3.4 - ವಿ ವಾ ಏತಸ್ಯ ಯಜ್ಞಃ - ಕೃಷ್ಣ ಯಜುರ್ವೇದ ತೈತ್ತಿರೀಯ ಸಂಹಿತಾ ಪಾಠಃ
Kanda 3 - Krishna Yajurveda Taittiriya Samhita · ಸಾಂಪ್ರದಾಯಿಕ ಭಕ್ತಿ ಪಠ್ಯ
krishna yajurvedeeya taittireeya samhitaayaa-ntriteeyakaande chaturthah prashnah - ishtihomaabhidhaanam
o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥
vi vaa e̠tasya̍ ya̠jna ri̍ddhyate̠ yasya̍ ha̠vira̍ti̠richya̍te̠ sooryo̍ de̠vo di̍vi̠shadbhya̠ ityaa̍ha̠ briha̠spati̍naa chai̠vaasya̍ pra̠jaapa̍tinaa cha ya̠jnasya̠ vyri̍ddha̠mapi̍ vapati̠ rakshaagm̍si̠ vaa e̠ta-tpa̠shugm sa̍chante̠ yade̍kadeva̠tya̍ aala̍bdho̠ bhooyaa̠-nbhava̍ti̠ yasyaa̎ste̠ hari̍to̠ garbha̠ ityaa̍ha deva̠traivainaa̎-ngamayati̠ raksha̍saa̠mapa̍hatyaa̠ aa va̍rtana varta̠yetyaa̍ha̠ [varta̠yetyaa̍ha, brahma̍nai̠vaina̠-maa] 1
brahma̍nai̠vaina̠-maa va̍rtayati̠ vi te̍ bhinadmi taka̠reemityaa̍ha yathaaya̠jure̠vaitadu̍- rudra̠phso vi̠shvaroo̍pa̠ indu̠rityaa̍ha pra̠jaa vai pa̠shava̠ indu̍h pra̠jayai̠vaina̍-mpa̠shubhi̠-ssama̍rdhayati̠ diva̠m vai ya̠jnasya̠ vyri̍ddha-ngachchhati prithi̠veemati̍rikta̠-ntadyanna sha̠maye̠daarti̠maarchchhe̠-dyaja̍maano ma̠hee dyauh pri̍thi̠veecha̍ na̠ i̍- [na̠ iti̍, aa̠ha̠ dyaavaa̍prithi̠veebhyaa̍me̠va] 2
-tyaaha̠ dyaavaa̍prithi̠veebhyaa̍me̠va ya̠jnasya̠ vyri̍ddha̠-nchaati̍rikta-ncha shamayati̠ naa-''rti̠maarchchha̍ti̠ yaja̍maano̠ bhasma̍naa̠-'bhi samoo̍hati sva̠gaakri̍tyaa̠ atho̍ a̠nayo̠rvaa e̠sha garbho̠-'nayo̍re̠vaina̍-ndadhaati̠ yada̍va̠dyedati̠ tadre̍chaye̠dyannaava̠dye-tpa̠shoraala̍bdhasya̠ naava̍ dye-tpu̠rastaa̠nnaabhyaa̍ a̠nyada̍va̠dye-du̠pari̍shtaada̠nya-tpu̠rastaa̠dvai naabhyai̎ [ ] 3
praa̠na u̠pari̍shtaadapaa̠no yaavaa̍ne̠va pa̠shustasyaava̍ dyati̠ vishna̍ve shipivi̠shtaaya̍ juhoti̠ yadvai ya̠jnasyaa̍ti̠richya̍te̠ yah pa̠shorbhoo̠maa yaa pushti̠sta-dvishnu̍-shshipivi̠shto 'ti̍rikta e̠vaati̍rikta-ndadhaa̠tyati̍riktasya̠ shaantyaa̍ a̠shtaaproo̠ddhira̍nya̠-ndakshi̍naa̠-'shtaapa̍dee̠ hye̍shaa ''tmaa na̍va̠mah pa̠shoraaptyaa̍ antarako̠sha u̠shneeshe̠naa-''vi̍shtita-mbhavatye̠vami̍va̠ hi pa̠shurulba̍miva̠ charme̍va maa̠gm̠sami̠vaasthee̍va̠ yaavaa̍ne̠va pa̠shustamaa̠ptvaa-'va̍ rundhe̠yasyai̠shaa ya̠jne praya̍shchittih kri̠yata̍ i̠shtvaa vasee̍yaa-nbhavati ॥ 4 ॥ (va̠rta̠yatyaa̍ha-na̠ iti̠-vai naabhyaa̠-ulba̍mi̠vai-ka̍vigmshatishcha) (a. 1)
aa vaa̍yo bhoosha shuchipaa̠ upa̍ na-ssa̠hasra̍-nte ni̠yuto̍ vishvavaara । upo̍ te̠ andho̠ madya̍mayaami̠ yasya̍ deva dadhi̠she poo̎rva̠peya̎m ॥ aakoo̎tyai tvaa̠ kaamaa̍ya tvaa sa̠mridhe̎ tvaa kikki̠taa te̠ mana̍h pra̠jaapa̍taye̠ svaahaa̍ kikki̠taa te̎ praa̠nam vaa̠yave̠ svaahaa̍ kikki̠taa te̠ chakshu̠-ssooryaa̍ya̠ svaahaa̍ kikki̠taa te̠ shrotra̠-ndyaavaa̍prithi̠veebhyaa̠g̠ svaahaa̍ kikki̠taa te̠ vaacha̠gm̠ sara̍svatyai̠ svaahaa̠ [sara̍svatyai̠ svaahaa̎, tva-ntu̠reeyaa̍] 5
tva-ntu̠reeyaa̍ va̠shinee̍ va̠shaa-'si̍ sa̠kridya-ttvaa̠ mana̍saa̠ garbha̠ aa-'sha̍yat । va̠shaa tvam va̠shinee̍ gachchha de̠vaan-thsa̠tyaa-ssa̍ntu̠ yaja̍maanasya̠ kaamaa̎h ॥ a̠jaa-'si̍ rayi̠shthaa pri̍thi̠vyaagm see̍do̠rdhvaa-'ntari̍ksha̠mupa̍ tishthasva di̠vi te̍ bri̠hadbhaah ॥ tantu̍-nta̠nva-nraja̍so bhaa̠numanvi̍hi̠ jyoti̍shmatah pa̠tho ra̍ksha dhi̠yaa kri̠taan ॥ a̠nu̠lba̠nam va̍yata̠ jogu̍vaa̠mapo̠ manu̍ rbhava ja̠nayaa̠ daivya̠-njana̎m ॥ mana̍so ha̠vira̍si pra̠jaapa̍te̠rvarno̠ gaatraa̍naa-nte gaatra̠bhaajo̍ bhooyaasma ॥ 6 ॥ (sara̍svatyai̠ svaahaa̠ - manu̠ - strayo̍dasha cha) (a. 2)
