2.3 - ஆதி³த்யேப்⁴யோ பு⁴வத்³வத்³ப்⁴யஶ்சரும் - க்ருஷ்ண யஜுர்வேத³ தைத்திரீய ஸம்ஹிதா பாட:²
Kanda 2 - Krishna Yajurveda Taittiriya Samhita · பாரம்பரிய பக்தி நூல்
krishna yajurvedeeya taittireeya samhitaayaa-ndviteeyakaande triteeyah prashnah - ishtividhaanam
o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥
aa̠di̠tyebhyo̠ bhuva̍dvadbhyashcha̠ru-nnirva̍pe̠-dbhooti̍kaama aadi̠tyaa vaa e̠ta-mbhootyai̠ prati̍ nudante̠ yo-'la̠-mbhootyai̠ sa-nbhooti̠-nna praa̠pnotyaa̍di̠tyaane̠va bhuva̍dvata̠-ssvena̍ bhaaga̠dheye̠nopa̍ dhaavati̠ ta e̠vaina̠-mbhooti̍-ngamayanti̠ bhava̍tye̠vaa ''di̠tyebhyo̍ dhaa̠raya̍dva-dbhyashcha̠ru-nnirva̍pe̠-dapa̍ruddho vaa-'paru̠ddhyamaa̍no vaa-''di̠tyaa vaa a̍paro̠ddhaara̍ aadi̠tyaa a̍vagamayi̠taara̍ aadi̠tyaane̠va dhaa̠raya̍dvata̠- [dhaa̠raya̍dvatah, svena̍] 1
-ssvena̍ bhaaga̠dheye̠nopa̍ dhaavati̠ ta e̠vaina̍m vi̠shi daa̎ddhratyanaparu̠ddhyo bha̍va̠tyadi̠te-'nu̍ manya̠sve-tya̍paru̠ddhyamaa̍no-'sya pa̠damaa da̍deete̠yam vaa adi̍tiri̠yame̠vaasmai̍ raa̠jyamanu̍ manyate sa̠tyaa-''sheerityaa̍ha sa̠tyaame̠vaa-''shisha̍-nkuruta i̠ha mana̠ ityaa̍ha pra̠jaa e̠vaasmai̠ sama̍nasah karo̠tyupa̠ preta̍ maruta- [preta̍ marutah, su̠daa̠na̠va̠ e̠naa] 2
-ssudaanava e̠naa vi̠shpati̍naa̠-'bhya̍mugm raajaa̍na̠mityaa̍ha maaru̠tee vai vi-djye̠shtho vi̠shpati̍-rvi̠shaivainagm̍ raa̠shtrena̠ sama̍rdhayati̠ yah pa̠rastaa̎-dgraamyavaa̠dee syaa-ttasya̍ gri̠haa-dvree̠heenaa ha̍rechchhu̠klaagshcha̍ kri̠shnaagshcha̠ vi chi̍nuyaa̠dye shu̠klaa-ssyustamaa̍di̠tya-ncha̠ru-nnirva̍pedaadi̠tyaa vai de̠vata̍yaa̠ vidvisha̍me̠vaa-'va̍ gachchha̠- [gachchhati, ava̍gataa-'sya̠] 3
-tyava̍gataa-'sya̠ vidana̍vagatagm raa̠shtra-mityaa̍hu̠rye kri̠shnaa-ssyustam vaa̍ru̠na-ncha̠ru-nnirva̍pe-dvaaru̠nam vai raa̠shtramu̠bhe e̠va visha̍-ncha raa̠shtra-nchaava̍ gachchhati̠ yadi̠ naava̠gachchhe̍di̠ma-ma̠hamaa̍di̠tyebhyo̍ bhaa̠ga-nnirva̍paa̠myaa 'mushmaa̍-da̠mushyai̍ vi̠sho-'va̍ganto̠-riti̠ nirva̍pe-daadi̠tyaa e̠vaina̍-mbhaaga̠dheya̍-mpre̠phsanto̠ visha̠mava̍ [visha̠mava̍, ga̠ma̠ya̠nti̠ yadi̠] 4
gamayanti̠ yadi̠ naava̠gachchhe̠daashva̍tthaa-nma̠yookhaa̎m-thsa̠pta ma̍ddhyame̠shaayaa̠mupa̍- hanyaadi̠dama̠ha-maa̍di̠tyaa-nba̍dhnaa̠myaa 'mushmaa̍da̠mushyai̍ vi̠sho-'va̍ganto̠rityaa̍di̠tyaa e̠vaina̍-mba̠ddhavee̍raa̠ visha̠mava̍ gamayanti̠ yadi̠ naa-'va̠gachchhe̍-de̠ta-me̠vaa-''di̠tya-ncha̠ru-nnirva̍pe-di̠ddhme-'pi̍ ma̠yookhaa̠n-thsa-nna̍hye-danaparu̠ddhya-me̠vaava̍ gachchha̠tyaashva̍tthaa bhavantima̠rutaa̠m vaa e̠ta -dojo̠ yada̍shva̠ttha oja̍sai̠va visha̠mava̍ gachchhati sa̠pta bha̍vanti sa̠pta ga̍naa̠ vai ma̠ruto̍ gana̠sha e̠va visha̠mava̍ gachchhati । 5 (dhaa̠raya̍dvato - maruto - gachchhati̠ - visha̠mavai̠ - ta - da̠shtaada̍sha cha) (a. 1)
de̠vaa vai mri̠tyo-ra̍bibhayu̠ste pra̠jaapa̍ti̠-mupaa̍dhaava̠-ntebhya̍ e̠taa-mpraa̍jaapa̠tyaagm sha̠takri̍shnalaa̠-nnira̍vapa̠-ttayai̠vaishva̠mrita̍-madadhaa̠dyo mri̠tyo-rbi̍bhee̠yaa-ttasmaa̍ e̠taa-mpraa̍jaapa̠tyaagm sha̠takri̍shnalaa̠-nnirva̍pe-tpra̠jaapa̍ti-me̠va svena̍ bhaaga̠dheye̠nopa̍ dhaavati̠ sa e̠vaa-'smi̠-nnaayu̍-rdadhaati̠ sarva̠maayu̍reti sha̠takri̍shnalaa bhavati sha̠taayu̠h puru̍sha̠-shsha̠tendri̍ya̠ aayu̍shye̠vendri̠ye [ ] 6
prati̍ tishthati ghri̠te bha̍va̠tyaayu̠rvai ghri̠ta-ma̠mrita̠gm̠ hira̍nya̠-maayu̍shchai̠vaasmaa̍ a̠mrita̍-ncha sa̠meechee̍ dadhaati cha̠tvaari̍ chatvari kri̠shnalaa̠nyava̍ dyati chaturava̠-ttasyaa-''ptyaa̍ eka̠dhaa bra̠hmana̠ upa̍ haratyeka̠dhaiva yaja̍maana̠ aayu̍rdadhaatya̠- saavaa̍di̠tyo na vya̍rochata̠ tasmai̍ de̠vaah praaya̍shchitti-maichchha̠-ntasmaa̍ e̠tagm sau̠rya-ncha̠ru-nnira̍vapa̠-ntenai̠vaa-'smi̠- [-tenai̠vaa-'sminn̍, rucha̍-madadhu̠ryo] 7
