5.7 - যো বা অযথা দেবতম্ - কৃষ্ণ যজুর্বেদ তৈত্তিরীয় সংহিতা পাঠঃ
Kanda 5 - Krishna Yajurveda Taittiriya Samhita · প্রথাগত ভক্তিপাঠ
krishna yajurvedeeya taittireeya samhitaayaa-mpanchamakaande saptamah prashnah-upaanuvaakyaavashishtakarmaniroopanam
o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥
yo vaa aya̍thaadevatama̠gni-nchi̍nu̠ta aa de̠vataa̎bhyo vrishchyate̠ paapee̍yaa-nbhavati̠ yo ya̍thaadeva̠ta-nna de̠vataa̎bhya̠ aa vri̍shchyate̠ vasee̍yaa-nbhavatyaagne̠yyaa gaa̍yatri̠yaa pra̍tha̠maa-nchiti̍ma̠bhi mri̍she-ttri̠shtubhaa̎ dvi̠teeyaa̠-njaga̍tyaa tri̠teeyaa̍manu̠shtubhaa̍ chatu̠rthee-mpa̠nktyaa pa̍ncha̠meem ya̍thaadeva̠tame̠vaagni-nchi̍nute̠ na de̠vataa̎bhya̠ aa vri̍shchyate̠ vasee̍yaa-nbhava̠teedaa̍yai̠ vaa e̠shaa vibha̍ktih pa̠shava̠ idaa̍ pa̠shubhi̍rena- [pa̠shubhi̍renam, chi̠nu̠te̠ yo vai] 1
-nchinute̠ yo vai pra̠jaapa̍taye prati̠ prochyaa̠gni-nchi̠noti̠ naa-''rti̠maarchchha̠-tyashvaa̍va̠bhita̍stishthetaa-nkri̠shna u̍ttara̠ta-shshve̠to dakshi̍na̠staavaa̠labhyeshta̍kaa̠ upa̍ daddhyaade̠tadvai pra̠jaapa̍te roo̠pa-mpraa̍jaapa̠tyo-'shva̍-ssaa̠kshaade̠va pra̠jaapa̍taye prati̠prochyaa̠gni-nchi̍noti̠ naa-''rti̠maarchchha̍tye̠tadvaa ahno̍ roo̠pam yachchhve̠to-'shvo̠ raatri̍yai kri̠shna e̠tadahno̍ [e̠tadahna̍h, roo̠pam yadishta̍kaa̠] 2
roo̠pam yadishta̍kaa̠ raatri̍yai̠ puree̍sha̠mishta̍kaa upadhaa̠syanchhve̠ta-mashva̍ma̠bhi mri̍she̠-tpuree̍shamupadhaa̠syan kri̠shnama̍horaa̠traabhyaa̍me̠vaina̍-nchinute hiranya paa̠tra-mmadho̎h poo̠rna-nda̍daati madha̠vyo̍ 'saa̠neeti̍ sau̠ryaa chi̠trava̠tyaa-'ve̎kshate chi̠trame̠va bha̍vati ma̠ddhyandi̠ne-'shva̠mava̍ ghraapayatya̠sau vaa aa̍di̠tya indra̍ e̠sha pra̠jaapa̍tih praajaapa̠tyo-'shva̠stame̠va saa̠kshaadri̍ddhnoti ॥ 3 ॥ (e̠na̠ - me̠tadahno̠ - 'shtaacha̍tvaarigmshachcha) (a. 1)
tvaama̍gne vrisha̠bha-ncheki̍taana̠-mpuna̠ryuvaa̍na-nja̠naya̍nnu̠paagaa̎m । a̠sthoo̠ri no̠ gaarha̍patyaani santu ti̠gmena̍ no̠ brahma̍naa̠ sagm shi̍shaadhi ॥ pa̠shavo̠ vaa e̠te yadishta̍kaa̠shchityaa̎-nchityaamrisha̠bhamupa̍ dadhaati mithu̠name̠vaasya̠ ta-dya̠jne ka̍roti pra̠jana̍naaya̠ tasmaa̎-dyoo̠theyoo̍tha risha̠bhah ॥ sa̠mva̠thsa̠rasya̍ prati̠maam yaa-ntvaa̍ raatryu̠paasa̍te । pra̠jaagm su̠veeraa̎-nkri̠tvaa vishva̠maayu̠rvya̍shnavat ॥ praa̠jaa̠pa̠tyaa- [praa̠jaa̠pa̠tyaam, e̠taamupa̍] 4
-me̠taamupa̍ dadhaatee̠yam vaa vaishaikaa̎shta̠kaa yade̠vaikaa̎shta̠kaayaa̠manna̍-nkri̠yate̠ tade̠vaitayaava̍ rundha e̠shaa vai pra̠jaapa̍teh kaama̠dughaa̠ tayai̠va yaja̍maano̠-'mushmi̍n mlo̠ke̎-'gni-ndu̍he̠ yena̍ de̠vaa jyoti̍sho̠rdhvaa u̠daaya̠n̠ yenaa̍-''di̠tyaa vasa̍vo̠ yena̍ ru̠draah । yenaangi̍raso mahi̠maana̍-maana̠shustenai̍tu̠ yaja̍maana-ssva̠sti ॥ su̠va̠rgaaya̠ vaa e̠sha lo̠kaaya̍ [lo̠kaaya̍, chee̠ya̠te̠ yada̠gniryena̍] 5
cheeyate̠ yada̠gniryena̍ de̠vaa jyoti̍sho̠rdhvaa u̠daaya̠nnityukhya̠gm̠ sami̍ndha̠ ishta̍kaa e̠vaitaa upa̍ dhatte vaanaspa̠tyaa-ssu̍va̠rgasya̍ lo̠kasya̠ sama̍shtyai sha̠taayu̍dhaaya sha̠tavee̎ryaaya sha̠tota̍ye 'bhimaati̠shaahe̎ । sha̠tam yo na̍-shsha̠rado̠ ajee̍taa̠nindro̍ nesha̠dati̍ duri̠taani̠ vishvaa̎ ॥ ye cha̠tvaara̍h pa̠thayo̍ deva̠yaanaa̍ anta̠raa dyaavaa̍prithi̠vee vi̠yanti̍ । teshaa̠m yo ajyaa̍ni̠- majee̍ti-maa̠vahaa̠-ttasmai̍ no devaa̠h [no devaah, pari̍ datte̠ha sarve̎ ।] 6