i̠me vai sa̠haa-''staa̠-nte vaa̠yurvya̍vaa̠-tte garbha̍madadhaataa̠-ntagm soma̠h praaja̍naya-da̠gnira̍grasata̠ sa e̠ta-mpra̠jaapa̍tiraagne̠ya-ma̠shtaaka̍paalamapashya̠-tta-nnira̍vapa̠-ttenai̠vainaa̍ma̠gneradhi̠ nira̍kreenaa̠-ttasmaa̠dapya̍nyadeva̠tyaa̍maa̠labha̍maana aagne̠yama̠shtaaka̍paala-mpu̠rastaa̠nnirva̍peda̠gnere̠vainaa̠madhi̍ ni̠shkreeyaa-''la̍bhate̠ ya- [yat, vaa̠yurvyavaa̠-] 7
-dvaa̠yurvyavaa̠-ttasmaa̎-dvaaya̠vyaa̍ yadi̠me garbha̠mada̍dhaataa̠-ntasmaa̎-ddyaavaaprithi̠vyaa̍ ya-thsoma̠h praaja̍nayada̠gniragra̍sata̠ tasmaa̍dagneesho̠meeyaa̠ yada̠nayo̎rviya̠tyo-rvaagava̍da̠-ttasmaa̎-thsaarasva̠tee ya-tpra̠jaapa̍tira̠gneradhi̍ ni̠rakree̍naa̠-ttasmaa̎-tpraajaapa̠tyaa saa vaa e̠shaa sa̍rvadeva̠tyaa̍ yada̠jaa va̠shaa vaa̍ya̠vyaa̍maa la̍bheta̠ bhooti̍kaamo vaa̠yurvai kshepi̍shthaa de̠vataa̍ vaa̠yume̠va svena̍ [svena̍, bhaa̠ga̠dheye̠nopa̍ dhaavati̠] 8
bhaaga̠dheye̠nopa̍ dhaavati̠ sa e̠vaina̠-mbhooti̍-ngamayati dyaavaaprithi̠vyaa̍maa la̍bheta kri̠shamaa̍nah prati̠shthaakaa̍mo di̠va e̠vaasmai̍ pa̠rjanyo̍ varshati̠ vya̍syaamosha̍dhayo rohanti sa̠mardhu̍kamasya sa̠sya-mbha̍vatyagneesho̠meeyaa̠maa la̍bheta̠ yah kaa̠maye̠taanna̍vaanannaa̠da-ssyaa̠mitya̠gninai̠vaanna̠mava̍ rundhe̠ some̍naa̠nnaadya̠-manna̍vaane̠vaannaa̠do bha̍vati saarasva̠teemaa la̍bheta̠ ya [yah, ee̠shva̠ro vaa̠cho] 9
ee̎shva̠ro vaa̠cho vadi̍to̠-ssan. vaacha̠-nnavade̠-dvaagvai sara̍svatee̠ sara̍svateeme̠va svena̍ bhaaga̠dheye̠nopa̍ dhaavati̠ saivaasmi̠n. vacha̍-ndadhati praajaapa̠tyaamaa la̍bheta̠ yah kaa̠maye̠taana̍bhijitama̠bhi ja̍yeya̠miti̍ pra̠jaapa̍ti̠-ssarvaa̍ de̠vataa̍ de̠vataa̍bhire̠vaa-na̍bhijitama̠bhi ja̍yati vaaya̠vya̍yo̠paaka̍roti vaa̠yore̠vainaa̍mava̠ruddhyaa-''la̍bhata̠ aakoo̎tyai tvaa̠ kaamaa̍ya̠ tve- [kaamaa̍ya tvaa, ityaa̍ha yathaaya̠ju-] 10
-tyaa̍ha yathaaya̠ju-re̠vaita-tki̍kkitaa̠kaara̍-njuhoti kikkitaakaa̠rena̠ vai graa̠myaah pa̠shavo̍ ramante̠ praa-''ra̠nyaah pa̍tanti̠ ya-tki̍kkitaa̠kaara̍-nju̠hoti̍ graa̠myaanaa̎-mpashoo̠naa-ndhrityai̠ parya̍gnau kri̠yamaa̍ne juhoti̠ jeeva̍nteeme̠vainaagm̍ suva̠rgam lo̠ka-nga̍mayati̠ tva-ntu̠reeyaa̍ va̠shinee̍ va̠shaa-'seetyaa̍ha deva̠traivainaa̎-ngamayati sa̠tyaa-ssa̍ntu̠ yaja̍maanasya̠ kaamaa̠ ityaa̍hai̠sha vai kaamo̠ [vai kaama̍h, yaja̍maanasya̠] 11
yaja̍maanasya̠ yadanaa̎rta u̠dricha̠-ngachchha̍ti̠ tasmaa̍de̠vamaa̍haa̠-'jaa-'si̍ rayi̠shthetyaa̍hai̠ shve̍vainaa̎m lo̠keshu̠ prati̍shthaapayati di̠vi te̍ bri̠hadbhaa ityaa̍ha suva̠rga e̠vaasmai̍ lo̠ke jyoti̍-rdadhaati̠ tantu̍-nta̠nva-nraja̍so bhaa̠numanvi̠heetyaa̍he̠maane̠vaasmai̍ lo̠kaan jyoti̍shmatah karotyanulba̠nam va̍yata̠ jogu̍vaa̠mapa̠ i- [jogu̍vaa̠mapa̠ iti̍, aa̠ha̠ yade̠va] 12
