MuhurtaNow

3.5 - பூர்ணா பஶ்சாது³த பூர்ணா - க்ருஷ்ண யஜுர்வேத³ தைத்திரீய ஸம்ஹிதா பாட:²

Kanda 3 - Krishna Yajurveda Taittiriya Samhita · பாரம்பரிய பக்தி நூல்

krishna yajurvedeeya taittireeya samhitaayaa-ntriteeyakaande panchamah prashnah - ishtisheshaabhidhaanam

o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥

poo̠rnaa pa̠shchaadu̠ta poo̠rnaa pu̠rastaa̠du-nma̍ddhya̠tah pau̎rnamaa̠see ji̍gaaya । tasyaa̎-nde̠vaa adhi̍ sa̠mvasa̍nta utta̠me naaka̍ i̠ha maa̍dayantaam ॥ yatte̍ de̠vaa ada̍dhu rbhaaga̠dheya̠mamaa̍vaasye sa̠mvasa̍nto mahi̠tvaa । saano̍ ya̠jna-mpi̍prihi vishvavaare ra̠yi-nno̍ dhehi subhage su̠veera̎m ॥ni̠vesha̍nee sa̠ngama̍nee̠ vasoo̍naa̠m vishvaa̍ roo̠paani̠ vasoo̎nyaave̠shaya̍ntee । sa̠ha̠sra̠po̠shagm su̠bhagaa̠ raraa̍naa̠ saa na̠ aaga̠n. varcha̍saa [aaga̠n. varcha̍saa, sa̠mvi̠daa̠naa ।] 1

samvidaa̠naa ॥ agnee̍shomau pratha̠mau vee̠rye̍na̠ vasoo̎-nru̠draanaa̍di̠tyaani̠ha ji̍nvatam । maa̠ddhyagm hi pau̎rnamaa̠sa-nju̠shethaa̠-mbrahma̍naa vri̠ddhau su̍kri̠tena̍ saa̠taavathaa̠-'smabhyagm̍ sa̠havee̍raagm ra̠yi-nni ya̍chchhatam ॥ aa̠di̠tyaashchaa-'ngi̍rasashchaa̠gneenaa-'da̍dhata̠ te da̍rshapoornamaa̠sau praiphsa̠-nteshaa̠mangi̍rasaa̠-nniru̍ptagm ha̠viraasee̠dathaa̍-''di̠tyaa e̠tau homaa̍vapashya̠-ntaava̍juhavu̠stato̠ vai te da̍rshapoornamaa̠sau [ ] 2

poorva̠ aa 'la̍bhanta darshapoornamaa̠saa-vaa̠labha̍maana e̠tau homau̍ pu̠rastaa̎jjuhuyaa-thsaa̠kshaade̠va da̍rshapoornamaa̠saavaa la̍bhate brahmavaa̠dino̍ vadanti̠ sa tvai da̍rshapoornamaa̠saavaa la̍bheta̠ ya e̍nayoranu-lo̠mancha̍ pratilo̠mancha̍ vi̠dyaaditya̍maavaa̠syaa̍yaa oo̠rdhva-ntada̍nulo̠ma-mpau̎rnamaa̠syai pra̍tee̠cheena̠-nta-tpra̍tilo̠mam ya-tpau̎rnamaa̠see-mpoorvaa̍maa̠labhe̍ta pratilo̠mame̍naa̠vaa la̍bhetaa̠-muma̍pa̠ksheeya̍maana̠-manvapa̍- [-manvapa̍, kshee̠ye̠ta̠ saa̠ra̠sva̠tau homau̍] 3

-ksheeyeta saarasva̠tau homau̍ pu̠rastaa̎jjuhuyaadamaavaa̠syaa̍ vai sara̍svatyanulo̠ma-me̠vainaa̠vaa la̍bhate̠ 'mumaa̠pyaaya̍maana̠manvaa pyaa̍yata aagnaavaishna̠va-mekaa̍dashakapaala-mpu̠rastaa̠nnirva̍pe̠-thsara̍svatyai cha̠rugm sara̍svate̠ dvaada̍shakapaala̠m yadaa̎gne̠yo bhava̍tya̠gnirvai ya̍jnamu̠kham ya̍jnamu̠khame̠vardhi̍-mpu̠rastaa̎-ddhatte̠ ya-dvai̎shna̠vo bhava̍ti ya̠jno vai vishnu̍rya̠jname̠vaa-''rabhya̠ prata̍nute̠ sara̍svatyai cha̠rurbha̍vati̠ sara̍svate̠ dvaada̍shakapaalo-'maavaa̠syaa̍ vai sara̍svatee poo̠rnamaa̍sa̠-ssara̍svaa̠-ntaave̠va saa̠kshaadaa ra̍bhata ri̠ddhnotyaa̎bhyaa̠-ndvaada̍shakapaala̠-ssara̍svate bhavati mithuna̠tvaaya̠ prajaa̎tyai mithu̠nau gaavau̠ dakshi̍naa̠ samri̍ddhyai ॥ 4 ॥ (varcha̍saa̠ - vai te da̍rshapoornamaa̠saa - vapa̍ - tanute̠ sara̍svatyai̠ - pancha̍vigmshatishcha) (a. 1)

