MuhurtaNow

1.8 - అనుమత్యై పురోడాశమష్టాకపాలం - కృష్ణ యజుర్వేద తైత్తిరీయ సంహితా పాఠః

Kanda 1 - Krishna Yajurveda Taittiriya Samhita · సాంప్రదాయ భక్తి గ్రంథం

krishna yajurvedeeya taittireeya samhitaayaa-mprathamakaande ashamah prashnah - raajasooyah

o-nnamah paramaatmane, shree mahaaganapataye namah, shree gurubhyo namah । ha̠ri̠h om ॥

anu̍matyai puro̠daasha̍-ma̠shtaaka̍paala̠-nnirva̍pati dhe̠nu-rdakshi̍naa̠ ye pra̠tyancha̠-shshamyaa̍yaa ava̠sheeya̍nte̠ ta-nnair-ri̠ta-meka̍kapaala-nkri̠shnam vaasa̍h kri̠shnatoo̍sha̠-ndakshi̍naa̠ veehi̠ svaahaa-''hu̍ti-njushaa̠na e̠sha te̍ nir-rite bhaa̠go bhoote̍ ha̠vishma̍tyasi mu̠nchema-magmha̍sa̠-ssvaahaa̠ namo̠ ya i̠da-ncha̠kaaraa̍-''di̠tya-ncha̠ru-nnirva̍pati̠ varo̠ dakshi̍naa-''gnaavaishna̠va-mekaa̍dashakapaalam vaama̠no va̠hee dakshi̍naa 'gneesho̠meeya̠- [dakshi̍naa 'gneesho̠meeya̎m, ekaa̍dashakapaala̠gm̠ hira̍nya̠m] 1

-mekaa̍dashakapaala̠gm̠ hira̍nya̠-ndakshi̍nai̠ndra-mekaa̍dashakapaala-mrisha̠bho va̠hee dakshi̍naa-''gne̠ya-ma̠shtaaka̍paalamai̠ndra-ndaddhyri̍sha̠bho va̠hee dakshi̍naindraa̠gna-ndvaada̍shakapaalam vaishvade̠va-ncha̠ru-mpra̍thama̠jo va̠thso dakshi̍naa sau̠myagg shyaa̍maa̠ka-ncha̠rum vaaso̠ dakshi̍naa̠ sara̍svatyai cha̠rugm sara̍svate cha̠ru-mmi̍thu̠nau gaavau̠ dakshi̍naa ॥ 2 ॥ (a̠gnee̠sho̠meeya̠m-chatu̍strigmshachcha) (a. 1)

aa̠gne̠yama̠shtaaka̍paala̠-nnirva̍pati sau̠mya-ncha̠rugm saa̍vi̠tram-dvaada̍shakapaalagm saarasva̠ta-ncha̠ru-mpau̠shna-ncha̠ru-mmaa̍ru̠tagm sa̠ptaka̍paalam vaishvade̠vee-maa̠mikshaa̎-ndyaavaaprithi̠vya̍-meka̍kapaalam ॥ 3 ॥ (aa̠gne̠yagm sau̠mya-mmaa̍ru̠ta-ma̠shtaada̍sha) (a. 2)

ai̠ndraa̠gna-mekaa̍dashakapaala-mmaaru̠tee-maa̠mikshaa̎m vaaru̠nee-maa̠mikshaa̎-nkaa̠yameka̍kapaala-mpraghaa̠syaan̍. havaamahe ma̠ruto̍ ya̠jnavaa̍hasah kara̠mbhena̍ sa̠josha̍sah ॥ mo shoo na̍ indra pri̠thsu de̠vaastu̍ sma te shushminnava̠yaa । ma̠hee hya̍sya mee̠dhusho̍ ya̠vyaa । ha̠vishma̍to ma̠ruto̠ vanda̍te̠ geeh ॥ ya-dgraame̠ yadara̍nye̠ ya-thsa̠bhaayaa̠m yadi̍ndri̠ye । yachchhoo̠dre yada̠rya̍ ena̍shchakri̠maa va̠yam । yade ka̠syaadhi̠ dharma̍ni̠ tasyaa̍va̠yaja̍namasi̠ svaahaa̎ ॥ akra̠n karma̍ karma̠krita̍-ssa̠ha vaa̠chaa ma̍yobhu̠vaa । de̠vebhya̠h karma̍ kri̠tvaa-'sta̠-mpreta̍ sudaanavah ॥ 4 ॥ (va̠yamya-dvigm̍sha̠tishcha̍) (a. 3)