-tyaa̍ha̠ yade̠va ya̠jna u̠lbana̍-nkri̠yate̠ tasyai̠vaishaa shaanti̠rmanu̍rbhava ja̠nayaa̠ daivya̠-njana̠mityaa̍ha maana̠vyo̍ vai pra̠jaastaa e̠vaa-''dyaa̎h kurute̠ mana̍so ha̠vira̠seetyaa̍ha sva̠gaakri̍tyai̠ gaatraa̍naa-nte gaatra̠bhaajo̍ bhooyaa̠smetyaa̍haa̠ ''shisha̍me̠vaitaamaa shaa̎ste̠ tasyai̠ vaa e̠tasyaa̠ eka̍me̠vaa-de̍vayajana̠m myadaala̍bdhaayaa-ma̠bhro [-ma̠bhrah, bhava̍ti̠] 13
bhava̍ti̠ yadaala̍bdhaayaama̠bhra-ssyaada̠phsu vaa̎prave̠shaye̠-thsarvaa̎m vaa̠ praashnee̍yaa̠dyada̠phsu pra̍ve̠shaye̎dyajnavesha̠sa-nku̍ryaa̠-thsarvaa̍me̠va praashnee̍yaadindri̠yame̠vaa-''tma-ndha̍-tte̠ saa vaa e̠shaa tra̍yaa̠naame̠vaava̍ ruddhaa samvathsara̠sada̍-ssahasrayaa̠jino̍ grihame̠dhina̠sta e̠vaitayaa̍ yajera̠-nteshaa̍me̠vaishaa-''ptaa ॥ 14 ॥ (yath - svena̍ - saarasva̠teemaa la̍bheta̠ yah - kaamaa̍ya tvaa̠ - kaamo - 'pa̠ itya̠ - bhro - dvicha̍tvaarigmshachcha) (a. 3)
chi̠tta-ncha̠ chitti̠shchaa ''koo̍ta̠-nchaa-''koo̍tishcha̠ vijna̍ta-ncha vi̠jnaana̍-ncha̠ mana̍shcha̠ shakva̍reeshcha̠ darsha̍shcha poo̠rnamaa̍sashcha bri̠hachcha̍ rathanta̠ra-ncha̍ pra̠jaapa̍ti̠rjayaa̠nindraa̍ya̠ vrishne̠ praaya̍chchhadu̠grah pri̍ta̠naajye̍shu̠ tasmai̠ visha̠-ssama̍namanta̠ sarvaa̠-ssa u̠gra-ssahi havyo̍ ba̠bhoova̍devaasu̠raa-ssamya̍ttaa aasa̠nthsa indra̍h pra̠jaapa̍ti̠mupaa̍ dhaava̠-ttasmaa̍ e̠taanjayaa̠-npraaya̍chchha̠-ttaana̍juho̠-ttato̠ vai de̠vaa asu̍raanajaya̠n̠. yadaja̍ya̠-ntajjayaa̍naa-njaya̠tvagg spardha̍maanenai̠te ho̍ta̠vyaa̍ jaya̍tye̠va taa-mprita̍naam ॥ 15 ॥ (upa̠ - pancha̍vigmshatishcha) (a. 4)
a̠gnirbhoo̠taanaa̠madhi̍pati̠-ssamaa̍-'va̠tvindro̎ jye̠shthaanaa̎m ya̠mah pri̍thi̠vyaa vaa̠yura̠ntari̍kshasya̠ sooryo̍di̠vashcha̠ndramaa̠ naksha̍traanaa̠-mbriha̠spati̠rbrahma̍no mi̠tra-ssa̠tyaanaa̠m varu̍no̠-'paagm sa̍mu̠dra-ssro̠tyaanaa̠manna̠gm̠ saamraa̎jyaanaa̠madhi̍pati̠ tanmaa̍-'vatu̠ soma̠ osha̍dheenaagm savi̠taa pra̍sa̠vaanaagm̍ ru̠drah pa̍shoo̠naa-ntvashtaa̍ roo̠paanaa̠m vishnu̠h parva̍taanaa-mma̠ruto̍ ga̠naanaa̠madhi̍pataya̠ste maa̍vantu̠ pita̍rah pitaamahaah pare-'vare̠ tataa̎stataamahaa i̠ha maa̍-'vata । a̠smi-nbrahma̍nna̠smin ksha̠tre̎-'syaa-maa̠shishya̠syaa-mpu̍ro̠dhaayaa̍ma̠smin-karma̍nna̠syaa-nde̠vahoo̎tyaam ॥ 16 ॥ (a̠va̠re̠ - sa̠ptada̍sha cha) (a. 5)
de̠vaa vai yadya̠jne-'ku̍rvata̠ tadasu̍raa akurvata̠ te de̠vaa e̠taana̍bhyaataa̠naana̍pashya̠n- taana̠bhyaata̍nvata̠ yadde̠vaanaa̠-nkarmaa-''see̠daardhya̍ta̠ tadyadasu̍raanaa̠-nna tadaa̎rdhyata̠ yena̠ karma̠nerthse̠-ttatra̍ hota̠vyaa̍ ri̠ddhnotye̠va tena̠ karma̍naa̠ yadvishve̍ de̠vaa-ssa̠mabha̍ra̠-ntasmaa̍-dabhyaataa̠naa vai̎shvade̠vaayat-pra̠jaapa̍ti̠rjayaa̠-npraaya̍chchha̠-ttasmaa̠jjayaa̎h praajaapa̠tyaa [praajaapa̠tyaah, ya-draa̎shtra̠bhridbhee̍] 17
ya-draa̎shtra̠bhridbhee̍ raa̠shtramaa-'da̍data̠ ta-draa̎shtra̠bhritaagm̍ raashtrabhri̠ttva-nte de̠vaa a̍bhyaataa̠nairasu̍raana̠bhyaata̍nvata̠ jayai̍rajayan-raashtra̠bhridbhee̍ raa̠shtramaa-'da̍data̠ yadde̠vaa a̍bhyaataa̠nairasu̍raana̠bhyaata̍nvata̠ tada̍bhyaataa̠naanaa̍mabhyaataana̠tvam yajjayai̠raja̍ya̠-ntajjayaa̍naa-njaya̠tvam ya-draa̎shtra̠bhridbhee̍ raa̠shtramaa-'da̍data̠ ta-draa̎shtra̠bhritaagm̍ raashtrabhri̠ttva-ntato̍ de̠vaa abha̍va̠-nparaa-'su̍raa̠ yo bhraatri̍vyavaa̠n-thsyaa-thsa e̠taan ju̍huyaadabhyaataa̠naire̠va bhraatri̍vyaana̠bhyaata̍nute̠ jayai̎rjayati raashtra̠bhridbhee̍ raa̠shtramaa da̍tte̠ bhava̍tyaa̠tmanaa̠ paraa̎-'sya̠ bhraatri̍vyo bhavati ॥ 18 ॥ (praa̠jaa̠pa̠tyaah-so̎-'-shtaa da̍sha cha) (a. 6)