risha̍yo̠ vaa indra̍-mpra̠tyaksha̠-nnaapa̍shya̠-ntam vasi̍shthah pra̠tyaksha̍mapashya̠-thso̎-'bravee̠-dbraahma̍na-nte vakshyaami̠ yathaa̠ tvatpu̍rohitaah pra̠jaah pra̍jani̠shyante-'tha̠ meta̍rebhya̠ rishi̍bhyo̠ maa pravo̍cha̠ iti̠ tasmaa̍ e̠taanthstoma̍-bhaagaanabravee̠-ttato̠ vasi̍shthapurohitaah pra̠jaah praajaa̍yanta̠ tasmaa̎-dvaasi̠shtho bra̠hmaa kaa̠rya̍h praiva jaa̍yate ra̠shmira̍si̠ kshayaa̍ya tvaa̠ kshaya̍-nji̠nve- [kshaya̍-nji̠nveti̍, aa̠ha̠ de̠vaa vai] 5

-tyaa̍ha de̠vaa vai kshayo̍ de̠vebhya̍ e̠va ya̠jna-mpraa-''ha̠ preti̍rasi̠ dharmaa̍ya tvaa̠ dharma̍-nji̠nvetyaa̍ha manu̠shyaa̍ vai dharmo̍ manu̠shye̎bhya e̠va ya̠jna-mpraa-''haanvi̍tirasi di̠ve tvaa̠ diva̍-nji̠nvetyaa̍hai̠bhya e̠va lo̠kebhyo̍ ya̠jna-mpraa-''ha̍vishta̠mbho̍-'si̠ vrishtyai̎ tvaa̠ vrishti̍-nji̠nvetyaa̍ha̠ vrishti̍me̠vaa-'va̍- [vrishti̍me̠vaa-'va̍, ru̠ndhe̠ pra̠vaa-] 6

-rundhe pra̠vaa-'sya̍nu̠vaa-'seetyaa̍ha mithuna̠tvaayo̠shiga̍si̠ vasu̍bhyastvaa̠ vasoo̎mji̠nvetyaa̍haa̠shtau vasa̍va̠ ekaa̍dasha ru̠draa dvaada̍shaa-''di̠tyaa e̠taava̍nto̠ vai de̠vaastebhya̍ e̠va ya̠jna-mpraa-''haujo̍-'si pi̠tribhya̍stvaa pi̠treen ji̠nvetyaa̍ha de̠vaane̠va pi̠treenanu̠ santa̍noti̠ tantu̍rasi pra̠jaabhya̍stvaa pra̠jaa ji̠nve- [pra̠jaa ji̍nva, ityaa̍ha pi̠treene̠va] 7

-tyaa̍ha pi̠treene̠va pra̠jaa anu̠ santa̍noti pritanaa̠shaada̍si pa̠shubhya̍stvaa pa̠shoonji̠nvetyaa̍ha pra̠jaa e̠va pa̠shoonanu̠ santa̍notire̠vada̠syo-sha̍dheebhya̠ stvausha̍dhee-rji̠nvetyaa̠hausha̍dheeshve̠va pa̠shoo-nprati̍shthaapayatyabhi̠jida̍si yu̠ktagraa̠vendraa̍ya̠ tvendra̍-nji̠nvetyaa̍haa̠bhiji̍tyaa̠ adhi̍patirasi praa̠naaya̍ tvaa praa̠na- [praa̠nam, ji̠nvetyaa̍ha] 8

-nji̠nvetyaa̍ha pra̠jaasve̠va praa̠naa-nda̍dhaati tri̠vrida̍si pra̠vrida̠seetyaa̍ha mithuna̠tvaaya̍ sagmro̠ho̍-'si neero̠ho̍-'seetyaa̍ha̠ prajaa̎tyai vasu̠ko̍-'si̠ vesha̍shrirasi̠ vasya̍shtira̠seetyaa̍ha̠ prati̍shthityai ॥ 9 ॥ (ji̠nvetya - va̍ - pra̠jaa ji̍nva - praa̠nan - tri̠gm̠shachcha̍) (a. 2)

