̠ - shatcha̍) (a. 4)
vai̠shvaa̠na̠ra-ndvaada̍shakapaala̠-nnirva̍pe-dvaaru̠na-ncha̠ru-nda̍dhi̠kraavnne̍ cha̠ruma̍bhisha̠syamaa̍no̠ ya-dvai̎shvaana̠ro dvaada̍shakapaalo̠ bhava̍ti samvathsa̠ro vaa a̠gni rvai̎shvaana̠ra-ssa̍mvathsa̠renai̠vainagg̍ svadaya̠tyapa̍ paa̠pam varnagm̍ hate vaaru̠nenai̠vaina̍m varunapaa̠shaa-nmu̍nchati dadhi̠kraavnnaa̍ punaati̠ hira̍nya̠-ndakshi̍naa pa̠vitra̠m vai hira̍nya-mpu̠naatye̠vaina̍-maa̠dya̍-ma̠syaa-'nna̍-mbhavatye̠taame̠va nirva̍pe-tpra̠jaakaa̍ma-ssamvathsa̠ro [samvathsa̠rah, vaa] 23
vaa e̠tasyaa-'shaa̎mto̠ yoni̍-mpra̠jaayai̍ pashoo̠naa-nnirda̍hati̠ yo-'la̍-mpra̠jaayai̠ sa-npra̠jaa-nna vi̠ndate̠ ya-dvai̎shvaana̠ro dvaada̍shakapaalo̠ bhava̍ti samvathsa̠ro vaa a̠gni rvai̎shvaana̠ra-ssa̍mvathsa̠rame̠va bhaa̍ga̠dheye̍na shamayati̠ so̎-'smai shaa̠nta-ssvaadyone̎h pra̠jaa-mpraja̍nayati vaaru̠nenai̠vaina̍m varunapaa̠shaa-nmu̍nchati dadhi̠kraavnnaa̍ punaati̠ hira̍nya̠-ndakshi̍naa pa̠vitra̠m vai hira̍nya-mpu̠naatye̠vaina̍m- [pu̠naatye̠vaina̎m, vi̠ndate̎] 24
-mvi̠ndate̎ pra̠jaam vai̎shvaana̠ra-ndvaada̍shakapaala̠-nnirva̍pe-tpu̠tre jaa̠teyada̠shtaaka̍paalo̠ bhava̍ti gaayatri̠yaivaina̍-mbrahmavarcha̠sena̍ punaati̠ yannava̍kapaala-stri̠vritai̠vaasmi̠-ntejo̍ dadhaati̠ ya-ddasha̍kapaalo vi̠raajai̠vaa-'smi̍-nna̠nnaadya̍-ndadhaati̠ yadekaa̍dashakapaala- stri̠shtubhai̠vaa-'smi̍-nnindri̠ya-nda̍dhaati̠ ya-ddvaada̍shakapaalo̠ jaga̍tyai̠vaa-'smi̍-npa̠shoo-nda̍dhaati̠ yasmi̍n jaa̠ta e̠taamishti̍-nni̠rvapa̍ti poo̠ta [poo̠tah, e̠va te̍ja̠svya̍nnaa̠da] 25
e̠va te̍ja̠svya̍nnaa̠da i̍ndriyaa̠vee pa̍shu̠maa-nbha̍va̠tyava̠ vaa e̠sha su̍va̠rgaa-llo̠kaa-chchhi̍dyate̠ yo da̍rshapoornamaasayaa̠jee sanna̍maavaa̠syaa̎m vaa paurnamaa̠seem vaa̍tipaa̠daya̍ti suva̠rgaaya̠ hi lo̠kaaya̍ darshapoornamaa̠saa vi̠jyete̍ vaishvaana̠ra-ndvaada̍shakapaala̠-nnirva̍pe-damaavaa̠syaa̎m vaa paurnamaa̠seem vaa̍-'ti̠paadya̍ samvathsa̠ro vaa a̠gni rvai̎shvaana̠ra-ssa̍mvathsa̠rame̠va pree̍naa̠tyatho̍ samvathsa̠rame̠vaasmaa̠ upa̍ dadhaati suva̠rgasya̍ lo̠kasya̠ sama̍shtyaa̠ [sama̍shtyai, atho̍] 26
atho̍ de̠vataa̍ e̠vaanvaa̠rabhya̍ suva̠rgam lo̠kame̍ti veera̠haa vaa e̠sha de̠vaanaa̠m yo̎-'gni-mu̍dvaa̠saya̍te̠ na vaa e̠tasya̍ braahma̠naa ri̍taa̠yava̍h pu̠raa-'nna̍-maksha-nnaagne̠ya-ma̠shtaaka̍paala̠-nnirva̍pe-dvaishvaana̠ra-ndvaada̍shakapaala-ma̠gnimu̍dvaasayi̠shyan. yada̠shtaaka̍paalo̠ bhava̍tya̠shtaaksha̍raa gaaya̠tree-gaa̍ya̠tro̎ 'gni-ryaavaa̍-ne̠vaa-'gnistasmaa̍ aati̠thya-nka̍ro̠tyatho̠ yathaa̠ jana̍m ya̠te̍-'va̠sa-nka̠roti̍ taa̠dri- [taa̠drik, e̠va] 27
-ge̠va ta-ddvaada̍shakapaalo vaishvaana̠ro bha̍vati̠ dvaada̍sha̠ maasaa̎-ssamvathsa̠ra-ssa̍mvathsa̠rah khalu̠ vaa a̠gneryoni̠-ssvaame̠vaina̠m yoni̍-ngamaya-tyaa̠dya̍ma̠syaanna̍-mbhavati vaishvaana̠ra-ndvaada̍shakapaala̠-nnirva̍penmaaru̠tagm sa̠ptaka̍paala̠-ngraama̍kaama aahava̠neeye̍ vaishvaana̠ramadhi̍ shrayati̠ gaarha̍patye maaru̠ta-mpaa̍pavasya̠sasya̠ vidhri̍tyai̠ dvaada̍shakapaalo vaishvaana̠ro bha̍vati̠ dvaada̍sha̠ maasaa̎-ssamvathsa̠ra-ssa̍mvathsa̠renai̠vaasmai̍ sajaa̠taagshchyaa̍vayati maaru̠to bha̍vati [ ] 28
ma̠ruto̠ vai de̠vaanaa̠m visho̍ devavi̠shenai̠vaa-'smai̍ manushya vi̠shamava̍ rundhe sa̠ptaka̍paalo bhavati sa̠pta ga̍naa̠ vai ma̠ruto̍ gana̠sha e̠vaasmai̍ sajaa̠taanava̍ rundhe 'noo̠chyamaa̍na̠ aa saa̍dayati̠ visha̍me̠vaasmaa̠ anu̍vartmaana-nkaroti ॥ 29 ॥ (pra̠jaakaa̍ma-ssamvathsa̠rah - pu̠naatye̠vaina̍m - poo̠tah - sama̍shtyai -taa̠drim - maa̍ru̠to bha̍va̠ - tyekaa̠nna tri̠gm̠shachcha̍ ) (a. 5)