ri̠taa̠shaa-dri̠tadhaa̍maa̠-'gni-rga̍ndha̠rvasta-syausha̍dhayo-'phsa̠rasa̠ oorjo̠ naama̠ sa i̠da-mbrahma̍ ksha̠tra-mpaa̍tu̠ taa i̠da-mbrahma̍ ksha̠tra-mpaa̎mtu̠ tasmai̠ svaahaa̠ taabhya̠-ssvaahaa̍ sagmhi̠to vi̠shvasaa̍maa̠ sooryo̍ gandha̠rva-stasya̠ maree̍chayo-'phsa̠rasa̍ aa̠yuva̍-ssushu̠mna-ssoorya̍ rashmi-shcha̠ndramaa̍ gandha̠rva-stasya̠ naksha̍traanya-phsa̠raso̍ be̠kura̍yobhu̠jyu-ssu̍pa̠rno ya̠jno ga̍ndha̠rva-stasya̠ dakshi̍naa apsa̠rasa̍-ssta̠vaah pra̠jaapa̍ti-rvi̠shvaka̍rmaa̠ mano̍ [mana̍h, ga̠ndha̠rvastasya̍-rkhsaa̠maanya̍-phsa̠raso̠] 19
gandha̠rvastasya̍-rkhsaa̠maanya̍-phsa̠raso̠ vahna̍yaishi̠ro vi̠shvavya̍chaa̠ vaato̍ gandha̠rva-stasyaa-''po̎ 'phsa̠raso̍ mu̠daabhuva̍nasya pate̠ yasya̍ta u̠pari̍ gri̠haa i̠ha cha̍ । sa no̍ raa̠svaajyaa̍nigm raa̠yasposhagm̍ su̠veeryagm̍ samvathsa̠reenaag̍ sva̠stim ॥ pa̠ra̠me̠shthyadhi̍pati-rmri̠tyu-rga̍ndha̠rva-stasya̠ vishva̍mapsa̠raso̠ bhuva̍-ssukshi̠tih- subhoo̍ti-rbhadra̠kri-thsuva̍rvaa-npa̠rjanyo̍ gandha̠rva-stasya̍ vi̠dyuto̎ 'phsa̠raso̠ rucho̍ doo̠re he̍ti-ramrida̠yo [doo̠re he̍ti-ramrida̠yah, mri̠tyurga̍ndha̠rva-stasya̍] 20
mri̠tyurga̍ndha̠rva-stasya̍ pra̠jaa a̍phsa̠raso̍ bhee̠ruva̠shcharu̍h kripana kaa̠shee kaamo̍ gandha̠rva-stasyaa̠dhayo̎ 'phsa̠rasa̍-shsho̠chaya̍ntee̠rnaama̠ sa i̠da-mbrahma̍ ksha̠tra-mpaa̍ta̠ taa i̠da-mbrahma̍ ksha̠tra-mpaa̎mtu̠ tasmai̠ svaahaa̠ taabhya̠-ssvaahaa̠ sa no̍ bhuvanasya pate̠ yasya̍ta u̠pari̍ gri̠haa i̠ha cha̍ । u̠ru bra̠hma̍ne̠-'smai ksha̠traaya̠ mahi̠ sharma̍ yachchha ॥ 21 ॥ (mano̍ - 'mrida̠yah - shatcha̍tvaarigmshachcha) (a. 7)
raa̠shtrakaa̍maaya hota̠vyaa̍ raa̠shtram vai raa̎shtra̠bhrito̍ raa̠shtrenai̠vaasmai̍ raa̠shtramava̍ rundhe raa̠shtrame̠va bha̍vatyaa̠tmane̍ hota̠vyaa̍ raa̠shtram vai raa̎shtra̠bhrito̍ raa̠shtra-mpra̠jaa raa̠shtra-mpa̠shavo̍ raa̠shtram yachchhreshtho̠ bhava̍ti raa̠shtrenai̠va raa̠shtramava̍ rundhe̠ vasi̍shtha-ssamaa̠naanaa̎-mbhavati̠ graama̍kaamaaya hota̠vyaa̍ raa̠shtram vai raa̎shtra̠bhrito̍ raa̠shtragm sa̍jaa̠taa raa̠shtrenai̠vaasmai̍ raa̠shtragm sa̍jaa̠taanava̍ rundhe graa̠- [rundhe graa̠mee, e̠va bha̍vatyadhi̠deva̍ne] 22
-mye̍va bha̍vatyadhi̠deva̍ne juhotyadhi̠deva̍na e̠vaasmai̍ sajaa̠taanava̍ rundhe̠ ta e̍na̠mava̍ruddhaa̠ upa̍ tishthante rathamu̠kha oja̍skaamasya hota̠vyaa̍ ojo̠ vai raa̎shtra̠bhrita̠ ojo̠ ratha̠ oja̍sai̠vaasmaa̠ ojo-'va̍ rundha oja̠svye̍va bha̍vati̠ yo raa̠shtraadapa̍bhoota̠-ssyaa-ttasmai̍ hota̠vyaa̍ yaava̍nto-'sya̠ rathaa̠-ssyustaa-nbroo̍yaa-dyu̠ndhvamiti̍ raa̠shtrame̠vaa-'smai̍ yuna̠- [raa̠shtrame̠vaa-'smai̍ yunakti, aahu̍tayo̠ vaa] 23
-ktyaahu̍tayo̠ vaa e̠tasyaakLi̍ptaa̠ yasya̍ raa̠shtra-nna kalpa̍te svara̠thasya̠ dakshi̍na-ncha̠kra-mpra̠vrihya̍ naa̠deema̠bhi ju̍huyaa̠daahu̍teere̠vaasya̍ kalpayati̠ taa a̍sya̠ kalpa̍maanaa raa̠shtramanu̍ kalpate sangraa̠me samya̍tte hota̠vyaa̍ raa̠shtram vai raa̎shtra̠bhrito̍ raa̠shtre khalu̠ vaa e̠te vyaaya̍chchhante̠ ye sa̍ngraa̠magm sa̠m yanti̠ yasya̠ poorva̍sya̠ juhva̍ti̠ sa e̠va bha̍vati̠ jaya̍ti̠ tagm sa̍graa̠mma-mmaa̎mdhu̠ka i̠ddhmo [i̠ddhmah, bha̠va̠tyangaa̍raa] 24