a̠gninaa̍ de̠vena̠ prita̍naa jayaami gaaya̠trena̠ chhanda̍saa tri̠vritaa̠ stome̍na rathanta̠rena̠ saamnaa̍ vashatkaa̠rena̠ vajre̍na poorva̠jaa-nbhraatri̍vyaa̠nadha̍raa-npaadayaa̠myavai̍naa-nbaadhe̠ pratye̍naannude̠-'smin kshaye̠-'smi-nbhoo̍milo̠ke yo̎-'smaa-ndveshti̠ yancha̍ va̠ya-ndvi̠shmo vishno̠h krame̠naa-'tye̍naan kraamaa̠meendre̍na de̠vena̠ prita̍naa jayaami̠ traishtu̍bhena̠ chhanda̍saa panchada̠shena̠ stome̍na briha̠taa saamnaa̍ vashatkaa̠rena̠ vajre̍na [vajre̍na, sa̠ha̠jaan. vishve̍bhirde̠vebhi̠h prita̍naa] 10

saha̠jaan. vishve̍bhirde̠vebhi̠h prita̍naa jayaami̠ jaaga̍tena̠ chhanda̍saa saptada̠shena̠ stome̍na vaamade̠vyena̠ saamnaa̍ vashatkaa̠rena̠ vajre̍naa para̠jaanindre̍na sa̠yujo̍ va̠yagm saa̍sa̠hyaama̍ pritanya̠tah । ghnanto̍ vri̠traanya̍pra̠ti । yatte̍ agne̠ teja̠stenaa̠ha-nte̍ja̠svee bhoo̍yaasa̠m yatte̍ agne̠ varcha̠stenaa̠ham va̍rcha̠svee bhoo̍yaasa̠m yatte̍ agne̠ hara̠stenaa̠hagm ha̍ra̠svee bhoo̍yaasam ॥ 11 ॥ (bri̠ha̠taa saamnaa̍ vashatkaa̠rena̠ vajre̍na̠ - shatcha̍tvaarigmshachcha) (a. 3)

ye de̠vaa ya̍jna̠hano̍ yajna̠musha̍h prithi̠vyaamaddhyaasa̍te । a̠gnirmaa̠ tebhyo̍ rakshatu̠ gachche̍ma su̠krito̍ va̠yam ॥ aa-'ga̍nma mitraavarunaa varenyaa̠ raatree̍naa-mbhaa̠go yu̠vayo̠ryo asti̍ । naaka̍-ngrihnaa̠naa-ssu̍kri̠tasya̍ lo̠ke tri̠teeye̍ pri̠shthe adhi̍ rocha̠ne di̠vah ॥ ye de̠vaa ya̍jna̠hano̍ yajna̠musho̠-'ntari̠kshe-'ddhyaasa̍te । vaa̠yurmaa̠ tebhyo̍ rakshatu̠ gachche̍ma su̠krito̍ va̠yam ॥ yaaste̠ raatree̎-ssavita- [raatree̎-ssavitah, de̠va̠yaanee̍ranta̠raa] 12

-rdeva̠yaanee̍ranta̠raa dyaavaa̍prithi̠vee vi̠yanti̍ । gri̠haishcha̠ sarvai̎h pra̠jayaa̠ nvagre̠ suvo̠ ruhaa̍naastarataa̠ rajaagm̍si ॥ ye de̠vaa ya̍jna̠hano̍ yajna̠musho̍ di̠vyaddhyaasa̍te । sooryo̍ maa̠ tebhyo̍ rakshatu̠ gachche̍ma su̠krito̍ va̠yam ॥ yenendraa̍ya sa̠mabha̍ra̠h payaag̍syutta̠mena̍ ha̠vishaa̍ jaatavedah । tenaa̎-'gne̠ tvamu̠ta va̍rdhaye̠magm sa̍jaa̠taanaa̠g̠ shraishthya̠ aa dhe̎hyenam ॥ ya̠jna̠hano̠ vai de̠vaa ya̍jna̠musha̍- [de̠vaa ya̍jna̠musha̍h, sa̠nti̠ ta e̠shu] 13

-ssanti̠ ta e̠shu lo̠keshvaa̍sata aa̠dadaa̍naa vimathnaa̠naa yo dadaa̍ti̠ yo yaja̍te̠ tasya̍ । ye de̠vaa ya̍jna̠hana̍h prithi̠vyaamaddhyaasa̍te̠ ye a̠ntari̍kshe̠ ye di̠veetyaa̍he̠maane̠va lo̠kaagstee̠rtvaa sagri̍ha̠-ssapa̍shu-ssuva̠rgam lo̠kame̠tyapa̠ vai some̍nejaa̠naadde̠vataa̎shcha ya̠jnashcha̍ kraamantyaagne̠ya-mpancha̍kapaalamudavasaa̠neeya̠-nnirva̍peda̠gni-ssarvaa̍ de̠vataa̠h [de̠vataa̎h, paankto̍ ya̠jno] 14