aa̠di̠tya-ncha̠ru-nnirva̍pe-thsangraa̠ma-mu̍paprayaa̠sya-nni̠yam vaa adi̍ti-ra̠syaame̠va poorve̠ prati̍tishthanti vaishvaana̠ra-ndvaada̍shakapaala̠-nnirva̍pe-daa̠yata̍na-nga̠tvaa-sa̍mvathsa̠ro vaa a̠gni rvai̎shvaana̠ra-ssa̍mvathsa̠rah khalu̠ vai de̠vaanaa̍-maa̠yata̍na-me̠tasmaa̠dvaa aa̠yata̍naa-dde̠vaa asu̍raa-najaya̠n̠. ya-dvai̎shvaana̠ra-ndvaada̍shakapaala-nni̠rvapa̍ti de̠vaanaa̍-me̠vaa-''yata̍ne yatate̠ jaya̍ti̠ tagm sa̍graa̠mma-me̠tasmi̠n vaa e̠tau mri̍jaate̠ [e̠tau mri̍jaate, yo vi̍dvishaa̠nayo̠-ranna̠-matti̍] ॥ 30 ॥
yo vi̍dvishaa̠nayo̠-ranna̠-matti̍ vaishvaana̠ra-ndvaada̍shakapaala̠-nnirva̍pe-dvidvishaa̠nayo̠ranna̍-nja̠gdhvaa sa̍mvathsa̠ro vaa a̠gni-rvai̎shvaana̠ra-ssa̍mvathsa̠ra sva̍dita-me̠vaa-'tti̠ naasmi̍-nmrijaate samvathsa̠raaya̠ vaa e̠tau sama̍maate̠ yau sa̍ma̠maate̠ tayo̠ryah poorvo̍-'bhi̠druhya̍ti̠ tam varu̍no grihnaati vaishvaana̠ra-ndvaada̍shakapaala̠-nnirva̍pe-thsamamaa̠nayo̠h poorvo̍-'bhi̠druhya̍ samvathsa̠ro vaa a̠gni-rvai̎shvaana̠ra-ssa̍mvathsa̠ra-me̠vaa-''ptvaa ni̍rvaru̠nam- [ni̍rvaru̠nam, pa̠rastaa̍-da̠bhi] ॥ 31 ॥
-pa̠rastaa̍-da̠bhi dru̍hyati̠ naina̠m varu̍no grihnaatyaa̠vya̍m vaa e̠sha prati̍ grihnaati̠ yo-'vi̍-mpratigri̠hnaati̍ vaishvaana̠ra-ndvaada̍shakapaala̠-nnirva̍pe̠davi̍-mprati̠grihya̍ samvathsa̠ro vaa a̠gni-rvai̎shvaana̠ra-ssa̍mvathsa̠ra-sva̍ditaame̠va prati̍grihnaati̠ naa-''vya̍-mprati̍grihnaatyaa̠tmano̠ vaa e̠sha maatraa̍maapnoti̠ ya u̍bha̠yaada̍-tpratigri̠hnaatyashva̍m vaa̠ puru̍sham vaa vaishvaana̠ra-ndvaada̍shakapaala̠-nnirva̍pe-dubha̠yaada̍- [nirva̍pe-dubha̠yaada̍t, pra̠ti̠grihya̍] ॥ 32 ॥
-tprati̠grihya̍ samvathsa̠ro vaa a̠gnirvai̎shvaana̠ra-ssa̍mvathsa̠ra-sva̍ditame̠va prati̍ grihnaati̠ naatmano̠ maatraa̍maapnoti vaishvaana̠ra-ndvaada̍shakapaala̠-nnirva̍pe-thsa̠ni-me̠shyan-thsa̍mvathsa̠ro vaa a̠gni-rvai̎shvaana̠ro ya̠daa khalu̠ vai sa̍mvathsa̠ra-nja̠nataa̍yaa̠-nchara̠tyatha̠ sa dha̍naa̠rgho bha̍vati̠ya-dvai̎shvaana̠ra-ndvaada̍shakapaala-nni̠rvapa̍ti samvathsa̠ra-saa̍taame̠va sa̠nima̠bhi prachya̍vate̠ daana̍kaamaa asmai pra̠jaa bha̍vanti̠ yo vai sa̍mvathsa̠ram- [vai sa̍mvathsa̠ram, pra̠yujya̠ na] ॥ 33 ॥
-pra̠yujya̠ na vi̍mu̠nchatya̍pratishthaa̠no vai sa bha̍vatye̠ta-me̠va vai̎shvaana̠ra-mpuna̍raa̠gatya̠ nirva̍pe̠dya-me̠va pra̍yu̠nkte ta-mbhaa̍ga̠dheye̍na̠ vi mu̍nchati̠ prati̍shthityai̠ yayaa̠ rajvo̎tta̠maa-ngaamaa̠je-ttaa-mbhraatri̍vyaaya̠ pra hi̍nuyaa̠-nnir-ri̍ti-me̠vaasmai̠ pra hi̍noti ॥ 34 ॥ (mri̠jaa̠te̠ - ni̠rva̠ru̠nam - mva̍pedubha̠yaada̠--dyo vai sa̍mvathsa̠ragm - shattrigm̍shachcha) (a. 6)
ai̠ndra-ncha̠ru-nnirva̍pe-tpa̠shukaa̍ma ai̠ndraa vai pa̠shava̠ indra̍me̠va svena̍ bhaaga̠dheye̠nopa̍ dhaavati̠ sa e̠vaasmai̍ pa̠shoo-npraya̍chchhati pashu̠maa-ne̠va bha̍vati cha̠rurbha̍vati̠ svaade̠vaasmai̠ yone̎h pa̠shoo-npraja̍naya̠teendraa̍yendri̠yaava̍te puro̠daasha̠-mekaa̍dashakapaala̠-nnirva̍pe-tpa̠shukaa̍ma indri̠yam vai pa̠shava̠ indra̍-me̠vendri̠yaava̍nta̠gg̠ svena ̍bhaaga̠dheye̠nopa̍ dhaavati̠ sa [dhaavati̠ sah, e̠vaa-'smaa̍] ॥ 35 ॥
