MuhurtaNow

6.2 - യദുഭൌ വിമുച്യാതിഥ്യമ് - കൃഷ്ണ യജുർവേദ തൈത്തിരീയ സംഹിതാ പാഠഃ

Kanda 6 - Krishna Yajurveda Taittiriya Samhita · പരമ്പരാഗത ഭക്തിഗ്രന്ഥം

krishna yajurvedeeya taittireeya samhitaayaam shashthakaande dviteeyah prashnah - somamantrabraahmananiroopanam

o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥

yadu̠bhau vi̠muchyaa̍-''ti̠thya-ngri̍hnee̠yaa-dya̠jnam vichchhi̍ndyaa̠-dyadu̠bhaava-vi̍muchya̠ yathaa-'naa̍gataayaa-''ti̠thya-nkri̠yate̍ taa̠drige̠va ta-dvimu̍kto̠-'nyo̍-'na̠dvaa-nbhava̠tya vi̍mukto̠-'nyo-'thaa̍-''ti̠thya-ngri̍hnaati ya̠jnasya̠ santa̍tyai̠ patnya̠nvaara̍bhate̠ patnee̠ hi paaree̍nahya̠syeshe̠ patni̍yai̠ vaanu̍mata̠-nnirva̍pati̠ yadvai patnee̍ ya̠jnasya̍ ka̠roti̍ mithu̠na-ntadatho̠ patni̍yaa e̠vai- [patni̍yaa e̠va, e̠sha] 1

-sha ya̠jnasyaa̎nvaara̠bhom 'na̍vachchhittyai̠ yaava̍-dbhi̠rvai raajaa̍-'nucha̠rairaa̠gachchha̍ti̠ sarve̎bhyo̠ vai tebhya̍ aati̠thya-nkri̍yate̠ chhandaagm̍si̠ khalu̠ vai soma̍sya̠ raajno̍-'nucha̠raanya̠gne-raa̍ti̠thyama̍si̠ vishna̍ve̠ tvetyaa̍ha gaayatri̠yaa e̠vaitena̍ karoti̠ soma̍syaa-''ti̠thyama̍si̠ vishna̍ve̠ tvetyaa̍ha tri̠shtubha̍ e̠vaitena̍ karo̠tyati̍theraati̠thyama̍si̠ vishna̍ve̠ tvetyaa̍ha̠ jaga̍tyaa [jaga̍tyai, e̠vaitena̍] 2

e̠vaitena̍ karotya̠gnaye̎ tvaa raayasposha̠daavnne̠ vishna̍ve̠ tvetyaa̍haanu̠shtubha̍ e̠vaitena̍ karoti shye̠naaya̍ tvaa soma̠bhrite̠ vishna̍ve̠ tvetyaa̍ha gaayatri̠yaa e̠vaitena̍ karoti̠ pancha̠ kritvo̍ grihnaati̠ pancha̎kshara pa̠nktih paankto̍ ya̠jno ya̠jname̠vaava̍ rundhe brahmavaa̠dino̍ vadanti̠ kasmaa̎-thsa̠tyaa-dgaa̍yatri̠yaa u̍bha̠yata̍ aati̠thyasya̍ kriyata̠ iti̠ yade̠vaa-'da-ssoma̠maa- [yade̠vaa-'da-ssoma̠maa, aaha̍ra̠-ttasmaa̎-] 3

-'ha̍ra̠-ttasmaa̎-dgaayatri̠yaa u̍bha̠yata̍ aati̠thyasya̍ kriyate pu̠rastaa̎chcho̠ pari̍shtaachcha̠ shiro̠ vaa e̠ta-dya̠jnasya̠ yadaa̍ti̠thya-nnava̍kapaalah puro̠daasho̍ bhavati̠ tasmaa̎nnava̠dhaa shiro̠ vishyoo̍ta̠-nnava̍kapaalah puro̠daasho̍ bhavati̠ te traya̍strikapaa̠laastri̠vritaa̠ stome̍na̠ sammi̍taa̠steja̍stri̠vri-tteja̍ e̠va ya̠jnasya̍ shee̠r̠sha-nda̍dhaati̠ nava̍kapaalah puro̠daasho̍ bhavati̠ te traya̍strikapaa̠laastri̠vritaa̎ praa̠nena̠ sammi̍taastri̠vridvai [ ] 4

praa̠na-stri̠vrita̍me̠va praa̠nama̍bhipoo̠rvam ya̠jnasya̍ shee̠r̠sha-nda̍dhaati pra̠jaapa̍te̠rvaa e̠taani̠ pakshmaa̍ni̠ yada̍shvavaa̠laa ai̎ksha̠vee ti̠rashchee̠ yadaashva̍vaalah prasta̠ro bhava̍tyaiksha̠vee ti̠rashchee̎ pra̠jaapa̍tere̠va tachchakshu̠-ssambha̍rati de̠vaa vai yaa aahu̍tee̠raju̍havu̠staa asu̍raa ni̠shkaava̍maada̠-nte de̠vaah kaa̎rshma̠rya̍mapashyan karma̠nyo̍ vai karmai̍nena kurvee̠teti̠ te kaa̎rshmarya̠mayaa̎-npari̠dhee- [-npari̠dheen, a̠ku̠rva̠ta̠ tairvai] 5

-na̍kurvata̠ tairvai te rakshaa̠g̠syapaa̎ghnata̠ ya-tkaa̎rshmarya̠mayaa̎h pari̠dhayo̠ bhava̍nti̠ raksha̍saa̠mapa̍hatyai̠ sagg spa̍rshayati̠ raksha̍saa̠mana̍nva-vachaaraaya̠ na pu̠rastaa̠-tpari̍ dadhaatyaadi̠tyo hye̍vodya-npu̠rastaa̠-drakshaag̍syapa̠hantyoo̠rdhve sa̠midhaa̠vaa da̍dhaatyu̠pari̍shtaade̠va rakshaa̠g̠syapa̍ hanti̠ yaju̍shaa̠-'nyaa-ntoo̠shneema̠nyaa-mmi̍thuna̠tvaaya̠ dve aa da̍dhaati dvi̠paa-dyaja̍maana̠h prati̍shthityai brahmavaa̠dino̍ vada- [vadanti, a̠gnishcha̠ vaa] 6

-ntya̠gnishcha̠ vaa e̠tau soma̍shcha ka̠thaa somaa̍yaa-''ti̠thya-nkri̠yate̠ naagnaya̠ iti̠ yada̠gnaava̠gni-mma̍thi̠tvaa pra̠hara̍ti̠ tenai̠vaagnaya̍ aati̠thya-nkri̍ya̠te 'tho̠ khalvaa̍hura̠gni-ssarvaa̍ de̠vataa̠ iti̠ yaddha̠viraa̠saadyaa̠gni-mmantha̍ti ha̠vyaayai̠vaa-''sa̍nnaaya̠ sarvaa̍ de̠vataa̍ janayati ॥ 7 ॥ (patni̍yaa e̠va - jaga̍tyaa̠ - aa - tri̠vridvai - pa̍ri̠dheen - va̍da̠ntye - ka̍chatvarigmshachcha) (a. 1)

de̠vaa̠su̠raa-ssamya̍ttaa aasa̠-nte de̠vaa mi̠tho vipri̍yaa aasa̠-nte̎-'(1̠)nyo̎-'nyasmai̠ jyaishthyaa̠yaati̍shthamaanaah pancha̠dhaa vya̍kraamanna̠gnirvasu̍bhi̠-ssomo̍ ru̠drairindro̍ ma̠rudbhi̠-rvaru̍na aadi̠tyai-rbriha̠spati̠-rvishvai̎rde̠vaiste̍ 'manya̠ntaasu̍rebhyo̠ vaa i̠da-mbhraatri̍vyebhyo raddhyaamo̠ yanmi̠tho vipri̍yaa̠-ssmo yaa na̍ i̠maah pri̠yaasta̠nuva̠staa-ssa̠mava̍dyaamahai̠ taabhya̠-ssa nir-ri̍chchhaa̠dyo [nir-ri̍chchhaa̠dyah, na̠h pra̠tha̠mo̎(1̠)-'nyo̎] 8