-nrucha̍-madadhu̠ryo bra̍hmavarcha̠sakaa̍ma̠-ssyaa-ttasmaa̍ e̠tagm sau̠rya-ncha̠ru-nnirva̍pe-da̠mu-me̠vaa-''di̠tyagg svena̍ bhaaga̠dheye̠nopa̍ dhaavati̠ sa e̠vaasmi̍-nbrahmavarcha̠sa-nda̍dhaati brahmavarcha̠sye̍va bha̍vatyubha̠yato̍ ru̠kmau bha̍vata ubha̠yata̍ e̠vaasmi̠-nrucha̍-ndadhaati prayaa̠je pra̍yaaje kri̠shnala̍-njuhoti di̠gbhya e̠vaasmai̎ brahmavarcha̠samava̍ rundha aagne̠ya-ma̠shtaaka̍paala̠-nnirva̍pe-thsaavi̠tra-ndvaada̍shakapaala̠-mbhoomyai̍ [-bhoomyai̎, cha̠rum yah kaa̠maye̍ta̠] 8
cha̠rum yah kaa̠maye̍ta̠ hira̍nyam vindeya̠ hira̍nya̠-mmopa̍ name̠diti̠ yadaa̎gne̠yo bhava̍tyaagne̠yam vai hira̍nya̠m yasyai̠va hira̍nya̠-ntenai̠vaina̍-dvindate saavi̠tro bha̍vati savi̠tripra̍soota e̠vaina̍-dvindate̠ bhoomyai̍ cha̠rurbha̍vatya̠syaame̠vaina̍-dvindata̠ upai̍na̠gm̠ hira̍nya-nnamati̠ vi vaa e̠sha i̍ndri̠yena̍ vee̠rye̍nardhyate̠ yo hira̍nyam vi̠ndata̍ e̠taa- [e̠taam, e̠va] 9
-me̠va nirva̍pe̠ddhira̍nyam vi̠ttvaa nendri̠yena̍ vee̠rye̍na̠ vyri̍ddhyata e̠taame̠va nirva̍pe̠dyasya̠ hira̍nya̠-nnashye̠dyadaa̎gne̠yo bhava̍tyaagne̠yam vai hira̍nya̠m yasyai̠ va hira̍nya̠-ntenai̠vaina̍-dvindati saavi̠tro bha̍vati savi̠tri-pra̍soota e̠vaina̍-dvindati̠ bhoomyai̍ cha̠rurbha̍vatya̠syaam vaa e̠tanna̍shyati̠ yannashya̍tya̠syaame̠vaina̍-dvinda̠teendra̠- [dvinda̠teendra̍h, tvashtu̠-ssoma̍] 10
-stvashtu̠-ssoma̍-mabhee̠shahaa̍-' piba̠-thsa vishva̠m vyaa̎rchchha̠-thsa i̍ndri̠yena̍ somapee̠thena̠ vyaa̎rdhyata̠ sa yadoo̠rdhvamu̠dava̍mee̠-tte shyaa̠maakaa̍ abhava̠nthsa pra̠jaapa̍ti̠mupaa̍dhaava̠-ttasmaa̍ e̠tagm so̍me̠ndragg shyaa̍maa̠ka-ncha̠ru-nnira̍vapa̠-ttenai̠vaasmi̍nnindri̠yagm so̍mapee̠thama̍dadhaa̠dvi vaa e̠sha i̍ndri̠yena̍ soma̠peethena̍rdhyate̠ ya-ssoma̠m vami̍ti̠ ya-sso̍mavaa̠mee syaa-ttasmaa̍ [syaa-ttasmai̎, e̠tagm] 11
e̠tagm so̍me̠ndragg shyaa̍maa̠ka-ncha̠ru-nnirva̍pe̠-thsoma̍-nchai̠vendra̍-ncha̠ svena̍ bhaaga̠dheye̠nopa̍ dhaavati̠ taave̠vaasmi̍nnindri̠yagm so̍mapee̠tha-ndha̍tto̠ nendri̠yena̍ somapee̠thena̠ vyri̍ddhyate̠ ya-thsau̠myo bhava̍ti somapee̠thame̠vaava̍ rundhe̠ yadai̠ndro bhava̍teendri̠yam vai so̍mapee̠tha i̍ndri̠yame̠va so̍mapee̠thamava̍ rundhe shyaamaa̠ko bha̍vatye̠sha vaava sa soma̍- [sa soma̍h, saa̠kshaade̠va] 12
-ssaa̠kshaade̠va so̍mapee̠thamava̍ rundhe̠ 'gnaye̍ daa̠tre pu̍ro̠daasha̍ma̠shtaaka̍paala̠-nnirva̍pe̠dindraa̍ya pradaa̠tre pu̍ro̠daasha̠mekaa̍dashakapaala-mpa̠shukaa̍mo̠-'gnire̠vaasmai̍ pa̠shoo-npra̍ja̠naya̍ti vri̠ddhaanindra̠h pra ya̍chchhati̠ dadhi̠ madhu̍ ghri̠tamaapo̍ dhaa̠naa bha̍vantye̠tadvai pa̍shoo̠naagm roo̠pagm roo̠penai̠va pa̠shoonava̍ rundhe pancha-grihee̠ta-mbha̍vati̠ paanktaa̠ hi pa̠shavo̍ bahu roo̠pa-mbha̍vati bahu roo̠paa hi pa̠shava̠- [pa̠shava̍h, samri̍ddhyai] 13
-ssamri̍ddhyai praajaapa̠tya-mbha̍vati praajaapa̠tyaa vai pa̠shava̍h pra̠jaapa̍tire̠vaasmai̍ pa̠shoo-npraja̍nayatyaa̠tmaa vai puru̍shasya̠ madhu̠ yanmaddhva̠gnau ju̠hotyaa̠tmaana̍me̠va ta-dyaja̍maano̠-'gnau prada̍dhaati pa̠nktyau̍ yaajyaanuvaa̠kye̍ bhavata̠h paankta̠h puru̍sha̠h paanktaa̎h pa̠shava̍ aa̠tmaana̍me̠va mri̠tyorni̠shkreeya̍pa̠shoonava̍ rundhe ॥ 14 ॥ (i̠ndri̠ye̎ - 'smi̠n - bhoomyaa̍ - e̠taa - mindra̠h - syaa-ttasmai̠ - somo̍ - bahu roo̠paa hi pa̠shava̠ - eka̍chatvarigmshachcha ) (a. 2)
de̠vaa vai sa̠tramaa̍sa̠ta-rdhi̍parimita̠m yasha̍skaamaa̠steshaa̠gm̠ soma̠gm̠ raajaa̍na̠m yasha̍ aarchchha̠-thsa gi̠rimudai̠-ttama̠gniranoodai̠-ttaava̠gneeshomau̠ sama̍bhavataa̠-ntaavindro̍ ya̠jnavi̍bhra̠shto-'nu̠ parai̠-ttaava̍braveedyaa̠jaya̍ta̠-mmeti̠ tasmaa̍ e̠taamishti̠-nnira̍vapataamaagne̠ya-ma̠shtaaka̍paalamai̠ndra-mekaa̍dashakapaalagm sau̠mya-ncha̠ru-ntayai̠vaa-'smi̠-nteja̍ [tayai̠vaa-'smi̠-nteja̍h, i̠ndri̠ya-mbra̍hmavarcha̠sa-] 15