a̠gnaye-'nee̍kavate puro̠daasha̍-ma̠shtaaka̍paala̠-nnirva̍pati saa̠kagm soorye̍nodya̠taa ma̠rudbhya̍-ssaantapa̠nebhyo̍ ma̠ddhyandi̍ne cha̠ru-mma̠rudbhyo̍ grihame̠dhibhya̠-ssarvaa̍saa-ndu̠gdhe saa̠ya-ncha̠ru-mpoo̠rnaa da̍rvi̠ paraa̍pata̠ supoo̎rnaa̠ puna̠raa pa̍ta । va̠sneva̠ vi kree̍naavahaa̠ isha̠moorjagm̍ shatakrato ॥ de̠hi me̠ dadaa̍mi te̠ ni me̍ dhehi̠ ni te̍ dadhe । ni̠haara̠minni me̍ haraa ni̠ haara̠- [ni̠ haara̎m, ni ha̍raami te ।] 5

-nni ha̍raami te ॥ ma̠rudbhya̍h kree̠dibhya̍h puro̠daashagm̍ sa̠ptaka̍paala̠-nnirva̍pati saa̠kagm soorye̍nodya̠taa-''gne̠ya-ma̠shtaaka̍paala̠-nnirva̍pati sau̠mya-ncha̠rugm saa̍vi̠tra-ndvaada̍shakapaalagm saarasva̠ta-ncha̠ru-mpau̠shna-ncha̠rumai̎mdraa̠gna-mekaa̍dashakapaala-mai̠ndra-ncha̠rum vai̎shvakarma̠na-meka̍kapaalam ॥ 6 ॥ (ha̠raa̠ ni̠haara̍n-tri̠gm̠shachcha̍) (a. 4)

somaa̍ya pitri̠mate̍ puro̠daasha̠gm̠ shatka̍paala̠-nnirva̍pati pi̠tribhyo̍ barhi̠shadbhyo̍ dhaa̠naah pi̠tribhyo̎-'gnishvaa̠ttebhyo̍ 'bhivaa̠nyaa̍yai du̠gdhe ma̠nthame̠ta-tte̍ tata̠ ye cha̠ tvaa-manve̠ta-tte̍ pitaamaha prapitaamaha̠ ye cha̠ tvaamanvatra̍ pitaro yathaabhaa̠ga-mma̍ndaddhvagm susa̠ndrisha̍-ntvaa va̠ya-mmagha̍va-nmandishee̠mahi̍ । pranoo̠na-mpoo̠rnava̍ndhura-sstu̠to yaa̍si̠ vashaa̠gm̠ anu̍ । yojaa̠ nvi̍ndra te̠ haree̎ ॥ 7 ॥

aksha̠nnamee̍madanta̠ hyava̍ pri̠yaa a̍dhooshata । asto̍shata̠ svabhaa̍navo̠ vipraa̠ navi̍shthayaa ma̠tee । yojaa̠ nvi̍ndra te̠ haree̎ ॥ aksha̍-npi̠taro-'mee̍madanta pi̠taro-'tee̍tripanta pi̠taro-'mee̍mrijanta pi̠tara̍h ॥ pare̍ta pitara-ssomyaa gambhee̠raih pa̠thibhi̍h poo̠rvyaih । athaa̍ pi̠trin-thsu̍vi̠datraa̠gm̠ apee̍ta ya̠mena̠ ye sa̍dha̠maada̠-mmada̍nti ॥ mano̠ nvaa hu̍vaamahe naaraasha̠gm̠sena̠ stome̍na pitri̠naa-ncha̠ manma̍bhih ॥ aa [aa, na̠ e̠tu̠ mana̠h puna̠h kratve̠] 8