pari̍ datte̠ha sarve̎ ॥ gree̠shmo he̍ma̠nta u̠ta no̍ vasa̠nta-shsha̠ra-dva̠r̠shaa-ssu̍vi̠tanno̍ astu । teshaa̍mritoo̠naagm sha̠ta shaa̍radaanaa-nnivaa̠ta e̍shaa̠mabha̍ye syaama ॥ i̠du̠va̠thsa̠raaya̍ parivathsa̠raaya̍ samvanthsa̠raaya̍ krinutaa bri̠hannama̍h । teshaa̎m va̠yagm su̍ma̠tau ya̠jniyaa̍naa̠-njyogajee̍taa̠ aha̍taa-ssyaama ॥ bha̠draanna̠-shshreya̠-ssama̍naishta devaa̠stvayaa̍-'va̠sena̠ sama̍sheemahi tvaa । sa no̍ mayo̠ bhooh pi̍to̠ [mayo̠ bhooh pi̍to, aa vi̍shasva̠] 7
aa vi̍shasva̠ sha-nto̠kaaya̍ ta̠nuve̎ syo̠nah ॥ ajyaa̍neere̠taa upa̍ dadhaatye̠taa vai de̠vataa̠ apa̍raajitaa̠staa e̠va pra vi̍shati̠ naiva jee̍yate brahmavaa̠dino̍ vadanti̠ yada̍rdhamaa̠saa maasaa̍ ri̠tava̍-ssamvathsa̠ra osha̍dhee̠h pacha̠ntyatha̠ kasmaa̍da̠nyaabhyo̍ de̠vataa̎bhya aagraya̠na-nniru̍pyata̠ itye̠taa hi ta-dde̠vataa̍ u̠daja̍ya̠n̠ yadri̠tubhyo̍ ni̠rvape̎-dde̠vataa̎bhya-ssa̠mada̍-ndaddhyaadaagraya̠na-nni̠rupyai̠taa aahu̍tee rjuhotyardhamaa̠saane̠va maasaa̍nri̠toon-thsa̍mvathsa̠ra-mpree̍naati̠ na de̠vataa̎bhya-ssa̠mada̍-ndadhaati bha̠draanna̠-shshreya̠-ssama̍naishta devaa̠ ityaa̍ha hu̠taadyaa̍ya̠ yaja̍maana̠syaa-'pa̍raabhaavaaya ॥ 8 ॥ (pra̠jaa̠pa̠tyaam - mlo̠kaaya̍ - devaah - pito - dadhyaadaagraya̠nam - pancha̍vigmshatishcha) (a. 2)
indra̍sya̠ vajro̍-'si̠ vaartra̍ghnastanoo̠paa na̍h pratispa̠shah । yo na̍h pu̠rastaa̎-ddakshina̠tah pa̠shchaa-du̍ttara̠to̍-'ghaa̠yura̍bhi̠daasa̍tye̠tagm so-'shma̍namrichchatu ॥ de̠vaa̠su̠raa-ssamya̍ttaa aasa̠-nte-'su̍raa di̠gbhya aa-'baa̍dhanta̠ taa-nde̠vaa ishvaa̍ cha̠ vajre̍na̠ chaapaa̍nudanta̠ ya-dva̠jrinee̍rupa̠dadhaa̠teeshvaa̍ chai̠va ta-dvajre̍na cha̠ yaja̍maano̠ bhraatri̍vyaa̠napa̍ nudate di̠kshoopa̍ [di̠kshoopa̍, da̠dhaa̠ti̠ de̠va̠pu̠raa] 9
dadhaati devapu̠raa e̠vaitaasta̍noo̠paanee̠h paryoo̍ha̠te 'gnaa̍vishnoo sa̠josha̍se̠maa va̍rdhantu vaa̠gimra̍h । dyu̠mnairvaaje̍bhi̠raa ga̍tam ॥ bra̠hma̠vaa̠dino̍ vadanti̠ yanna de̠vataa̍yai̠ juhva̠tyatha̍ ki-ndeva̠tyaa̍ vaso̠rdhaaretya̠gni-rvasu̠stasyai̠shaa dhaaraa̠ vishnu̠-rvasu̠stasyai̠shaa dhaaraa̎ ''gnaavaishna̠vyarchaa vaso̠rdhaaraa̎-njuhoti bhaaga̠dheye̍nai̠vainau̠ sama̍rdhaya̠tyatho̍ e̠taa- [e̠taam, e̠vaa-''hu̍ti-] 10
-me̠vaa-''hu̍ti-maa̠yata̍navatee-nkaroti̠ yatkaa̍ma enaa-nju̠hoti̠ tade̠vaava̍ rundhe ru̠dro vaa e̠sha yada̠gnistasyai̠te ta̠nuvau̍ gho̠raa-'nyaa shi̠vaa-'nyaa yachchha̍taru̠dreeya̍-nju̠hoti̠ yaivaasya̍ gho̠raa ta̠noostaa-ntena̍ shamayati̠ ya-dvaso̠rdhaaraa̎-nju̠hoti̠ yaivaasya̍ shi̠vaa ta̠noostaa-ntena̍ preenaati̠ yo vai vaso̠rdhaaraa̍yai [vaso̠rdhaaraa̍yai, pra̠ti̠shthaam veda̠] 11
prati̠shthaam veda̠ pratye̠va ti̍shthati̠ yadaajya̍mu̠chchhishye̍ta̠ tasmi̍-nbrahmauda̠na-mpa̍che̠-tta-mbraa̎hma̠naashcha̠tvaara̠h praa-'shnee̍yure̠sha vaa a̠gnirvai̎shvaana̠ro yadbraa̎hma̠na e̠shaa khalu̠ vaa a̠gneh pri̠yaa ta̠noorya-dvai̎shvaana̠rah pri̠yaayaa̍me̠vainaa̎-nta̠nuvaa̠-mprati̍ shthaapayati̠ chata̍sro dhe̠noorda̍dyaa̠-ttaabhi̍re̠va yaja̍maano̠-'mushmi̍n mlo̠ke̎-'gni-ndu̍he ॥ 12 ॥ (upai̠ - taam - dhaaraa̍yai̠ - shatcha̍tvaarigmshachcha) (a. 3)
chitti̍-njuhomi̠ mana̍saa ghri̠tenetyaa̠haadaa̎bhyaa̠ vai naamai̠shaa-''hu̍tirvaishvakarma̠nee naina̍-nchikyaa̠na-mbhraatri̍vyo dabhno̠tyatho̍ de̠vataa̍ e̠vaava̍ ru̠ndhe 'gne̠ tama̠dyeti̍ pa̠nktyaa ju̍hoti pa̠nktyaa-''hu̍tyaa yajnamu̠khamaa ra̍bhate sa̠pta te̍ agne sa̠midha̍-ssa̠ptaji̠hvaa ityaa̍ha̠ hotraa̍ e̠vaava̍ rundhe̠ 'gnirde̠vebhyo-'paa̎kraa-'ma-dbhaaga̠dheya̍- [-'paa̎kraa-'ma-dbhaaga̠dheya̎m, i̠chchhamaa̍na̠stasmaa̍] 13