na̍h pratha̠mo̎(1̠)-'nyo̎-'nyasmai̠ druhyaa̠diti̠ tasmaa̠dya-ssataa̍noonaptrinaa-mpratha̠mo druhya̍ti̠ sa aarti̠maarchchha̍ti̠ ya-ttaa̍noona̠ptragm sa̍mava̠dyati̠ bhraatri̍vyaabhibhootyai̠ bhava̍tyaa̠tmanaa̠ paraa̎-'sya̠ bhraatri̍vyo bhavati̠ pancha̠ kritvo-'va̍dyati pancha̠dhaa hi te ta-thsa̍ma̠vaadya̠ntaatho̠ pancha̎kshara pa̠nktih paankto̍ ya̠jno ya̠jname̠vaava̍ rundha̠ aapa̍taye tvaa grihnaa̠meetyaa̍ha praa̠no vaa [praa̠no vai, aapa̍tih] 9

aapa̍tih praa̠name̠va pree̍naati̠ pari̍pataya̠ ityaa̍ha̠ mano̠ vai pari̍pati̠rmana̍ e̠va pree̍naati̠ tanoo̠naptra̠ ityaa̍ha ta̠nuvo̠ hi te taa-ssa̍ma̠vaadya̍nta shaakva̠raayetyaa̍ha̠ shaktyai̠ hi te taa-ssa̍ma̠vaadya̍nta̠ shakma̠-nnoji̍shthaa̠yetyaa̠hauji̍shtha̠gm̠ hi te ta daa̠tmana̍-ssama̠vaadya̠ntaa--naa̍dhrishta-masyanaadhri̠shya-mityaa̠haa-'naa̍dhrishta̠gg̠ hye̍tada̍naadhri̠shya-nde̠vaanaa̠-moja̠ [de̠vaanaa̠-moja̍h, ityaa̍ha] 10

ityaa̍ha de̠vaanaa̠g̠ hye̍tadojo̍-'bhishasti̠paa a̍nabhishaste̠nyamityaa̍haa-bhishasti̠paa hye̍tada̍ -nabhishaste̠nyamanu̍ me dee̠kshaa-ndee̠kshaapa̍ti-rmanyataa̠mityaa̍ha yathaaya̠jure̠vaita-dghri̠tam vai de̠vaa vajra̍-nkri̠tvaa soma̍maghna-nnanti̠kami̍va̠ khalu̠ vaa a̍syai̠tachcha̍ranti̠ ya-ttaa̍noona̠ptrena̍ pra̠chara̍ntya̠gm̠ shuragm̍ shuste deva so̠maa-'' pyaa̍yataa̠-mityaa̍ha̠ ya- [-mityaa̍ha̠ yat, e̠vaasyaa̍-] 11

-de̠vaasyaa̍-puvaa̠yate̠ yanmeeya̍te̠-tade̠vaasyai̠tenaa-'' pyaa̍yaya̠tyaa tubhya̠mindra̍h pyaayataa̠maa tvamindraa̍ya pyaaya̠svetyaa̍-ho̠bhaave̠vendra̍-ncha̠ soma̠-nchaa-''pyaa̍yaya̠tyaa pyaa̍yaya̠ sakhee̎m-thsa̠nyaa me̠dhayetyaa̍ha̠rtvijo̠ vaa a̍sya̠ sakhaa̍ya̠staa-ne̠vaa-''pyaa̍yayati sva̠sti te̍ deva soma su̠tyaama̍shee̠ye- [su̠tyaama̍shee̠ya, ityaa̍haa̠ ''shisha̍-] 12

-tyaa̍haa̠ ''shisha̍-me̠vaitaamaa shaa̎ste̠ pra vaa e̠te̎-'smaa-llo̠kaachchya̍vante̠ ye soma̍maa-pyaa̠yaya̍ntya-ntarikshadeva̠tyo̍ hi soma̠ aapyaa̍yita̠ eshtaa̠ raaya̠h preshe bhagaa̠yetyaa̍ha̠ dyaavaa̍prithi̠veebhyaa̍me̠va na̍ma̠skrityaa̠smin mlo̠ke prati̍ tishthanti devaasu̠raa-ssamya̍ttaa aasa̠-nte de̠vaa bibhya̍to̠-'gni-mpraavi̍sha̠-ntasmaa̍daahura̠gni-ssarvaa̍ de̠vataa̠ iti̠ te̎- [de̠vataa̠ iti̠ te, a̠gnime̠va] 13

-'gnime̠va varoo̍tha-nkri̠tvaa 'su̍raana̠bhya̍bhava-nna̠gnimi̍va̠ khalu̠ vaa e̠sha pravi̍shati̠ yo̍-'vaantaradee̠kshaamu̠paiti̠ bhraatri̍vyaabhibhootyai̠ bhava̍tyaa̠tmanaa̠ paraa̎-'sya̠ bhraatri̍vyo bhavatyaa̠tmaana̍me̠va dee̠kshayaa̍ paati pra̠jaama̍vaantaradee̠kshayaa̍ santa̠raa-mmekha̍laagm sa̠maaya̍chchhate pra̠jaa hyaa̎tmano-'nta̍rataraa ta̠ptavra̍to bhavati̠ mada̍nteebhirmaarjayate̠ nirhya̍gni-shshee̠tena̠ vaaya̍ti̠ sami̍ddhyai̠ yaa te̍ agne̠ rudri̍yaa ta̠noorityaa̍ha̠ svayai̠vaina̍-dde̠vata̍yaa vratayati sayoni̠tvaaya̠ shaantyai̎ ॥ 14 ॥ (yo - vaa - oja̍ - aaha̠ ya - da̍shee̠ye - ti̠ te̎ - 'gna̠ - ekaa̍dasha cha) (a. 2)

teshaa̠masu̍raanaa-nti̠srah pura̍ aasa-nnaya̠sma-yya̍va̠maa-'tha̍ raja̠taa-'tha̠ hari̍nee̠ taa de̠vaa jetu̠-nnaasha̍knuva̠-ntaa u̍pa̠sadai̠vaaji̍geesha̠-ntasmaa̍daahu̠ryashchai̠vam veda̠ yashcha̠ nopa̠sadaa̠ vai ma̍haapu̠ra-nja̍ya̠nteeti̠ ta ishu̠gm̠ sama̍skurvataa̠- gnimanee̍ka̠gm̠ somagm̍ sha̠lyam vishnu̠-nteja̍na̠-nte̎-'bruva̠n ka i̠maama̍sishya̠teeti̍ [ ] 15

ru̠dra itya̍bruva-nru̠dro vai kroo̠ra-sso̎-'sya̠tviti̠ so̎-'bravee̠-dvara̍m vrinaa a̠hame̠va pa̍shoo̠naa-madhi̍patirasaa̠neeti̠ tasmaa̎-dru̠drah pa̍shoo̠naa-madhi̍pati̠staagm ru̠dro-'vaa̍srija̠-thsa ti̠srah puro̍ bhi̠ttvaibhyo lo̠kebhyo- 'su̍raa̠-npraanu̍data̠ yadu̍pa̠sada̍ upasa̠dyante̠ bhraatri̍vyaparaanutyai̠ naanyaamaahu̍ti-mpu̠rastaa̎-jjuhuyaa̠-dyada̠nyaamaahu̍ti-mpu̠rastaa̎-jjuhu̠yaa- [-jjuhu̠yaat, a̠nyanmukha̍-nkuryaa-] 16