indri̠ya-mbra̍hmavarcha̠sa-ma̍dhattaa̠m yo ya̠jnavi̍bhrashta̠-ssyaa-ttasmaa̍ e̠taamishti̠-nnirva̍pedaagne̠ya-ma̠shtaaka̍paalamai̠ndra-mekaa̍dashakapaalagm sau̠mya-ncha̠rum yadaa̎gne̠yo bhava̍ti̠ teja̍ e̠vaasmi̠-ntena̍ dadhaati̠ yadai̠ndro bhava̍teendri̠yame̠vaasmi̠-ntena̍ dadhaati̠ ya-thsau̠myo bra̍hmavarcha̠sa-ntenaa̎ ''gne̠yasya̍ cha sau̠myasya̍ chai̠ndre sa̠maashle̍shaye̠-tteja̍shchai̠vaasmi̍-nbrahmavarcha̠sa-ncha̍ sa̠meechee̍ [sa̠meechee̎, da̠dhaa̠tya̠gnee̠sho̠meeya̠-] 16
dadhaatyagneesho̠meeya̠-mekaa̍dashakapaala̠-nnirva̍pe̠dya-nkaamo̠ nopa̠name̍daagne̠yo vai braa̎hma̠na-ssa soma̍-mpibati̠ svaame̠va de̠vataa̠g̠ svena̍ bhaaga̠dheye̠nopa̍ dhaavati̠ saivaina̠-nkaame̍na̠ sama̍rdhaya̠tyupai̍na̠-nkaamo̍ namatyagneesho̠meeya̍-ma̠shtaaka̍paala̠-nnirva̍pe-dbrahmavarcha̠sakaa̍mo̠-'gneeshomaa̍ ve̠va svena̍ bhaaga̠dheye̠nopa̍ dhaavati̠ taave̠vaasmi̍-nbrahmavarcha̠sa-ndha̍tto brahmavarcha̠sye̍va [brahmavarcha̠sye̍va, bha̠va̠ti̠ yada̠shtaaka̍paala̠-] 17
bha̍vati̠ yada̠shtaaka̍paala̠-stenaa̎-''gne̠yo yachchhyaa̍maa̠kastena̍ sau̠mya-ssamri̍ddhyai̠ somaa̍ya vaa̠jine̎ shyaamaa̠ka-ncha̠ru-nnirva̍pe̠dyah klaibyaa̎dbibhee̠yaa-dreto̠ hi vaa e̠tasmaa̠-dvaaji̍namapa̠kraama̠tyathai̠sha klaibyaa̎dbibhaaya̠ soma̍me̠va vaa̠jina̠gg̠ svena̍ bhaaga̠dheye̠nopa̍ dhaavati̠ sa e̠vaasmi̠-nreto̠ vaaji̍na-ndadhaati̠ na klee̠bo bha̍vatibraahmanaspa̠tya-mekaa̍dashakapaala̠-nnirva̍pe̠-dgraama̍kaamo̠ [-nirva̍pe̠-dgraama̍kaamah, brahma̍na̠spati̍me̠va] 18
brahma̍na̠spati̍me̠va svena̍ bhaaga̠dheye̠nopa̍ dhaavati̠ sa e̠vaasmai̍ sajaa̠taa-npra ya̍chchhati graa̠mye̍va bha̍vati ga̠nava̍tee yaajyaanuvaa̠kye̍ bhavata-ssajaa̠taire̠vaina̍-nga̠nava̍nta-nkarotye̠taame̠va nirva̍pe̠dyah kaa̠maye̍ta̠ brahma̠n visha̠m vi naa̍shayeya̠miti̍ maaru̠tee yaa̎jyaanuvaa̠kye̍ kuryaa̠-dbrahma̍nne̠va visha̠m vi naa̍shayati ॥ 19 (teja̍h - sa̠meechee̎ - brahmavarcha̠sye̍va - graama̍kaama̠ - stricha̍tvaarigmshachcha ) (a. 3)
a̠rya̠mne cha̠ru-nnirva̍pe-thsuva̠rgakaa̍mo̠-'sau vaa aa̍di̠tyo̎-'rya̠maa-'rya̠mana̍me̠va svena̍ bhaaga̠dheye̠nopa̍ dhaavati̠ sa e̠vainagm̍ suva̠rgam lo̠ka-nga̍mayatyarya̠mne cha̠ru-nnirva̍pe̠dyah kaa̠maye̍ta̠ daana̍kaamaa me pra̠jaa-ssyu̠ritya̠sau vaa aa̍di̠tyo̎-'rya̠maa yah khalu̠ vai dadaa̍ti̠ so̎-'rya̠maa-'rya̠mana̍me̠va svena̍ bhaaga̠dheye̠nopa̍ dhaavati̠ sa e̠vaa- [sa e̠va, a̠smai̠ daana̍kaamaah] 20
-'smai̠ daana̍kaamaah pra̠jaah ka̍roti̠ daana̍kaamaa asmai pra̠jaa bha̍vantyarya̠mne cha̠ru-nnirva̍pe̠dyah kaa̠maye̍ta sva̠sti ja̠nataa̍miyaa̠mitya̠sau vaa aa̍di̠tyo̎-'rya̠maa- 'rya̠mana̍me̠va svena̍ bhaaga̠dheye̠nopa̍ dhaavati̠ sa e̠vaina̠-nta-dga̍mayati̠ yatra̠ jiga̍misha̠teendro̠ vai de̠vaanaa̍maanujaava̠ra aa̍see̠-thsa pra̠jaapa̍ti̠ -mupaa̍dhaava̠-ttasmaa̍ e̠tamai̠ndramaa̍nushoo̠ka-mekaa̍dashakapaala̠-nni- [-mekaa̍dashakapaala̠-nnih, a̠va̠pa̠-ttenai̠vaina̠magra̍m-] 21
-ra̍vapa̠-ttenai̠vaina̠-magra̍-nde̠vataa̍naa̠-mparya̍naya-dbu̠ddhnava̍tee̠ agra̍vatee yaajyaanuvaa̠kye̍ akaro-dbu̠ddhnaa-de̠vaina̠magra̠-mparya̍naya̠dyo raa̍ja̠nya̍ aanujaava̠ra-ssyaa-ttasmaa̍ e̠tamai̠ndra-maa̍nushoo̠ka-mekaa̍dashakapaala̠-nnirva̍pe̠-dindra̍me̠va svena̍ bhaaga̠dheye̠nopa̍ dhaavati̠ sa e̠vaina̠-magragm̍ samaa̠naanaa̠-mpari̍nayati bu̠ddhnava̍tee̠ agra̍vatee yaajyaanuvaa̠kye̍ bhavato bu̠ddhnaa-de̠vaina̠-magra̠m- [bu̠ddhnaa-de̠vaina̠-magra̎m, pari̍] 22
-pari̍ nayatyaanushoo̠ko bha̍vatye̠shaa hye̍tasya̍ de̠vataa̠ ya aa̍nujaava̠ra-ssamri̍ddhyai̠ yo braa̎hma̠na aa̍nujaava̠ra-ssyaa-ttasmaa̍ e̠ta-mbaa̍rhaspa̠tya-maa̍nushoo̠ka-ncha̠ru-nnirva̍pe̠-dbriha̠spati̍-me̠va svena̍ bhaaga̠dheye̠nopa̍ dhaavati̠ sa e̠vaina̠magragm̍ samaa̠naanaa̠-mpari̍nayati bu̠ddhnava̍tee̠ agra̍vatee yaajyaanuvaa̠kye̍ bhavato bu̠ddhnaa-de̠vaina̠-magra̠-mpari̍ nayatyaanushoo̠ko bha̍vatye̠shaa hye̍tasya̍ de̠vataa̠ ya aa̍nujaava̠ra-ssamri̍ddhyai ॥ 23 ॥ (e̠va - nira - gra̍-me̠tasya̍ - cha̠tvaari̍ cha) (a. 4)