-mi̠chchhamaa̍na̠stasmaa̍ e̠ta-dbhaa̍ga̠dheya̠-mpraaya̍chchhanne̠tadvaa a̠gnera̍gniho̠trame̠tarhi̠ khalu̠ vaa e̠sha jaa̠to yarhi̠ sarva̍shchi̠to jaa̠taayai̠vaasmaa̠ anna̠mapi̍ dadhaati̠ sa e̍na-mpree̠tah pree̍naati̠ vasee̍yaa-nbhavati brahmavaa̠dino̍ vadanti̠ yade̠sha gaarha̍patyashchee̠yate-'tha̠ kvaa̎syaa-''hava̠neeya̠ itya̠saavaa̍di̠tya iti̍ brooyaade̠tasmi̠n̠.hi sarvaa̎bhyo de̠vataa̎bhyo̠ juhva̍ti̠ [juhva̍ti, ya e̠vam vi̠dvaana̠gni-] 14
ya e̠vam vi̠dvaana̠gni-nchi̍nu̠te saa̠kshaade̠va de̠vataa̍ riddhno̠tyagne̍ yashasvi̠n̠ yasha̍se̠ mama̍rpa̠yendraa̍vatee̠ mapa̍chitee mi̠haa-''va̍ha । a̠ya-mmoo̠rdhaa pa̍rame̠shthee su̠varchaa̎-ssamaa̠naanaa̍mutta̠ma shlo̍ko astu ॥ bha̠dra-mpashya̍nta̠ upa̍ sedu̠ragre̠ tapo̍ dee̠kshaamrisha̍ya-ssuva̠rvida̍h । tata̍h, ksha̠tra-mbala̠moja̍shcha jaa̠ta-ntada̠smai de̠vaa a̠bhi sa-nna̍mantu ॥ dhaa̠taa vi̍dhaa̠taa pa̍ra̠mo- [pa̍ra̠maa, u̠ta sa̠ndri-kpra̠jaapa̍tih] 15
-ta sa̠ndri-kpra̠jaapa̍tih parame̠shthee vi̠raajaa̎ । stomaa̠-shchhandaagm̍si ni̠vido̍ ma aahure̠tasmai̍ raa̠shtrama̠bhi sa-nna̍maama ॥ a̠bhyaava̍rtaddhva̠mupa̠ meta̍ saa̠kama̠yagm shaa̠staa-'dhi̍patirvo astu । a̠sya vi̠jnaana̠manu̠ sagm ra̍bhaddhvami̠ma-mpa̠shchaadanu̍ jeevaatha̠ sarve̎ ॥ raa̠shtra̠bhrita̍ e̠taa upa̍ dadhaatye̠shaa vaa a̠gneshchitee̍ raashtra̠bhri-ttayai̠vaasmi̍-nraa̠shtra-nda̍dhaati raa̠shtrame̠va bha̍vati̠ naasmaa̎-draa̠shtra-mbhragm̍shate ॥ 16 ॥ (bhaa̠ga̠dheya̠m - juhva̍ti - para̠maa - raa̠shtra-nda̍dhaati - sa̠pta cha̍) (a. 4)
yathaa̠ vai pu̠tro jaa̠to mri̠yata̍ e̠vam vaa e̠sha mri̍yate̠ yasyaa̠gnirukhya̍ u̠dvaaya̍ti̠ yanni̍rma̠nthya̍-nku̠ryaa-dvichchhi̍ndyaa̠-dbhraatri̍vyamasmai janaye̠-thsa e̠va puna̍h pa̠reeddhya̠-ssvaade̠vaina̠m yone̎rjanayati̠ naasmai̠ bhraatri̍vya-njanayati̠ tamo̠ vaa e̠ta-ngri̍hnaati̠ yasyaa̠gnirukhya̍ u̠dvaaya̍ti mri̠tyustama̍h kri̠shnam vaasa̍h kri̠shnaa dhe̠nurdakshi̍naa̠ tama̍sai̠- [tama̍saa, e̠va tamo̍] 17
-va tamo̍ mri̠tyumapa̍ hate̠ hira̍nya-ndadaati̠ jyoti̠rvai hira̍nya̠-njyoti̍shai̠va tamo-'pa̍ ha̠te-'tho̠ tejo̠ vai hira̍nya̠-nteja̍ e̠vaa-''tma-ndha̍tte̠ suva̠rna gha̠rma-ssvaahaa̠ suva̠rnaa-'rka-ssvaahaa̠ suva̠rna shu̠kra-ssvaahaa̠ suva̠rna jyoti̠-ssvaahaa̠ suva̠rna soorya̠-ssvaahaa̠ 'rko vaa e̠sha yada̠gni-ra̠saa-vaa̍di̠tyo̎- [yada̠gni-ra̠saa-vaa̍di̠tyah, aa̠shva̠me̠dho yade̠taa] 18
-'shvame̠dho yade̠taa aahu̍tee rju̠hotya̍rkaa-shvame̠dhayo̍re̠va jyoteegm̍shi̠ sa-nda̍dhaatye̠sha ha̠ tvaa a̍rkaashvame̠dhee yasyai̠tada̠gnau kri̠yata̠ aapo̠ vaa i̠damagre̍ sali̠lamaa̍see̠-thsa e̠taa-mpra̠jaapa̍tih pratha̠maa-nchiti̍mapashya̠-ttaamupaa̍dhatta̠ tadi̠yama̍bhava̠-ttam vi̠shvaka̍rmaa-'bravee̠dupa̠ tvaa-''yaa̠neeti̠ neha lo̠ko̎-'steetya̍- [lo̠ko̎-'steeti̍, a̠bra̠vee̠-thsa] 19
-tyabravee̠-thsa e̠taa-ndvi̠teeyaa̠-nchiti̍mapashya̠-ttaamupaa̍dhatta̠ tada̠ntari̍kshamabhava̠-thsa ya̠jnah pra̠jaapa̍timabravee̠dupa̠ tvaa-''yaa̠neeti̠ neha lo̠ko̎-'steetya̍bravee̠-thsa vi̠shvaka̍rmaana-mabravee̠dupa̠ tvaa-''yaa̠neeti̠ kena̍ mo̠paishya̠seeti̠ dishyaa̍bhi̠ritya̍bravee̠-tta-ndishyaa̍bhiru̠pai-ttaa upaa̍dhatta̠ taa disho̍- [taa disha̍h, a̠bha̠va̠n-thsa] 20
-'bhava̠n-thsa pa̍rame̠shthee pra̠jaapa̍timabravee̠dupa̠ tvaa-''yaa̠neeti̠ neha lo̠ko̎-'steetya̍bravee̠-thsa vi̠shvaka̍rmaana-ncha ya̠jna-nchaa̎bravee̠dupa̍ vaa̠maa 'yaa̠neeti̠ neha lo̠ko̎-'steetya̍brootaa̠gm̠ sa e̠taa-ntri̠teeyaa̠-nchiti̍mapashya̠-ttaamupaa̍dhatta̠ tada̠saava̍bhava̠-thsa aa̍di̠tyah pra̠jaapa̍ti-mabravee̠dupa̠ tvaa- [-mabravee̠dupa̠ tvaa, aayaa̠neeti̠] 21