-da̠nyanmukha̍-nkuryaa-thsru̠venaa̍-'ghaa̠ramaa ghaa̍rayati ya̠jnasya̠ prajnaa̎tyai̠ paraa̍nati̠kramya̍ juhoti̠ paraa̍cha e̠vaibhyo lo̠kebhyo̠ yaja̍maano̠ bhraatri̍vyaa̠-npra nu̍date̠ puna̍ratyaa̠kramyo̍pa̠sada̍-njuhoti pra̠nudyai̠vaibhyo lo̠kebhyo̠ bhraatri̍vyaanji̠tvaa bhraa̍trivyalo̠ka-ma̠bhyaaro̍hati de̠vaa vai yaah praa̠taru̍pa̠sada̍ u̠paasee̍da̠-nnahna̠staabhi̠rasu̍raa̠-npraanu̍danta̠ yaa-ssaa̠yagm raatri̍yai̠ taabhi̠rya-thsaa̠ya-mpraa̍ta-rupa̠sada̍- [-rupa̠sada̍h, u̠pa̠sa̠dyante̍] 17

upasa̠dyante̍ 'horaa̠traabhyaa̍me̠va ta-dyaja̍maano̠ bhraatri̍vyaa̠-npra nu̍date̠ yaah praa̠taryaa̠jyaa̎-ssyustaa-ssaa̠ya-mpu̍ro-'nuvaa̠kyaa̎h kuryaa̠dayaa̍tayaamatvaaya ti̠sra u̍pa̠sada̠ upai̍ti̠ traya̍ i̠me lo̠kaa i̠maane̠va lo̠kaa-npree̍naati̠ shat-thsa-mpa̍dyante̠ shadvaa ri̠tava̍ ri̠toone̠va pree̍naati̠ dvaada̍shaa̠heene̠ soma̠ upai̍ti̠ dvaada̍sha̠ maasaa̎-ssamvathsa̠ra-ssa̍vanthsa̠rame̠va pree̍naati̠ chatu̍rvigmshati̠-ssa- [chatu̍rvigmshati̠-ssam, pa̠dya̠nte̠ chatu̍rvigmshati-] 18

-mpa̍dyante̠ chatu̍rvigmshati-rardhamaa̠saa a̍rdhamaa̠saane̠va pree̍naa̠tyaaraa̎graa-mavaantaradee̠kshaa-mupe̍yaa̠dyah kaa̠maye̍taa̠-'smi-nme̍ lo̠ke-'rdhu̍kagg syaa̠dityeka̠magre-'tha̠ dvaavatha̠ treenatha̍ cha̠tura̍ e̠shaa vaa aaraa̎graa 'vaantaradee̠kshaa 'sminne̠vaasmai̍ lo̠ke-'rdhu̍ka-mbhavati pa̠rova̍reeyasee-mavaantaradee̠kshaa-mupe̍yaa̠dyah kaa̠maye̍taa̠mushmi̍-nme lo̠ke-'rdhu̍kagg syaa̠diti̍ cha̠turo-'gre 'tha̠ treenatha̠ dvaavathaika̍me̠shaa vai pa̠rova̍reeyasya-vaantaradee̠kshaa 'mushmi̍nne̠vaasmai̍ lo̠ke-'rdhu̍ka-mbhavati ॥ 19 ॥ (a̠si̠shya̠teeti̍ - juhu̠yaath - saa̠ya-mpraa̍tarupa̠sada̠ - shchatu̍rvigmshati̠-ssam - cha̠turo-'gre̠ - shoda̍sha cha) (a. 3)

su̠va̠rgam vaa e̠te lo̠kam ya̍nti̠ ya u̍pa̠sada̍ upa̠yanti̠ teshaa̠m ya u̠nnaya̍te̠ heeya̍ta e̠va sa noda̍ne̠sheeti̠ soo̎nneeyamiva̠ yo vai svaa̠rthetaa̎m ya̠taag shraa̠nto heeya̍ta u̠ta sa ni̠shtyaaya̍ sa̠ha va̍sati̠ tasmaa̎-thsa̠kridu̠nneeya̠ naapa̍ra̠munna̍yeta da̠ddhnonna̍yetai̠tadvai pa̍shoo̠naagm roo̠pagm roo̠penai̠va pa̠shoonava̍ rundhe [ ] 20

ya̠jno de̠vebhyo̠ nilaa̍yata̠ vishnoo̍ roo̠pa-nkri̠tvaa sa pri̍thi̠vee-mpraavi̍sha̠-tta-nde̠vaa hastaa̎m-thsa̠gm̠ rabhyai̎chchha̠-ntamindra̍ u̠paryu̍pa̠ryatya̍kraama̠-thso̎-'bravee̠-tko maa̠-'yamu̠paryu̍pa̠ryatya̍kramee̠-ditya̠ha-ndu̠rge hantetyatha̠ kastvamitya̠ha-ndu̠rgaadaaha̠rteti̠ so̎-'bravee-ddu̠rge vai hantaa̍-'vochathaa varaa̠ho̍-'yam vaa̍mamo̠sha- [-mvaa̍mamo̠shah, sa̠ptaa̠naa] 21

-ssa̍ptaa̠naa-ngi̍ree̠naa-mpa̠rastaa̎dvi̠ttam vedya̠masu̍raanaa-mbibharti̠ ta-nja̍hi̠ yadi̍ du̠rge hantaa-'seeti̠ sa da̍rbhapunjee̠lamu̠-dvrihya̍ sa̠pta gi̠ree-nbhi̠ttvaa tama̍ha̠n-thso̎-'bravee-ddu̠rgaadvaa aaha̍rtaavochathaa e̠tamaa ha̠reti̠ tame̎bhyo ya̠jna e̠va ya̠jnamaa-'ha̍ra̠dya-ttadvi̠ttam vedya̠masu̍raanaa̠-mavi̍ndanta̠ tadeka̠m vedyai̍ vedi̠tva-masu̍raanaa̠m- [-masu̍raanaam, vaa i̠yamagra̍] 22

-mvaa i̠yamagra̍ aasee̠-dyaava̠daasee̍nah paraa̠pashya̍ti̠ taava̍-dde̠vaanaa̠-nte de̠vaa a̍bruva̠nnastve̠va no̠-'syaamapeeti̠ kiya̍dvo daasyaama̠ iti̠ yaava̍di̠yagm sa̍laavri̠kee trih pa̍ri̠kraama̍ti̠ taava̍nno da̠tteti̠ sa indra̍-ssalaavri̠kee roo̠pa-nkri̠tvemaa-ntri-ssa̠rvata̠h parya̍kraama̠-ttadi̠maama̍vindanta̠ yadi̠maamavi̍ndanta̠ ta-dvedyai̍ vedi̠tvagm [vedi̠tvam, saa vaa i̠yagm] 23