paankto̍ ya̠jno de̠vataa̎shchai̠va ya̠jnanchaava̍ rundhegaaya̠tro vaa a̠gnirgaa̍ya̠tra chha̍ndaa̠sta-nchhanda̍saa̠ vya̍rdhayati̠ ya-tpancha̍kapaala-nka̠rotya̠shtaaka̍paalah kaa̠ryo̎-'shtaaksha̍raa gaaya̠tree gaa̍ya̠tro̎-'gni-rgaa̍ya̠tra chha̍ndaa̠-ssvenai̠vaina̠-nchhanda̍saa̠ sama̍rdhayati pa̠nktyau̍ yaajyaanuvaa̠kye̍ bhavata̠h paankto̍ ya̠jnastenai̠va ya̠jnaannaiti̍ ॥ 15 ॥ (sa̠vi̠ta̠-rde̠vaa ya̍jna̠musha̠h - sarvaa̍ de̠vataa̠ - stricha̍tvaarigmshachcha) (a. 4)

sooryo̍ maa de̠vo de̠vebhya̍h paatu vaa̠yura̠ntari̍kshaa̠-dyaja̍maano̠-'gnirmaa̍ paatu̠ chakshu̍shah । saksha̠ shoosha̠ savi̍ta̠rvishva̍charshana e̠tebhi̍-ssoma̠ naama̍bhirvidhema te̠ tebhi̍-ssoma̠ naama̍bhirvidhema te ॥ a̠ha-mpa̠rastaa̍da̠-hama̠vastaa̍da̠ha-njyoti̍shaa̠ vi tamo̍ vavaara । yada̠ntari̍ksha̠-ntadu̍ me pi̠taa-'bhoo̍da̠hagm soorya̍mubha̠yato̍ dadarshaa̠ha-mbhoo̍yaa samutta̠ma-ssa̍maa̠naanaa̠- [samutta̠ma-ssa̍maa̠naanaa̎m, aa sa̍mu̠draa-] 16

-maa sa̍mu̠draa-daa-'ntari̍kshaat-pra̠jaapa̍tiruda̠dhi-nchyaa̍vayaa̠teendra̠h prasnau̍tu ma̠ruto̍ varshaya̠ntoonna̍mbhaya prithi̠vee-mbhi̠ndheeda-ndi̠vya-nnabha̍h । u̠dno di̠vyasya̍ no de̠heeshaa̍no̠ visri̍jaa̠ driti̎m ॥ pa̠shavo̠ vaa e̠te yadaa̍di̠tya e̠sha ru̠dro yada̠gnirosha̍dhee̠h praasyaa̠gnaavaa̍di̠tya-nju̍hoti ru̠draade̠va pa̠shoona̠ntarda̍dhaa̠tyatho̠ osha̍dheeshve̠va pa̠shoo- [pa̠shoon, prati̍shthaapayati] 17

-nprati̍shthaapayati ka̠virya̠jnasya̠ vita̍noti̠ panthaa̠-nnaaka̍sya pri̠shthe adhi̍ rocha̠ne di̠vah । yena̍ ha̠vyam vaha̍si̠ yaasi̍ doo̠ta i̠tah prache̍taa a̠muta̠-ssanee̍yaan ॥ yaaste̠ vishvaa̎-ssa̠midha̠-ssantya̍gne̠yaah pri̍thi̠vyaa-mba̠r̠hishi̠ soorye̠ yaah । taaste̍ gachchha̠ntvaahu̍ti-nghri̠tasya̍ devaaya̠te yaja̍maanaaya̠ sharma̍ ॥ aa̠shaasaa̍na-ssu̠veeryagm̍ raa̠yasposha̠gg̠ svashvi̍yam । briha̠spati̍naa raa̠yaa sva̠gaakri̍to̠ mahya̠m yaja̍maanaaya tishtha ॥ 18 ॥ (sa̠maa̠naanaa̠-mosha̍dheeshve̠va pa̠shoon - mahya̠m yaja̍maanaa̠ - yaika̍ncha) (a. 5)

sa-ntvaa̍ nahyaami̠ paya̍saa ghri̠tena̠ sa-ntvaa̍ nahyaamya̠pa osha̍dheebhih । sa-ntvaa̍ nahyaami pra̠jayaa̠-'hama̠dya saa dee̎kshi̠taa sa̍navo̠ vaaja̍ma̠sme ॥ praitu̠ brahma̍na̠spatnee̠ vedi̠m varne̍na seedatu । athaa̠hama̍nukaa̠minee̠ sve lo̠ke vi̠shaa i̠ha ॥ su̠pra̠jasa̍stvaa va̠yagm su̠patnee̠rupa̍ sedima । agne̍ sapatna̠dambha̍na̠mada̍bdhaaso̠ adaa̎bhyam ॥ i̠mam vishyaa̍mi̠ varu̍nasya̠ paasha̠m- [paasha̎m, yamaba̍ddhneeta] 19