na̍ etu̠ mana̠h puna̠h kratve̠ dakshaa̍ya jee̠vase̎ । jyokcha̠ soorya̍-ndri̠she ॥ puna̍rnah pi̠taro̠ mano̠ dadaa̍tu̠ daivyo̠ jana̍h । jee̠vam vraatagm̍ sachemahi ॥ yada̠ntari̍ksha-mprithi̠veemu̠ta dyaam yanmaa̠tara̍-mpi̠tara̍m vaa jihigmsi̠ma । a̠gni-rmaa̠ tasmaa̠dena̍so̠ gaarha̍patya̠h pra mu̍nchatu duri̠taa yaani̍ chakri̠ma ka̠rotu̠ maa-ma̍ne̠nasa̎m ॥ 9 ॥ (haree̠-manma̍bhi̠raa-chatu̍shchatvaarigmshachcha) (a. 5)

pra̠ti̠poo̠ru̠shameka̍kapaalaa̠-nnirva̍pa̠tyeka̠-mati̍rikta̠m yaava̍nto gri̠hyaa̎-ssmastebhya̠h kama̍kara-mpashoo̠naagm sharmaa̍si̠ sharma̠ yaja̍maanasya̠ sharma̍ me ya̠chchhaika̍ e̠va ru̠dro na dvi̠teeyaa̍ya tastha aa̠khuste̍ rudra pa̠shusta-nju̍shasvai̠sha te̍ rudra bhaa̠ga-ssa̠ha svasraa-'mbi̍kayaa̠ ta-nju̍shasva bhesha̠ja-ngave-'shvaa̍ya̠ puru̍shaaya bhesha̠jamatho̍ a̠smabhya̍-mbhesha̠jagm subhe̍shaja̠m- [subhe̍shajam, yathaa-'sa̍ti ।] 10

-myathaa-'sa̍ti । su̠ga-mme̠shaaya̍ me̠shyaa̍ avaa̎mba ru̠dra-ma̍dima̠hyava̍ de̠va-ntyra̍mbakam । yathaa̍ na̠-shshreya̍sa̠h kara̠-dyathaa̍ no̠ vasya̍sa̠h kara̠-dyathaa̍ nah pashu̠mata̠h kara̠-dyathaa̍ no vyavasaa̠yayaa̎t ॥ tyra̍mbakam yajaamahe suga̠ndhi-mpu̍shti̠vardha̍nam । u̠rvaa̠ru̠ka-mi̍va̠ bandha̍naa-nmri̠tyo-rmu̍ksheeya̠ maa-'mritaa̎t ॥ e̠sha te̍ rudra bhaa̠gasta-nju̍shasva̠ tenaa̍va̠sena̍ pa̠ro mooja̍va̠to-'tee̠hya va̍tatadhanvaa̠ pinaa̍kahasta̠h kritti̍vaasaah ॥ 11 ॥ (subhe̍shaja-mihi̠ treeni̍ cha) (a. 6)

ai̠ndraa̠gna-ndvaada̍shakapaalam vaishvade̠va-ncha̠rumindraa̍ya̠ shunaa̠seeraa̍ya puro̠daasha̠-ndvaada̍shakapaalam vaaya̠vya̍-mpaya̍-ssau̠ryameka̍kapaala-ndvaadashaga̠vagm seera̠-ndakshi̍naa- ''gne̠ya-ma̠shtaaka̍paala̠-nnirva̍pati rau̠dra-ngaa̍veedhu̠ka-ncha̠rumai̠ndra-ndadhi̍ vaaru̠nam ya̍va̠maya̍-ncha̠rum va̠hinee̍ dhe̠nu-rdakshi̍naa̠ ye de̠vaah pu̍ra̠ssado̠-'gnine̎traa dakshina̠sado̍ ya̠mane̎traah pashchaa̠thsada̍-ssavi̠trine̎traa uttara̠sado̠ varu̍nanetraa upari̠shado̠ briha̠spati̍netraa raksho̠hana̠ste na̍h paantu̠ te no̍-'vantu̠ tebhyo̠ [te no̍-'vantu̠ tebhya̍h, nama̠stebhya̠-ssvaahaa̠] 12

