MuhurtaNow

ദശാവതാര സ്തോത്രമ് (വേദാംതാചാര്യ കൃതമ്)

Vishnu · പരമ്പരാഗത ഭക്തിഗ്രന്ഥം

ദേവോ നശ്ശുഭമാതനോതു ദശധാ നിർവര്തയന്ഭൂമികാം രംഗേ ധാമനി ലബ്ധനിര്ഭരരസൈരധ്യക്ഷിതോ ഭാവുകൈഃ । യദ്ഭാവേഷു പൃഥഗ്വിധേഷ്വനുഗുണാന്ഭാവാന്സ്വയം ബിഭ്രതീ യദ്ധര്മൈരിഹ ധര്മിണീ വിഹരതേ നാനാകൃതിര്നായികാ ॥ 1 ॥

നിര്മഗ്നശ്രുതിജാലമാര്ഗണദശാദത്തക്ഷണൈർവീക്ഷണൈ- രംതസ്തന്വദിവാരവിംദഗഹനാന്യൌദന്വതീനാമപാമ് । നിഷ്പ്രത്യൂഹതരംഗരിംഖണമിഥഃ പ്രത്യൂഢപാഥശ്ഛടാ- ഡോലാരോഹസദോഹളം ഭഗവതോ മാത്സ്യം വപുഃ പാതു നഃ ॥ 2 ॥

അവ്യാസുര്ഭുവനത്രയീമനിഭൃതം കംഡൂയനൈരദ്രിണാ നിദ്രാണസ്യ പരസ്യ കൂര്മവപുഷോ നിശ്വാസവാതോര്മയഃ । യദ്വിക്ഷേപണസംസ്കൃതോദധിപയഃ പ്രേംഖോളപര്യംകികാ- നിത്യാരോഹണനിർവൃതോ വിഹരതേ ദേവസ്സഹൈവ ശ്രിയാ ॥ 3 ॥

ഗോപായേദനിശം ജഗംതി കുഹനാപോത്രീ പവിത്രീകൃത- ബ്രഹ്മാംഡപ്രളയോര്മിഘോഷഗുരുഭിര്ഘോണാരവൈര്ഘുര്ഘുരൈഃ । യദ്ദംഷ്ട്രാംകുരകോടിഗാഢഘടനാനിഷ്കംപനിത്യസ്ഥിതി- ര്ബ്രഹ്മസ്തംബമസൌദസൌ ഭഗവതീമുസ്തേവവിശ്വംഭരാ ॥ 4 ॥

പ്രത്യാദിഷ്ടപുരാതനപ്രഹരണഗ്രാമഃക്ഷണം പാണിജൈ- രവ്യാത്ത്രീണി ജഗംത്യകുംഠമഹിമാ വൈകുംഠകംഠീരവഃ । യത്പ്രാദുര്ഭവനാദവംധ്യജഠരായാദൃച്ഛികാദ്വേധസാം- യാ കാചിത്സഹസാ മഹാസുരഗൃഹസ്ഥൂണാപിതാമഹ്യഭൃത് ॥ 5 ॥

വ്രീഡാവിദ്ധവദാന്യദാനവയശോനാസീരധാടീഭട- സ്ത്രൈയക്ഷം മകുടം പുനന്നവതു നസ്ത്രൈവിക്രമോ വിക്രമഃ । യത്പ്രസ്താവസമുച്ഛ്രിതധ്വജപടീവൃത്താംതസിദ്ധാംതിഭി- സ്സ്രോതോഭിസ്സുരസിംധുരഷ്ടസുദിശാസൌധേഷു ദോധൂയതേ ॥ 6 ॥

ക്രോധാഗ്നിം ജമദഗ്നിപീഡനഭവം സംതര്പയിഷ്യന് ക്രമാ- ദക്ഷത്രാമിഹ സംതതക്ഷ യ ഇമാം ത്രിസ്സപ്തകൃത്വഃ ക്ഷിതിമ് । ദത്വാ കര്മണി ദക്ഷിണാം ക്വചന താമാസ്കംദ്യ സിംധും വസ- ന്നബ്രഹ്മണ്യമപാകരോതു ഭഗവാനാബ്രഹ്മകീടം മുനിഃ ॥ 7 ॥

പാരാവാരപയോവിശോഷണകലാപാരീണകാലാനല- ജ്വാലാജാലവിഹാരഹാരിവിശിഖവ്യാപാരഘോരക്രമഃ । സർവാവസ്ഥസകൃത്പ്രപന്നജനതാസംരക്ഷണൈകവ്രതീ ധര്മോ വിഗ്രഹവാനധര്മവിരതിം ധന്വീ സതന്വീതു നഃ ॥ 8 ॥