pra̠jaapa̍te̠-straya̍strigmsha-dduhi̠tara̍ aasa̠-ntaa-ssomaa̍ya̠ raajne̍-'dadaa̠-ttaasaagm̍ rohi̠neemupai̠-ttaa eershya̍ntee̠h puna̍ragachchha̠-ntaa anvai̠-ttaah puna̍rayaachata̠ taa a̍smai̠ na puna̍radadaa̠-thso̎-'bravee-dri̠ta-ma̍meeshva̠ yathaa̍ samaava̠chchha u̍pai̠shyaamyatha̍ te̠ puna̍-rdaasyaa̠meeti̠ sa ri̠tamaa̍mee̠-ttaa a̍smai̠ puna̍radadaa̠-ttaasaagm̍ rohi̠neeme̠vopa̠- [rohi̠neeme̠vopa̍, ai̠ttam yakshma̍] 24
-ttam yakshma̍ aarchchha̠-draajaa̍na̠m yakshma̍ aara̠diti̠ tadraa̍jaya̠kshmasya̠ janma̠ ya-tpaapee̍yaa̠nabha̍va̠-tta-tpaa̍paya̠kshmasya̠ yajjaa̠yaabhyo-'vi̍nda̠-ttajjaa̠yenya̍sya̠ya e̠vame̠teshaa̠m yakshmaa̍naa̠-njanma̠ veda̠ naina̍me̠te yakshmaa̍ vindanti̠sa e̠taa e̠va na̍ma̠sya-nnupaa̍-'dhaava̠-ttaa a̍bruva̠n. vara̍m vrinaamahai samaava̠chchha e̠va na̠ upaa̍ya̠ iti̠ tasmaa̍ e̠ta- [tasmaa̍ e̠tam, aa̍di̠tya-ncha̠rum] 25
-maa̍di̠tya-ncha̠ru-nnira̍vapa̠-ntenai̠vaina̍-mpaa̠paa-thsraamaa̍damuncha̠n. yah paa̍paya̠kshmagri̍heeta̠-ssyaa-ttasmaa̍ e̠tamaa̍di̠tya-ncha̠ru-nnirva̍pedaadi̠tyaane̠va svena̍ bhaaga̠dheye̠nopa̍ dhaavati̠ ta e̠vaina̍-mpaa̠paa-thsraamaa̎nmunchantya-maavaa̠syaa̍yaa̠-nnirva̍pe-da̠mume̠vaina-̍maa̠pyaaya̍maana̠-manvaa pyaa̍yayati̠ navo̍navo bhavati̠ jaaya̍maana̠ iti̍ puro-'nuvaa̠kyaa̍ bhava̠tyaayu̍re̠vaasmi̠-ntayaa̍ dadhaati̠ yamaa̍di̠tyaa a̠gm̠shumaa̎pyaa̠yaya̠nteeti̍ yaa̠jyaivaina̍me̠tayaa̎ pyaayayati ॥ 26 ॥ (e̠vopai̠ -ta- ma̍smi̠n - trayo̍dashacha) (a. 5)
pra̠jaapa̍ti rde̠vebhyo̠-'nnaadya̠m vyaadi̍sha̠-thso̎-'bravee̠dyadi̠maan mlo̠kaa-na̠bhya̍ti̠richyaa̍tai̠ tanmamaa̍sa̠diti̠ tadi̠maan mlo̠kaa-na̠bhyatya̍richya̠tendra̠gm̠ raajaa̍na̠-mindra̍-madhiraa̠ja-mindragg̍ sva̠raajaa̍na̠-ntato̠ vai sa i̠maan mlo̠kaag stre̠dhaa-'du̍ha̠-tta-ttri̠dhaato̎-stridhaatu̠tvam ya-nkaa̠maye̍taannaa̠da-ssyaa̠diti̠ tasmaa̍ e̠ta-ntri̠dhaatu̠-nnirva̍pe̠dindraa̍ya̠ raajne̍ puro̠daasha̠- [puro̠daasha̎m, ekaa̍dashakapaala̠-] 27
-mekaa̍dashakapaala̠-mindraa̍yaa-dhiraa̠jaayendraa̍ya sva̠raajne̠-'yam vaa indro̠ raajaa̠-'yamindro̍-'dhiraa̠jo̍-'saavindra̍-ssva̠raadi̠maane̠va lo̠kaan-thsvena̍ bhaaga̠dheye̠nopa̍ dhaavati̠ ta e̠vaasmaa̠ anna̠-mpraya̍chchhantyannaa̠da e̠va bha̍vati̠ yathaa̍ va̠thsena̠ prattaa̠-ngaa-ndu̠ha e̠vame̠vemaan mlo̠kaa-nprattaa̠n kaama̍ma̠nnaadya̍-nduha uttaa̠neshu̍ ka̠paale̠shvadhi̍ shraya̠tyayaa̍tayaamatvaaya̠ traya̍h puro̠daashaa̍ bhavanti̠ traya̍ i̠me lo̠kaa e̠shaam lo̠kaanaa̠maaptyaa̠ utta̍rauttaro̠ jyaayaa̎-nbhavatye̠vami̍va̠ heeme lo̠kaa-ssamri̍ddhyai̠ sarve̍shaamabhi-ga̠maya̠nnava̍ dya̠tyachha̍mbatkaaram vya̠tyaasa̠manvaa̠haani̍rdaahaaya ॥ 28 ॥ (pu̠ro̠daasha̠m - traya̠h - shadvigm̍shatishcha) (a. 6)
de̠vaa̠su̠raa-ssamya̍ttaa aasa̠-ntaa-nde̠vaanasu̍raa ajaya̠-nte de̠vaah pa̍raajigyaa̠naa asu̍raanaa̠m vaishya̠mupaa̍-''ya̠-ntebhya̍ indri̠yam vee̠rya̍mapaa̎kraama̠-ttadindro̍-'chaaya̠-ttadanvapaa̎kraama̠-ttada̍va̠rudha̠-nnaasha̍kno̠-ttada̍smaadabhya̠rdho̍ 'chara̠-thsa pra̠jaapa̍ti̠mupaa̍dhaava̠-ttame̠tayaa̠ sarva̍prishthayaa-'yaajaya̠-ttayai̠vaa-'smi̍-nnindri̠yam vee̠rya̍-madadhaa̠dya i̍ndri̠yakaa̍mo [i̍ndri̠yakaa̍mah, vee̠rya̍kaama̠-ssyaat-] 29
vee̠rya̍kaama̠-ssyaa-ttame̠tayaa̠ sarva̍prishthayaa yaajayede̠taa e̠va de̠vataa̠-ssvena̍ bhaaga̠dheye̠nopa̍ dhaavati̠ taa e̠vaasmi̍-nnindri̠yam vee̠rya̍-ndadhati̠yadindraa̍ya̠ raatha̍ntaraaya ni̠rvapa̍ti̠ yade̠vaagne-steja̠stade̠vaava̍ rundhe̠yadindraa̍ya̠ baarha̍taaya̠ yade̠vendra̍sya̠ teja̠stade̠vaava̍ rundhe̠ yadindraa̍ya vairoo̠paaya̠ yade̠va sa̍vi̠tu-steja̠sta- [sa̍vi̠tu-steja̠stat, e̠vaava̍ rundhe̠] 30
-de̠vaava̍ rundhe̠ yadindraa̍ya vairaa̠jaaya̠ yade̠va dhaa̠tu-steja̠sta-de̠vaava̍ rundhe̠ yadindraa̍ya shaakva̠raaya̠ yade̠va ma̠rutaa̠-nteja̠sta-de̠vaava̍ rundhe̠ yadindraa̍ya raiva̠taaya̠ yade̠va briha̠spate̠-steja̠sta-de̠vaa-'va̍ rundha e̠taava̍nti̠ vai tejaagm̍si̠ taanye̠vaava̍ rundha uttaa̠neshu̍ ka̠paale̠shvadhi̍ shraya̠tyayaa̍tayaamatvaaya̠ dvaada̍shakapaalah puro̠daasho̍ [puro̠daasha̍h, bha̠va̠ti̠ vai̠shva̠de̠va̠tvaaya̍] 31