e̠vaa-'smaa̍ indri̠ya-mpa̠shoo-npraya̍chchhati pashu̠maane̠va bha̍va̠teendraa̍ya-gha̠rmava̍te puro̠daasha̠-mekaa̍dashakapaala̠-nnirva̍pe-dbrahmavarcha̠sakaa̍mo brahmavarcha̠sam vai gha̠rma indra̍me̠va gha̠rmava̍nta̠gg̠ svena̍ bhaaga̠dheye̠nopa̍ dhaavati̠ sa e̠vaasmi̍-nbrahmavarcha̠sa-nda̍dhaati brahmavarcha̠sye̍va bha̍va̠teendraa̍yaa̠-'rkava̍te puro̠daasha̠-mekaa̍dashakapaala̠-nnirva̍pe̠-danna̍kaamo̠-'rko vai de̠vaanaa̠-manna̠-mindra̍-me̠vaa-'rkava̍nta̠gg̠ svena̍ bhaaga̠dheye̠no- [svena̍ bhaaga̠dheye̍na, upa̍ dhaavati̠ sa] ॥ 36॥
-pa̍ dhaavati̠ sa e̠vaasmaa̠ anna̠-mpraya̍chchhatyannaa̠da e̠va bha̍va̠teendraa̍ya gha̠rmava̍te puro̠daasha̠-mekaa̍dashakapaala̠-nnirva̍pe̠-dindraa̍ye-ndri̠yaava̍ta̠ indraa̍yaa̠-'rkava̍te̠ bhooti̍kaamo̠ yadindraa̍ya gha̠rmava̍te ni̠rvapa̍ti̠ shira̍ e̠vaasya̠ tena̍ karoti̠ yadindraa̍yendri̠yaava̍ta aa̠tmaana̍-me̠vaasya̠ tena̍ karoti̠-ya-dindraa̍yaa̠-'rkava̍te bhoo̠ta e̠vaannaadye̠ prati̍-tishthati̠ bhava̍tye̠vendraa̍yaa- [bhava̍tye̠vendraa̍yaa, a̠gm̠ ho̠muche̍] ॥ 37 ॥
-'gm ho̠muche̍ puro̠daasha̠-mekaa̍dashakapaala̠-nnirva̍pe̠dyah paa̠pmanaa̍ grihee̠ta-ssyaa-tpaa̠pmaa vaa agmha̠ indra̍me̠vaa-'gm ho̠mucha̠gg̠ svena̍ bhaaga̠dheye̠nopa̍ dhaavati̠ sa e̠vaina̍-mpaa̠pmano-'gmha̍so muncha̠teendraa̍ya vaimri̠dhaaya̍ puro̠daasha̠-mekaa̍dashakapaala̠-nnirva̍pe̠dya-mmridho̠-'bhi pra̠vepe̍ran-raa̠shtraani̍ vaa̠-'bhi sa̍mi̠yu-rindra̍-me̠va vai̍mri̠dhagg svena̍ bhaaga̠dheye̠nopa̍ dhaavati̠ sa e̠vaa-'smaa̠nmridho- [e̠vaa-'smaa̠nmridha̍h, apa̍ ha̠nteendraa̍ya] ॥ 38 ॥
-'pa̍ ha̠nteendraa̍ya traa̠tre pu̍ro̠daasha̠-mekaa̍dashakapaala̠-nnirva̍pe-dba̠ddho vaa̠ pari̍yatto̠ vendra̍me̠va traa̠taara̠gg̠ svena̍ bhaaga̠dheye̠nopa̍ dhaavati̠ sa e̠vaina̍-ntraayata̠ indraa̍yaa-'rkaashvame̠dhava̍te puro̠daasha̠-mekaa̍dashakapaala̠-nnirva̍pe̠dya-mma̍haaya̠jno nopa̠name̍de̠te vai ma̍haaya̠jnasyaa-'ntye̍ ta̠noo ya-da̍rkaashvame̠dhaa-vindra̍-me̠vaa-'rkaa̎shvame̠dha- va̍nta̠gg̠ svena̍ bhaaga̠dheye̠nopa̍ dhaavati̠ sa e̠vaasmaa̍ anta̠to ma̍haaya̠jna-nchyaa̍vaya̠tyupai̍na-mmahaaya̠jno na̍mati ॥ 39 ॥ (i̠ndri̠yaava̍nta̠gg̠ svena̍ bhaaga̠dheye̠nopa̍ dhaavati̠ so̎ - 'rkava̍nta̠gg̠ svena̍ bhaaga̠dheye̍nai̠ - vendraa̍yaa - smaa̠-nmridho̎ - 'smai - sa̠pta cha̍ ) (a. 7)
indraa̠yaa-'nvri̍jave puro̠daasha̠-mekaa̍dashakapaala̠-nnirva̍pe̠-dgraama̍kaama̠ indra̍-me̠vaa-'nvri̍ju̠gg̠ svena̍ bhaaga̠dheye̠nopa̍ dhaavati̠ sa e̠vaasmai̍ sajaa̠taa-nanu̍kaan karoti graa̠mye̍va bha̍vateendraa̠nyai cha̠ru-nnirva̍pe̠dyasya̠ senaa-'sagm̍shiteva̠ syaa-di̍ndraa̠nee vai senaa̍yai de̠vate̎mdraa̠nee-me̠va svena̍ bhaaga̠dheye̠nopa̍ dhaavati̠ saivaasya̠ senaa̠gm̠ sagg shya̍ti̠ balba̍jaa̠napee̠- [balba̍jaa̠napi̍, i̠ddhme sa-nna̍hye̠dgau-] ॥ 40 ॥
-ddhme sa-nna̍hye̠dgau-ryatraa-'dhi̍shkannaa̠-nyame̍ha̠-ttato̠ balba̍jaa̠ uda̍tishtha̠-ngavaa̍-me̠vaina̍-nnyaa̠ya-ma̍pi̠neeya̠ gaa ve̍daya̠teendraa̍ya manyu̠mate̠ mana̍svate puro̠daasha̠-mekaa̍dashakapaala̠-nnirva̍pe-thsangraa̠me samya̍tta indri̠yena̠ vai ma̠nyunaa̠ mana̍saa sangraa̠ma-nja̍ya̠teendra̍-me̠va ma̍nyu̠manta̠-mmana̍svanta̠gg̠ svena̍ bhaaga̠dheye̠nopa̍ dhaavati̠ sa e̠vaasmi̍nnindri̠ya-mma̠nyu-mmano̍ dadhaati̠ jaya̍ti̠ tagm [jaya̍ti̠ tam, sa̠graa̠ma-me̠taa-me̠va] ॥ 41 ॥
sa̍graa̠ma-me̠taa-me̠va nirva̍pe̠dyo ha̠tama̍naa-ssva̠ya-mpaa̍pa iva̠ syaade̠taani̠ hi vaa e̠tasmaa̠ dapa̍kraantaa̠nyathai̠sha ha̠tama̍naa-ssva̠ya-mpaa̍pa̠ indra̍me̠va ma̍nyu̠manta̠-mmana̍svanta̠gg̠ svena̍ bhaaga̠dheye̠nopa̍ dhaavati̠ sa e̠vaasmi̍-nnindri̠ya-mma̠nyu-mmano̍ dadhaati̠ na ha̠tama̍naa-ssva̠ya-mpaa̍po bhava̠teendraa̍ya daa̠tre pu̍ro̠daasha̠-mekaa̍dashakapaala̠-nnirva̍pe̠dyah kaa̠maye̍ta̠ daana̍kaamaa me pra̠jaa-ssyu̠- [daana̍kaamaa me pra̠jaa-ssyu̍h, iteendra̍-me̠va] ॥ 42 ॥
