Gita Govindam Chapter 10 - Chatura Chaturbhuja
Sri Krishna · Traditional devotional text
॥ ದಶಮಃ ಸರ್ಗಃ ॥ ॥ ಚತುರಚತುರ್ಭುಜಃ ॥
ಅತ್ರಾಂತರೇ ಮಸೃಣರೋಷವಶಾಮಸೀಂ-ನಿಃಶ್ವಾಸನಿಃಸಹಮುಖೀಂ ಸುಮುಖೀಮುಪೇತ್ಯ । ಸವ್ರೀಡಮೀಕ್ಷಿತಸಖೀವದನಾಂ ದಿನಾಂತೇ ಸಾನಂದಗದ್ಗದಪದಂ ಹರಿರಿತ್ಯುವಾಚ ॥ 53 ॥
॥ ಗೀತಂ 19 ॥
ವದಸಿ ಯದಿ ಕಿಂಚಿದಪಿ ದಂತರುಚಿಕೌಮುದೀ ಹರತಿ ದರತಿಮಿರಮತಿಘೋರಮ್ । ಸ್ಫುರದಧರಸೀಧವೇ ತವ ವದನಚಂದ್ರಮಾ ರೋಚಯತು ಲೋಚನಚಕೋರಮ್ ॥ ಪ್ರಿಯೇ ಚಾರುಶೀಲೇ ಮುಂಚ ಮಯಿ ಮಾನಮನಿದಾನಂ ಸಪದಿ ಮದನಾನಲೋ ದಹತಿ ಮಮ ಮಾನಸಂ ದೇಹಿ ಮುಖಕಮಲಮಧುಪಾನಮ್ ॥ 1 ॥
ಸತ್ಯಮೇವಾಸಿ ಯದಿ ಸುದತಿ ಮಯಿ ಕೋಪಿನೀ ದೇಹಿ ಖರನಖಶರಘಾತಮ್ । ಘಟಯ ಭುಜಬಂಧನಂ ಜನಯ ರದಖಂಡನಂ ಯೇನ ವಾ ಭವತಿ ಸುಖಜಾತಮ್ ॥ 2 ॥
ತ್ವಮಸಿ ಮಮ ಭೂಷಣಂ ತ್ವಮಸಿ ಮಮ ಜೀವನಂ ತ್ವಮಸಿ ಭವಜಲಧಿರತ್ನಮ್ । ಭವತು ಭವತೀಹ ಮಯಿ ಸತತಮನೋರೋಧಿನಿ ತತ್ರ ಮಮ ಹೃದಯಮತಿರತ್ನಮ್ ॥ 3 ॥
ನೀಲನಲಿನಾಭಮಪಿ ತನ್ವಿ ತವ ಲೋಚನಂ ಧಾರಯತಿ ಕೋಕನದರೂಪಮ್ । ಕುಸುಮಶರಬಾಣಭಾವೇನ ಯದಿ ರಂಜಯಸಿ ಕೃಷ್ಣಮಿದಮೇತದನುರೂಪಮ್ ॥ 4 ॥
ಸ್ಫುರತು ಕುಚಕುಂಭಯೋರುಪರಿ ಮಣಿಮಂಜರೀ ರಂಜಯತು ತವ ಹೃದಯದೇಶಮ್ । ರಸತು ರಶನಾಪಿ ತವ ಘನಜಘನಮಂಡಲೇ ಘೋಷಯತು ಮನ್ಮಥನಿದೇಶಮ್ ॥ 5 ॥
ಸ್ಥಲಕಮಲಗಂಜನಂ ಮಮ ಹೃದಯರಂಜನಂ ಜನಿತರತಿರಂಗಪರಭಾಗಮ್ । ಭಣ ಮಸೃಣವಾಣಿ ಕರವಾಣಿ ಪದಪಂಕಜಂ ಸರಸಲಸದಲಕ್ತಕರಾಗಮ್ ॥ 6 ॥
ಸ್ಮರಗರಲಖಂಡನಂ ಮಮ ಶಿರಸಿ ಮಂಡನಂ ದೇಹಿ ಪದಪಲ್ಲವಮುದಾರಮ್ । ಜ್ವಲತಿ ಮಯಿ ದಾರುಣೋ ಮದನಕದನಾರುಣೋ ಹರತು ತದುಪಾಹಿತವಿಕಾರಮ್ ॥ 7 ॥
ಇತಿ ಚಟುಲಚಾಟುಪಟುಚಾರು ಮುರವೈರಿಣೋ ರಾಧಿಕಾಮಧಿ ವಚನಜಾತಮ್ । ಜಯತಿ ಪದ್ಮಾವತೀರಮಣಜಯದೇವಕವಿ-ಭಾರತೀಭಣಿತಮತಿಶಾತಮ್ ॥ 8 ॥
ಪರಿಹರ ಕೃತಾತಂಕೇ ಶಂಕಾಂ ತ್ವಯಾ ಸತತಂ ಘನ-ಸ್ತನಜಘನಯಾಕ್ರಾಂತೇ ಸ್ವಾಂತೇ ಪರಾನವಕಾಶಿನಿ । ವಿಶತಿ ವಿತನೋರನ್ಯೋ ಧನ್ಯೋ ನ ಕೋಽಪಿ ಮಮಾಂತರಂ ಸ್ತನಭರಪರೀರಂಭಾರಂಭೇ ವಿಧೇಹಿ ವಿಧೇಯತಾಮ್ ॥ 54 ॥
ಮುಗ್ಧೇ ವಿಧೇಹಿ ಮಯಿ ನಿರ್ದಯದಂತದಂಶ-ದೋರ್ವಲ್ಲಿಬಂಧನಿಬಿಡಸ್ತನಪೀಡನಾನಿ । ಚಂಡಿ ತ್ವಮೇವ ಮುದಮಂಚ ನ ಪಂಚಬಾಣ-ಚಂಡಾಲಕಾಂಡದಲನಾದಸವಃ ಪ್ರಯಾಂತು ॥ 55 ॥
ವ್ಯಥಯತಿ ವೃಥಾ ಮೌನಂ ತನ್ವಿ ಪ್ರಪಂಚಯ ಪಂಚಮಂ ತರುಣೀ ಮಧುರಾಲಾಪೈಸ್ತಾಪಂ ವಿನೋದಯ ದೃಷ್ಟಿಭಿಃ । ಸುಮುಖಿ ವಿಮುಖೀಭಾವಂ ತಾವದ್ವಿಮುಂಚ ನ ಮುಂಚ ಮಾಂ ಸ್ವಯಮತಿಶಯಸ್ನಿಗ್ಧೋ ಮುಗ್ಧೇ ಪ್ರಿಯಿಽಹಮುಪಸ್ಥಿತಃ ॥ 56 ॥