bha̍va̠tyangaa̍raa e̠va pra̍ti̠veshta̍maanaa a̠mitraa̍naamasya̠ senaa̠-mprati̍veshtayanti̠ ya u̠nmaadye̠-ttasmai̍ hota̠vyaa̍ gandharvaaphsa̠raso̠ vaa e̠tamunmaa̍dayanti̠ ya u̠nmaadya̍tye̠te khalu̠ vai ga̍ndharvaaphsa̠raso̠ yadraa̎shtra̠bhrita̠stasmai̠ svaahaa̠ taabhya̠-ssvaaheti̍ juhoti̠ tenai̠vainaa̎mchhamayati̠ naiya̍grodha̠ audu̍mbara̠ aashva̍ttha̠h plaaksha̠ itee̠ddhmo bha̍vatye̠te vai ga̍ndharvaaphsa̠rasaa̎-ngri̠haa-ssva e̠vainaa̍- [e̠vainaan̍, aa̠yata̍ne] 25
-naa̠yata̍ne shamayatyabhi̠chara̍taa pratilo̠magm ho̍ta̠vyaa̎h praa̠naane̠vaasya̍ pra̠teecha̠h prati̍ yauti̠ ta-ntato̠ yena̠ kena̍ cha strinute̠ svakri̍ta̠ iri̍ne juhoti prada̠re vai̠tadvaa a̠syai nir-ri̍tigriheeta̠-nnir-ri̍tigriheeta e̠vaina̠-nnir-ri̍tyaa graahayati̠ yadvaa̠chah kroo̠ra-ntena̠ vasha̍-tkaroti vaa̠cha e̠vaina̍-nkroo̠rena̠ pravri̍shchati taa̠jagaarti̠maarchchha̍ti̠ yasya̍ kaa̠maye̍taa̠nnaadya̠- [kaa̠maye̍taa̠nnaadya̎m, aa da̍dee̠yeti̠] 26
-maa da̍dee̠yeti̠ tasya̍ sa̠bhaayaa̍muttaa̠no ni̠padya̠ bhuva̍nasya pata̠ iti̠ trinaa̍ni̠ sa-ngri̍hneeyaa-tpra̠jaapa̍ti̠rvai bhuva̍nasya̠ pati̍h pra̠jaapa̍tinai̠vaasyaa̠nnaadya̠maa da̍tta i̠dama̠hama̠mushyaa̍ ''mushyaaya̠nasyaa̠nnaadyagm̍ haraa̠meetyaa̍haa̠nnaadya̍me̠vaasya̍ harati sha̠dbhirha̍rati̠ shadvaa ri̠tava̍h pra̠jaapa̍tinai̠vaasyaa̠-nnaadya̍maa̠daaya̠rtavo̎ 'smaa̠ anu̠ praya̍chchhanti̠ [praya̍chchhanti, yo jye̠shthaba̍ndhu̠-] 27
yo jye̠shthaba̍ndhu̠-rapa̍ bhoota̠-ssyaa-ttaggsthale̍-'va̠saayya̍ brahmauda̠na-nchatu̍-shsharaava-mpa̠ktvaa tasmai̍ hota̠vyaa̍ varshma̠ vai raa̎shtra̠bhrito̠ vashma̠ sthala̠m varshma̍nai̠vaina̠m vashma̍ samaa̠naanaa̎-ngamayati̠ chatu̍-shsharaavo bhavati di̠kshve̍va prati̍tishthati kshee̠re bha̍vati̠ rucha̍me̠vaasmi̍-ndadhaa̠tyuddha̍rati shrita̠tvaaya̍ sa̠rpishvaa̎-nbhavati meddhya̠tvaaya̍ cha̠tvaara̍ aarshe̠yaah praa-'shna̍nti di̠shaame̠va jyoti̍shi juhoti ॥ 28 ॥ (graa̠mee - yu̍naktee̠ - dhmah - sva e̠vainaa̍ - na̠nnaadya̍m - myachchha̠ntye - kaa̠nna pa̍nchaa̠shachcha̍) (a. 8)
devi̍kaa̠ niva̍rpe-tpra̠jaakaa̍ma̠shchhandaagm̍si̠ vai devi̍kaa̠shchhandaagm̍seeva̠ khalu̠ vai pra̠jaashchhando̍bhire̠vaasmai̎ pra̠jaah praja̍nayati pratha̠ma-ndhaa̠taara̍-nkaroti mithu̠nee e̠va tena̍ karo̠tyanve̠vaasmaa̠ anu̍matirmanyate raa̠te raa̠kaa pra si̍neevaa̠lee ja̍nayati pra̠jaasve̠va prajaa̍taasu ku̠hvaa̍ vaacha̍-ndadhaatye̠taa e̠va niva̍rpe-tpa̠shukaa̍ma̠shchhandaagm̍si̠ vai devi̍kaa̠shchhandaagm̍see- [devi̍kaa̠shchhandaagm̍si, i̠va̠ khalu̠ vai] 29
-va̠ khalu̠ vai pa̠shava̠shchhando̍bhire̠vaasmai̍ pa̠shoo-npraja̍nayati pratha̠ma-ndhaa̠taara̍-nkaroti̠ praiva tena̍ vaapaya̠tyanve̠vaasmaa̠ anu̍matirmanyate raa̠te raa̠kaa pra si̍neevaa̠lee ja̍nayati pa̠shoone̠va prajaa̍taan ku̠hvaa̎ prati̍shthaapayatye̠taa e̠va nirva̍pe̠-dgraama̍kaama̠shchhandaagm̍si̠ vai devi̍kaa̠shchhandaagm̍see va̠ khalu̠ vai graama̠shchhando̍bhire̠vaasmai̠ graama̠- [graama̎m, ava̍ rundhe] 30