-riteendra̍-me̠va daa̠taara̠gg̠ svena̍ bhaaga̠dheye̠nopa̍ dhaavati̠ sa e̠vaasmai̠ daana̍kaamaah pra̠jaah ka̍roti̠ daana̍kaamaa asmai pra̠jaa bha̍va̠nteendraa̍ya pradaa̠tre pu̍ro̠daasha̠-mekaa̍dashakapaala̠-nnirva̍pe̠-dyasmai̠ pratta̍miva̠ sanna pra̍dee̠yetendra̍-me̠va pra̍daa̠taara̠gg̠ svena̍ bhaaga̠dheye̠nopa̍-dhaavati̠ sa e̠vaasmai̠ pra-daa̍paya̠teendraa̍ya su̠traamne̍ puro̠daasha̠-mekaa̍dashakapaala̠-nnirva̍pe̠-dapa̍ruddho vaa- [-dapa̍ruddho vaa, a̠pa̠ru̠ddhayamaa̍no̠] ॥ 43 ॥
-'paru̠ddhyamaa̍no̠ vendra̍me̠va su̠traamaa̍na̠gg̠ svena̍ bhaaga̠dheye̠nopa̍ dhaavati̠ sa e̠vaina̍-ntraayate 'naparu̠ddhyo bha̍va̠teendro̠ vai sa̠dri-nde̠vataa̍bhiraasee̠-thsa na vyaa̠vrita̍magachchha̠-thsa pra̠jaapa̍ti̠-mupaa̍dhaava̠-ttasmaa̍ e̠ta-mai̠ndra-mekaa̍dashakapaala̠-nnira̍vapa̠-ttenai̠-vaa-'smi̍-nnindri̠ya-ma̍dadhaa̠-chchhakva̍ree yaajyaanuvaa̠kye̍ akaro̠-dvajro̠ vai shakva̍ree̠ sa e̍na̠m vajro̠ bhootyaa̍ aindha̠- [bhootyaa̍ aindha, so̍-'bhava̠-thso̍-'bibhe-] ॥ 44 ॥
-so̍-'bhava̠thso̍-'bibhe-dbhoo̠tah pra maa̍ dhakshya̠teeti̠ sa pra̠jaapa̍ti̠-mpuna̠rupaa̍-'dhaava̠-thsa pra̠jaapa̍ti̠-shshakva̍ryaa̠ adhi̍ re̠vatee̠-nnira̍mimeeta̠ shaantyaa̠ apra̍daahaaya̠ yo-'lagg̍ shri̠yai san-thsa̠drinkhsa̍maa̠nai-ssyaa-ttasmaa̍ e̠ta-mai̠ndra-mekaa̍dashakapaala̠-nnirva̍pe̠-dindra̍me̠va svena̍ bhaaga̠dheye̠nopa̍ dhaavati̠ sa e̠vaa-'smi̍-nnindri̠ya-nda̍dhaati re̠vatee̍ puronuvaa̠kyaa̍ bhavati̠ shaantyaa̠ apra̍daahaaya̠ shakva̍ree yaa̠jyaa̍ vajro̠ vai shakva̍ree̠sa e̍na̠m vajro̠ bhootyaa̍ indhe̠ bhava̍tye̠va ॥ 45 ॥ (api̠ - tagg - syu̍ - rvai - ndha - bhavati̠ - chatu̍rdasha cha ) (a. 8)
aa̠gnaa̠-vai̠shna̠va-mekaa̍dashakapaala̠-nnirva̍pe-dabhi̠chara̠n-thsara̍sva̠tyaajya̍ bhaagaa̠ syaa-dbaa̍rhaspa̠t yashcha̠ruryadaa̎gnaa-vaishna̠va ekaa̍dashakapaalo̠ bhava̍tya̠gni-ssarvaa̍ de̠vataa̠ vishnu̍rya̠jno de̠vataa̍bhi-shchai̠vaina̍m ya̠jnena̍ chaa̠bhi cha̍rati̠-sara̍sva̠tyaajya̍bhaagaa bhavati̠ vaagvai sara̍svatee vaa̠chaivaina̍-ma̠bhi cha̍rati baarhaspa̠tya-shcha̠ru rbha̍vati̠ brahma̠ vai de̠vaanaa̠-mbriha̠spati̠ rbrahma̍nai̠vaina̍-ma̠bhi cha̍rati̠ [-ma̠bhi cha̍rati, prati̠ vai] ॥ 46 ॥
prati̠ vai pa̠rastaa̍-dabhi̠chara̍nta-ma̠bhi cha̍ranti̠ dvedve̍ puro-'nuvaa̠kye̍ kuryaa̠dati̠ prayu̍ktyaa e̠tayai̠va ya̍jetaabhi cha̠ryamaa̍no de̠vataa̍bhi-re̠va de̠vataa̎h prati̠chara̍ti ya̠jnena̍ ya̠jnam vaa̠chaa vaacha̠-mbrahma̍naa̠ brahma̠ sa de̠vataa̎shchai̠va ya̠jna-ncha̍ maddhya̠to vyava̍sarpati̠ tasya̠ na kuta̍-shcha̠nopaa̎vyaa̠dho bha̍vati̠ naina̍-mabhi̠charan̎-thstrinuta aagnaavaishna̠va-mekaa̍dashakapaala̠-nnirva̍pe̠dyam ya̠jno no- [-ya̠jno na, u̠pa̠name̍da̠gni-ssarvaa̍] ॥ 47 ॥
-pa̠name̍da̠gni-ssarvaa̍ de̠vataa̠ vishnu̍-rya̠jno̎-'gni-nchai̠va vishnu̍-ncha̠ svena̍ bhaaga̠dheye̠nopa̍ dhaavati̠ taave̠vaasmai̍ ya̠jna-mpraya̍chchhata̠ upai̍nam ya̠jno na̍matyaagnaa- vaishna̠va-nghri̠te cha̠ru-nnirva̍pe̠chchakshu̍shkaamo̠-'gnervai chakshu̍shaa manu̠shyaa̍ vi pa̍shyanti ya̠jnasya̍ de̠vaa a̠gni-nchai̠va vishnu̍-ncha̠ svena̍ bhaaga̠dheye̠nopa̍ dhaavati̠ taave̠vaa- [taave̠va, a̠smi̠n chakshu̍rdhatta̠-] ॥ 48 ॥