saa vaa i̠yagm sarvai̠va vedi̠riya̍ti shakshyaa̠meeti̠ tvaa a̍va̠maaya̍ yajante tri̠gm̠sha-tpa̠daani̍ pa̠shchaa-tti̠rashchee̍ bhavati̠ shattrigm̍sha̠-tpraachee̠ chatu̍rvigmshatih pu̠rastaa̎-tti̠rashchee̠ dasha̍dasha̠ sampa̍dyante̠ dashaa̎ksharaa vi̠raadanna̍m vi̠raa-dvi̠raajai̠vaannaadya̠mava̍ rundha̠ uddha̍nti̠ yade̠vaasyaa̍ ame̠ddhya-ntadapa̍ ha̠ntyuddha̍nti̠ tasmaa̠dosha̍dhaya̠h paraa̍ bhavanti ba̠r̠hi-sstri̍naati̠ tasmaa̠dosha̍dhaya̠h puna̠raa bha̍va̠ntyutta̍ra-mba̠r̠hisha̍ uttaraba̠r̠hi-sstri̍naati pra̠jaa vai ba̠r̠hiryaja̍maana uttara ba̠r̠hi ryaja̍maana-me̠vaa-ya̍jamaanaa̠dutta̍ra-nkaroti̠ tasmaa̠-dyaja̍maa̠no 'ya̍jamaanaa̠dutta̍rah ॥ 24 ॥ (ru̠ndhe̠ - vaa̠ma̠mo̠sho - ve̍di̠tvamasu̍raanaam - mvedi̠tvam - bha̍vanti̠ - pancha̍vigmshatishcha) (a. 4)

yadvaa anee̍shaano bhaa̠ramaa̍da̠tte vi vai sa li̍shate̠ ya-ddvaada̍sha saa̠hnasyo̍pa̠sada̠-ssyusro̍-'heena̍sya ya̠jnasya̠ vilo̍ma kriyeta ti̠sra e̠va saa̠hnasyo̍pa̠sado̠ dvaada̍shaa̠heena̍sya ya̠jnasya̍ saveerya̠tvaayaatho̠ salo̍ma kriyate va̠thsasyaika̠-sstano̍ bhaa̠gee hi so-'thaika̠gg̠ stana̍m vra̠tamupai̠tyatha̠ dvaavatha̠ treenatha̍ cha̠tura̍ e̠tadvai [ ] 25

kshu̠rapa̍vi̠ naama̍ vra̠tam yena̠ pra jaa̠taa-nbhraatri̍vyaa-nnu̠date̠ prati̍ jani̠shyamaa̍naa̠natho̠ kanee̍yasai̠va bhooya̠ upai̍ti cha̠turo-'gre̠ stanaa̎n vra̠tamupai̠tyatha̠ treenatha̠ dvaavathaika̍me̠tadvai su̍jagha̠na-nnaama̍ vra̠ta-nta̍pa̠syagm̍ suva̠rgya̍matho̠ praiva jaa̍yate pra̠jayaa̍ pa̠shubhi̍ryavaa̠goo raa̍ja̠nya̍sya vra̠ta-nkroo̠reva̠ vai ya̍vaa̠gooh kroo̠ra i̍va [kroo̠ra i̍va, raa̠ja̠nyo̍ vajra̍sya] 26

raaja̠nyo̍ vajra̍sya roo̠pagm samri̍ddhyaa aa̠mikshaa̠ vaishya̍sya paakaya̠jnasya̍ roo̠pa-mpushtyai̠ payo̎ braahma̠nasya̠ tejo̠ vai braa̎hma̠nasteja̠h paya̠steja̍sai̠va teja̠h paya̍ aa̠tma-ndha̠tte 'tho̠ paya̍saa̠ vai garbhaa̍ vardhante̠ garbha̍ iva̠ khalu̠ vaa e̠sha ya-ddee̎kshi̠to yada̍sya̠ payo̎ vra̠ta-mbhava̍tyaa̠tmaana̍me̠va ta-dva̍rdhayati̠ trivra̍to̠ vai manu̍raasee̠-ddvivra̍taa̠ asu̍raa̠ eka̍vrataa [eka̍vrataah, de̠vaah praa̠tarma̠ddhyandi̍ne] 27

de̠vaah praa̠tarma̠ddhyandi̍ne saa̠ya-nta-nmano̎rvra̠tamaa̍see-tpaakaya̠jnasya̍ roo̠pa-mpushtyai̎ praa̠tashcha̍ saa̠ya-nchaasu̍raanaa-nnirma̠ddhya-nkshu̠dho roo̠pa-ntata̠ste paraa̍-'bhava-nma̠ddhyandi̍ne maddhyaraa̠tre de̠vaanaa̠-ntata̠ste̍-'bhavan-thsuva̠rgam lo̠kamaa̍ya̠n̠. yada̍sya ma̠ddhyandi̍ne maddhyaraa̠tre vra̠ta-mbhava̍ti maddhya̠to vaa anne̍na bhunjate maddhya̠ta e̠va tadoorja̍-ndhatte̠ bhraatri̍vyaabhibhootyai̠ bhava̍tyaa̠tmanaa̠ [bhava̍tyaa̠tmanaa̎, paraa̎-'sya̠ bhraatri̍vyo] 28

paraa̎-'sya̠ bhraatri̍vyo bhavati̠ garbho̠ vaa e̠sha ya-ddee̎kshi̠to yoni̍ rdeekshitavimi̠tam ya-ddee̎kshi̠to dee̎kshitavimi̠taa-tpra̠vase̠-dyathaa̠ yone̠rgarbha̠-sskanda̍ti taa̠drige̠va tanna pra̍vasta̠vya̍maa̠tmano̍ gopee̠thaayai̠sha vai vyaa̠ghrah ku̍lago̠po yada̠gnistasmaa̠-dya-ddee̎kshi̠tah pra̠vase̠-thsa e̍nameeshva̠ro̍-'noo̠tthaaya̠ hanto̠rna pra̍vasta̠vya̍maa̠tmano̠ guptyai̍ dakshina̠ta-shsha̍ya e̠tadvai yaja̍maanasyaa̠ ''yata̍na̠gg̠sva e̠vaa-''yata̍ne shaye̠ 'gnima̍bhyaa̠vritya̍ shaye de̠vataa̍ e̠va ya̠jnama̍bhyaa̠vritya̍ shaye ॥ 29 ॥ (e̠tadvai-kroo̠ra i̠vai-ka̍vrataa-aa̠tmanaa̠-yaja̍maanasya̠-trayo̍dasha cha) (a. 5)

pu̠roha̍vishi deva̠yaja̍ne yaajaye̠dya-nkaa̠maye̠topai̍na̠mutta̍ro ya̠jno na̍meda̠bhi su̍va̠rgam lo̠ka-nja̍ye̠ditye̠tadvai pu̠roha̍virdeva̠yaja̍na̠m yasya̠ hotaa̎ praataranuvaa̠ka -ma̍nubru̠va-nna̠gnima̠pa aa̍di̠tyama̠bhi vi̠pashya̠tyupai̍na̠mutta̍ro ya̠jno na̍matya̠bhi su̍va̠rgam lo̠ka-nja̍yatyaa̠pte de̍va̠yaja̍ne yaajaye̠--dbhraatri̍vyavanta̠-mpanthaa̎m vaa-'dhispa̠r̠shaye̎-tka̠rtam vaa̠ yaava̠nnaana̍se̠ yaata̠vai [ ] 30

na rathaa̍yai̠tadvaa aa̠pta-nde̍va̠yaja̍namaa̠pnotye̠va bhraatri̍vya̠-nnaina̠-mbhraatri̍vya aapno̠tyeko̎nnate deva̠ya̍jane yaajaye-tpa̠shukaa̍ma̠-meko̎nnataa̠dvai de̍va̠yaja̍naa̠dangi̍rasah pa̠shoona̍srijantaanta̠raa sa̍dohavirdhaa̠ne u̍nna̠tagg syaa̍de̠tadvaa eko̎nnata-ndeva̠yaja̍na-mpashu̠maane̠va bha̍vati̠ tryu̍nnate deva̠yaja̍ne yaajaye-thsuva̠rgakaa̍ma̠-ntryu̍nnataa̠dvai de̍va̠yaja̍naa̠dangi̍rasa-ssuva̠rgam lo̠kamaa̍ya-nnanta̠raa ''ha̍va̠neeya̍-ncha havi̠rdhaana̍-ncho- [havi̠rdhaana̍-ncha, u̠nna̠tagg syaa̍danta̠raa] 31