-''yaa̠neeti̠ neha lo̠ko̎-'steetya̍bravee̠-thsa vi̠shvaka̍rmaana-ncha ya̠jna-nchaa̎bravee̠dupa̍ vaa̠maa-'yaa̠neeti̠ neha lo̠ko̎-'steetya̍brootaa̠gm̠ sa pa̍rame̠shthina̍mabravee̠dupa̠ tvaa-''yaa̠neeti̠ kena̍ mo̠paishya̠seeti̍ loka-mpri̠nayetya̍bravee̠-ttam lo̍ka-mpri̠nayo̠pai-ttasmaa̠dayaa̍tayaamnee loka-mpri̠naa-'yaa̍tayaamaa̠ hya̍saa- [hya̍sau, aa̠di̠tyastaanrisha̍yo] 22
-vaa̍di̠tyastaanrisha̍yo 'bruva̠nnupa̍ va̠ aa-'yaa̠meti̠ kena̍ na u̠paishya̠theti̍ bhoo̠mnetya̍bruva̠-ntaa-ndvaabhyaa̠-nchitee̎bhyaamu̠paaya̠n-thsa pancha̍chiteeka̠-ssama̍padyata̠ ya e̠vam vi̠dvaana̠gni-nchi̍nu̠te bhooyaa̍ne̠va bha̍vatya̠bheemaan mlo̠kaanja̍yati vi̠dure̍na-nde̠vaa atho̍ e̠taasaa̍me̠va de̠vataa̍naa̠gm̠ saayu̍jya-ngachchhati ॥ 23 ॥ (tama̍saa - ''di̠tyo̎ - 'steeti̠ - disha̍ - aadi̠tyah pra̠jaapa̍timabravee̠dupa̍ tvaa̠ - 'sau - pancha̍chatvaarigmshachcha) (a. 5)
vayo̠ vaa a̠gniryada̍gni̠chi-tpa̠kshino̎-'shnee̠yaa-ttame̠vaagnima̍dyaa̠daa-rti̠maarchchhe̎-thsamvathsa̠ram vra̠ta-ncha̍re-thsamvathsa̠ragm hi vra̠ta-nnaati̍ pa̠shurvaa e̠sha yada̠gnirhi̠nasti̠ khalu̠ vai ta-mpa̠shurya e̍na-mpu̠rastaa̎-tpra̠tyancha̍mupa̠chara̍ti̠ tasmaa̎-tpa̠shchaa-tpraanu̍pa̠charya̍ aa̠tmano-'higm̍saayai̠ tejo̍-'si̠ tejo̍ me yachchha prithi̠veem ya̍chchha [prithi̠veem ya̍chchha, pri̠thi̠vyai maa̍ paahi̠] 24
prithi̠vyai maa̍ paahi̠ jyoti̍rasi̠ jyoti̍rme yachchhaa̠ntari̍ksham yachchhaa̠ntari̍kshaanmaa paahi̠ suva̍rasi̠ suva̍rme yachchha̠ diva̍m yachchha di̠vo maa̍ paa̠heetyaa̍hai̠taabhi̠rvaa i̠me lo̠kaa vidhri̍taa̠ yade̠taa u̍pa̠dadhaa̎tye̠shaam lo̠kaanaa̠m vidhri̍tyai svayamaatri̠nnaa u̍pa̠dhaaya̍ hiranyeshta̠kaa upa̍dadhaatee̠me vai lo̠kaa-ssva̍yamaatri̠nnaa jyoti̠r̠hira̍nya̠m ya-thsva̍yamaatri̠nnaa u̍pa̠dhaaya̍ [u̍pa̠dhaaya̍, hi̠ra̠nye̠shta̠kaa u̍pa̠dadhaa̍tee̠-] 25
hiranyeshta̠kaa u̍pa̠dadhaa̍tee̠maa-ne̠vaitaabhi̍-rlo̠kaa-njyoti̍shmatah kuru̠te-'tho̍ e̠taabhi̍re̠vaasmaa̍ i̠me lo̠kaah pra bhaa̎mti̠ yaaste̍ agne̠ soorye̠ rucha̍ udya̠to diva̍maata̠nvanti̍ ra̠shmibhi̍h । taabhi̠-ssarvaa̍bhee ru̠che janaa̍ya naskridhi ॥ yaa vo̍ devaa̠-ssoorye̠ rucho̠ goshvashve̍shu̠ yaa rucha̍h । indraa̎gnee̠ taabhi̠-ssarvaa̍bhee̠ rucha̍-nno dhatta brihaspate ॥ rucha̍nno dhehi [dhehi, braa̠hma̠neshu̠ rucha̠gm̠] 26
braahma̠neshu̠ rucha̠gm̠ raaja̍su naskridhi । rucha̍m vi̠shye̍shu shoo̠dreshu̠ mayi̍ dhehi ru̠chaa rucha̎m ॥ dve̠dhaa vaa a̠gni-nchi̍kyaa̠nasya̠ yasha̍ indri̠ya-nga̍chchhatya̠gnim vaa̍ chi̠tamee̍jaa̠nam vaa̠ yade̠taa aahu̍teerju̠hotyaa̠tmanne̠va yasha̍ indri̠ya-ndha̍tta eeshva̠ro vaa e̠sha aarti̠maarto̠ryo̎-'gni-nchi̠nvanna̍dhi̠ kraama̍ti̠ tattvaa̍ yaami̠ brahma̍naa̠ vanda̍maana̠ iti̍ vaaru̠nyarchaa [iti̍ vaaru̠nyarchaa, ju̠hu̠yaa̠chchhaanti̍-] 27
ju̍huyaa̠chchhaanti̍-re̠vaishaa 'gnergupti̍raa̠tmano̍ ha̠vishkri̍to̠ vaa e̠sha yo̎-'gni-nchi̍nu̠te yathaa̠ vai ha̠vi-sskanda̍tye̠vam vaa e̠sha ska̍ndati̠ yo̎-'gni-nchi̠tvaa striya̍mu̠paiti̍ maitraavaru̠nyaa-''miksha̍yaa yajeta maitraavaru̠nataa̍-me̠vopai̎tyaa̠tmano 'ska̍ndaaya̠ yo vaa a̠gnimri̍tu̠sthaam veda̠rtur-ri̍turasmai̠ kalpa̍maana eti̠ pratye̠va ti̍shthati samvathsa̠ro vaa a̠gnir- [vaa a̠gnih, ri̠tu̠sthaa-stasya̍] 28
-ri̍tu̠sthaa-stasya̍ vasa̠nta-shshiro̎ gree̠shmo dakshi̍nah pa̠ksho va̠r̠shaah puchchhagm̍ sha̠radutta̍rah pa̠ksho he̍ma̠nto maddhya̍-mpoorvapa̠kshaa-shchita̍yo¶pa̠kshaah puree̍sha-mahoraa̠traaneeshta̍kaa e̠sha vaa a̠gnir-ri̍tu̠sthaa ya e̠vam veda̠rtur-ri̍turasmai̠ kalpa̍maana eti̠ pratye̠va ti̍shthati pra̠jaapa̍ti̠rvaa e̠ta-njyaishthya̍kaamo̠ nya̍dhatta̠ tato̠ vai sa jyaishthya̍magachchha̠dya e̠vam vi̠dvaana̠gni-nchi̍nu̠te jyaishthya̍me̠va ga̍chchhati ॥ 29 ॥ (pri̠thi̠veem ya̍chchha̠ - ya-thsva̍yamaatri̠nnaa u̍pa̠dhaaya̍ - dhehyri̠ - chaa - gni - shchi̍nu̠te - treeni̍ cha) (a. 6)