-mava̍ rundhe maddhya̠to dhaa̠taara̍-nkaroti maddhya̠ta e̠vaina̠-ngraama̍sya dadhaatye̠taa e̠va nirva̍pe̠jjyogaa̍mayaavee̠ chhandaagm̍si̠ vai devi̍kaa̠shchhandaagm̍si̠ khalu̠ vaa e̠tama̠bhi ma̍nyante̠ yasya̠ jyogaa̠maya̍ti̠ chhando̍bhire̠vaina̍-maga̠da-nka̍roti maddhya̠to dhaa̠taara̍-nkaroti maddhya̠to vaa e̠tasyaakLi̍pta̠m yasya̠ jyogaa̠maya̍ti maddhya̠ta e̠vaasya̠ tena̍ kalpayatye̠taa e̠va ni- [ e̠va nih, va̠pe̠dyam ya̠jno] 31
-rva̍pe̠dyam ya̠jno nopa̠name̠chchhandaagm̍si̠ vai devi̍kaa̠shchhandaagm̍si̠ khalu̠ vaa e̠ta-nnopa̍ namanti̠ yam ya̠jno nopa̠nama̍ti pratha̠ma-ndhaa̠taara̍-nkaroti mukha̠ta e̠vaasmai̠ chhandaagm̍si dadhaa̠tyupai̍nam ya̠jno na̍matye̠taa e̠va niva̍rpedeejaa̠nashchhandaagm̍si̠ vai devi̍kaa yaa̠tayaa̍maaneeva̠ khalu̠ vaa e̠tasya̠ chhandaagm̍si̠ ya ee̍jaa̠na u̍tta̠ma-ndhaa̠taara̍-nkaro- [u̍tta̠ma-ndhaa̠taara̍-nkaroti, u̠pari̍shtaade̠vaasmai̠] 32
-tyu̠pari̍shtaade̠vaasmai̠ chhandaa̠g̠syayaa̍tayaamaa̠nyava̍ rundha̠ upai̍na̠mutta̍ro ya̠jno na̍matye̠taa e̠va niva̍rpe̠dya-mme̠dhaa nopa̠name̠chchhandaagm̍si̠ vai devi̍kaa̠shchhandaagm̍si̠ khalu̠ vaa e̠ta-nnopa̍ namanti̠ ya-mme̠dhaa nopa̠nama̍ti pratha̠ma-ndhaa̠taara̍-nkaroti mukha̠ta e̠vaasmai̠ chhandaagm̍si dadhaa̠tyupai̍na-mme̠dhaa na̍matye̠taa e̠va niva̍rpe̠- [niva̍rpet, rukkaa̍ma̠shchhandaagm̍si̠ vai] 33
-drukkaa̍ma̠shchhandaagm̍si̠ vai devi̍kaa̠shchhandaagm̍seeva̠ khalu̠ vai ruk chhando̍bhire̠vaasmi̠-nrucha̍-ndadhaatikshee̠re bha̍vanti̠ rucha̍me̠vaasmi̍-ndadhati maddhya̠to dhaa̠taara̍-nkaroti maddhya̠ta e̠vainagm̍ ru̠cho da̍dhaatigaaya̠tree vaa anu̍matistri̠shtugraa̠kaa jaga̍tee sineevaa̠lya̍nu̠shtup ku̠hoordhaa̠taa va̍shatkaa̠rah poo̎rvapa̠ksho raa̠kaa-'pa̍rapa̠kshah ku̠hoora̍maavaa̠syaa̍ sineevaa̠lee pau̎rnamaa̠syanu̍matishcha̠ndramaa̍ dhaa̠taa-'shtau [ ] 34
vasa̍vo̠-'shtaaksha̍raa gaaya̠tryekaa̍dasha ru̠draa ekaa̍dashaaksharaa tri̠shtub dvaada̍shaa-''di̠tyaa dvaada̍shaaksharaa̠ jaga̍tee pra̠jaapa̍tiranu̠shtub dhaa̠taa va̍shatkaa̠ra e̠tadvai devi̍kaa̠-ssarvaa̍ni cha̠ chhandaagm̍si̠ sarvaa̎shcha de̠vataa̍ vashatkaa̠rastaa ya-thsa̠ha sarvaa̍ ni̠rvape̍deeshva̠raa e̍na-mpra̠daho̠ dve pra̍tha̠me ni̠rupya̍ dhaa̠tustri̠teeya̠-nniva̍rpe̠-ttatho̍ e̠votta̍re̠ niva̍rpe̠-ttathai̍na̠-nna prada̍ha̠ntya tho̠ yasmai̠ kaamaa̍ya niru̠pyante̠ tame̠vaa-''bhi̠rupaa̎-''pnoti ॥ 35 ॥ (pa̠shukaa̍ma̠shchhandaagm̍si̠ vai devi̍kaa̠shchhandaagm̍si̠-graama̍m-kalpayatye̠taa e̠va ni-ru̍tta̠mandhaa̠taara̍-nkaroti - me̠dhaa na̍matye̠taa e̠va nirva̍pe - da̠shtau - da̍hanti̠ - nava̍ cha) (a. 9) (devi̍kaah pra̠jaakaa̍mo mithu̠nee pa̠shukaa̍ma̠h praiva graama̍kaamo̠ jyogaa̍mayaavee̠ yam ya̠jno ya ee̍jaa̠no ya-mme̠dhaa rukkaa̍mo̠-'shtau । devi̍kaa bhavanti dadhati raa̠shtrakaa̍maaya bhavati dadhaati ।)
vaasto̎shpate̠ prati̍ jaanee hya̠smaan-thsvaa̍ve̠sho a̍namee̠vo bha̍vaanah । ya-ttvema̍he̠ prati̠tanno̍ jushasva̠ shanna̍ edhi dvi̠pade̠ shanchatu̍shpade ॥ vaasto̎shpate sha̠gmayaa̍ sa̠gm̠ sadaa̍te sakshee̠mahi̍ ra̠nvayaa̍ gaatu̠matyaa̎ । aava̠h, kshema̍ u̠ta yoge̠ vara̍nno yoo̠ya-mpaa̍ta sva̠stibhi̠-ssadaa̍nah ॥ ya-thsaa̠ya-mpraa̍taragniho̠tra-nju̠hotyaa̍huteeshta̠kaa e̠va taa upa̍ dhatte̠ [taa upa̍ dhatte, yaja̍maano-'horaa̠traani̠] 36