-nna̠tagg syaa̍danta̠raa ha̍vi̠rdhaana̍-ncha̠ sada̍shchaanta̠raa sada̍shcha̠ gaarha̍patya-nchai̠tadvai tryu̍nnata-ndeva̠yaja̍nagm suva̠rgame̠va lo̠kame̍ti̠ prati̍shthite deva̠yaja̍ne yaajaye-tprati̠shthaakaa̍mame̠tadvai prati̍shthita-ndeva̠yaja̍na̠m ya-thsa̠rvata̍-ssa̠ma-mpratye̠va ti̍shthati̠ yatraa̠nyaa a̍nyaa̠ osha̍dhayo̠ vyati̍shaktaa̠-ssyusta-dyaa̍jaye-tpa̠shukaa̍mame̠tadvai pa̍shoo̠naagm roo̠pagm roo̠penai̠vaasmai̍ pa̠shoo- [pa̠shoon, ava̍ rundhe] 32

-nava̍ rundhe pashu̠maane̠va bha̍vati̠ nir-ri̍tigriheete deva̠yaja̍ne yaajaye̠dya-nkaa̠maye̍ta̠ nir-ri̍tyaasya ya̠jna-ngraa̍hayeya̠mitye̠tadvai nir-ri̍tigriheeta-ndeva̠yaja̍na̠m ya-thsa̠drishyai̍ sa̠tyaa̍ ri̠ksha-nnir-ri̍tyai̠vaasya̍ ya̠jna-ngraa̍hayati̠ vyaavri̍tte deva̠yaja̍ne yaajaye-dvyaa̠vritkaa̍ma̠m ya-mpaatre̍ vaa̠ talpe̍ vaa̠ meemaagm̍sera-npraa̠cheena̍maahava̠neeyaa̎-tprava̠nagg syaa̎-tpratee̠cheena̠-ngaarha̍patyaade̠tadvai vyaavri̍tta-ndeva̠yaja̍na̠m vi paa̠pmanaa̠ bhraatri̍vye̠naa- ''va̍rtate̠ naina̠-mpaatre̠ na talpe̍ meemaagm sante kaa̠rye̍ deva̠yaja̍ne yaajaye̠-dbhooti̍kaama-nkaa̠yaa̍ vai puru̍sho̠ bhava̍tye̠va ॥ 33 ॥ (yaata̠vai - ha̍vi̠rdhaana̍-ncha - pa̠shoon - paa̠pmanaa̠ - 'shtaada̍sha cha) (a. 6)

tebhya̍ uttarave̠di-ssi̠gm̠hee roo̠pa-nkri̠tvobhayaa̍-nanta̠raa-'pa̠kramyaa̍tishtha̠-tte de̠vaa a̍manyanta yata̠raan. vaa i̠yamu̍paava̠rthsyati̠ ta i̠da-mbha̍vishya̠nteeti̠ taamupaa̍mantrayanta̠ saa-'bra̍vee̠-dvara̍m vrinai̠ sarvaa̠-nmayaa̠ kaamaa̠n vya̍shnavatha̠ poorvaa̠-ntu maa̠-'gneraahu̍tirashnavataa̠ iti̠ tasmaa̍duttarave̠di-mpoorvaa̍ma̠gne- rvyaaghaa̍rayanti̠ vaare̍vrita̠gg̠ hya̍syai̠ shamya̍yaa̠ pari̍ mimeete̠ [mimeete, maatrai̠vaa-'syai̠] 34

maatrai̠vaa-'syai̠ saatho̍ yu̠ktenai̠va yu̠ktamava̍ rundhe vi̠ttaaya̍nee me̠-'seetyaa̍ha vi̠ttaa hye̍naa̠naava̍-tti̠ktaaya̍nee me̠-'seetyaa̍ha ti̠ktaan. hye̍naa̠naava̠dava̍taanmaa naathi̠tamityaa̍ha naathi̠taan. hye̍naa̠naava̠dava̍taanmaa vyathi̠tamityaa̍ha vyathi̠taan. hye̍naa̠naava̍-dvi̠de-ra̠gni-rnabho̠ naamaa- [-rnabho̠ naamaa̍, agne̍ angira̠ iti̠] 35

-'gne̍ angira̠ iti̠ trirha̍rati̠ ya e̠vaishu lo̠keshva̠gnaya̠-staane̠vaava̍ rundhe too̠shnee-ncha̍tu̠rthagm ha̍ra̠tyani̍-ruktame̠vaava̍ rundhe si̠gm̠heera̍si mahi̠sheera̠seetyaa̍ha si̠gm̠heerhye̍shaa roo̠pa-nkri̠tvobhayaa̍-nanta̠raa 'pa̠kramyaati̍shthadu̠ru pra̍thasvo̠ru te̍ ya̠jnapa̍tih prathataa̠mityaa̍ha̠ yaja̍maaname̠va pra̠jayaa̍ pa̠shubhi̍h prathayati dhru̠vaa- [dhru̠vaa, a̠seeti̠ sagm ha̍nti̠] 36

-'seeti̠ sagm ha̍nti̠ dhrityai̍ de̠vebhya̍-shshundhasva de̠vebhya̍-shshumbha̠svetyava̍ cho̠kshati̠ pra cha̍ kirati̠ shuddhyaa̍ indragho̠shastvaa̠ vasu̍bhih pu̠rastaa̎-tpaa̠tvityaa̍ha di̠gbhya e̠vainaa̠-mproksha̍ti de̠vaagshchedu̍-ttarave̠diru̠paava̍vartee̠haiva vi ja̍yaamahaa̠ ityasu̍raa̠ vajra̍mu̠dyatya̍ de̠vaana̠bhyaa̍yanta̠ taani̍ndragho̠sho vasu̍bhih pu̠rastaa̠dapaa̍- [pu̠rastaa̠dapaa̍, a̠nu̠da̠ta̠ mano̍javaah] 37

-nudata̠ mano̍javaah pi̠tribhi̍ rdakshina̠tah prache̍taa ru̠draih pa̠shchaa-dvi̠shvaka̍rmaa-''di̠tyairu̍ttara̠to yade̠vamu̍ttarave̠di-mpro̠kshati̍ di̠gbhya e̠va ta-dyaja̍maano̠ bhraatri̍vyaa̠-npra nu̍data̠ indro̠ yatee̎m-thsaalaavri̠kebhya̠h praaya̍chchha̠-ttaa-nda̍kshina̠ta u̍ttarave̠dyaa aa̍da̠n̠ ya-tproksha̍neenaa-mu̠chchhishye̍ta̠ ta-dda̍kshina̠ta u̍ttarave̠dyai ni na̍ye̠-dyade̠va tatra̍ kroo̠ra-nta-ttena̍ shamayati̠ ya-ndvi̠shyaa-tta-ndhyaa̍yechchhu̠chai vaina̍marpayati ॥ 38 ॥ (mi̠mee̠te̠ - naama̍ - dhru̠vaa - 'pa̍ - shu̠chaa - treeni̍ cha) ( aa7)

sotta̍rave̠dira̍bravee̠-thsarvaa̠-nmayaa̠ kaamaa̠n vya̍shnava̠theti̠ te de̠vaa a̍kaamaya̠ntaasu̍raa̠-nbhraatri̍vyaana̠bhi bha̍ve̠meti̠ te̍-'juhavu-ssi̠gm̠heera̍si sapatnasaa̠hee svaaheti̠ te-'su̍raa̠-nbhraatri̍vyaa-na̠bhya̍bhava̠-nte-'su̍raa̠-nbhraatri̍vyaa-nabhi̠bhooyaa̍kaamayanta pra̠jaam vi̍ndema̠heeti̠ te̍-'juhavu-ssi̠gm̠heera̍si suprajaa̠vani̠-ssvaaheti̠ te pra̠jaama̍vindanta̠ te pra̠jaam vi̠ttvaa- [pra̠jaam vi̠ttvaa,a̠kaa̠ma̠ya̠nta̠ pa̠shoon. ] 39