ഫക്കത്കൌരവപട്ടണപ്രഭൃതയഃ പ്രാസ്തപ്രലംബാദയ- സ്താലാംകാസ്യതഥാവിധാ വിഹൃതയസ്തന്വംതു ഭദ്രാണി നഃ । ക്ഷീരം ശര്കരയേവ യാഭിരപൃഥഗ്ഭൂതാഃ പ്രഭൂതൈര്ഗുണൈ- രാകൌമാരകമസ്വദംതജഗതേ കൃഷ്ണസ്യ താഃ കേളയഃ ॥ 9 ॥

നാഥായൈവ നമഃ പദം ഭവതു നശ്ചിത്രൈശ്ചരിത്രക്രമൈ- ര്ഭൂയോഭിര്ഭുവനാന്യമൂനികുഹനാഗോപായ ഗോപായതേ । കാളിംദീരസികായകാളിയഫണിസ്ഫാരസ്ഫടാവാടികാ- രംഗോത്സംഗവിശംകചംക്രമധുരാപര്യായ ചര്യായതേ ॥ 10 ॥

ഭാവിന്യാ ദശയാഭവന്നിഹ ഭവധ്വംസായ നഃ കല്പതാം കല്കീ വിഷ്ണുയശസ്സുതഃ കലികഥാകാലുഷ്യകൂലംകഷഃ । നിശ്ശേഷക്ഷതകംടകേ ക്ഷിതിതലേ ധാരാജലൌഘൈര്ധ്രുവം ധര്മം കാര്തയുഗം പ്രരോഹയതി യന്നിസ്ത്രിംശധാരാധരഃ ॥ 11 ॥

ഇച്ഛാമീന വിഹാരകച്ഛപ മഹാപോത്രിന് യദൃച്ഛാഹരേ രക്ഷാവാമന രോഷരാമ കരുണാകാകുത്സ്ഥ ഹേലാഹലിന് । ക്രീഡാവല്ലവ കല്കിവാഹന ദശാകല്കിന്നിതി പ്രത്യഹം ജല്പംതഃ പുരുഷാഃ പുനംതു ഭുവനം പുണ്യൌഘപണ്യാപണാഃ ॥

വിദ്യോദന്വതി വേംകടേശ്വരകവൌ ജാതം ജഗന്മംഗളം ദേവേശസ്യദശാവതാരവിഷയം സ്തോത്രം വിവക്ഷേത യഃ । വക്ത്രേ തസ്യ സരസ്വതീ ബഹുമുഖീ ഭക്തിഃ പരാ മാനസേ ശുദ്ധിഃ കാപി തനൌ ദിശാസു ദശസു ഖ്യാതിശ്ശുഭാ ജൃംഭതേ ॥

ഇതി കവിതാര്കികസിംഹസ്യ സർവതംത്രസ്വതംത്രസ്യ ശ്രീമദ്വേംകടനാഥസ്യ വേദാംതാചാര്യസ്യ കൃതിഷു ദശാവതാരസ്തോത്രമ് ।

ദശാവതാര സ്തോത്രമ് (വേദാംതാചാര്യ കൃതമ്) - ഒരു പരിചയം

This Dashavatara Stotram is Vedanta Desika's hymn to the ten avatars of Vishnu, set at Srirangam. Its first verse pictures the Lord of Srirangam as an actor who takes on ten roles on the stage of the world, watched with deep delight by his devotees, and asks him to bless us. The verses then praise each avatar in turn, from the Fish who rescued the Vedas from the deep waters, through Kurma, Varaha, Narasimha, Vamana, Parashurama, Rama, Balarama and Krishna, to Kalki.

രചയിതാവ്: Vedanta Desika (1268 to 1369), as its colophon states

എപ്പോൾ ജപിക്കാം: On Vaikuntha Ekadashi, at Srirangam, and in Vishnu worship.

നിങ്ങൾക്കറിയാമോ?

  • Its colophon names Venkatanatha (Vedanta Desika), "the lion among poets and logicians", as its author.
  • Vedanta Desika (1268 to 1369) was one of the greatest teachers of Sri Vaishnavism.

പതിവ് ചോദ്യങ്ങൾ

Who wrote this Dashavatara Stotram?

Vedanta Desika (Venkatanatha), as its colophon states.

What image opens the hymn?

The Lord as an actor taking on ten roles on the world's stage.

Where is it set?

At Srirangam, before Lord Ranganatha.

ആരാധനയ്ക്കും പഠനത്തിനുമായി നൽകുന്നു, പ്രവചനമായല്ല. വാണിജ്യേതരം.