-myamaba̍ddhneeta savi̠taa su̠keta̍h । dhaa̠tushcha̠ yonau̍ sukri̠tasya̍ lo̠ke syo̠na-mme̍ sa̠ha patyaa̍ karomi ॥ prehyu̠dehyri̠tasya̍ vaa̠meeranva̠gniste-'gra̍-nnaya̠tvadi̍ti̠rmaddhya̍-ndadataagm ru̠draava̍srishtaa-'si yu̠vaa naama̠ maa maa̍ higmsee̠rvasu̍bhyo ru̠drebhya̍ aadi̠tyebhyo̠ vishve̎bhyo vo de̠vebhya̍h pa̠nneja̍neergrihnaami ya̠jnaaya̍ vah pa̠nneja̍nee-ssaadayaami̠ vishva̍sya te̠ vishvaa̍vato̠ vrishni̍yaavata̠- [vrishni̍yaavatah, tavaa̎gne vaa̠meeranu̍] 20

-stavaa̎gne vaa̠meeranu̍ sa̠drimshi̠ vishvaa̠ retaagm̍si dhishee̠yaa-'ga̍-nde̠vaan. ya̠jno ni de̠veerde̠vebhyo̍ ya̠jnama̍shishanna̠smin-thsu̍nva̠ti yaja̍maana aa̠shisha̠-ssvaahaa̍kritaa-ssamudre̠shthaa ga̍ndha̠rvamaati̍shtha̠taanu̍ । vaata̍sya̠ patma̍nni̠da ee̍di̠taah ॥ 21 ॥ (paasha̠m - mvrishni̍yaavata - stri̠gm̠shachcha̍) (a. 6)

va̠sha̠tkaa̠ro vai gaa̍yatri̠yai shiro̎-'chhina̠-ttasyai̠ rasa̠h paraa̍-'pata̠-thsa pri̍thi̠vee-mpraavi̍sha̠thsa kha̍di̠ro̍-'bhava̠dyasya̍ khaadi̠ra-ssru̠vo bhava̍ti̠ chhanda̍saame̠va rase̠naava̍ dyati̠ sara̍saa a̠syaa-''hu̍tayo bhavanti tri̠teeya̍syaami̠to di̠vi soma̍ aasee̠-tta-ngaa̍yatryaa-' ha̍ra̠-ttasya̍ pa̠rnama̍chchhidyata̠ ta-tpa̠rno̍-'bhava̠-tta-tpa̠rnasya̍ parna̠tvam yasya̍ parna̠mayee̍ ju̠hoo- [ju̠hooh, bhava̍ti sau̠myaa] 22

-rbhava̍ti sau̠myaa a̠syaa-''hu̍tayo bhavanti ju̠shante̎-'sya de̠vaa aahu̍teerde̠vaa vai brahma̍nnavadanta̠ ta-tpa̠rna upaa̍-'shrino-thsu̠shravaa̠ vai naama̠ yasya̍ parna̠mayee̍ ju̠hoorbhava̍ti̠ na paa̠pagg shlokagm̍ shrinoti̠ brahma̠ vai pa̠rno vinma̠ruto-'nna̠m vinmaa̍ru̠to̎-'shva̠ttho yasya̍ parna̠mayee̍ ju̠hoorbhava̠tyaa-shva̍t-thyupa̠bhrid- brahma̍nai̠vaanna̠mava̍ ru̠ndhe-'tho̠ brahmai̠- [ru̠ndhe-'tho̠ brahma̍, e̠va vi̠shyaddhyoo̍hati] 23

-va vi̠shyaddhyoo̍hati raa̠shtram vai pa̠rno vida̍shva̠ttho ya-tpa̍rna̠mayee̍ ju̠hoorbhava̠tyaa-shva̍tthyupa̠bhri-draa̠shtrame̠va vi̠shyaddhyoo̍hati pra̠jaapa̍ti̠rvaa a̍juho̠-thsaa yatraa-''hu̍tih pra̠tyati̍shtha̠-ttato̠ vika̍nkata̠ uda̍tishtha̠-ttata̍h pra̠jaa a̍srijata̠ yasya̠ vaika̍nkatee dhru̠vaa bhava̍ti̠ pratya̠vaasyaa ''hu̍tayastishtha̠ntyatho̠ praiva jaa̍yata e̠tadvai sru̠chaagm roo̠pam yasyai̠vagm roo̍paa̠-ssrucho̠ bhava̍nti̠ sarvaa̎nye̠vainagm̍ roo̠paani̍ pashoo̠naamupa̍tishthante̠ naasyaapa̍-roopamaa̠tmanjaa̍yate ॥ 24 ॥ (ju̠hoo - ratho̠ brahma̍ - sru̠chaagm - sa̠ptada̍sha cha) (a. 7)