-'kaa̍mayanta pa̠shoon. vi̍ndema̠heeti̠ te̍-'juhavu-ssi̠gm̠heera̍si raayasposha̠vani̠-ssvaaheti̠ te pa̠shoona̍vindanta̠ te pa̠shoon. vi̠ttvaa-'kaa̍mayanta prati̠shthaam vi̍ndema̠heeti̠ te̍-'juhavu-ssi̠gm̠hee-ra̍syaaditya̠vani̠-ssvaaheti̠ ta i̠maa-mpra̍ti̠shthaama̍vindanta̠ ta i̠maa-mpra̍ti̠shthaam vi̠ttvaa-'kaa̍mayanta de̠vataa̍ aa̠shisha̠ upe̍yaa̠meti̠ te̍-'juhavu-ssi̠gm̠heera̠syaa va̍ha de̠vaa-nde̍vaya̠te [ ] 40

yaja̍maanaaya̠ svaaheti̠ te de̠vataa̍ aa̠shisha̠ upaa̍ya̠-npancha̠ kritvo̠ vyaaghaa̍rayati̠ panchaa̎ksharaa pa̠nktih paankto̍ ya̠jno ya̠jname̠vaava̍ rundhe 'kshna̠yaa vyaaghaa̍rayati̠ tasmaa̍dakshna̠yaa pa̠shavo-'ngaa̍ni̠ praha̍ranti̠ prati̍shthityai bhoo̠tebhya̠stveti̠ srucha̠mudgri̍hnaati̠ ya e̠va de̠vaa bhoo̠taasteshaa̠-nta-dbhaa̍ga̠dheya̠-ntaane̠va tena̍ preenaati̠ pautu̍dravaa-npari̠dhee-npari̍ dadhaatye̠shaam- [dadhaatye̠shaam, lo̠kaanaa̠m vidhri̍tyaa] 41

-mlo̠kaanaa̠m vidhri̍tyaa a̠gnestrayo̠ jyaayaagm̍so̠ bhraata̍ra aasa̠-nte de̠vebhyo̍ ha̠vyam vaha̍nta̠h praamee̍yanta̠ so̎-'gnira̍bibhedi̠ttham vaava sya aarti̠maa-'ri̍shya̠teeti̠ sa nilaa̍yata̠ sa yaam vana̠spati̠shvava̍sa̠ttaa-mpootu̍drau̠ yaamosha̍dheeshu̠ taagm su̍gandhi̠teja̍ne̠ yaa-mpa̠shushu̠ taa-mpetva̍syaanta̠raa shringe̠ ta-nde̠vataa̠h praisha̍maichchha̠-ntamanva̍vinda̠-nta-ma̍bruva̠- [-ma̍bruvann, upa̍ na̠ aa] 42

-nnupa̍ na̠ aa va̍rtasva ha̠vya-nno̍ va̠heti̠ so̎-'bravee̠-dvara̍m vrinai̠ yade̠va gri̍hee̠tasyaahu̍tasya bahihpari̠dhi skandaa̠-ttanme̠ bhraatri̍naa-mbhaaga̠dheya̍-masa̠diti̠ tasmaa̠-dya-dgri̍hee̠tasyaa-'hu̍tasya bahihpari̠dhi skanda̍ti̠ teshaa̠-nta-dbhaa̍ga̠dheya̠-ntaane̠va tena̍ preenaati̠ so̍-'manyataa-'stha̠nvanto̍ me̠ poorve̠ bhraata̍ra̠h praame̍shataa̠-'sthaani̍ shaatayaa̠ iti̠ sa yaa- [sa yaani̍, ] 43

-nya̠sthaanyashaa̍tayata̠ ta-tpootu̍drva-bhava̠-dyanmaa̠gm̠ samupa̍mrita̠-nta-dgulgu̍lu̠ yade̠taan-thsa̍bhaam̠raan-thsa̠-mbhara̍tya̠gnime̠va ta-thsambha̍ratya̠gneh puree̍sha-ma̠seetyaa̍haa̠-'gnerhye̍ta-tpuree̍sha̠m ya-thsa̍mbhaa̠raa atho̠ khalvaa̍hure̠te vaavaina̠-nte bhraata̍ra̠h pari̍ shere̠ ya-tpautu̍dravaah pari̠dhaya̠ iti̍ ॥ 44 ॥ (vi̠ttvaa - de̍vaya̠ta - e̠shaa - ma̍bruva̠n - yaani̠ - chatu̍shchatvaarigmshachcha) (a. 8)

ba̠ddhamava̍ syati varunapaa̠shaade̠vaine̍ munchati̠ prane̍nekti̠ meddhye̍ e̠vaine̍ karoti saavitri̠yarchaa hu̠tvaa ha̍vi̠rdhaane̠ pra va̍rtayati savi̠tripra̍soota e̠vaine̠ pra va̍rtayati̠ varu̍no̠ vaa e̠sha du̠rvaagu̍bha̠yato̍ ba̠ddho yadaksha̠-ssa yadu̠-thsarje̠-dyaja̍maanasya gri̠haa-na̠bhyuthsa̍rje-thsu̠vaagde̍va̠ duryaa̠gm̠ aa va̠detyaa̍ha gri̠haa vai duryaa̠-shshaantyai̠ pa- [duryaa̠-shshaantyai̠ patnee̎, upaa̍nakti̠] 45

-tnyupaa̍nakti̠ patnee̠ hi sarva̍sya mi̠tra-mmi̍tra̠tvaaya̠ yadvai patnee̍ ya̠jnasya̍ ka̠roti̍ mithu̠na-ntadatho̠ patni̍yaa e̠vaisha ya̠jnasyaa̎-nvaara̠bhom-'na̍vachchhittyai̠ vartma̍naa̠ vaa a̠nvitya̍ ya̠jnagm rakshaagm̍si jighaagmsanti vaishna̠veebhyaa̍mri̠gbhyaam vartma̍no rjuhoti ya̠jno vai vishnu̍rya̠jnaade̠va rakshaa̠g̠syapa̍ hanti̠ yada̍ddhva̠ryu-ra̍na̠gnaa-vaahu̍ti-njuhu̠yaa-da̠ndho̎-'ddhva̠ryu-ssyaa̠-drakshaagm̍si ya̠jnagm ha̍nyu̠r̠- [ya̠jnagm ha̍nyuh, hira̍nya-mu̠paasya̍] 46