yaja̍maano-'horaa̠traani̠ vaa e̠tasyeshta̍kaa̠ ya aahi̍taagni̠rya-thsaa̠ya-mpraa̍tarju̠hotya̍horaa̠traanye̠vaa ''ptveshta̍kaah kri̠tvopa̍ dhatte̠ dasha̍ samaa̠natra̍ juhoti̠ dashaa̎ksharaa vi̠raa-dvi̠raaja̍me̠vaa-''ptveshta̍kaa-nkri̠tvopa̍ dha̠tte-'tho̍ vi̠raajye̠va ya̠jnamaa̎pnoti̠ chitya̍shchityo-'sya bhavati̠ tasmaa̠dyatra̠ dasho̍shi̠tvaa pra̠yaati̠ ta-dya̍jnavaa̠stvavaa̎stve̠va tadya-ttato̎-'rvaa̠cheenagm̍ [tadya-ttato̎-'rvaa̠cheena̎m, ru̠drah khalu̠ vai] 37
ru̠drah khalu̠ vai vaa̎stoshpa̠tiryadahu̍tvaa vaastoshpa̠teeya̍-mprayaa̠yaa-dru̠dra e̍na-mbhoo̠tvaa-'gnira̍noo̠tthaaya̍ hanyaadvaastoshpa̠teeya̍-njuhoti bhaaga̠dheye̍nai̠vainagm̍ shamayati̠ naa-''rti̠maarchchha̍ti̠ yaja̍maano̠ yadyu̠kte ju̍hu̠yaadyathaa̠ prayaa̍te̠ vaastaa̠vaahu̍ti-nju̠hoti̍ taa̠drige̠va tadyadayu̍kte juhu̠yaadyathaa̠ kshema̠ aahu̍ti-nju̠hoti̍ taa̠drige̠va tadahu̍tamasya vaastoshpa̠teeyagg̍ syaa̠- [syaat, dakshi̍no] 38
-ddakshi̍no yu̠kto bhava̍ti sa̠vyo-'yu̠kto-'tha̍ vaastoshpa̠teeya̍-njuhotyu̠bhaya̍me̠vaa-' ka̠rapa̍rivargame̠vainagm̍ shamayati̠ yadeka̍yaa juhu̠yaadda̍rviho̠ma-nku̍ryaa-tpuro-'nuvaa̠kyaa̍ ma̠noochya̍ yaa̠jya̍yaa juhoti sadeva̠tvaaya̠ yaddhu̠ta aa̍da̠ddhyaa-dru̠dra-ngri̠haana̠nvaaro̍haye̠-dyada̍va̠kshaanaa̠nyasa̍-mprakshaapya prayaa̠yaadyathaa̍ yajnavesha̠sam vaa̠-''daha̍nam vaa taa̠drige̠va tada̠yante̠ yoni̍r-ri̠tviya̠ itya̠ranyo̎-ssa̠maaro̍haya- [itya̠ranyo̎-ssa̠maaro̍hayati, e̠sha vaa] 39
-tye̠sha vaa a̠gneryoni̠-ssva e̠vaina̠m yonau̍ sa̠maaro̍haya̠tyatho̠ khalvaa̍hu̠ryada̠ranyo̎-ssa̠maaroo̍dho̠ nashye̠duda̍syaa̠gni-ssee̍de-tpunaraa̠dheya̍-ssyaa̠diti̠ yaa te̍ agne ya̠jniyaa̍ ta̠noostayehyaa ro̠hetyaa̠tman-thsa̠maaro̍hayate̠ yaja̍maano̠ vaa a̠gneryoni̠-ssvaayaa̍me̠vaina̠m yonyaagm̍ sa̠maaro̍hayate ॥ 40 ॥ (dha̠tte̠-'rvaa̠cheenagg̍ -syaa-thsa̠maaro̍hayati̠ -pancha̍chatvaarigmshachcha) (a. 10)
tvama̍gne bri̠hadvayo̠ dadhaa̍si deva daa̠shushe̎ । ka̠virgri̠hapa̍ti̠ryuvaa̎ ॥ ha̠vya̠vaada̠gnira̠jara̍h pi̠taa no̍ vi̠bhurvi̠bhaavaa̍ su̠drishee̍ko a̠sme । su̠gaa̠r̠ha̠pa̠tyaa-ssamisho̍ dideehyasma̠driya̠khsa-mmi̍meehi̠ shravaagm̍si ॥ tva-ncha̍ soma no̠ vasho̍ jee̠vaatu̠-nna ma̍raamahe । pri̠yasto̎tro̠ vana̠spati̍h ॥ bra̠hmaa de̠vaanaa̎-mpada̠veeh ka̍vee̠naamrishi̠rvipraa̍naa-mmahi̠sho mri̠gaanaa̎m । shye̠no griddhraa̍naa̠g̠ svadhi̍ti̠ rvanaa̍naa̠gm̠ soma̍h [soma̍h, pa̠vitra̠matye̍ti̠] 41
pa̠vitra̠matye̍ti̠ rebhann̍ ॥ aa vi̠shvade̍va̠gm̠ satpa̍tigm soo̠ktaira̠dyaa vri̍neemahe । sa̠tyasa̍vagm savi̠taara̎m ॥ aasa̠tyena̠ raja̍saa̠ varta̍maano nive̠shaya̍nna̠mrita̠-mmartya̍ncha । hi̠ra̠nyaye̍na savi̠taa rathe̠naa-'' de̠voyaa̍ti̠ bhuva̍naa vi̠pashyann̍ ॥ yathaa̍ no̠ adi̍ti̠h kara̠-tpashve̠ nribhyo̠ yathaa̠ gave̎ । yathaa̍ to̠kaaya̍ ru̠driya̎m ॥ maa na̍sto̠ke tana̍ye̠ maa na̠ aayu̍shi̠ maa no̠ goshu̠ maa [ ] 42
no̠ ashve̍shu reerishah । vee̠raa-nmaano̍ rudra bhaami̠to va̍dheerha̠vishma̍nto̠ nama̍saa vidhema te ॥ u̠da̠pruto̠ na vayo̠ raksha̍maanaa̠ vaava̍dato a̠bhriya̍syeva̠ ghoshaa̎h । gi̠ri̠bhrajo̠ normayo̠ mada̍nto̠ briha̠spati̍ma̠bhya̍rkaa a̍naavann ॥ ha̠gm̠sairi̍va̠ sakhi̍bhi̠rvaava̍dadbhirashma̠n- mayaa̍ni̠ naha̍naa̠ vyasyann̍ । briha̠spati̍rabhi̠kani̍krada̠dgaa u̠ta praastau̠duchcha̍ vi̠dvaagm a̍gaayat ॥ endra̍ saana̠sigm ra̠yigm [ra̠yim, sa̠jitvaa̍nagm sadaa̠saha̎m ।] 43