bhavati vaishvadeva̠tvaaya̍ sama̠nta-mpa̠ryava̍dyati sama̠nta-me̠vendri̠yam vee̠rya̍m yaja̍maane dadhaati vya̠tyaasa̠-manvaa̠haani̍rdaahaa̠yaashva̍ risha̠bho vri̠shnirba̠sta-ssaa-dakshi̍naa-vrisha̠tvaayai̠tayai̠va ya̍jetaa-'bhisha̠syamaa̍na e̠taashchedvaa a̍syade̠vataa̠ anna̍-ma̠dantya̠dantyu̍-ve̠vaa-'sya̍ manu̠shyaa̎h ॥ 32 ॥ (i̠ndri̠ya̠kaa̍mah-savi̠tusteja̠stat - pu̍ro̠daasho̠ -'shtaatrigm̍shachcha) (a. 7)
raja̍no̠ vai kau̍ne̠yah kra̍tu̠jita̠-njaana̍ki-nchakshu̠rvanya̍mayaa̠-ttasmaa̍ e̠taamishti̠-nnira̍vapa-da̠gnaye̠ bhraaja̍svate puro̠daasha̍-ma̠shtaaka̍paalagm sau̠rya-ncha̠ruma̠gnaye̠ bhraaja̍svate puro̠daasha̍-ma̠shtaaka̍paala̠-ntayai̠vaasmi̠n chakshu̍radadhaa̠-dya-shchakshu̍shkaama̠-ssyaa-ttasmaa̍ e̠taamishti̠-nnirva̍pe-da̠gnaye̠ bhraaja̍svate puro̠daasha̍ma̠shtaaka̍paalagm sau̠rya-ncha̠ruma̠gnaye̠ bhraaja̍svate puro̠daasha̍-ma̠shtaaka̍paalama̠gne rvai chakshu̍shaa manu̠shyaa̍ vi- [chakshu̍shaa manu̠shyaa̍ vi, pa̠shya̠nti̠ soorya̍sya] 33
pa̍shyanti̠ soorya̍sya de̠vaa a̠gni-nchai̠va soorya̍-ncha̠ svena̍ bhaaga̠dheye̠nopa̍ dhaavati̠ taave̠vaasmi̠n chakshu̍-rdhatta̠-shchakshu̍shmaa-ne̠va bha̍vati̠ yadaa̎gne̠yau bhava̍ta̠-shchakshu̍shee e̠vaasmi̠-nta-tprati̍ dadhaati̠ ya-thsau̠ryo naasi̍kaa̠-ntenaa̠bhita̍-ssau̠ryamaa̎gne̠yau bha̍vata̠-stasmaa̍-da̠bhito̠ naasi̍kaa̠-nchakshu̍shee̠ tasmaa̠-nnaasi̍kayaa̠ chakshu̍shee̠ vidhri̍te samaa̠nee yaa̎jyaanuvaa̠kye̍ bhavata-ssamaa̠nagm hi chakshu̠-ssamri̍ddhyaa̠ udu̠tya-njaa̠tave̍dasagm sa̠pta tvaa̍ ha̠rito̠ rathe̍ chi̠tra-nde̠vaanaa̠muda̍gaa̠danee̍ka̠miti̠ pindaa̠-npraya̍chchhati̠ chakshu̍-re̠vaasmai̠ praya̍chchhati̠ yade̠va tasya̠ tat ॥ 34 ॥ (vi - hya̍ - shtaavigm̍shatishcha) (a. 8)
dhru̠vo̍-'si dhru̠vo̍-'hagm sa̍jaa̠teshu̍ bhooyaasa̠-ndheera̠shchettaa̍ vasu̠vi-ddhru̠vo̍-'si dhru̠vo̍-'hagm sa̍jaa̠teshu̍ bhooyaasa-mu̠grashchettaa̍ vasu̠vi-ddhru̠vo̍-'si dhru̠vo̍-'hagm sa̍jaa̠teshu̍ bhooyaasa-mabhi̠bhooshchettaa̍ vasu̠vi-daama̍na-ma̠syaama̍nasya devaa̠ ye sa̍jaa̠taah ku̍maa̠raa-ssama̍nasa̠staana̠ha-nkaa̍maye hri̠daa te maa-nkaa̍mayantaagm hri̠daa taa-nma̠ aama̍nasah kridhi̠ svaahaa ''ma̍nama̠- [svaahaa ''ma̍nama̠si, aama̍nasya] 35
-syaama̍nasya devaa̠ yaa-sstriya̠-ssama̍nasa̠staa a̠ha-nkaa̍maye hri̠daa taa maa-nkaa̍mayantaagm hri̠daa taa ma̠ aama̍nasah kridhi̠ svaahaa̍ vaishvade̠veegm-saa̎mgraha̠nee-nnirva̍pe̠dgraama̍kaamo vaishvade̠vaa vai sa̍jaa̠taa vishvaa̍ne̠va de̠vaanthsvena̍ bhaaga̠dheye̠nopa̍ dhaavati̠ ta e̠vaasmai̍ sajaa̠taa-npra ya̍chchhanti graa̠mye̍va bha̍vati saangraha̠nee bha̍vati mano̠graha̍na̠m vaisa̠gramha̍na̠-mmana̍ e̠va sa̍jaa̠taanaa̎m- [e̠va sa̍jaa̠taanaa̎m, gri̠hnaa̠ti̠ dhru̠vo̍-'si] 36
-grihnaati dhru̠vo̍-'si dhru̠vo̍-'hagm sa̍jaa̠teshu̍ bhooyaasa̠miti̍ pari̠dhee-npari̍ dadhaatyaa̠shisha̍me̠vaitaamaa shaa̠ste-'tho̍ e̠tade̠va sarvagm̍ sajaa̠teshvadhi̍ bhavati̠ yasyai̠vam vi̠dusha̍ e̠te pa̍ri̠dhaya̍h paridhee̠yanta̠ aama̍ nama̠syaama̍nasya devaa̠ iti̍ ti̠sra aahu̍tee rjuhotye̠taava̍nto̠ vai sa̍jaa̠taa ye ma̠haanto̠ ye kshu̍lla̠kaa yaa-sstriya̠staane̠vaava̍ rundhe̠ ta e̍na̠mava̍ruddhaa̠ upa̍ tishthante ॥ 37 ॥ (svaahaa ''ma̍namasi - sajaa̠taanaagm̍ - rundhe̠ - pancha̍ cha ) (a. 9)
yannava̠-maitta-nnava̍neeta-mabhava̠dya-dasa̍rpa̠-tta-thsa̠rpira̍bhava̠-dyadaddhi̍yata̠ ta-dghri̠tama̍bhavada̠shvino̎h praa̠no̍-'si̠ tasya̍ te dattaa̠m yayo̎h praa̠no-'si̠ svaahendra̍sya praa̠no̍-'si̠ tasya̍ te dadaatu̠ yasya̍ praa̠no-'si̠ svaahaa̍ mi̠traavaru̍nayoh praa̠no̍-'si̠ tasya̍ te dattaa̠m yayo̎h praa̠no-'si̠ svaahaa̠ vishve̍shaa-nde̠vaanaa̎-mpraa̠no̍-'si̠ [vishve̍shaa-nde̠vaanaa̎-mpraa̠no̍-'si̠, tasya̍ te] 38