nama̠stebhya̠-ssvaahaa̠ samoo̍dha̠gm̠ raksha̠-ssanda̍̍gdha̠gm̠ raksha̍ i̠dama̠hagm raksho̠-'bhi sa-nda̍haamya̠gnaye̍ raksho̠ghne svaahaa̍ ya̠maaya̍ savi̠tre varu̍naaya̠ briha̠spata̍ye̠ duva̍svate raksho̠ghne svaahaa̎ prashtivaa̠hee ratho̠ dakshi̍naa de̠vasya̍ tvaa savi̠tuh pra̍sa̠ve̎-'shvino̎-rbaa̠hubhyaa̎-mpoo̠shno hastaa̎bhyaa̠gm̠ raksha̍so va̠dha-nju̍homi ha̠tagm raksho-'va̍dhishma̠ raksho̠ ya-dvaste̠ ta-ddakshi̍naa ॥ 13 ॥ (tebhya̠h-pancha̍chatvaarigmshachcha) (a. 7)

dhaa̠tre pu̍ro̠daasha̠-ndvaada̍shakapaala̠-nnirva̍pa̠tyanu̍matyai cha̠rugm raa̠kaayai̍ cha̠rugm si̍neevaa̠lyai cha̠ru-nku̠hvai̍ cha̠ru-mmi̍thu̠nau gaavau̠ dakshi̍naa ''gnaavaishna̠va-mekaa̍dashakapaala̠-nnirva̍patyaindraavaishna̠va-mekaa̍dashakapaalam vaishna̠va-ntri̍kapaa̠lam vaa̍ma̠no va̠hee dakshi̍naa-'gneesho̠meeya̠-mekaa̍dashakapaala̠-nnirva̍pateendraaso̠meeya̠- mekaa̍dashakapaalagm sau̠mya-ncha̠ru-mba̠bhru-rdakshi̍naa somaapau̠shna-ncha̠ru-nnirva̍patyaindraa pau̠shna-ncha̠ru-mpau̠shna-ncha̠rugg shyaa̠mo dakshi̍naa vaishvaana̠ra-ndvaada̍shakapaala̠-nnirva̍pati̠ hira̍nya̠-ndakshi̍naa vaaru̠nam ya̍va̠maya̍-ncha̠rumashvo̠ dakshi̍naa ॥ 14 ॥ (vai̠shvaa̠na̠ra-ndvaada̍shakapaala̠-nni̠-rashtau cha̍) (a. 8)

baa̠r̠ha̠spa̠tya-ncha̠ru-nnirva̍pati bra̠hmano̍ gri̠he shi̍tipri̠shtho dakshi̍nai̠ndra-mekaa̍dashakapaalagm raaja̠nya̍sya gri̠ha ri̍sha̠bho dakshi̍naa-''di̠tya-ncha̠ru-mmahi̍shyai gri̠he dhe̠nu-rdakshi̍naa nair-ri̠ta-ncha̠ru-mpa̍rivri̠ktyai̍ gri̠he kri̠shnaanaa̎m vreehee̠naa-nna̠khani̍rbhinna-nkri̠shnaa koo̠taa dakshi̍naa ''gne̠yama̠shtaaka̍paalagm senaa̠nyo̍ gri̠he hira̍nya̠-ndakshi̍naa vaaru̠na-ndasha̍kapaalagm soo̠tasya̍ gri̠he ma̠haani̍rashto̠ dakshi̍naa maaru̠tagm sa̠ptaka̍paala-ngraama̠nyo̍ gri̠he prishni̠-rdakshi̍naa saavi̠tra-ndvaada̍shakapaalam- [dvaada̍shakapaalam, ksha̠ttu-rgri̠ha] 15

-ksha̠ttu-rgri̠ha u̍paddhva̠sto dakshi̍naa-''shvi̠na-ndvi̍kapaa̠lagm sa̍ngrahee̠tu-rgri̠he sa̍vaa̠tyau̍ dakshi̍naa pau̠shna-ncha̠ru-mbhaa̍gadu̠ghasya̍ gri̠he shyaa̠mo dakshi̍naa rau̠dra-ngaa̍veedhu̠ka-ncha̠ruma̍kshaavaa̠pasya̍ gri̠he sha̠bala̠ udvaa̍ro̠ dakshi̠nendraa̍ya su̠traanne̍ puro̠daasha̠mekaa̍dashakapaala̠-mprati̠ nirva̍pa̠teendraa̍yaagmho̠muche̠ 'ya-nno̠ raajaa̍ vritra̠haa raajaa̍ bhoo̠tvaa vri̠tram va̍ddhyaa-nmaitraabaarhaspa̠tya-mbha̍vati shve̠taayai̎ shve̠tava̍thsaayai du̠gdhe sva̍yammoo̠rte sva̍yammathi̠ta aajya̠ aashva̍tthe̠ [aashva̍tthe, paatre̠ chatu̍ssraktau] 16