yadaakoo̍taa-thsa̠masu̍sroddhri̠do vaa̠ mana̍so vaa̠ sambhri̍ta̠-nchakshu̍sho vaa । tamanu̠ prehi̍ sukri̠tasya̍ lo̠kam yatrarsha̍yah prathama̠jaa ye pu̍raa̠naah ॥ e̠tagm sa̍dhastha̠ pari̍ te dadaami̠ yamaa̠vahaa̎chchheva̠dhi-njaa̠tave̍daah । a̠nvaa̠ga̠ntaa ya̠jnapa̍tirvo̠ atra̠ tagg sma̍ jaaneeta para̠me vyo̍mann ॥ jaa̠nee̠taade̍na-mpara̠me vyo̍ma̠-ndevaa̎-ssadhasthaa vi̠da roo̠pama̍sya । yadaa̠gachchhaa̎- [yadaa̠gachchhaa̎t, pa̠thibhi̍-rdeva̠yaanai̍] 30
-tpa̠thibhi̍-rdeva̠yaanai̍-rishtaapoo̠rte kri̍nutaa-daa̠vi-ra̍smai ॥ sa-mpra chya̍vaddhva̠-manu̠ sa-mpra yaa̠taagne̍ pa̠tho de̍va̠yaanaa̎n krinuddhvam । a̠smin-thsa̠dhasthe̠ addhyutta̍rasmi̠n vishve̍ devaa̠ yaja̍maanashcha seedata ॥ pra̠sta̠rena̍ pari̠dhinaa̎ sru̠chaa vedyaa̍ cha ba̠r̠hishaa̎ । ri̠chemam ya̠jna-nno̍ vaha̠ suva̍rde̠veshu̠ ganta̍ve ॥ yadi̠shtam ya-tpa̍raa̠daana̠m yadda̠ttam yaa cha̠ dakshi̍naa । ta- [tat, a̠gni-] 31
-da̠gni-rvai̎shvakarma̠na-ssuva̍rde̠veshu̍ no dadhat ॥ yenaa̍ sa̠hasra̠m vaha̍si̠ yenaa̎gne sarvaveda̠sam । tene̠mam ya̠jna-nno̍ vaha̠ suva̍rde̠veshu̠ ganta̍ve ॥ yenaa̎gne̠ dakshi̍naa yu̠ktaa ya̠jnam vaha̍ntyri̠tvija̍h । tene̠mam ya̠jna-nno̍ vaha̠ suva̍rde̠veshu̠ ganta̍ve ॥ yenaa̎-'gne su̠krita̍h pa̠thaa madho̠rdhaaraa̎ vyaana̠shuh । tene̠mam ya̠jna-nno̍ vaha̠ suva̍rde̠veshu̠ ganta̍ve ॥ yatra̠ dhaaraa̠ ana̍petaa̠ madho̎rghri̠tasya̍ cha̠ yaah । tada̠gnirvai̎shvakarma̠na-ssuva̍rde̠veshu̍ no dadhat ॥ 32 ॥ (aa̠gachchhaa̠t - ta - dvayaa̍na̠shu stene̠mam ya̠jna-nno̍ vaha̠ suva̍rde̠veshu̠ ganta̍ve̠ - chatu̍rdasha cha) (a. 7)
yaaste̍ agne sa̠midho̠ yaani̠ dhaama̠ yaa ji̠hvaa jaa̍tavedo̠ yo a̠rchih । ye te̍ agne me̠dayo̠ ya inda̍va̠stebhi̍raa̠tmaana̍-nchinuhi prajaa̠nann ॥ u̠thsa̠nna̠ya̠jno vaa e̠sha yada̠gnih kim vaa-'hai̠tasya̍ kri̠yate̠ kim vaa̠ na yadvaa a̍ddhva̠ryu-ra̠gneshchi̠nvanna̍-nta̠retyaa̠tmano̠ vai tada̠ntare̍ti̠ yaaste̍ agne sa̠midho̠ yaani̠ [sa̠midho̠ yaani̍, dhaametyaa̍hai̠shaa] 33
dhaametyaa̍hai̠shaa vaa a̠gne-ssva̍ya-nchi̠tira̠gnire̠va tada̠gni-nchi̍noti̠ naaddhva̠ryuraa̠tmano̠-'ntare̍ti̠ chata̍sra̠ aashaa̠h pracha̍rantva̠gnaya̍ i̠ma-nno̍ ya̠jna-nna̍yatu prajaa̠nann । ghri̠ta-mpinva̍nna̠jaragm̍ su̠veera̠-mbrahma̍ sa̠mi-dbha̍va̠tyaahu̍teenaam ॥ su̠va̠rgaaya̠ vaa e̠sha lo̠kaayopa̍ dheeyate̠ ya-tkoo̠rmashchata̍sra̠ aashaa̠h pra cha̍rantva̠gnaya̠ ityaa̍ha̠ [ityaa̍ha, disha̍ e̠vaitena̠] 34
disha̍ e̠vaitena̠ pra jaa̍naatee̠ma-nno̍ ya̠jna-nna̍yatu prajaa̠nannityaa̍ha suva̠rgasya̍ lo̠kasyaa̠bhinee̎tyai̠ brahma̍ sa̠mi-dbha̍va̠tyaahu̍teenaa̠-mityaa̍ha̠ brahma̍naa̠ vai de̠vaa-ssu̍va̠rgam lo̠kamaa̍ya̠n̠ ya-dbrahma̍nvatyopa̠dadhaa̍ti̠ brahma̍nai̠va ta-dyaja̍maana-ssuva̠rgam lo̠kame̍ti pra̠jaapa̍ti̠rvaa e̠sha yada̠gnistasya̍ pra̠jaah pa̠shava̠-shchhandaagm̍si roo̠pagm sarvaa̠n̠ varnaa̠nishta̍kaanaa-nkuryaa-droo̠penai̠va pra̠jaa-mpa̠shoon chhandaa̠g̠syava̍ ru̠ndhe-'tho̎ pra̠jaabhya̍ e̠vaina̍-mpa̠shubhya̠-shchhando̎bhyo 'va̠ruddhya̍ chinute ॥ 35 ॥ (yaanya̠ - gnaya̠ ityaa̠he - shta̍kaanaa̠gm̠ - shoda̍sha cha) (a. 8)