tasya̍ te dadatu̠ yeshaa̎-mpraa̠no-'si̠ svaahaa̍ ghri̠tasya̠ dhaaraa̍ma̠mrita̍sya̠ panthaa̠mindre̍na da̠ttaa-mpraya̍taa-mma̠rudbhi̍h । ta-ttvaa̠ vishnu̠h parya̍pashya̠-tta-ttvedaa̠ gavyaira̍yat ॥ paa̠va̠maa̠nena̍ tvaa̠ stome̍na gaaya̠trasya̍ varta̠nyopaa̠gm̠sho rvee̠rye̍na de̠vastvaa̍ savi̠to-thsri̍jatu jee̠vaata̍ve jeevana̠syaayai̍ briha-drathanta̠rayo̎stvaa̠ stome̍na tri̠shtubho̍ varta̠nyaa shu̠krasya̍ vee̠rye̍na de̠vastvaa̍ savi̠to- [savi̠tot, sri̠ja̠tu̠ jee̠vaata̍ve] 39
-thsri̍jatu jee̠vaata̍ve jeevana̠syaayaa̍ a̠gnestvaa̠ maatra̍yaa̠ jaga̍tyai varta̠nyaa-''gra̍ya̠nasya̍ vee̠rye̍na de̠vastvaa̍ savi̠to-thsri̍jatu jee̠vaata̍ve jeevana̠syaayaa̍ i̠mama̍gna̠ aayu̍she̠ varcha̍se kridhi pri̠yagm reto̍ varuna soma raajann । maa̠ tevaa̎smaa adite̠ sharma̍ yachchha̠ vishve̍ devaa̠ jara̍dashti̠ryathaa-'sa̍t ॥ a̠gniraayu̍shmaa̠n-thsa vana̠spati̍bhi̠-raayu̍shmaa̠-ntena̠ tvaa-''yu̠shaa-''yu̍shmanta-nkaromi̠ soma̠ aayu̍shmaa̠n-thsa osha̍dheebhi rya̠jna aayu̍shmaa̠n-thsa dakshi̍naabhi̠ rbrahmaa-''yu̍shma̠-tta-dbraa̎hma̠nairaayu̍shma-dde̠vaa aayu̍shmanta̠ste̍-'mrite̍na pi̠tara̠ aayu̍shmanta̠ste sva̠dhayaa-''yu̍shmanta̠stena̠ tvaa ''yu̠shaa-'' yu̍shmanta-nkaromi ॥ 40 ॥ (vishve̍shaa-nde̠vaanaa̎-mpraa̠no̍-'si - tri̠shtubho̍ varta̠nyaa shu̠krasya̍ vee̠rye̍na de̠vastvaa̍ savi̠toth - soma̠ aayu̍shmaa̠n - pancha̍vigmshatishcha) (a. 10)
a̠gnim vaa e̠tasya̠ sharee̍ra-ngachchhati̠ soma̠gm̠ raso̠ varu̍na enam varunapaa̠shena̍ grihnaati̠ sara̍svatee̠m vaaga̠gnaavishnoo̍ aa̠tmaa yasya̠ jyogaa̠maya̍ti̠ yo jyogaa̍mayaavee̠ syaadyo vaa̍ kaa̠maye̍ta̠ sarva̠maayu̍riyaa̠miti̠ tasmaa̍ e̠taamishti̠-nnirva̍pedaagne̠ya -ma̠shtaaka̍paalagm sau̠mya-ncha̠rum vaa̍ru̠na-ndasha̍kapaalagm saarasva̠ta-ncha̠rumaa̎gnaavaishna̠va-mekaa̍dashakapaala-ma̠gnere̠vaasya̠ sharee̍ra-nnishkree̠naati̠ somaa̠drasa̍m- [somaa̠drasa̎m, vaa̠ru̠nenai̠vaina̍m-] 41
-mvaaru̠nenai̠vaina̍m varunapaa̠shaa-nmu̍nchati saarasva̠tena̠ vaacha̍-ndadhaatya̠gni-ssarvaa̍ de̠vataa̠ vishnu̍rya̠jno de̠vataa̍bhishchai̠vaina̍m ya̠jnena̍ cha bhishajyatyu̠ta yadee̠taasu̠ rbhava̍ti̠ jeeva̍tye̠va yannava̠-maitta-nnava̍neeta-mabhava̠-dityaajya̠- mave̎kshate-roo̠pame̠vaasyai̠-tanma̍hi̠maana̠m vyaacha̍shte̠-'shvino̎h praa̠no̍-'seetyaa̍haa̠shvinau̠ vai de̠vaanaa̎m- [de̠vaanaa̎m, bhi̠shajau̠] 42
-bhi̠shajau̠ taabhyaa̍me̠vaasmai̍ bhesha̠ja-nka̍ro̠teendra̍sya praa̠no̍ 'seetyaa̍hendri̠ya- me̠vaasmi̍nne̠tena̍ dadhaati mi̠traavaru̍nayoh praa̠no̍-'seetyaa̍ha praanaapaa̠naave̠- vaasmi̍nne̠tena̍ dadhaati̠ vishve̍shaa-nde̠vaanaa̎-mpraa̠no̍-'seetyaa̍ha vee̠rya̍me̠vaasmi̍nne̠tena̍ dadhaati ghri̠tasya̠ dhaaraa̍ma̠mrita̍sya̠ panthaa̠mityaa̍ha yathaaya̠jure̠vaita-tpaa̍vamaa̠nena̍ tvaa̠ stome̠ne- [stome̠neti, aa̠ha̠ praa̠name̠vaasmi̍-] 43
-tyaa̍ha praa̠name̠vaasmi̍-nne̠tena̍ dadhaati briha-drathanta̠rayo̎stvaa̠ stome̠netyaa̠hauja̍ e̠vaasmi̍nne̠tena̍ dadhaatya̠gnestvaa̠ maatra̠yetyaa̍haa̠-''tmaana̍-me̠vaasmi̍nne̠tena̍ dadhaatyri̠tvija̠h paryaa̍hu̠ryaava̍nta e̠vartvija̠sta e̍na-mbhishajyanti bra̠hmano̠ hasta̍manvaa̠rabhya̠ paryaa̍hureka̠dhaiva yaja̍maana̠ aayu̍rdadhati̠ yade̠va tasya̠ taddhira̍nyaa- [taddhira̍nyaat, ghri̠ta-nnishpi̍ba̠tyaayu̠rvai] 44
-dghri̠ta-nnishpi̍ba̠tyaayu̠rvai ghri̠tama̠mrita̠gm̠ hira̍nyama̠mritaa̍de̠vaa ''yu̠rnishpi̍bati sha̠tamaa̍na-mbhavati sha̠taayu̠h puru̍sha-shsha̠tendri̍ya̠ aayu̍shye̠vendri̠ye prati̍tishtha̠tyatho̠ khalu̠ yaava̍tee̠-ssamaa̍ e̠shya-nmanye̍ta̠ taava̍nmaanagg syaa̠-thsamri̍ddhyaa i̠mama̍gna̠ aayu̍she̠ varcha̍se kri̠dheetyaa̠haa ''yu̍re̠vaasmi̠n. varcho̍ dadhaati̠ vishve̍ devaa̠ jara̍dashti̠ryathaa 'sa̠dityaa̍ -ha̠ jara̍dashtime̠vaina̍-nkarotya̠gni-raayu̍shmaa̠niti̠ hasta̍-ngrihnaatye̠te vai de̠vaa aayu̍shmanta̠sta e̠vaasmi̠nnaayu̍rdadhati̠ sarva̠maayu̍reti ॥ 45 ॥ (rasa̍m-de̠vaanaa̠g̠-stome̠neti̠-hira̍nyaa̠-dasa̠diti̠-dvaavigm̍shatishcha) (a. 11)