ಬಂಧೂಕದ್ಯುತಿಬಾಂಧವೋಽಯಮಧರಃ ಸ್ನಿಗ್ಧೋ ಮಧೂಕಚ್ಚವಿ-ರ್ಗಂಡಶ್ಚಂಡಿ ಚಕಾಸ್ತಿ ನೀಲನಲಿನಶ್ರೀಮೋಚನಂ ಲೋಚನಮ್ । ನಾಸಾಭ್ಯೇತಿ ತಿಲಪ್ರಸೂನಪದವೀಂ ಕುಂದಾಭದಾಂತಿ ಪ್ರಿಯೇ ಪ್ರಾಯಸ್ತ್ವನ್ಮುಖಸೇವಯಾ ವಿಜಯತೇ ವಿಶ್ವಂ ಸ ಪುಷ್ಪಾಯುಧಃ ॥ 57 ॥
ದೃಶೌ ತವ ಮದಾಲಸೇ ವದನಮಿಂದುಸಂದೀಪಕಂ ಗತಿರ್ಜನಮನೋರಮಾ ವಿಧುತರಂಭಮೂರುದ್ವಯಮ್ । ರತಿಸ್ತವ ಕಲಾವತೀ ರುಚಿರಚಿತ್ರಲೇಖೇ ಭ್ರುವಾ-ವಹೋ ವಿಬುಧಯೌವನಂ ವಹಸಿ ತನ್ವೀ ಪೃಥ್ವೀಗತಾ ॥ 58 ॥
॥ ಇತಿ ಶ್ರೀಗೀತಗೋವಿಂದೇ ಮಾನಿನೀವರ್ಣನೇ ಚತುರಚತುರ್ಭುಜೋ ನಾಮ ದಶಮಃ ಸರ್ಗಃ ॥
About Gita Govindam Chapter 10 - Chatura Chaturbhuja
The tenth canto of Jayadeva's Gita Govinda, "Chatura Chaturbhuja", the clever four-armed Lord, shows Krishna pleading with Radha in her wounded pride. At dusk he comes to her as she sits angry and sighing, and sings the famous song "Vadasi yadi kinchid api", begging her to speak even a word, to strike him with her glances, and finally to place her tender foot on his head as an ornament to soothe the poison of love.
Written by: Jayadeva (12th century)
When to chant: In Odissi and other dance, in bhajans and concerts, and in the Gita Govinda seva at Puri.
Did you know?
- Tradition says that Jayadeva hesitated to write the line "dehi pada pallavam udaram" (give me your tender foot), went to bathe, and returned to find it written by Krishna himself.
- Its colophon calls this canto a description of the manini, the heroine in wounded pride.
Frequently asked questions
What does "Chatura Chaturbhuja" mean?
"The clever four-armed one", Krishna pleading with Radha.
Which famous song is in this canto?
"Vadasi yadi kinchid api", Krishna's plea to Radha.
What legend is linked with it?
That Krishna himself wrote the line "dehi pada pallavam udaram".
Offered for worship and study, not as prediction. Non-commercial.
More devotional texts