mayi̍ grihnaa̠myagre̍ a̠gnigm raa̠yasposhaa̍ya suprajaa̠stvaaya̍ su̠veeryaa̍ya । mayi̍ pra̠jaa-mmayi̠ varcho̍ dadhaa̠myari̍shtaa-ssyaama ta̠nuvaa̍ su̠veeraa̎h ॥ yo no̍ a̠gnih pi̍taro hri̠thsva̍ntarama̍rtyo̠ martyaagm̍ aavi̠vesha̍ । tamaa̠tma-npari̍ grihneemahe va̠ya-mmaa so a̠smaagm a̍va̠haaya̠ paraa̍ gaat ॥ yada̍ddhva̠ryuraa̠tmanna̠gnima-gri̍heetvaa̠-'gni-nchi̍nu̠yaadyo̎-'sya̠ svo̎-'gnistamapi̠ [svo̎-'gnistamapi̍, yaja̍maanaaya] 36
yaja̍maanaaya chinuyaada̠gni-nkhalu̠ vai pa̠shavo-'noopa̍ tishthante-'pa̠kraamu̍kaa asmaa-tpa̠shava̍-ssyu̠rmayi̍ grihnaa̠myagre̍ a̠gnimityaa̍haa̠-''tmanne̠va svama̠gni-ndaa̍dhaara̠ naasmaa̎-tpa̠shavo-'pa̍ kraamanti brahmavaa̠dino̍ vadanti̠ yanmrichchaa-''pa̍shchaa̠gne-ra̍naa̠dya-matha̠ kasmaa̎nmri̠daa chaa̠dbhishchaa̠-'gnishchee̍yata̠ iti̠ yada̠dbhi-ssa̠m yau- [yada̠dbhi-ssa̠m yauti̍, aapo̠ vai] 37
-tyaapo̠ vai sarvaa̍ de̠vataa̍ de̠vataa̍bhire̠vaina̠gm̠ sagm sri̍jati̠ yanmri̠daa chi̠notee̠yam vaa a̠gnirvai̎shvaana̠ro̎-'gninai̠va tada̠gni-nchi̍noti brahmavaa̠dino̍ vadanti̠ yanmri̠daa chaa̠dbhishchaa̠gnishchee̠yate-'tha̠ kasmaa̍da̠gniru̍chyata̠ iti̠ yachchhando̍bhi-shchi̠notya̠gnayo̠ vai chhandaagm̍si̠ tasmaa̍da̠gniru̍chya̠te-'tho̍ i̠yam vaa a̠gnirvai̎shvaana̠ro ya- [a̠gnirvai̎shvaana̠ro yat, mri̠daa chi̠noti̠] 38
-nmri̠daa chi̠noti̠ tasmaa̍da̠gniru̍chyate hiranyeshta̠kaa upa̍ dadhaati̠ jyoti̠rvai hira̍nya̠-njyoti̍re̠vaa-'smi̍-ndadhaa̠tyatho̠ tejo̠ vai hira̍nya̠-nteja̍ e̠vaa-''tma-ndha̍tte̠ yo vaa a̠gnigm sa̠rvato̍mukha-nchinu̠te sarvaa̍su pra̠jaasvanna̍matti̠ sarvaa̠ disho̠-'bhi ja̍yati gaaya̠tree-mpu̠rastaa̠dupa̍ dadhaati tri̠shtubha̍-ndakshina̠to jaga̍tee-mpa̠shchaada̍nu̠shtubha̍muttara̠tah pa̠nkti-mmaddhya̍ e̠sha vaa a̠gni-ssa̠rvato̍mukha̠stam ya e̠vam vi̠dvaagshchi̍nu̠te sarvaa̍su pra̠jaasvanna̍matti̠ sarvaa̠ disho̠-'bhi ja̍ya̠tyatho̍ di̠shye̍va disha̠-mpra va̍yati̠ tasmaa̎-ddi̠shi di-kprotaa̎ ॥ 39 ॥ (api̍-sa̠myauti̍-vaishvaana̠ro ya-de̠sha vai-pancha̍vigmshatishcha) (a. 9)
pra̠jaapa̍ti-ra̠gni-ma̍srijata̠ so̎-'smaa-thsri̠shtah praa-mpraa-'dra̍va̠-ttasmaa̠ ashva̠-mpratyaa̎sya̠-thsa da̍kshi̠naa-''va̍rtata̠ tasmai̍ vri̠shni-mpratyaa̎sya̠-thsa pra̠tyannaa-'va̍rtata̠ tasmaa̍ risha̠bha-mpratyaa̎sya̠-thsa uda̠nnaa-'va̍rtata̠ tasmai̍ ba̠sta-mpratyaa̎sya̠-thsa oo̠rdhvo̎-'drava̠-ttasmai̠ puru̍sha̠-mpratyaa̎sya̠dya-tpa̍shushee̠r̠shaanyu̍pa̠dadhaa̍ti sa̠rvata̍ e̠vaina̍- [e̠vaina̎m, a̠va̠ruddhya̍ chinuta] 40
-mava̠ruddhya̍ chinuta e̠taa vai praa̍na̠bhrita̠-shchakshu̍shmatee̠rishta̍kaa̠ ya-tpa̍shushee̠r̠shaani̠ ya-tpa̍shushee̠r̠shaanyu̍pa̠dadhaa̍ti̠ taabhi̍re̠va yaja̍maano̠-'mushmi̍mllo̠ke praani̠tyatho̠ taabhi̍re̠vaasmaa̍ i̠me lo̠kaah pra bhaa̎mti mri̠daa-'bhi̠lipyopa̍ dadhaati meddhya̠tvaaya̍ pa̠shurvaa e̠sha yada̠gniranna̍-mpa̠shava̍ e ̠sha khalu̠ vaa a̠gnirya-tpa̍shushee̠r̠shaani̠ ya-nkaa̠maye̍ta̠ kanee̍yo̠-'syaa-'nnagg̍ - [kanee̍yo̠-'syaa-'nna̎m, syaa̠diti̍] 41
syaa̠diti̍ santa̠raa-ntasya̍ pashushee̠r̠shaanyupa̍ daddhyaa̠-tkanee̍ya e̠vaasyaanna̍-mbhavati̠ ya-nkaa̠maye̍ta sa̠maava̍da̠syaannagg̍ syaa̠diti̍ maddhya̠tastasyopa̍ daddhyaa-thsa̠maava̍-de̠vaasyaanna̍-mbhavati̠ ya-nkaa̠maye̍ta̠ bhooyo̠-'syaa-'nnagg̍ syaa̠dityante̍shu̠ tasya̍ vyu̠doohyopa̍ daddhyaadanta̠ta e̠vaasmaa̠ anna̠mava̍ rundhe̠ bhooyo̠-'syaanna̍-mbhavati ॥ 42 ॥ (e̠na̠- ma̠syaanna̠m - bhooyo̠-'syaa-'nna̍-mbhavati) (a. 10)
ste̠gaa-ndaggshtraa̎bhyaa-mma̠ndookaa̠n jambhye̍bhi̠raada̍kaam-khaa̠denorjagm̍ sagm soo̠denaa-'ra̍nya̠-njaambee̍lena̠ mrida̍-mba̠rsve̍bhi̠-shsharka̍raabhi̠rava̍kaa̠mava̍kaabhi̠-shsharka̍raamuthsaa̠dena̍ ji̠hvaama̍vakra̠ndena̠ taalu̠gm̠ sara̍svatee-njihvaa̠grena̍ ॥ 43 ॥ (ste̠gaan - dvaavigm̍shatih) (a. 11)