-'smi̠n chakshu̍-rdhatta̠-shchakshu̍shmaa-ne̠va bha̍vati dhe̠nvai vaa e̠ta-dreto̠ yadaajya̍-mana̠duha̍-standu̠laa mi̍thu̠naa-de̠vaasmai̠ chakshu̠h praja̍nayati ghri̠te bha̍vati̠ tejo̠ vai ghri̠ta-nteja̠shchakshu̠-steja̍sai̠vaasmai̠ teja̠-shchakshu̠rava̍ rundha indri̠yam vai vee̠rya̍m vrinkte̠ bhraatri̍vyo̠ yaja̍maa̠no-'ya̍jamaanasyaa-dhva̠raka̍lpaa̠-mprati̠ nirva̍pe̠-dbhraatri̍vye̠ yaja̍maane̠ naa-'sye̎mdri̠yam- [naa-'sye̎mdri̠yam, vee̠ryam̍ mvrinkte] ॥ 49 ॥
-mvee̠ryam̍ mvrinkte pu̠raavaa̠chah prava̍dito̠-rnirva̍pe̠-dyaava̍tye̠va vaa-ktaamapro̍ditaa̠-mbhraatri̍vyasya vrinkte̠ taama̍sya̠ vaacha̍-mpra̠vada̍ntee-ma̠nyaa vaacho-'nu̠ prava̍danti̠ taa i̍ndri̠yam vee̠rya̍m yaja̍maane dadhatyaagnaa vaishna̠va-ma̠shtaaka̍paala̠-nnirva̍pe-tpraata-ssavana̠syaa̍-'' kaa̠le sara̍sva̠tyaajya̍bhaagaa̠ syaa-dbaa̍rhaspa̠tyashcha̠ru- ryada̠shtaaka̍paalo̠ bhava̍tya̠shtaaksha̍raa gaaya̠tree gaa̍ya̠tra-mpraa̍ta-ssava̠na-mpraa̍ta-ssava̠name̠va tenaa̎-''pno- [tenaa̎-''pnoti, aa̠gnaa̠vai̠shna̠va-] ॥ 50 ॥
-tyaagnaavaishna̠va-mekaa̍dashakapaala̠-nnirva̍pe̠-nmaaddhya̍ndinasya̠ sava̍nasyaa-'' kaa̠le sara̍sva̠tyaajya̍bhaagaa̠ syaa-dbaa̍rhaspa̠tya-shcha̠ru ryadekaa̍dashakapaalo̠ bhava̠tyekaa̍dashaaksharaa tri̠shtu-ptraishtu̍bha̠-mmaaddhya̍ndina̠gm̠ sava̍na̠-mmaaddhya̍dinname̠va sava̍na̠-ntenaa̎-''pnotyaagnaavaishna̠va-ndvaada̍shakapaala̠-nnirva̍pe-ttriteeyasava̠nasyaa̍-''kaa̠le sara̍sva̠tyaajya̍bhaagaa̠ syaa-dbaa̍rhaspa̠tya-shcha̠rurya-ddvaada̍shakapaalo̠ bhava̍ti̠ dvaada̍shaaksharaa̠ jaga̍tee̠ jaaga̍ta-ntriteeyasava̠na-ntri̍teeya sava̠name̠va tenaa̎-''pnoti de̠vataa̍bhire̠va de̠vataa̎h [de̠vataa̎h, pra̠ti̠chara̍ti] ॥ 51 ॥
prati̠chara̍ti ya̠jnena̍ ya̠jnam vaa̠chaa vaacha̠-mbrahma̍naa̠ brahma̍ ka̠paalai̍re̠va chhandaag̍syaa̠pnoti̍ puro̠daashai̠-ssava̍naani maitraavaru̠na-meka̍kapaala̠-nnirva̍pe-dva̠shaayai̍ kaa̠le yaivaasau bhraatri̍vyasya va̠shaa-'noo̍ba̠ndhyaa̍ so e̠vaishaitasyaika̍kapaalo bhavati̠ na hi ka̠paalai̎h pa̠shu-marha̠tyaaptu̎m ॥ 52 ॥ (brahma̍nai̠vaina̍ma̠bhi cha̍rati - ya̠jno na - taave̠vaa - 'sye̎mdri̠ya - maa̎pnoti -de̠vataa̎h - sa̠ptatrigm̍shachcha ) (a. 9)
a̠saavaa̍di̠tyo na vya̍rochata̠ tasmai̍ de̠vaah praaya̍shchitti-maichchha̠-ntasmaa̍ e̠tagm so̍maarau̠dra-ncha̠ru-nnira̍vapa̠-ntenai̠vaasmi̠-nrucha̍madadhu̠ryo bra̍hmavarcha̠sakaa̍ma̠-ssyaa-ttasmaa̍ e̠tagm so̍maarau̠dra-ncha̠ru-nnirva̍pe̠-thsoma̍-nchai̠va ru̠dra-ncha̠ svena̍ bhaaga̠dheye̠nopa̍ dhaavati̠ taave̠vaasmi̍-nbrahmavarcha̠sa-ndha̍tto brahmavarcha̠sye̍va bha̍vati tishyaapoornamaa̠se nirva̍pedru̠dro [nirva̍pedru̠drah, vai ti̠shya̍-ssoma̍h] ॥ 53 ॥
vai ti̠shya̍-ssoma̍h poo̠rnamaa̍sa-ssaa̠kshaade̠va bra̍hmavarcha̠samava̍ rundhe̠ pari̍shrite yaajayati brahmavarcha̠sasya̠ pari̍griheetyai shve̠taayai̎ shve̠tava̍thsaayai du̠gdha-mma̍thi̠tamaajya̍-mbhava̠tyaajya̠-mproksha̍na̠maajye̍na maarjayante̠ yaava̍de̠va bra̍hmavarcha̠sa-nta-thsarva̍-nkaro̠tyati̍ brahmavarcha̠sa-nkri̍yata̠ ityaa̍hureeshva̠ro du̠shcharmaa̠ bhavi̍to̠riti̍ maana̠vee richau̍ dhaa̠yye̍ kuryaa̠-dyadvai kincha̠ manu̠-rava̍da̠tta-dbhe̍sha̠jam- [-dbhe̍sha̠jam, bhe̠sha̠ja-me̠vaa-'smai̍] ॥ 54 ॥
-bhe̍sha̠ja-me̠vaa-'smai̍ karoti̠ yadi̍ bibhee̠yaa-ddu̠shcharmaa̍ bhavishyaa̠meeti̍ somaapau̠shna-ncha̠ru-nnirva̍pe-thsau̠myo vai de̠vata̍yaa̠ puru̍shah pau̠shnaah pa̠shava̠-ssvayai̠ vaasmai̍ de̠vata̍yaa pa̠shubhi̠-stvacha̍-nkaroti̠ na du̠shcharmaa̍ bhavati somaarau̠dra-ncha̠ru-nnirva̍pe-tpra̠jaakaa̍ma̠-ssomo̠ vai re̍to̠dhaa a̠gnih pra̠jaanaa̎-mprajanayi̠taa soma̍ e̠vaasmai̠ reto̠ dadhaa̎tya̠gnih pra̠jaa-mpraja̍nayati vi̠ndate̎ - [ ] ॥ 55 ॥