u̠pa̠yaa̠magri̍heeto-'si pra̠jaapa̍taye tvaa̠ jyoti̍shmate̠ jyoti̍shmanta-ngrihnaami̠ dakshaa̍ya daksha̠vridhe̍ raa̠ta-nde̠vebhyo̎-'gni ji̠hvebhya̍stvartaa̠yubhya̠ indra̍jyeshthebhyo̠ varu̍naraajabhyo̠ vaataa̍pibhyah pa̠rjanyaa̎tmabhyo di̠ve tvaa̠-'ntari̍kshaaya tvaa prithi̠vyai tvaa-'pe̎ndra dvisha̠to mano-'pa̠ jijyaa̍sato ja̠hyapa̠ yo no̍-'raatee̠yati̠ ta-nja̍hi praa̠naaya̍ tvaa-'paa̠naaya̍ tvaa vyaa̠naaya̍ tvaa sa̠te tvaa-'sa̍te tvaa̠-'dbhyastvausha̍dheebhyo̠ vishve̎bhyastvaa bhoo̠tebhyo̠ yata̍h pra̠jaa akkhi̍draa̠ ajaa̍yanta̠ tasmai̎ tvaa pra̠jaapa̍taye vibhoo̠daav.nne̠ jyoti̍shmate̠ jyoti̍shmanta-njuhomi ॥ 25 ॥ (osha̍dheebhya̠ - shchatu̍rdasha cha) (a. 8)

yaam vaa a̍ddhva̠ryushcha̠ yaja̍maanashcha de̠vataa̍mantari̠tastasyaa̠ aa vri̍shchyete praajaapa̠tya-nda̍dhigra̠ha-ngri̍hneeyaa-tpra̠jaapa̍ti̠-ssarvaa̍ de̠vataa̍ de̠vataa̎bhya e̠va nihnu̍vaate jye̠shtho vaa e̠sha grahaa̍naa̠m yasyai̠sha gri̠hyate̠ jyaishthya̍me̠va ga̍chchhati̠ sarvaa̍saa̠m vaa e̠tadde̠vataa̍naagm roo̠pam yade̠sha graho̠ yasyai̠sha gri̠hyate̠ sarvaa̎nye̠vainagm̍ roo̠paani̍ pashoo̠naamupa̍tishthanta upayaa̠magri̍heeto- [upayaa̠magri̍heetah, a̠si̠ pra̠jaapa̍taye] 26

-'si pra̠jaapa̍taye tvaa̠ jyoti̍shmate̠ jyoti̍shmanta-ngrihnaa̠meetyaa̍ha̠ jyoti̍re̠vainagm̍ samaa̠naanaa̎-nkarotyagni-ji̠hvebhya̍stvartaa̠yubhya̠ ityaa̍hai̠taava̍tee̠rvai de̠vataa̠staabhya̍ e̠vaina̠gm̠ sarvaa̎bhyo grihnaa̠tyape̎mdra dvisha̠to mana̠ ityaa̍ha̠ bhraatri̍vyaapanuttyai praa̠naaya̍ tvaa-'paa̠naaya̠ tvetyaa̍ha praa̠naane̠va yaja̍maane dadhaati̠ tasmai̎ tvaa pra̠jaapa̍taye vibhoo̠daav.nne̠ jyoti̍shmate̠ jyoti̍shmanta-njuho̠mee- [jyoti̍shmanta-njuho̠mi, ityaa̍ha pra̠jaapa̍ti-] 27

-tyaa̍ha pra̠jaapa̍ti̠-ssarvaa̍ de̠vataa̠-ssarvaa̎bhya e̠vaina̍-nde̠vataa̎bhyo juhotyaajyagra̠ha-ngri̍hneeyaa̠-tteja̍skaamasya̠ tejo̠ vaa aajya̍-nteja̠svye̍va bha̍vati somagra̠ha-ngri̍hneeyaa-dbrahmavarcha̠sakaa̍masya brahmavarcha̠sam vai somo̎ brahmavarcha̠sye̍va bha̍vati dadhigra̠ha-ngri̍hneeyaa-tpa̠shukaa̍ma̠syorgvai daddhyoor-kpa̠shava̍ oo̠rjaivaasmaa̠ oorja̍-mpa̠shoonava̍ rundhe ॥ 28 ॥ (u̠pa̠yaa̠magri̍heeto - juhomi̠ - tricha̍tvaarigmshachcha) (a. 9)

tve kratu̠mapi̍ vrinjanti̠ vishve̠ dviryade̠te tri-rbhava̠ntyoomaa̎h । svaa̠do-ssvaadee̍ya-ssvaa̠dunaa̍ srijaa̠ samata̍ oo̠ shu madhu̠ madhu̍naa̠-'bhi yo̍dhi । u̠pa̠yaa̠magri̍heeto-'si pra̠jaapa̍taye tvaa̠ jushta̍-ngrihnaamye̠sha te̠ yoni̍h pra̠jaapa̍taye tvaa ॥ praa̠na̠gra̠haa-ngri̍hnaatye̠taava̠dvaa a̍sti̠ yaava̍de̠te grahaa̠-sstomaa̠shchhandaagm̍si pri̠shthaani̠ disho̠ yaava̍de̠vaasti̠ ta- [yaava̍de̠vaasti̠ tat, ava̍ rundhe] 29