pra̠jaapa̍ti̠ rvaru̍naa̠yaashva̍manaya̠-thsa svaa-nde̠vataa̍maarchchha̠-thsa parya̍deeryata̠ sa e̠tam vaa̍ru̠na-nchatu̍sh-kapaalamapashya̠-tta-nnira̍vapa̠-ttato̠ vai sa va̍runa- paa̠shaada̍muchyata̠ varu̍no̠ vaa e̠ta-ngri̍hnaati̠ yo-'shva̍-mpratigri̠hnaati̠ yaava̠to-'shvaa̎-npratigrihnee̠yaa-ttaava̍to vaaru̠naan chatu̍shkapaalaa̠-nnirva̍pe̠-dvaru̍name̠va svena̍ bhaaga̠dheye̠nopa̍ dhaavati̠ sa e̠vaina̍m varunapaa̠shaan -mu̍nchati̠ [varunapaa̠shaan -mu̍nchati, chatu̍shkapaalaa] 46
chatu̍shkapaalaa bhavanti̠ chatu̍shpaa̠ddhyashva̠-ssamri̍ddhyaa̠ eka̠mati̍rikta̠-nnirva̍pe̠-dyame̠va pra̍tigraa̠hee bhava̍ti̠ yam vaa̠ naaddhyeti̠ tasmaa̍de̠va va̍runapaa̠shaa-nmu̍chyate̠ yadyapa̍ra-mpratigraa̠hee syaa-thsau̠ryameka̍kapaala̠manu̠ nirva̍peda̠mume̠vaa ''di̠tyamu̍chchaa̠ra-nku̍rute̠ 'po̍-'vabhri̠thamavai̎tya̠phsu vai varu̍na-ssaa̠kshaade̠va varu̍na̠mava̍ yajate 'pona̠ptreeya̍-ncha̠ru-mpuna̠retya̠ nirva̍peda̠phsu yo̍ni̠rvaa ashva̠-ssvaame̠vaina̠m yoni̍-ngamayati̠ sa e̍nagm shaa̠nta upa̍ tishthate ॥ 47 ॥ (mu̠ncha̠ti̠ - cha̠rugm - sa̠ptada̍sha cha) (a. 12)
yaa vaa̍mindraavarunaa yata̠vyaa̍ ta̠noostaye̠mamagm ha̍so munchata̠m yaa vaa̍mindraa varunaa saha̠syaa̍ raksha̠syaa̍ teja̠syaa̍ ta̠noostaye̠ mamagm ha̍so munchata̠m yo vaa̍mindraa varunaa va̠gnau sraama̠stam vaa̍ me̠ tenaa va̍yaje̠yo vaa̍mindraa varunaa dvi̠paathsu̍ pa̠shushu̠ chatu̍shpaathsu go̠shthe gri̠heshva̠phsvosha̍dheeshu̠ vana̠spati̍shu̠ sraama̠stam vaa̍ me̠ tenaava̍ yaja̠ indro̠ vaa e̠tasye̎- [e̠tasya̍, i̠ndri̠yenaapa̍ kraamati̠] 48
-ndri̠yenaapa̍ kraamati̠ varu̍na enam varunapaa̠shena̍ grihnaati̠ yah paa̠pmanaa̍ grihee̠to bhava̍ti̠ yah paa̠pmanaa̍ grihee̠ta-ssyaa-ttasmaa̍ e̠taamai̎mdraavaru̠nee-mpa̍ya̠syaa̎-nnirva̍pe̠dindra̍ e̠vaasmi̍-nnindri̠ya-nda̍dhaati̠ varu̍na enam mvarunapaa̠shaa-nmu̍nchati paya̠syaa̍ bhavati̠ payo̠ hi vaa e̠tasmaa̍-dapa̠kraama̠tyathai̠sha paa̠pmanaa̍ grihee̠to ya-tpa̍ya̠syaa̍ bhava̍ti̠ paya̍ e̠vaasmi̠-ntayaa̍ dadhaati paya̠syaa̍yaa- [paya̠syaa̍yaam, puro̠daasha̠mava̍] 49
-mpuro̠daasha̠mava̍ dadhaatyaatma̠nvanta̍-me̠vaina̍-nkaro̠tyatho̍ aa̠yata̍navanta-me̠va cha̍tu̠rdhaa vyoo̍hati di̠kshve̍va prati̍tishthati̠ puna̠-ssamoo̍hati di̠gbhya e̠vaasmai̍ bhesha̠ja-nka̍roti sa̠moohyaava̍ dyati̠ yathaa-''vi̍ddha-nnishkri̠ntati̍ taa̠drige̠va tadyo vaa̍mindraa-varunaava̠gnau sraama̠stam vaa̍me̠tenaava̍ yaja̠ ityaa̍ha̠ duri̍shtyaa e̠vaina̍-mpaati̠ yo vaa̍ mindraa varunaa dvi̠paathsu̍ pa̠shushu̠ sraama̠stam vaa̍ me̠ tenaava̍ yaja̠ ityaa̍hai̠taava̍tee̠rvaa aapa̠ osha̍dhayo̠ vana̠spata̍yah pra̠jaah pa̠shava̍ upajeeva̠neeyaa̠staa e̠vaasmai̍ varunapaa̠shaa-nmu̍nchati ॥ 50 ॥ (e̠tasya̍ - paya̠syaa̍yaam - paati̠ - shadvigm̍shatishcha ) (a. 13)
sa pra̍tna̠vanni kaavyendra̍m vo vi̠shvata̠-spareendra̠-nnara̍h ॥ tva-nna̍-ssoma vi̠shvato̠ rakshaa̍ raajannaghaaya̠tah । na ri̍shye̠-ttvaava̍ta̠-ssakhaa̎ ॥ yaa te̠ dhaamaa̍ni di̠vi yaa pri̍thi̠vyaam yaa parva̍te̠shvosha̍dheeshva̠phsu ॥ tebhi̍rno̠ vishvai̎-ssu̠manaa̠ ahe̍da̠-nraajan̎-thsoma̠ prati̍ ha̠vyaa gri̍bhaaya ॥ agnee̍shomaa̠ save̍dasaa̠ sahoo̍tee vanata̠-ngira̍h । sa-nde̍va̠traa ba̍bhoovathuh ॥ yu̠va- [yu̠vam, e̠taani̍ di̠vi ro̍cha̠naanya̠gnishcha̍] 51
-me̠taani̍ di̠vi ro̍cha̠naanya̠gnishcha̍ soma̠ sakra̍too adhattam ॥ yu̠vagm sindhoogm̍ ra̠bhisha̍sterava̠dyaa-dagnee̍shomaa̠-vamu̍nchata-ngribhee̠taan ॥ agnee̍shomaavi̠magm su me̍ shrinu̠tam vri̍shanaa̠ hava̎m । prati̍ soo̠ktaani̍ haryata̠-mbhava̍ta-ndaa̠shushe̠ maya̍h ॥ aa-'nya-ndi̠vo maa̍ta̠rishvaa̍ jabhaa̠raa-'ma̍thnaada̠nya-mpari̍ shye̠no adre̎h । agnee̍shomaa̠ brahma̍naa vaavridhaa̠norum ya̠jnaaya̍ chakrathuru lo̠kam ॥ agnee̍shomaa ha̠visha̠h prasthi̍tasya vee̠tagm [vee̠tam, harya̍tam vrishanaa ju̠shethaa̎m ।] 52