pra̠jaagm so̍maarau̠dra-ncha̠ru-nnirva̍pe-dabhi̠charan̎-thsau̠myo vai de̠vata̍yaa̠ puru̍sha e̠sha ru̠dro yada̠gni-ssvaayaa̍ e̠vaina̍-nde̠vataa̍yai ni̠shkreeya̍ ru̠draayaapi̍ dadhaati taa̠jagaarti̠-maarchchha̍ti somaarau̠dra-ncha̠ru-nnirva̍pe̠-jjyogaa̍mayaavee̠ soma̠m vaa e̠tasya̠ raso̍ gachchhatya̠gnigm sharee̍ra̠m yasya̠ jyogaa̠maya̍ti̠ somaa̍de̠vaasya̠ rasa̍-nnishkree̠naatya̠gne-shsharee̍ramu̠ta yadee̠- [yadi̍, i̠taasu̠ rbhava̍ti̠] ॥ 56 ॥
-taasu̠ rbhava̍ti̠ jeeva̍tye̠va so̍maaru̠drayo̠rvaa e̠ta-ngra̍si̠tagm hotaa̠ nishkhi̍dati̠ sa ee̎shva̠ra aarti̠maarto̍-rana̠dvaan. hotraa̠ deyo̠ vahni̠rvaa a̍na̠dvaan. vahni̠r̠hotaa̠ vahni̍nai̠va vahni̍-maa̠tmaanagg̍ sprinoti somaarau̠dra-ncha̠ru-nnirva̍pe̠dyah kaa̠maye̍ta̠ sve̎-'smaa aa̠yata̍ne̠ bhraatri̍vya-njanayeya̠miti̠ vedi̍-mpari̠grihyaa̠-'rdha-mu̍ddha̠nyaa-da̠rdha-nnaardha-mba̠r̠hisha̍-sstrinee̠yaa-da̠rdha-nnaardha-mi̠ddhmasyaa̎-'bhyaa-da̠ddhyaa-dad̠rdha-nna sva e̠vaasmaa̍ aa̠yata̍ne̠ bhraatri̍vya-njanayati ॥ 57 ॥ (ru̠dro - bhe̍sha̠jam - vi̠ndate̠- yadi̍ - strinee̠yaada̠rdham - dvaada̍sha cha) (a. 10)
ai̠ndra-mekaa̍dashakapaala̠-nnirva̍penmaaru̠tagm sa̠ptaka̍paala̠-ngraama̍kaama̠ indra̍-nchai̠va ma̠ruta̍shcha̠ svena̍ bhaaga̠dheye̠nopa̍ dhaavati̠ ta e̠vaasmai̍ sajaa̠taa-npraya̍chchhanti graa̠mye̍va bha̍vatyaahava̠neeya̍ ai̠ndramadhi̍ shrayati̠ gaarha̍patye maaru̠ta-mpaa̍pavasya̠sasya̠ vidhri̍tyai sa̠ptaka̍paalo maaru̠to bha̍vati sa̠ptaga̍naa̠ vai ma̠ruto̍gana̠sha e̠vaasmai̍ sajaa̠taanava̍ rundhe-'noo̠chyamaa̍na̠ aa saa̍dayati̠ visha̍me̠vaa- [visha̍me̠va, a̠smaa̠ anu̍vartmaanam-] ॥ 58 ॥
-'smaa̠ anu̍vartmaana-nkarotye̠taame̠va nirva̍pe̠dyah kaa̠maye̍ta ksha̠traaya̍ cha vi̠she cha̍ sa̠mada̍-ndaddhyaa̠-mityai̠ndrasyaa̍-'va̠dya-nbroo̍yaa̠-dindraa̠yaa-'nu̍ broo̠heetyaa̠shraavya̍ brooyaa-nma̠ruto̍ ya̠jeti̍ maaru̠tasyaa̍-'va̠dya-nbroo̍yaa-nma̠rudbhyo-'nu̍ broo̠heetyaa̠shraavya̍ brooyaa̠dindra̍m ya̠jeti̠ sva e̠vaibhyo̍ bhaaga̠dheye̍ sa̠mada̍-ndadhaati vitrigmhaa̠naa-sti̍shthantye̠ taame̠va [ ] ॥ 59 ॥
nirva̍pe̠dyah kaa̠maye̍ta̠ kalpe̍ra̠nniti̍ yathaadeva̠ta-ma̍va̠daaya̍ yathaa deva̠tam ya̍je-dbhaaga̠dheye̍nai̠vainaan̍ yathaaya̠tha-nka̍lpayati̠ kalpa̍nta e̠vaindra-mekaa̍dashakapaala̠-nnirva̍pe-dvaishvade̠va-ndvaada̍shakapaala̠-ngraama̍kaama̠ indra̍-nchai̠va vishvaag̍shcha de̠vaan-thsvena̍ bhaaga̠dheye̠nopa̍ dhaavati̠ ta e̠vaasmai̍ sajaa̠taa-npraya̍chchhanti graa̠mye̍va bha̍vatyai̠ndrasyaa̍-'va̠daaya̍ vaishvade̠vasyaava̍ dye̠-dathai̠ndrasyo̠- [-dathai̠ndrasya̍, u̠pari̍shtaa-] ॥ 60 ॥
-pari̍shtaa-dindri̠yenai̠vaasmaa̍ ubha̠yata̍-ssajaa̠taa-npari̍ grihnaatyupaadhaa̠yya̍ poorvaya̠m vaaso̠ dakshi̍naa sajaa̠taanaa̠mupa̍hityai̠ prishni̍yai du̠gdhe praiya̍ngava-ncha̠ru-nnirva̍penma̠rudbhyo̠ graama̍kaama̠h prishni̍yai̠ vai paya̍so ma̠ruto̍ jaa̠taah prishni̍yai pri̠yanga̍vo maaru̠taah khalu̠ vai de̠vata̍yaa sajaa̠taa ma̠ruta̍ e̠va svena̍ bhaaga̠dheye̠nopa̍ dhaavati̠ ta e̠vaasmai̍ sajaa̠taa-npraya̍chchhanti graa̠mye̍va bha̍vati pri̠yava̍tee yaajyaanuvaa̠kye̍ [yaajyaanuvaa̠kye̎, bha̠va̠ta̠h pri̠yame̠vainagm̍] ॥ 61 ॥