-dava̍ rundhe jye̠shthaa vaa e̠taa-nbraa̎hma̠naah pu̠raa vidaama̍kra̠-ntasmaa̠-tteshaa̠gm̠ sarvaa̠ disho̠-'bhiji̍taa abhoova̠n̠. yasyai̠ te gri̠hyante̠ jyaishthya̍me̠va ga̍chchhatya̠bhi disho̍ jayati̠ pancha̍ grihyante̠ pancha̠ disha̠-ssarvaa̎sve̠va di̠ksh-vri̍ddhnuvanti̠ nava̍nava grihyante̠ nava̠ vai puru̍she praa̠naah praa̠naane̠va yaja̍maaneshu dadhati praaya̠neeye̍ chodaya̠neeye̍ cha grihyante praa̠naa vai praa̍nagra̠haah [praa̠naa vai praa̍nagra̠haah, praa̠naire̠va] 30

praa̠naire̠va pra̠yanti̍ praa̠nairudya̍nti dasha̠me-'ha̍-ngrihyante praa̠naa vai praa̍nagra̠haah praa̠nebhya̠h khalu̠ vaa e̠ta-tpra̠jaa ya̍nti̠ yadvaa̍made̠vyam yone̠shchyava̍te dasha̠me-'ha̍n. vaamade̠vyam yone̎shchyavate̠ ya-dda̍sha̠me-'ha̍-ngri̠hyante̎ praa̠nebhya̍ e̠va ta-tpra̠jaa naya̍nti । 31 (tat - praa̍nagra̠haah - sa̠ptavigm̍shachcha) (a. 10)

pra de̠vande̠vyaa dhi̠yaa bhara̍taa jaa̠tave̍dasam । ha̠vyaa no̍ vakshadaanu̠shak ॥ a̠yamu̠ shya prade̍va̠yurhotaa̍ ya̠jnaaya̍ neeyate । ratho̠ na yora̠bheevri̍to̠ ghrinee̍vaan chetati̠ tmanaa̎ ॥ a̠yama̠gniru̍rushyatya̠mritaa̍diva̠ janma̍nah । saha̍sashchi̠-thsahee̍yaa-nde̠vo jee̠vaata̍ve kri̠tah ॥ idaa̍yaastvaa pa̠de va̠ya-nnaabhaa̍ prithi̠vyaa adhi̍ । jaata̍vedo̠ ni dhee̍ma̠hyagne̍ ha̠vyaaya̠ vodha̍ve । 32

agne̠ vishve̍bhi-ssvaneeka de̠vairoornaa̍vanta-mpratha̠ma-ssee̍da̠ yoni̎m । ku̠laa̠yina̍-nghri̠tava̍ntagm savi̠tre ya̠jna-nna̍ya̠ yaja̍maanaaya saa̠dhu ॥ seeda̍ hota̠-ssva u̍ lo̠ke chi̍ki̠tvaanthsaa̠dayaa̍ ya̠jnagm su̍kri̠tasya̠ yonau̎ । de̠vaa̠veerde̠vaan. ha̠vishaa̍ yajaa̠syagne̍ bri̠ha-dyaja̍maane̠ vayo̍ dhaah ॥ ni hotaa̍ hotri̠shada̍ne̠ vidaa̍nastve̠sho dee̍di̠vaagm a̍sada-thsu̠daksha̍h । ada̍bdhavrata-pramati̠rvasi̍shtha-ssahasra-mbha̠ra-shshuchi̍jihvo a̠gnih ॥ tva-ndoo̠tastva- [tva-ndoo̠tastvam, u̠ na̠h pa̠ra̠spaastvam vasya̠ aa] 33

-mu̍ nah para̠spaastvam vasya̠ aa vri̍shabha prane̠taa । agne̍ to̠kasya̍ na̠stane̍ ta̠noonaa̠mapra̍yuchchha̠-ndeedya̍dbodhi go̠paah ॥ a̠bhi tvaa̍ deva savita̠reeshaa̍na̠m vaaryaa̍naam । sadaa̍-'va-nbhaa̠gamee̍mahe ॥ ma̠hee dyauh pri̍thi̠vee cha̍na i̠mam ya̠jna-mmi̍mikshataam । pi̠pri̠taa-nno̠ bharee̍mabhih ॥ tvaama̍gne̠ pushka̍raa̠daddhyatha̍rvaa̠ nira̍manthata । moo̠rdhno vishva̍sya vaa̠ghata̍h ॥ tamu̍- [tamu̍, tvaa̠ da̠ddhyannrishi̍h] 34