paatre̠ chatu̍ssraktau svayamavapa̠nnaayai̠ shaakhaa̍yai ka̠rnaagshchaaka̍rnaagshcha tandu̠laan vi chi̍nuyaa-dyeka̠rnaa-ssa paya̍si baarhaspa̠tyo ye-'ka̍rnaa̠-ssa aajye̍ mai̠tra-ssva̍yankri̠taa vedi̍-rbhavati svayandi̠na-mba̠r̠hi-ssva̍yankri̠ta i̠ddhma-ssaiva shve̠taa shve̠tava̍thsaa̠ dakshi̍naa ॥ 17 ॥ (saavi̠tra-ndvaada̍shakapaala̠-maashva̍tthe̠ traya̍strigmshachcha) (a. 9)

a̠gnaye̍ gri̠hapa̍taye puro̠daasha̍ma̠shtaaka̍paala̠-nnirva̍pati kri̠shnaanaa̎m vreehee̠naagm somaa̍ya̠ vana̠spata̍ye shyaamaa̠ka-ncha̠rugm sa̍vi̠tre sa̠tyapra̍savaaya puro̠daasha̠-ndvaada̍shakapaala-maashoo̠naam vree̍hee̠naagm ru̠draaya̍ pashu̠pata̍ye gaaveedhu̠ka-ncha̠ru-mbriha̠spata̍ye vaa̠chaspata̍ye naivaa̠ra-ncha̠rumindraa̍ya jye̠shthaaya̍ puro̠daasha̠-mekaa̍dashakapaala-mma̠haavree̍heenaa-mmi̠traaya̍ sa̠tyaayaa̠-''mbaanaa̎-ncha̠rum varu̍naaya̠ dharma̍pataye yava̠maya̍-ncha̠rugm sa̍vi̠taa tvaa̎ prasa̠vaanaagm̍ suvataama̠gni-rgri̠hapa̍teenaa̠gm̠ somo̠ vana̠spatee̍naagm ru̠drah pa̍shoo̠naam- [pa̍shoo̠naam, briha̠spati̍-rvaa̠chaamindro̎] 18

-briha̠spati̍-rvaa̠chaamindro̎ jye̠shthaanaa̎-mmi̠tra-ssa̠tyaanaa̠m varu̍no̠ dharma̍pateenaa̠m ye de̍vaa deva̠suva̠-sstha ta i̠ma-maa̍mushyaaya̠na-ma̍nami̠traaya̍ suvaddhva-mmaha̠te ksha̠traaya̍ maha̠ta aadhi̍patyaaya maha̠te jaana̍raajyaayai̠sha vo̍ bharataa̠ raajaa̠ somo̠-'smaaka̍-mbraahma̠naanaa̠gm̠ raajaa̠ prati̠ tyannaama̍ raa̠jya-ma̍dhaayi̠ svaa-nta̠nuva̠m varu̍no ashishre̠chchhuche̎-rmi̠trasya̠ vratyaa̍ abhoo̠maama̍nmahi maha̠ta ri̠tasya̠ naama̠ sarve̠ vraataa̠ varu̍nasyaabhoova̠n vi mi̠tra evai̠-raraa̍ti-mataaree̠dasoo̍shudanta ya̠jniyaa̍ ri̠tena̠ vyu̍ tri̠to ja̍ri̠maana̍-nna aana̠-dvishno̠h kramo̍-'si̠ vishnoh̎ kraa̠ntama̍si̠ vishno̠-rvikraa̎mta-masi ॥ 19 ॥ (pa̠shoo̠naamvraataa̠h-pancha̍vigmshatishcha) (a. 10)