bhavatah pri̠yame̠vainagm̍ samaa̠naanaa̎-nkaroti dvi̠padaa̍ puro-'nuvaa̠kyaa̍ bhavati dvi̠pada̍ e̠vaava̍ rundhe̠ chatu̍shpadaa yaa̠jyaa̍ chatu̍shpada e̠va pa̠shoonava̍ rundhe devaasu̠raa-ssamya̍ttaa aasa̠-nte de̠vaa mi̠tho vipri̍yaa aasa̠-nte̎(1̠) 'nyo̎-'nyasmai̠ jyaishthyaa̠yaa-ti̍shthamaanaa-shchatu̠rdhaa vya̍kraama-nna̠gni-rvasu̍bhi̠-ssomo̍ ru̠drairindro̍ ma̠rudbhi̠-rvaru̍na aadi̠tyai-ssa indra̍h pra̠jaapa̍ti̠-mupaa̍-'dhaava̠-tta- [-'dhaava̠-ttam, e̠tayaa̍] ॥ 62 ॥
-me̠tayaa̍ sa̠m(2)jnaanyaa̍-'yaajaya-da̠gnaye̠ vasu̍mate puro̠daasha̍-ma̠shtaaka̍paala̠-nnira̍vapa̠-thsomaa̍ya ru̠drava̍te cha̠rumindraa̍ya ma̠rutva̍te puro̠daasha̠ -mekaa̍dashakapaala̠m varu̍naayaa-''di̠tyava̍te cha̠ru-ntato̠ vaa indra̍-nde̠vaa jyaishthyaa̍yaa̠bhi sama̍jaanata̠ ya-ssa̍maa̠nai-rmi̠tho vipri̍ya̠-ssyaa-ttame̠tayaa̍ sa̠m(2)jnaanyaa̍ yaajaye-da̠gnaye̠ vasu̍mate puro̠daasha̍-ma̠shtaaka̍paala̠-nnirva̍pe̠-thsomaa̍ya ru̠drava̍te cha̠ru-mindraa̍ya ma̠rutva̍te puro̠daasha̠-mekaa̍dashakapaala̠m varu̍naayaa ''di̠tyava̍te cha̠ru-mindra̍-me̠vaina̍-mbhoo̠ta-njyaishthyaa̍ya samaa̠naa a̠bhi sa-njaa̍nate̠ vasi̍shtha-ssamaa̠naanaa̎-mbhavati ॥ 63 ॥ (visha̍me̠va - ti̍shthantye̠taame̠ - vaathai̠ndrasya̍ - yaajyaanuvaa̠kye̍ - tam - mvaru̍naaya̠ -chatu̍rdasha cha) (a. 11)
hi̠ra̠nya̠ga̠rbha aapo̍ ha̠ yatprajaa̍pate ॥ sa ve̍da pu̠trah pi̠tara̠gm̠ sa maa̠tara̠gm̠ sa soo̠nubha̍rva̠-thsa bhu̍va̠-tpuna̍rmaghah । sa dyaamaurno̍da̠ntari̍ksha̠gm̠ sa suva̠-ssa vishvaa̠ bhuvo̍ abhava̠-thsa aa-'bha̍vat ॥ udu̠ tya-nchi̠tram ॥ sa pra̍tna̠vannavee̍ya̠saa-'gne̎ dyu̠mnena̍ sa̠myataa̎ । bri̠ha-tta̍tantha bhaa̠nunaa̎ ॥ ni kaavyaa̍ ve̠dhasa̠-shshashva̍taska̠r̠haste̠ dadhaa̍no̠ [dadhaa̍nah, naryaa̍ pu̠rooni̍ ।] ॥ 64 ॥
naryaa̍ pu̠rooni̍ । a̠gnirbhu̍vadrayi̠patee̍ rayee̠naagm sa̠traa cha̍kraa̠no a̠mritaa̍ni̠ vishvaa̎ ॥ hira̍nyapaanimoo̠taye̍ savi̠taara̠mupa̍ hvaye । sa chettaa̍ de̠vataa̍ pa̠dam ॥ vaa̠mama̠dya sa̍vitarvaa̠mamu̠ shvo di̠vedi̍ve vaa̠mama̠smabhyagm̍ saaveeh । vaa̠masya̠ hi kshaya̍sya deva̠ bhoore̍ra̠yaa dhi̠yaa vaa̍ma̠bhaaja̍-ssyaama ॥ badi̠tthaa parva̍taanaa-nkhi̠dra-mbi̍bharshi prithivi । pra yaa bhoo̍mi pravatvati ma̠hnaa ji̠noshi̍ [ji̠noshi̍, ma̠hi̠ni̠ ।] ॥ 65 ॥
mahini ॥ stomaa̍sastvaa vichaarini̠ prati̍shtobhantya̠ktubhi̍h । prayaa vaaja̠-nna hesha̍nta-mpe̠ru-masya̍syarjuni ॥ ri̠doo̠dare̍na̠ sakhyaa̍ sacheya̠ yo maa̠ na rishye̎ddharyashva pee̠tah । a̠yam ya-ssomo̠ nyadhaa̎yya̠sme tasmaa̠ indra̍-mpra̠tira̍-me̠myachchha̍ ॥ aapaa̎mtamanyu-stri̠pala̍-prabharmaa̠ dhuni̠-shshimee̍ vaa̠nchharu̍maagm rijee̠shee । somo̠ vishvaa̎nyata̠saa vanaa̍ni̠ naarvaagindra̍-mprati̠maanaa̍ni debhuh ॥ pra- [pra, su̠vaa̠na-ssoma̍] ॥ 66 ॥
-su̍vaa̠na-ssoma̍ rita̠yu-shchi̍ke̠tendraa̍ya̠ brahma̍ ja̠mada̍gni̠-rarchann̍ । vrishaa̍ ya̠ntaa-'si̠ shava̍sa-stu̠rasyaa̠-'nta-rya̍chchha grina̠te dha̠rtra-ndrigm̍ha ॥ sa̠baadha̍ste̠ mada̍-ncha shushma̠ya-ncha̠ brahma̠ naro̎ brahma̠krita̍-ssaparyann । a̠rko vaa̠ ya-ttu̠rate̠ soma̍chakshaa̠-statre-dindro̍ dadhate pri̠thsu tu̠ryaam ॥ vasha̍-tte vishnavaa̠sa aa kri̍nomi̠ tanme̍ jushasva shipivishta ha̠vyam । ॥ 67 ॥
vardha̍ntu tvaa sushtu̠tayo̠ giro̍ me yoo̠ya-mpaa̍ta sva̠stibhi̠-ssadaa̍ nah ॥pra ta-tte̍ a̠dya shi̍pivishta̠ naamaa̠-'rya-shshagm̍ saami va̠yunaa̍ni vi̠dvaan । tantvaa̍ grinaami ta̠vasa̠-mata̍veeyaa̠n kshaya̍ntama̠sya raja̍sah paraa̠ke ॥ kimi-tte̍ vishno pari̠chakshya̍-mbhoo̠-tpra yadva̍va̠kshe shi̍pivi̠shto a̍smi । maa varpo̍ a̠smadapa̍ gooha e̠tadya-da̠nyaroo̍pa-ssami̠the ba̠bhootha̍ । ॥ 68 ॥