-hira̍nya-mu̠paasya̍ juhotyagni̠vatye̠va ju̍hoti̠ naandho̎-'ddhva̠ryurbhava̍ti̠ na ya̠jnagm rakshaagm̍si ghnanti̠ praachee̠ preta̍maddhva̠ra-nka̠lpaya̍ntee̠ ityaa̍ha suva̠rgame̠vaine̍ lo̠ka-nga̍maya̠tyatra̍ ramethaa̠m varshma̍-nprithi̠vyaa ityaa̍ha̠ varshma̠ hye̍ta-tpri̍thi̠vyaa ya-dde̍va̠yaja̍na̠gm̠ shiro̠ vaa e̠ta-dya̠jnasya̠ yaddha̍vi̠rdhaana̍-ndi̠vo vaa̍ vishnavu̠ta vaa̍ prithi̠vyaa [prithi̠vyaah, ityaa̠sheerpa̍daya̠rchaa] 47

ityaa̠sheerpa̍daya̠rchaa dakshi̍nasya havi̠rdhaana̍sya me̠thee-nni ha̍nti sheersha̠ta e̠va ya̠jnasya̠ yaja̍maana aa̠shisho-'va̍ rundhe da̠ndo vaa au̍pa̠rastri̠teeya̍sya havi̠rdhaana̍sya vashatkaa̠re-naaksha̍-machchhina̠-dyat-tri̠teeya̍-nchha̠dir-ha̍vi̠rdhaana̍yo-rudaahri̠yate̍ tri̠teeya̍sya havi̠rdhaana̠syaava̍ruddhyai̠ shiro̠ vaa e̠ta-dya̠jnasya̠ yaddha̍vi̠rdhaana̠m vishno̍ ra̠raata̍masi̠ vishno̎h pri̠shthama̠seetyaa̍ha̠ tasmaa̍detaava̠ddhaa shiro̠ vishyoo̍ta̠m vishno̠-ssyoora̍si̠ vishno̎ddhru̠vama̠seetyaa̍ha vaishna̠vagm hi de̠vata̍yaa havi̠rdhaana̠m ya-mpra̍tha̠ma-ngra̠nthi-ngra̍thnee̠yaadya-tta-nna vi̍sra̠gm̠ saye̠dame̍henaaddhva̠ryuh pramee̍yeta̠ tasmaa̠-thsa vi̠srasya̍h ॥ 48 ॥ (patnee̍ -hanyu-rvaa prithi̠vyaa-vishyoo̍ta̠m vishno̠h-shadvigm̍shatishcha) (a. 9)

de̠vasya̍ tvaa savi̠tuh pra̍sa̠va ityabhri̠maa da̍tte̠ prasoo̎tyaa a̠shvino̎ rbaa̠hubhyaa̠mityaa̍haa̠shvinau̠ hi de̠vaanaa̍maddhva̠ryoo aastaa̎-mpoo̠shno hastaa̎bhyaa̠mityaa̍ha̠ yatyai̠ vajra̍ iva̠ vaa e̠shaa yadabhri̠rabhri̍rasi̠ naari̍ra̠seetyaa̍ha̠ shaantyai̠ kaande̍ kaande̠ vai kri̠yamaa̍ne ya̠jnagm rakshaagm̍si jighaagmsanti̠ pari̍likhita̠gm̠ raksha̠h pari̍likhitaa̠ araa̍taya̠ ityaa̍ha̠ raksha̍saa̠-mapa̍hatyaa [raksha̍saa̠-mapa̍hatyai, i̠dama̠hagm] 49

i̠dama̠hagm raksha̍so gree̠vaa api̍ krintaami̠ yo̎-'smaa-ndveshti̠ ya-ncha̍ va̠ya-ndvi̠shma ityaa̍ha̠ dvau vaava puru̍shau̠ ya-nchai̠va dveshti̠ yashchai̍na̠-ndveshti̠ tayo̍-re̠vaa-'na̍ntaraaya-ngree̠vaah kri̍ntati di̠ve tvaa̠-'ntari̍kshaaya tvaa prithi̠vyai tvetyaa̍hai̠bhya e̠vainaa̎m lo̠kebhya̠h proksha̍ti pa̠rastaa̍-da̠rvaachee̠-mproksha̍ti̠ tasmaa̎- [tasmaa̎t, pa̠rastaa̍-] 50

-tpa̠rastaa̍-da̠rvaachee̎-mmanu̠shyaa̍ oorja̠mupa̍ jeevanti kroo̠rami̍va̠ vaa e̠ta-tka̍roti̠ ya-tkhana̍tya̠po-'va̍ nayati̠ shaantyai̠ yava̍matee̠rava̍ naya̠tyoorgvai yava̠ oorgu̍du̠bamra̍ oo̠rjaivorja̠gm̠ sama̍rdhayati̠ yaja̍maanena̠ sammi̠taudu̍bamree bhavati̠ yaavaa̍ne̠va yaja̍maana̠staava̍tee-me̠vaasmi̠-nnoorja̍-ndadhaati pitri̠naagm sada̍nama̠seeti̍ ba̠r̠hirava̍ strinaati pitrideva̠tyaa̎(1̠)gg̠- [pitrideva̠tyaa̎m, hye̍ta-dyannikhaa̍ta̠m-] 51

-hye̍ta-dyannikhaa̍ta̠m ya-dba̠r̠hi-rana̍vasteerya minu̠yaa-tpi̍trideva̠tyaa̍ nikhaa̍taa syaa-dba̠r̠hi-ra̍va̠steerya̍ minotya̠syaa-me̠vainaa̎-mmino̠tyatho̎ svaa̠ruha̍-me̠vainaa̎-nkaro̠tyu-ddivagg̍ stabhaa̠naa-''ntari̍ksha-mpri̠netyaa̍hai̠shaam lo̠kaanaa̠m vidhri̍tyai dyutaa̠nastvaa̍ maaru̠to mi̍no̠tvityaa̍ha dyutaa̠no ha̍ sma̠ vai maa̍ru̠to de̠vaanaa̠-maudu̍bamree-mminoti̠ tenai̠vai- [tenai̠va, e̠naa̠-mmi̠no̠ti̠ bra̠hma̠vani̍-ntvaa] 52

-naa̎-mminoti brahma̠vani̍-ntvaa kshatra̠vani̠mityaa̍ha yathaaya̠jure̠vaita-dghri̠tena̍ dyaavaaprithivee̠ aa pri̍nethaa̠mityaudu̍bamryaa-njuhoti̠ dyaavaa̍prithi̠vee e̠va rase̍naanaktyaa̠-ntama̠nva-va̍sraavayatyaa̠ntame̠va yaja̍maana̠-nteja̍saa-naktyai̠ndrama̠seeti̍ chha̠diradhi̠ ni da̍dhaatyai̠ndragm hi de̠vata̍yaa̠ sado̍ vishvaja̠nasya̍ chhaa̠yetyaa̍ha vishvaja̠nasya̠ hye̍shaa chhaa̠yaa ya-thsado̠ nava̍chhadi̠ [nava̍chhadi, teja̍skaamasya] 53

teja̍skaamasya minuyaa-ttri̠vritaa̠ stome̍na̠ sammi̍ta̠-nteja̍stri̠vri-tte̍ja̠svye̍va bha̍va̠-tyekaa̍dasha-chhadeendri̠yakaa̍ma̠-syaikaa̍dashaaksharaa tri̠shtugi̍ndri̠ya-ntri̠shtugi̍ndriyaa̠vye̍va bha̍vati̠ pancha̍dashachhadi̠ bhraatri̍vyavatah panchada̠sho vajro̠ bhraatri̍vyaabhibhootyai sa̠ptada̍shachhadi pra̠jaakaa̍masya saptada̠shah pra̠jaapa̍tih pra̠jaapa̍te̠raaptyaa̠ eka̍vigmshatichhadi prati̠shthaakaa̍ma-syaikavi̠gm̠sha-sstomaa̍naa-mprati̠shthaa prati̍shthityaa u̠dara̠m vai sada̠ oorgu̍du̠bamro̍ maddhya̠ta audu̍bamree-mminoti maddhya̠ta e̠va pra̠jaanaa̠moorja̍-ndadhaati̠ tasmaa̎- [tasmaa̎t, ma̠ddhya̠ta oo̠rjaa] 54