-tvaa da̠ddhyannrishi̍h pu̠tra ee̍dhe̠ atha̍rvanah । vri̠tra̠hana̍-mpuranda̠ram ॥ tamu̍ tvaa paa̠thyo vrishaa̠ samee̍dhe dasyu̠hanta̍mam । dha̠na̠-nja̠yagm rane̍rane ॥ u̠ta bru̍vantu ja̠ntava̠ uda̠gnirvri̍tra̠haa-'ja̍ni । dha̠na̠-nja̠yo rane̍rane ॥ aa yagm haste̠ na khaa̠dina̠gm̠ shishu̍-njaa̠ta-nna bibhra̍ti । vi̠shaama̠gnigg sva̍ddhva̠ram ॥ prade̠va-nde̠vavee̍taye̠ bhara̍taa vasu̠vitta̍mam । aasve yonau̠ ni shee̍datu ॥ aa [ ] 35

jaa̠ta-njaa̠tave̍dasi pri̠yagm shi̍shee̠taa-'ti̍thim । syo̠na aa gri̠hapa̍tim ॥ a̠gninaa̠-'gni-ssami̍ddhyate ka̠virgri̠hapa̍ti̠ryuvaa̎ । ha̠vya̠vaa-dju̠hvaa̎syah ॥ tvagg hya̍gne a̠gninaa̠ vipro̠ vipre̍na̠ santhsa̠taa । sakhaa̠ sakhyaa̍ sami̠ddhyase̎ ॥ ta-mma̍rjayanta su̠kratu̍-mpuro̠yaavaa̍namaa̠jishu̍ । sveshu̠ kshaye̍shu vaa̠jina̎m ॥ ya̠jnena̍ ya̠jnama̍yajanta de̠vaastaani̠ dharmaa̍ni pratha̠maanyaa̍sann । te ha̠ naaka̍-mmahi̠maana̍-ssachante̠ yatra̠ poorve̍ saa̠ddhyaa-ssanti̍ de̠vaah ॥ 36 ॥ (vodha̍ve- doo̠tastvam - tamu̍ - seeda̠tvaa - yatra̍ - cha̠tvaari̍ cha) (a. 11)

(poo̠rna - rsha̍yo̠ - 'gninaa̠ - ye de̠vaah - sooryo̍ maa̠ - santvaa̍ nahyaami - vashatkaa̠ra-ssa kha̍di̠ra - u̍payaa̠magri̍heeto-'si̠ - yaam vai - tve kratu̠m - prade̠va - mekaa̍dasha )

(poo̠rnaa - sa̍ha̠jaan - tavaa̎-'gne - praa̠naire̠va - shattrigm̍shat)

(poo̠rnaa, santi̍ de̠vaah)

॥ hari̍h om ॥

(pra̠jaapa̍ti̠ - yo̍ vaa - agne̠ - vi vai - poo̠rnaa - pancha̍) (5)

॥ krishna yajurvedeeya taittireeya samhitaayaa-ntriteeyakaande panchamah prashna-ssamaaptah ॥

3.5 - பூர்ணா பஶ்சாது³த பூர்ணா - க்ருஷ்ண யஜுர்வேத³ தைத்திரீய ஸம்ஹிதா பாட:² பற்றி

This is prashna 5 of kanda 3 of the Krishna Yajurveda Taittiriya Samhita, in plain continuous recitation (samhita patha). Its heading calls it "ishti shesha", the remaining parts of the ishtis. It opens with verses to the full-moon and new-moon nights: "Full behind and full in front, the full-moon night has won from the middle", praying that the gods dwelling in her may rejoice and grant wealth and brave offspring.

மூலம்: Krishna Yajurveda, Taittiriya Samhita 3.5

எப்போது பாராயணம் செய்வது: In daily Vedic recitation, in Veda patashalas and in Yajur Veda study.

உங்களுக்குத் தெரியுமா?

  • The full moon (paurnamasi) and new moon (amavasya) are addressed as goddesses in these verses.
  • Samhita patha is the continuous form of the text, the base from which the pada, krama, jata and ghana recitations are built.

அடிக்கடி கேட்கப்படும் கேள்விகள்

What do the opening verses praise?

The full-moon and new-moon nights, addressed as goddesses.

What is samhita patha?

The plain, continuous recitation of the Vedic text.

Which part of the Taittiriya Samhita is this?

Kanda 3, prashna 5.

வழிபாட்டிற்கும் கற்றலுக்குமாக வழங்கப்படுகிறது, கணிப்பாக அல்ல. வணிக நோக்கமற்றது.