agne̠ daa daa̠shushe̍ ra̠yim vee̠rava̍nta̠-mparee̍nasam । shi̠shee̠hi na̍-ssoonu̠mata̍h ॥ daa no̍ agne sha̠tino̠ daa-ssa̍ha̠srino̍ du̠ro na vaaja̠gg̠ shrutyaa̠ apaa̍ vridhi । praachee̠ dyaavaa̍prithi̠vee brahma̍naa kridhi̠ suva̠rna shu̠kramu̠shaso̠ vi di̍dyutuh ॥ a̠gnirdaa̠ dravi̍nam vee̠rape̍shaa a̠gnir-rishi̠m ya-ssa̠hasraa̍ sa̠noti̍ । a̠gnirdi̠vi ha̠vyamaa ta̍taanaa̠-'gne-rdhaamaa̍ni̠ vibhri̍taa puru̠traa ॥ maa [maa, no̠ ma̠rdhee̠ raa too bha̍ra ।] ॥ 69 ॥
no̍ mardhee̠ raa too bha̍ra ॥ ghri̠ta-nna poo̠ta-nta̠noora̍re̠paa-shshuchi̠ hira̍nyam । ta-tte̍ ru̠kmo na ro̍chata svadhaavah ॥ u̠bhe su̍shchandra sa̠rpisho̠ darvee̎ shreeneesha aa̠sani̍ । u̠to na̠ u-tpu̍pooryaa u̠ktheshu̍ shavasaspata̠ ishagg̍ sto̠tribhya̠ aa bha̍ra ॥ vaayo̍ sha̠tagm haree̍naam yu̠vasva̠ poshyaa̍naam । u̠ta vaa̍ te saha̠srino̠ ratha̠ aa yaa̍tu̠ paaja̍saa ॥ pra yaabhi̠- [pra yaabhih, yaasi̍ daa̠shvaagmsa̠machchhaa̍] ॥ 70 ॥
-ryaasi̍ daa̠shvaagmsa̠machchhaa̍ ni̠yudbhi̍-rvaayavi̠shtaye̍ duro̠ne । ni no̍ ra̠yigm su̠bhoja̍sam yuve̠ha ni vee̠rava̠-dgavya̠mashvi̍ya-ncha̠ raadha̍h ॥re̠vatee̎rna-ssadha̠maada̠ indre̍ santu tu̠vivaa̍jaah । kshu̠manto̠ yaabhi̠rmade̍ma ॥ re̠vaagm idre̠vata̍-ssto̠taa syaa-ttvaava̍to ma̠ghona̍h । predu̍ hariva-shshru̠tasya̍ ॥ 71 ॥ (dadhaa̍no - ji̠noshi̍ - debhu̠h pra - ha̠vyam - ba̠bhootha̠ - maa - yaabhi̍ - shchatvaari̠gm̠shachcha̍ ) (a. 12)
(pra̠jaapa̍ti̠staa-ssri̠shtaa - a̠gnaye̍ pathi̠krite̠ - gnaye̠ kaamaa̍yaa̠ - gnayenna̍vate -vaishvaana̠ra -maa̍di̠tya-ncha̠ru - mai̠ndra-ncha̠ru - mindraa̠yaanvri̍java - aagnaavaishna̠va -ma̠sau so̍maarau̠dra - mai̠ndrama̠kaa̍dashakapaalagm- hiranyaga̠rbho - dvaada̍sha )
(pra̠jaapa̍ti - ra̠gnaye̠ kaamaa̍yaa̠ - 'bhi sa-mbha̍vato̠ - yo vi̍dvishaa̠nayo̍ -ri̠dhme sanna̍ hye - daagnaavaishna̠vamu̠ - pari̍shtaa̠ - dyaasi̍ daa̠shvaagmsa̠ - meka̍saptatih )
(pra̠jaapa̍ti̠h, predu̍ hariva-shshru̠tasya̍)
॥ hari̍h om ॥ ॥ krishna yajurvedeeya taittireeya samhitaayaa-ndviteeyakaande dviteeyah prashna-ssamaaptah ॥
2.2 - প্রজাপতিঃ প্রজা অসৃজত - কৃষ্ণ যজুর্বেদ তৈত্তিরীয় সংহিতা পাঠঃ সম্পর্কে
This is prashna 2 of kanda 2 of the Krishna Yajurveda Taittiriya Samhita, in plain continuous recitation (samhita patha). Its heading calls it "ishti vidhanam", rules for ishtis, offerings made for particular aims. It opens with a story: Prajapati created beings, but Indra and Agni hid them away; he saw an offering of eleven potsherds (ekadasha kapala) to Indra and Agni, made it, and they gave his creatures back. So one who longs for offspring makes that offering.
উৎস: Krishna Yajurveda, Taittiriya Samhita 2.2
কখন পাঠ করবেন: In daily Vedic recitation, in Veda patashalas and in Yajur Veda study.
আপনি কি জানেন?
- A "kapala" is a potsherd on which a rice cake (purodasha) is baked; the count of potsherds names the offering.
- Samhita patha is the continuous form of the text, the base from which the pada, krama, jata and ghana recitations are built.
প্রায়শই জিজ্ঞাসিত প্রশ্ন
What story opens this prashna?
Indra and Agni hide Prajapati's creatures until he makes an offering to them.
What is samhita patha?
The plain, continuous recitation of the Vedic text.
Which part of the Taittiriya Samhita is this?
Kanda 2, prashna 2.
উপাসনা ও অধ্যয়নের জন্য প্রদত্ত, ভবিষ্যদ্বাণী হিসেবে নয়। অবাণিজ্যিক।
আরও ভক্তিপাঠ