a̠rtheta̍-ssthaa̠-'paa-mpati̍rasi̠ vrishaa̎-'syoo̠rmi-rvri̍shase̠no̍-'si vraja̠kshita̍-sstha ma̠rutaa̠moja̍-sstha̠ soorya̍varchasa-sstha̠ soorya̍tvachasa-sstha̠ maandaa̎-sstha̠ vaashaa̎-sstha̠ shakva̍ree-sstha vishva̠bhrita̍-sstha jana̠bhrita̍-ssthaa̠-'gneste̍ja̠syaa̎-ssthaa̠-'paamosha̍dheenaa̠gm̠ rasa̍-ssthaa̠-'po de̠vee-rmadhu̍mateeragrihna̠nnoorja̍svatee raaja̠sooyaa̍ya̠ chita̍nah ॥ yaabhi̍-rmi̠traavaru̍naava̠-bhyashi̍ncha̠n̠. yaabhi̠-rindra̠mana̍ya̠nnatya raa̍teeh ॥ raa̠shtra̠daa-sstha̍ raa̠shtra-nda̍tta̠ svaahaa̍ raashtra̠daa-sstha̍ raa̠shtrama̠mushmai̍ datta ॥ 20 ॥ (atye-kaa̍dasha cha) (a. 11)

devee̍raapa̠-ssa-mmadhu̍matee̠-rmadhu̍mateebhi-ssrijyaddhva̠-mmahi̠ varcha̍h, ksha̠triyaa̍ya vanvaa̠naa anaa̍dhrishtaa-sseeda̠torja̍svatee̠rmahi̠ varcha̍h, ksha̠triyaa̍ya̠ dadha̍tee̠rani̍bhrishtamasi vaa̠cho bandhu̍stapo̠jaa-ssoma̍sya daa̠trama̍si shu̠kraa va̍-shshu̠krenotpu̍naami cha̠ndraashcha̠ndrenaa̠mritaa̍ a̠mrite̍na̠ svaahaa̍ raaja̠sooyaa̍ya̠ chita̍nah । sa̠dha̠maado̎ dyu̠mninee̠roorja̍ e̠taa ani̍bhrishtaa apa̠syuvo̠ vasaa̍nah ॥ pa̠styaa̍su chakre̠ varu̍na-ssa̠dhastha̍ma̠paagm shishu̍- [shishu̍h, maa̠trita̍maasva̠ntah ।] 21

-rmaa̠trita̍maasva̠ntah ॥ ksha̠trasyolba̍masi ksha̠trasya̠ yoni̍ra̠syaavi̍nno a̠gni-rgri̠hapa̍ti̠raavi̍nna̠ indro̍ vri̠ddhashra̍vaa̠ aavi̍nnah poo̠shaa vi̠shvave̍daa̠ aavi̍nnau mi̠traavaru̍naa vritaa̠vridhaa̠vaavi̍nne̠ dyaavaa̍prithi̠vee dhri̠tavra̍te̠ aavi̍nnaa de̠vyadi̍ti-rvishvaroo̠pyaavi̍nno̠ 'yama̠saavaa̍mushyaaya̠no̎-'syaam vi̠shya̍smi-nraa̠shtre ma̍ha̠te ksha̠traaya̍ maha̠ta aadhi̍patyaaya maha̠te jaana̍raajyaayai̠sha vo̍ bharataa̠ raajaa̠ somo̠-'smaaka̍-mbraahma̠naanaa̠gm̠ raajendra̍sya̠ [raajendra̍sya, vajro̍-'si̠] 22

vajro̍-'si̠ vaartra̍ghna̠stvayaa̠ yam vri̠tram va̍ddhyaachchhatru̠baadha̍naa-sstha paa̠ta maa̎ pra̠tyancha̍-mpaa̠ta maa̍ ti̠ryancha̍ma̠nvancha̍-mmaa paata di̠gbhyo maa̍ paata̠ vishvaa̎bhyo maa naa̠shtraabhya̍h paata̠ hira̍nyavarnaa-vu̠shasaa̎m mviro̠ke-'ya̍ssthoonaa̠-vudi̍tau̠ soorya̠syaa-'' ro̍hatam varuna mitra̠ garta̠-ntata̍shchakshaathaa̠madi̍ti̠-nditi̍-ncha ॥ 23 ॥ (shishu̠-rindra̠syai-ka̍chatvaarigmshachcha) (a. 12)