sa̠jitvaa̍nagm sadaa̠saha̎m । varshi̍shthamoo̠taye̍ bhara ॥ pra sa̍saahishe puruhoota̠ shatroo̠n jyeshtha̍ste̠ shushma̍ i̠ha raa̠tira̍stu । indraa-'' bha̍ra̠ dakshi̍nenaa̠ vasoo̍ni̠ pati̠-ssindhoo̍naamasi re̠vatee̍naam ॥ tvagm su̠tasya̍ pee̠taye̍ sa̠dyo vri̠ddho a̍jaayathaah । indra̠ jyaishthyaa̍ya sukrato ॥ bhuva̠stvami̍ndra̠ brahma̍naa ma̠haa-nbhuvo̠ vishve̍shu̠ sava̍neshu ya̠jniya̍h । bhuvo̠ nreegshchyau̠tno vishva̍smi̠-nbhare̠ jyeshtha̍shcha̠ mantro̍ [mantra̍h, vi̠shva̠cha̠rsha̠ne̠ ।] 44
vishvacharshane ॥ mi̠trasya̍ charshanee̠dhrita̠-shshravo̍ de̠vasya̍ saana̠sim । sa̠tya-nchi̠tra shra̍vastamam ॥ mi̠tro janaan̍ yaatayati prajaa̠na-nmi̠tro daa̍dhaara prithi̠veemu̠ta dyaam । mi̠trah kri̠shteerani̍mishaa̠-'bhi cha̍shte sa̠tyaaya̍ ha̠vya-nghri̠tava̍-dvidhema ॥ prasami̍tra̠ marto̍ astu̠ praya̍svaa̠n̠. yasta̍ aaditya̠ shiksha̍ti vra̠tena̍ । na ha̍nyate̠ na jee̍yate̠ tvoto̠ naina̠magmho̍ ashno̠tyanti̍to̠ na doo̠raat ॥ ya- [yat, chi̠ddhi te̠ visho̍] 45
-chchi̠ddhi te̠ visho̍ yathaa̠ prade̍va varuna vra̠tam । mi̠nee̠masi̠ dyavi̍dyavi ॥ ya-tkinche̠dam va̍runa̠ daivye̠ jane̍-'bhidro̠ha-mma̍nu̠shyaa̎shcharaa̍masi । achi̍ttee̠ya-ttava̠ dharmaa̍ yuyopi̠mamaa na̠stasmaa̠ dena̍so deva reerishah ॥ ki̠ta̠vaaso̠ yadri̍ ri̠purna dee̠vi yadvaa̍ ghaa sa̠tya mu̠tayanna vi̠dma । sarvaa̠ taa vishya̍ shithi̠re va̍ de̠vaathaa̍ te syaama varuna pri̠yaasa̍h ॥ 46 ॥ (somo̠-goshu̠ maa- ra̠yim - mantro̠ -ya-chchhi̍thi̠raa-sa̠pta cha̍ ) (a. 11)
(vi vaa e̠tasyaa - ''vaa̍yo - i̠me vai - chi̠ttanchaa̠ - 'gnirbhoo̠taanaa̎m - de̠vaa vaa a̍bhyaataa̠naa - nri̍taa̠shaad - raa̠shtrakaa̍maaya̠ - devi̍kaa̠ - vaasto̎shpate̠ - tvama̍gne bri̠ha - dekaa̍dasha )
(vi vaa e̠tasye - tyaa̍ha - mri̠tyurga̍ndha̠rvo - 'va̍ rundhe maddhya̠ta - stvama̍gne bri̠hath - shatcha̍tvaarigmshat)
(vi vaa e̠tasya̍, pri̠yaasa̍h )
॥ hari̍h om ॥
॥ krishna yajurvedeeya taittireeya samhitaayaa-ntriteeyakaande chaturthah prashna-ssamaaptah ॥
3.4 - ವಿ ವಾ ಏತಸ್ಯ ಯಜ್ಞಃ - ಕೃಷ್ಣ ಯಜುರ್ವೇದ ತೈತ್ತಿರೀಯ ಸಂಹಿತಾ ಪಾಠಃ ಬಗ್ಗೆ
ಇದು ಕೃಷ್ಣಯಜುರ್ವೇದ ತೈತ್ತಿರೀಯ ಸಂಹಿತೆಯ ಮೂರನೇ ಕಾಂಡದ ನಾಲ್ಕನೇ ಪ್ರಶ್ನ; ತಪ್ಪಿದ ಯಜ್ಞವನ್ನು ಸರಿಪಡಿಸುವ ಇಷ್ಟಿಹೋಮಗಳ ಕುರಿತದ್ದು. "ಇವನ ಯಜ್ಞ ಭಗ್ನವಾಗಿದೆ (ವಿ ವಾ ಏತಸ್ಯ ಯಜ್ಞಃ)..." ಎಂದು ಆರಂಭವಾಗಿ, ಯಾವ ಆಹುತಿಗಳು, ಯಾವ ದೇವತೆಗಳಿಗೆ, ಯಾವ ಮಂತ್ರಗಳಿಂದ ಅದನ್ನು ಮರುಸ್ಥಾಪಿಸುತ್ತವೆ ಎಂದು ವಿವರಿಸುತ್ತದೆ; ಯಜಮಾನ ಕರ್ಮಫಲ ಕಳೆದುಕೊಳ್ಳದಂತೆ.
ಮೂಲ: ಕೃಷ್ಣಯಜುರ್ವೇದ, ತೈತ್ತಿರೀಯ ಸಂಹಿತೆ 3.4
ಯಾವಾಗ ಪಠಿಸಬೇಕು: ವೇದಪಠಣದಲ್ಲಿ ಮತ್ತು ತೈತ್ತಿರೀಯ ಸಂಹಿತೆಯ ಸಾಂಪ್ರದಾಯಿಕ ಅಧ್ಯಯನದಲ್ಲಿ.
ನಿಮಗೆ ಗೊತ್ತೇ?
- ಇಂಥ ಪ್ರಾಯಶ್ಚಿತ್ತ ಆಹುತಿಗಳು ಪ್ರತಿ ವೈದಿಕ ಕರ್ಮವನ್ನು ಸರಿಯಾಗಿ ಪೂರ್ಣಗೊಳಿಸುವ ಎಚ್ಚರವನ್ನು ತೋರುತ್ತವೆ.
- ಮೂರನೇ ಕಾಂಡ ಮುಖ್ಯವಾಗಿ ಸೋಮಯಾಗದ ಪರಿಹಾರ ಪೂರಕ ಕರ್ಮಗಳ ಕುರಿತದ್ದು.
ಪದೇ ಪದೇ ಕೇಳುವ ಪ್ರಶ್ನೆಗಳು
ಇಲ್ಲಿ ಇಷ್ಟಿಹೋಮಗಳು ಏಕೆ?
ತಪ್ಪಿದ ಯಜ್ಞವನ್ನು ಸರಿಪಡಿಸಲು.
ಇದು ಯಾವ ವೇದದಿಂದ?
ಕೃಷ್ಣಯಜುರ್ವೇದ, ತೈತ್ತಿರೀಯ ಸಂಹಿತೆ 3.4.
ಪ್ರಶ್ನ ಎಂದರೇನು?
ವೇದಪಠ್ಯದ ಒಂದು ಅಧ್ಯಾಯ.
ಆರಾಧನೆ ಮತ್ತು ಅಧ್ಯಯನಕ್ಕಾಗಿ ನೀಡಲಾಗಿದೆ, ಭವಿಷ್ಯವಾಣಿಯಾಗಿ ಅಲ್ಲ. ವಾಣಿಜ್ಯೇತರ.
ಇನ್ನಷ್ಟು ಭಕ್ತಿ ಪಠ್ಯಗಳು