vaaja̠gm̠ hanoo̎bhyaama̠pa aa̠sye̍naa-''di̠tyaa-nchhmashru̍bhi-rupayaa̠ma-madha̍re̠noshthe̍na̠ sadutta̍re̠naanta̍renaa-nookaa̠sha-mpra̍kaa̠shena̠ baahyagg̍ stanayi̠tnu-nni̍rbaa̠dhena̍ sooryaa̠gnee chakshu̍rbhyaam vi̠dyutau̍ ka̠naana̍kaabhyaama̠shani̍-mma̠stishke̍na̠ bala̍-mma̠jjabhi̍h ॥ 44 ॥ (vaaja̠-mpancha̍vigmshatih) (a. 12)
koo̠rmaa-nchha̠phaira̠chchhalaa̍bhih ka̠pinja̍laa̠nthsaama̠ kushthi̍kaabhirja̠va-njanghaa̍bhiraga̠da-njaanu̍bhyaam vee̠rya̍-nku̠haabhyaa̎-mbha̠ya-mpra̍chaa̠laabhyaa̠-nguho̍papa̠kshaabhyaa̍-ma̠shvinaa̠vagm saa̎bhyaa̠madi̍tigm shee̠rshnaa nir-ri̍ti̠-nnirjaa̎lmakena shee̠rshnaa ॥ 45 ॥ (koo̠rmaan-trayo̍vigmshatih) (a. 13)
yoktra̠-ngriddhraa̍bhiryu̠gamaana̍tena chi̠tta-mmanyaa̍bhi-ssankro̠shaa-npraa̠naih pra̍kaa̠shena̠ tvacha̍-mparaakaa̠shenaanta̍raa-mma̠shakaa̠n keshai̠rindra̠gg̠ svapa̍saa̠ vahe̍na̠ briha̠spatigm̍ shakunisaa̠dena̠ ratha̍mu̠shnihaa̍bhih ॥ 46 ॥ (yoktra̠ - meka̍vigmshatih) (a. 14)
mi̠traavaru̍nau̠ shronee̎bhyaamindraa̠gnee shi̍kha̠ndaabhyaa̠-mindraa̠briha̠spatee̍ oo̠rubhyaa̠mindraa̠vishnoo̍ ashthee̠vadbhyaagm̍ savi̠taara̠-mpuchchhe̍na gandha̠rvaanchhepe̍naa-phsa̠raso̍ mu̠shkaabhyaa̠-mpava̍maana-mpaa̠yunaa̍ pa̠vitra̠-mpotraa̎bhyaamaa̠krama̍nagg sthoo̠raabhyaa̎-mprati̠krama̍na̠-nkushthaa̎bhyaam ॥ 47 ॥ (mi̠traavaru̍nau̠ - dvaavigm̍shatih) (a. 15)
indra̍sya kro̠do 'di̍tyai paaja̠sya̍-ndi̠shaa-nja̠travo̍ jee̠mootaa̎n hridayaupa̠shaabhyaa̍-ma̠ntari̍ksha-mpuri̠tataa̠ nabha̍ uda̠rye̍nendraa̠nee-mplee̠hnaa va̠lmeekaa̎n klo̠mnaa gi̠ree-nplaa̠shibhi̍-ssamu̠dramu̠dare̍na vaishvaana̠ra-mbhasma̍naa ॥ 48 ॥ (indra̍sya̠ - dvaavi̍shati̠h) (a. 16)
poo̠shno va̍ni̠shthura̍ndhaa̠he-ssthoo̍ragu̠daa sa̠rpaa-ngudaa̍bhir-ri̠too-npri̠shteebhi̠rdiva̍-mpri̠shthena̠ vasoo̍naa-mpratha̠maa keeka̍saa ru̠draanaa̎-ndvi̠teeyaa̍ ''di̠tyaanaa̎-ntri̠teeyaa 'ngi̍rasaa-nchatu̠rthee saa̠ddhyaanaa̎-mpancha̠mee vishve̍shaa-nde̠vaanaagm̍ sha̠shthee ॥ 49 ॥ (poo̠shna - shchatu̍rvigmshatih) (a. 17)
ojo̎ gree̠vaabhi̠-rnir-ri̍tima̠sthabhi̠rindra̠gg̠ svapa̍saa̠ vahe̍na ru̠drasya̍ vicha̠la-sska̠ndho̍ 'horaa̠trayo̎rdvi̠teeyo̎ 'rdhamaa̠saanaa̎-ntri̠teeyo̍ maa̠saa-ncha̍tu̠rtha ri̍too̠naa-mpa̍ncha̠ma-ssa̍mvathsa̠rasya̍ sha̠shthah ॥ 50 ॥ (ojo̍ - vigmsha̠tih) (a. 18)
aa̠na̠nda-nna̠ndathu̍naa̠ kaama̍-mpratyaa̠saabhyaa̎-mbha̠yagm shi̍tee̠mabhyaa̎-mpra̠shisha̍-mprashaa̠saabhyaagm̍ sooryaachandra̠masau̠ vrikyaa̎bhyaag shyaamashaba̠lau mata̍snaabhyaa̠m vyu̍shtigm roo̠pena̠ nimru̍kti̠maroo̍pena ॥ 51 ॥ (aa̠na̠ndagm - shoda̍sha) (a. 19)
aha̍rmaa̠gm̠sena̠ raatri̠-mpeeva̍saa̠-'po yoo̠shena̍ ghri̠tagm rase̍na̠ shyaam vasa̍yaa doo̠sheekaa̍bhir-hraa̠duni̠-mashru̍bhi̠h prishvaa̠-ndivagm̍ roo̠pena̠ naksha̍traani̠ prati̍roopena prithi̠vee-ncharma̍naa chha̠vee-nchha̠vyo̍ paakri̍taaya̠ svaahaa ''la̍bdhaaya̠ svaahaa̍ hu̠taaya̠ svaahaa̎ ॥ 52 ॥ (aha̍ra̠ - shtaavigm̍shatih) (a. 20)
a̠gneh pa̍ksha̠ti-ssara̍svatyai̠ nipa̍kshati̠-ssoma̍sya tri̠teeyaa̠-'paa-ncha̍tu̠rthyosha̍dheenaa-mpancha̠mee sa̍mvathsa̠rasya̍ sha̠shthee ma̠rutaagm̍ sapta̠mee briha̠spate̍rashta̠mee mi̠trasya̍ nava̠mee varu̍nasya dasha̠meendra̍syaikaada̠shee vishve̍shaa-nde̠vaanaa̎-ndvaada̠shee dyaavaa̍prithi̠vyoh paa̠rshvam ya̠masya̍ paatoo̠rah ॥ 53 ॥ (a̠gne-rekaa̠nna tri̠gm̠shat) (a. 21)
vaa̠yoh pa̍ksha̠ti-ssara̍svato̠ nipa̍kshati-shcha̠ndrama̍sa-stri̠teeyaa̠ naksha̍traanaa-nchatu̠rthee sa̍vi̠tuh pa̍ncha̠mee ru̠drasya̍ sha̠shthee sa̠rpaanaagm̍ sapta̠mya̍rya̠mno̎-'shta̠mee tvashtu̍rnava̠mee dhaa̠turda̍sha̠meendraa̠nyaa e̍kaadashyadi̍tyai dvaada̠shee dyaavaa̍prithi̠vyoh paa̠rshvam ya̠myai̍ paatoo̠rah ॥ 54 ॥ (vaa̠yo - ra̠shtaavigm̍shatih) (a. 22)