harya̍tam vrishanaa ju̠shethaa̎m । su̠sharmaa̍naa̠ svava̍saa̠ hi bhoo̠tamathaa̍ dhatta̠m yaja̍maanaaya̠ sham yoh ॥ aapyaa̍yasva̠, sa-nte̎ ॥ ga̠naanaa̎-ntvaa ga̠napa̍tigm havaamahe ka̠vi-nka̍vee̠naa-mu̍pa̠mashra̍vastamam । jye̠shtha̠raaja̠-mbrahma̍naa-mbrahmanaspata̠ aa na̍-shshri̠nvannoo̠tibhi̍-sseeda̠ saada̍nam । sa ijjane̍na̠ sa vi̠shaa sa janma̍naa̠ sa pu̠trairvaaja̍-mbharate̠ dhanaa̠ nribhi̍h । de̠vaanaa̠m yah pi̠tara̍-maa̠vivaa̍sati [ ] 53
shra̠ddhaama̍naa ha̠vishaa̠ brahma̍na̠spati̎m ॥ sa su̠shtubhaa̠ sa rikva̍taa ga̠nena̍ va̠lagm ru̍roja phali̠gagm rave̍na । briha̠spati̍-ru̠sriyaa̍ havya̠sooda̠h kani̍krada̠d- vaava̍shatee̠rudaa̍jat ॥ maru̍to̠ yaddha̍ vo di̠vo, yaa va̠-shsharma̍ ॥ a̠rya̠maa ''yaa̍ti vrisha̠bhastuvi̍shmaa-ndaa̠taa vasoo̍naa-mpuruhoo̠to arhann̍ । sa̠ha̠sraa̠ksho go̎tra̠bhi-dvajra̍baahura̠smaasu̍ de̠vo dravi̍na-ndadhaatu ॥ ye te̎-'ryama-nba̠havo̍ deva̠yaanaa̠h panthaa̍no [panthaa̍nah, raa̠ja̠-ndi̠va aa̠chara̍nti ।] 54
raaja-ndi̠va aa̠chara̍nti । tebhi̍rno deva̠ mahi̠ sharma̍ yachchha̠ sha-nna̍ edhi dvi̠pade̠ sha-nchatu̍shpade ॥ bu̠ddhnaadagra̠-mangi̍robhi-rgrinaa̠no vi parva̍tasya drigmhi̠taanyai̍rat । ru̠ja-drodhaagm̍si-kri̠trimaa̎nyeshaa̠gm̠-soma̍sya̠ taa-mada̠ indra̍-shchakaara ॥ bu̠ddhnaa-dagre̍na̠ vi mi̍maaya̠ maanai̠-rvajre̍na̠ khaanya̍trina-nna̠deenaa̎m । vrithaa̍ 'srija-tpa̠thibhi̍ rdeerghayaa̠thai-ssoma̍sya̠ taa mada̠ indra̍shchakaara । ॥ 55 ॥
pra yo ja̠jne vi̠dvaagm a̠sya bandhu̠m vishvaa̍ni de̠vo jani̍maa vivakti । brahma̠ brahma̍na̠ ujja̍bhaara̠ maddhyaa̎nnee̠chaadu̠chchaa sva̠dhayaa̠-'bhi prata̍sthau ॥ ma̠haa-nma̠hee a̍stabhaaya̠dvi jaa̠to dyaagm sadma̠ paarthi̍va-ncha̠ raja̍h । sa bu̠ddhnaadaa̎shta ja̠nushaa̠-'bhyagra̠-mbriha̠spati̍ rde̠vataa̠yasya̍ sa̠mraat ॥ bu̠ddhnaadyo agra̍ma̠bhyartyoja̍saa̠ briha̠spati̠maa vi̍vaasanti de̠vaah । bhi̠nadva̠lam vi puro̍ dardareeti̠ kani̍krada̠-thsuva̍ra̠po ji̍gaaya ॥ 56 ॥ (yu̠vam - mvee̠tamaa̠ - vivaa̍sati̠ - panthaa̍no - deerghayaa̠thai-ssoma̍sya̠ taa mada̠ indra̍shchakaara - de̠vaa - nava̍ cha) (a. 14)
(aa̠di̠tyebhyo̍ - de̠vaa vai mri̠tyo - rde̠vaa vai - sa̠trama̍ - rya̠mne -pra̠jaapa̍te̠straya̍strigmshat - pra̠jaapa̍ti rde̠vebhyo̠-'nnaadya̍m -devaasu̠raastaan - raja̍no - dhru̠vo̍-'si̠ - yannava̍ - ma̠gnim vai - pra̠jaapa̍ti̠ rvaru̍naaya̠ - yaa vaa̍mindraa varunaa̠ - sa pra̍tna̠va -chchatu̍rdasha)
(aa̠di̠tyebhya̠ - stvashtu̍ - rasmai̠ daana̍kaamaa - e̠vaava̍ rundhe̠ - 'gnim vai - sa pra̍tna̠vath - shatpa̍nchaa̠shat )
(aa̠di̠tyebhyah̠ - suva̍ra̠po ji̍gaaya )
॥ hari̍h om ॥
॥ krishna yajurvedeeya taittireeya samhitaayaa-ndviteeyakaande triteeyah prashna-ssamaaptah ॥
2.3 - ஆதி³த்யேப்⁴யோ பு⁴வத்³வத்³ப்⁴யஶ்சரும் - க்ருஷ்ண யஜுர்வேத³ தைத்திரீய ஸம்ஹிதா பாட:² பற்றி
This is the third prashna of the second kanda of the Krishna Yajurveda Taittiriya Samhita, which continues the ishtis, smaller offerings made for particular aims (ishti vidhanam). It opens with an offering of a pot of rice (charu) "to the Adityas who bring prosperity", and goes on to describe other ishtis to Agni, Indra, the Maruts and other deities, with the stories that explain why each offering brings its result.
மூலம்: Krishna Yajurveda, Taittiriya Samhita 2.3
எப்போது பாராயணம் செய்வது: In Vedic chanting and in traditional study of the Taittiriya Samhita.
உங்களுக்குத் தெரியுமா?
- A "charu" is rice or barley cooked in milk or water, a common Vedic offering.
- The Adityas are the sons of Aditi, gods of light and cosmic order.
அடிக்கடி கேட்கப்படும் கேள்விகள்
What is a charu?
Rice or barley cooked as an offering.
To whom is the first offering made?
To the Adityas who bring prosperity.
Which Veda is it from?
The Krishna Yajurveda, Taittiriya Samhita 2.3.
வழிபாட்டிற்கும் கற்றலுக்குமாக வழங்கப்படுகிறது, கணிப்பாக அல்ல. வணிக நோக்கமற்றது.
மேலும் பக்தி நூல்கள்