sa̠midha̠maa ti̍shtha gaaya̠tree tvaa̠ chhanda̍saamavatu tri̠vrithstomo̍ rathanta̠ragm saamaa̠gni-rde̠vataa̠ brahma̠ dravi̍namu̠graamaa ti̍shtha tri̠shtu-ptvaa̠ chhanda̍saamavatu panchada̠sha-sstomo̍ bri̠ha-thsaamendro̍ de̠vataa̎ ksha̠tra-ndravi̍nam vi̠raaja̠maa ti̍shtha̠ jaga̍tee tvaa̠ chhanda̍saamavatu saptada̠sha-sstomo̍ vairoo̠pagm saama̍ ma̠ruto̍ de̠vataa̠ vi-ddravi̍na̠-mudee̍chee̠maa-ti̍shthaanu̠shtu-ptvaa̠ - [ti̍shthaanu̠shtu-ptvaa̎, chhanda̍saa-] 24

chhanda̍saa-mavatvekavi̠gm̠sha-sstomo̍ vairaa̠jagm saama̍ mi̠traavaru̍nau de̠vataa̠ bala̠-ndravi̍na-moo̠rdhvaamaa ti̍shtha pa̠nktistvaa̠ chhanda̍saamavatu trinavatrayastri̠gm̠shau stomau̍ shaakvararaiva̠te saama̍nee̠ briha̠spati̍-rde̠vataa̠ varcho̠ dravi̍na-mee̠dri-nchaa̎nyaa̠dri-nchai̍taa̠dri-ncha̍ prati̠dri-ncha̍ mi̠tashcha̠ sammi̍tashcha̠ sabha̍raah । shu̠krajyo̍tishcha chi̠trajyo̍tishcha sa̠tyajyo̍tishcha̠ jyoti̍shmagshcha sa̠tyashcha̍rta̠paashchaa- [sa̠tyashcha̍rta̠paashcha̍, atyagm̍haah ।] 25

-'tyagm̍haah । a̠gnaye̠ svaahaa̠ somaa̍ya̠ svaahaa̍ savi̠tre svaahaa̠ sara̍svatyai̠ svaahaa̍ poo̠shne svaahaa̠ briha̠spata̍ye̠ svaahendraa̍ya̠ svaahaa̠ ghoshaa̍ya̠ svaahaa̠ shlokaa̍ya̠ svaahaa 'gmshaa̍ya̠ svaahaa̠ bhagaa̍ya̠ svaahaa̠ kshetra̍sya̠ pata̍ye̠ svaahaa̍ prithi̠vyai svaahaa̠ 'ntari̍kshaaya̠ svaahaa̍ di̠ve svaahaa̠ sooryaa̍ya̠ svaahaa̍ cha̠ndrama̍se̠ svaahaa̠ naksha̍trebhya̠-ssvaahaa̠ 'dbhya-ssvaahausha̍dheebhya̠-ssvaahaa̠ vana̠spati̍bhya̠-ssvaahaa̍ charaacha̠rebhya̠-ssvaahaa̍ paripla̠vebhya̠-ssvaahaa̍ sareesri̠pebhya̠-ssvaahaa̎ ॥ 26 ॥ (a̠nu̠shtuptva̍-rta̠paashcha̍ - sareesri̠pebhya̠-ssvaahaa̎) (a. 13)

soma̍sya̠ tvishi̍rasi̠ tave̍va me̠ tvishi̍-rbhooyaada̠mrita̍masi mri̠tyo-rmaa̍ paahi di̠dyonmaa̍ paa̠hyave̎shtaa danda̠shookaa̠ nira̍sta̠-nnamu̍che̠-shshira̍h ॥ somo̠ raajaa̠ varu̍no de̠vaa dha̍rma̠suva̍shcha̠ ye । te te̠ vaachagm̍ suvantaa̠-nte te̎ praa̠nagm su̍vantaa̠-nte te̠ chakshu̍-ssuvantaa̠-nte te̠ shrotragm̍ suvantaa̠gm̠ soma̍sya tvaa dyu̠mnenaa̠bhi shi̍nchaamya̠gne- [shi̍nchaamya̠gneh, teja̍saa̠ soorya̍sya̠] 27