panthaa̍manoo̠vrigbhyaa̠gm̠ santa̍tigg snaava̠nyaa̎bhyaa̠gm̠ shukaa̎-npi̠ttena̍ hari̠maana̍m ya̠knaa halee̎kshnaa-npaapavaa̠tena̍ koo̠shmaanchhaka̍bhi-shshava̠rtaanoova̍ddhyena̠ shuno̍ vi̠shasa̍nena sa̠rpaan mlo̍hitaga̠ndhena̠ vayaagm̍si pakvaga̠ndhena̍ pi̠peeli̍kaah prashaa̠dena̍ ॥ 55 ॥ (panthaa̠m - dvaavigm̍shatih) (a. 23)
kramai̠ratya̍kramee-dvaa̠jee vishvai̎rde̠vairya̠jniyai̎-ssamvidaa̠nah । sa no̍ naya sukri̠tasya̍ lo̠ka-ntasya̍ te va̠yagg sva̠dhayaa̍ madema ॥ 56 ॥ (kramai̍ - ra̠shtaada̍sha) (a. 24)
dyauste̍ pri̠shtha-mpri̍thi̠vee sa̠dhastha̍maa̠tmaantari̍kshagm samu̠dro yoni̠-ssoorya̍ste̠ chakshu̠rvaata̍h praa̠nashcha̠ndramaa̠-shshrotra̠-mmaasaa̎shchaardhamaa̠saashcha̠ parvaa̎nyri̠tavongaa̍ni samvathsa̠ro ma̍hi̠maa ॥ 57 ॥ (dyau - pancha̍vigmshatih) (a. 25)
a̠gnih pa̠shuraa̍see̠-ttenaa̍yajanta̠ sa e̠tam lo̠kama̍jaya̠-dyasmi̍nna̠gni-ssa te̍ lo̠kasta-nje̎shya̠syathaava̍ jighra vaa̠yuh pa̠shuraa̍see̠-ttenaa̍yajanta̠ sa e̠tam lo̠kama̍jaya̠-dyasmi̍n vaa̠yu-ssa te̍ lo̠kastasmaa̎-ttvaa̠-'ntare̎shyaami̠ yadi̠ naava̠jighra̍syaadi̠tyah pa̠shuraa̍see̠-ttenaa̍yajanta̠ sa e̠tam lo̠kama̍jaya̠-dyasmi̍-nnaadi̠tya-ssa te̍ lo̠kasta-nje̎shyasi̠ yadya̍va̠jighra̍si ॥ 58 ॥ (yasmi̍ - nna̠shtau cha̍) (a. 26)
(yo vaa aya̍thaadevata̠ - ntvaama̍gna̠ - indra̍sya̠ - chitti̠m - myathaa̠ vai - vayo̠ vai - yadaakoo̍taa̠--dyaaste̍ agne̠ - mayi̍ grihnaami - pra̠jaapa̍ti̠-sso̎-'smaath - ste̠gaan - vaaja̍m - koo̠rmaan - yoktra̍m - mi̠traavaru̍naa̠ - vindra̍sya - poo̠shna - oja̍ - aana̠nda - maha̍ - ra̠gne - rvaa̠yoh - panthaa̠m - kramai̠ - rdyauste̠ - 'gnih pa̠shuraa̍see̠th - shadvigm̍shatih)
(yo vaa - e̠vaa-''hu̍ti - mabhavan - pa̠thibhi̍ - rava̠rudhyaa̍ - ''na̠nda - ma̠shtau pa̍ncha̠shat )
(yo vaa aya̍thaadevata̠m, myadya̍va̠jighra̍si)
( saa̠vi̠traani̠ - vishnu̍mukhaa - uthsannaya̠jno - de̍vaasu̠raa - yadeke̍na̠ - hira̍nyavarnaa̠ - yo vaa̍- sa̠pta ) (7)
॥ hari̍h om ॥
॥ krishna yajurvedeeya taittireeya samhitaayaa-mpanchamakaande saptamah prashna-ssamaaptah ॥
5.7 - যো বা অযথা দেবতম্ - কৃষ্ণ যজুর্বেদ তৈত্তিরীয় সংহিতা পাঠঃ সম্পর্কে
This is the seventh and last prashna of the fifth kanda of the Krishna Yajurveda Taittiriya Samhita, which explains the remaining rites of the agnichayana, the building of the great fire altar, and the verses that accompany them (upanuvakya). It opens: "One who builds the fire without regard to its deities..." and explains why each part of the rite must be done with its proper deity and mantra, completing the explanation of the fire altar that runs through the fifth kanda.
উৎস: Krishna Yajurveda, Taittiriya Samhita 5.7
কখন পাঠ করবেন: In Vedic chanting and in traditional study of the Taittiriya Samhita.
আপনি কি জানেন?
- The fifth kanda explains the agnichayana rites whose mantras are given in the fourth kanda.
- The Brahmana passages often teach that a rite done without knowing its meaning loses its power.
প্রায়শই জিজ্ঞাসিত প্রশ্ন
What does this prashna explain?
The remaining rites of the agnichayana.
How does it begin?
"One who builds the fire without regard to its deities..."
Which Veda is it from?
The Krishna Yajurveda, Taittiriya Samhita 5.7.
উপাসনা ও অধ্যয়নের জন্য প্রদত্ত, ভবিষ্যদ্বাণী হিসেবে নয়। অবাণিজ্যিক।
আরও ভক্তিপাঠ