-nmaddhya̠ta oo̠rjaa bhu̍njate yajamaanalo̠ke vai dakshi̍naani chha̠deegmshi̍ bhraatrivyalo̠ka utta̍raani̠ dakshi̍naa̠nyutta̍raani karoti̠ yaja̍maana-me̠vaa-ya̍jamaanaa̠dutta̍ra-nkaroti̠ tasmaa̠-dyaja̍maa̠no-'ya̍jamaanaa̠dutta̍ro 'ntarva̠rtaan ka̍roti̠ vyaavri̍ttyai̠ tasmaa̠dara̍nya-mpra̠jaa upa̍ jeevanti̠ pari̍ tvaa girvano̠ gira̠ ityaa̍ha yathaaya̠jure̠vaitadindra̍sya̠ syoora̠seendra̍sya dhru̠vama̠seetyaa̍hai̠ndragm hi de̠vata̍yaa̠ sado̠ ya-mpra̍tha̠ma-ngra̠nthi-ngra̍thnee̠yaadya-tta-nna vi̍sra̠gm̠ saye̠dame̍henaaddhva̠ryuh pramee̍yeta̠ tasmaa̠-thsa vi̠srasya̍h ॥ 55 ॥ (apa̍hatyai̠ - tasmaa̎t - pitrideva̠tya̍m - tenai̠va - nava̍chhadi̠ - tasmaa̠th - sada̠h - pancha̍dasha cha) (a. 10)

shiro̠ vaa e̠ta-dya̠jnasya̠ yaddha̍vi̠rdhaana̍-mpraa̠naa u̍para̠vaa ha̍vi̠rdhaane̍ khaayante̠ tasmaa̎-chchhee̠r̠sha-npraa̠naa a̠dhastaa̎-tkhaayante̠ tasmaa̍-da̠dhastaa̎-chchhee̠rshnah praa̠naa ra̍ksho̠hano̍ valaga̠hano̍ vaishna̠vaa-nkha̍naa̠meetyaa̍ha vaishna̠vaa hi de̠vata̍yopara̠vaa asu̍raa̠ vai ni̠ryanto̍ de̠vaanaa̎-mpraa̠neshu̍ vala̠gaa-nnya̍khana̠-ntaa-nbaa̍humaa̠tre-'nva̍vinda̠-ntasmaa̎-dbaahumaa̠traah khaa̍yanta i̠dama̠ha-ntam va̍la̠ga-mudva̍paami̠ [ ] 56

ya-nna̍-ssamaa̠no yamasa̍maano nicha̠khaanetyaa̍ha̠ dvau vaava puru̍shau̠ yashchai̠va sa̍maa̠no yashchaasa̍maano̠ yame̠vaasmai̠ tau va̍la̠ga-nni̠khana̍ta̠sta-me̠vodva̍pati̠ santri̍natti̠ tasmaa̠-thsantri̍nnaa antara̠tah praa̠naa na sa-mbhi̍natti̠ tasmaa̠-dasa̍bhinnnaah praa̠naa a̠po-'va̍ nayati̠ tasmaa̍-daa̠rdraa a̍ntara̠tah praa̠naa yava̍matee̠-rava̍ naya̠- [-rava̍ nayati, oorgvai] 57

-tyoorgvai yava̍h praa̠naa u̍para̠vaah praa̠neshve̠vorja̍-ndadhaati ba̠r̠hirava̍ strinaati̠ tasmaa̎lloma̠shaa a̍ntara̠tah praa̠naa aajye̍na̠ vyaaghaa̍rayati̠ tejo̠ vaa aajya̍-mpraa̠naa u̍para̠vaah praa̠neshve̠va tejo̍ dadhaati̠ hanoo̠ vaa e̠te ya̠jnasya̠ yada̍dhi̠shava̍ne̠ na sa-ntri̍na̠ttya sa̍trinnne̠ hi hanoo̠ atho̠ khalu̍ deerghaso̠me sa̠trindye̠ dhrityai̠ shiro̠ vaa e̠ta-dya̠jnasya̠ yaddha̍vi̠rdhaana̍- [yaddha̍vi̠rdhaana̎m, praa̠naa u̍para̠vaa hanoo̍] 58

-mpraa̠naa u̍para̠vaa hanoo̍ adhi̠shava̍ne ji̠hvaa charma̠ graavaa̍no̠ dantaa̠ mukha̍maahava̠neeyo̠ naasi̍ko-ttarave̠di-ru̠dara̠gm̠ sado̍ ya̠daa khalu̠ vai ji̠hvayaa̍ da̠thsvadhi̠ khaada̠tyatha̠ mukha̍-ngachchhati ya̠daa mukha̠-ngachchha̠tyatho̠dara̍-ngachchhati̠ tasmaa̎ddhavi̠rdhaane̠ charma̠nnadhi̠ graava̍bhirabhi̠shutyaa̍-''hava̠neeye̍ hu̠tvaa pra̠tyancha̍h pa̠retya̠ sada̍si bhakshayanti̠ yo vai vi̠raajo̍ yajnamu̠khe doha̠m veda̍ du̠ha e̠vai naa̍mi̠yam vai vi̠raa-ttasyai̠ tvakcharmodho̍-'dhi̠shava̍ne̠ stanaa̍ upara̠vaa graavaa̍no va̠thsaa ri̠tvijo̍ duhanti̠ soma̠h payo̠ ya e̠vam veda̍ du̠ha e̠vainaa̎m ॥ 59 ॥ (va̠paa̠mi̠-yava̍matee̠rava̍ nayati-havi̠rdhaana̍-me̠va-trayo̍vigmshatishcha) (a. 11)

(yadu̠bhau - de̍vaasu̠raah mi̠tha - steshaagm̍ - suva̠rgam - myadvaa anee̍shaanah - pu̠roha̍vishi̠ - tebhya̠h - sotta̍rave̠di - rba̠ddhan - de̠vasyaa-'bhri̠m vajrah - shiro̠ vaa - ekaa̍dasha )

(yadu̠bhaa - vityaa̍ha de̠vaanaa̎m - mya̠jno de̠vebhyo̠ - na rathaa̍ya̠ - yaja̍maanaaya - pa̠rastaa̍da̠rvaachee̠ - nnava̍ panchaa̠shat)

(yadu̠bhau, du̠ha e̠vainaa̎m)

॥ hari̍h om ॥ ॥ krishna yajurvedeeya taittireeya samhitaayaam shashthakaande dviteeyah prashna-ssamaaptah ॥

6.2 - യദുഭൌ വിമുച്യാതിഥ്യമ് - കൃഷ്ണ യജുർവേദ തൈത്തിരീയ സംഹിതാ പാഠഃ - ഒരു പരിചയം

This is the second prashna of the sixth kanda of the Krishna Yajurveda Taittiriya Samhita, a Brahmana-style explanation of the mantras of the soma sacrifice. It opens with the atithya, the guest offering made to King Soma when he is brought to the place of sacrifice: if both draught oxen were unyoked before the offering, the sacrifice would be broken, so one is unyoked and one kept yoked, for the continuity of the rite. It goes on to explain the upasad offerings and the building of the high altar.

ഉറവിടം: Krishna Yajurveda, Taittiriya Samhita 6.2

എപ്പോൾ ജപിക്കാം: In Vedic chanting and in traditional study of the Taittiriya Samhita.

നിങ്ങൾക്കറിയാമോ?

  • The sixth kanda of the Taittiriya Samhita explains the meaning of the soma rite whose mantras are given in earlier kandas.
  • Soma is welcomed with an "atithya", the same honour given to an honoured guest, showing the Vedic value of hospitality.

പതിവ് ചോദ്യങ്ങൾ

What is the atithya?

The guest offering made to King Soma.

Why is one ox kept yoked?

For the continuity of the sacrifice.

Which Veda is it from?

The Krishna Yajurveda, Taittiriya Samhita 6.2.

ആരാധനയ്ക്കും പഠനത്തിനുമായി നൽകുന്നു, പ്രവചനമായല്ല. വാണിജ്യേതരം.