-steja̍saa̠ soorya̍sya̠ varcha̠sendra̍syendri̠yena̍ mi̠traavaru̍nayo-rvee̠rye̍na ma̠rutaa̠moja̍saa ksha̠traanaa̎-nksha̠trapa̍tira̠syati̍ di̠vaspaa̍hi sa̠maava̍vritranna-dha̠raagudee̍chee̠-rahi̍-mbu̠ddhniya̠manu̍ sa̠nchara̍ntee̠staah parva̍tasya vrisha̠bhasya̍ pri̠shthe naava̍shcharanti sva̠sicha̍ iyaa̠naah ॥ rudra̠ yatte̠ krayee̠ para̠-nnaama̠ tasmai̍ hu̠tama̍si ya̠meshta̍masi । prajaa̍pate̠ na tvade̠taanya̠nyo vishvaa̍ jaa̠taani̠ pari̠ taa ba̍bhoova । yatkaa̍maaste juhu̠mastanno̍ astu va̠yagg syaa̍ma̠ pata̍yo rayee̠naam ॥ 28 ॥ (a̠gne-stai-kaa̍dasha cha) (a. 14)

indra̍sya̠ vajro̍-'si̠ vaartra̍ghna̠stvayaa̠-'yam vri̠tram va̍ddhyaa-nmi̠traavaru̍nayostvaa prashaa̠stroh pra̠shishaa̍ yunajmi ya̠jnasya̠ yoge̍na̠ vishno̠h kramo̍-'si̠ vishno̎h kraa̠ntama̍si̠ vishno̠-rvikraa̎mtamasi ma̠rutaa̎-mprasa̠ve je̍shamaa̠pta-mmana̠-ssama̠hami̍ndri̠yena̍ vee̠rye̍na pashoo̠naa-mma̠nyura̍si̠ tave̍va me ma̠nyu-rbhoo̍yaa̠nnamo̍ maa̠tre pri̍thi̠vyai maa-'ha-mmaa̠tara̍-mprithi̠veegm higm̍sisha̠-mmaa [ ] 29

maa-mmaa̠taa pri̍thi̠vee higm̍see̠diya̍da̠syaayu̍-ra̠syaayu̍-rme dhe̠hyoorga̠syoorja̍-mme dhehi̠ yunna̍si̠ varcho̍-'si̠ varcho̠ mayi̍ dhehya̠gnaye̍ gri̠hapa̍taye̠ svaahaa̠ somaa̍ya̠ vana̠spata̍ye̠ svaahendra̍sya̠ balaa̍ya̠ svaahaa̍ ma̠rutaa̠moja̍se̠ svaahaa̍ ha̠gm̠sa-shshu̍chi̠sha-dvasu̍rantariksha̠ -saddhotaa̍ vedi̠shadati̍thi-rdurona̠sat । nri̠sha-dva̍ra̠sadri̍ta̠sa-dvyo̍ma̠sada̠bjaa go̠jaa ri̍ta̠jaa a̍dri̠jaa ri̠ta-mbri̠hat ॥ 30 ॥ (hi̠gm̠si̠sha̠-mma-rta̠jaa-streeni̍ cha) (a. 15)

mi̠tro̍-'si̠ varu̍no-'si̠ sama̠ham vi̠shvai̎-rde̠vaih, ksha̠trasya̠ naabhi̍rasi ksha̠trasya̠ yoni̍rasi syo̠naamaa see̍da su̠shadaa̠maa see̍da̠ maa tvaa̍ higmsee̠nmaa maa̍ higmsee̠nni sha̍saada dhri̠tavra̍to̠ varu̍nah pa̠styaa̎svaa saamraa̎jyaaya su̠kratu̠-rbrahmaa(3)-ntvagm raa̍ja-nbra̠hmaa-'si̍ savi̠taa-'si̍ sa̠tyasa̍vo̠ brahmaa(3)-ntvagm raa̍ja-nbra̠hmaa-'seendro̍-'si sa̠tyaujaa̠ [sa̠tyaujaa̎h, brahmaa(3)ntvagm] 31

brahmaa(3)ntvagm raa̍ja-nbra̠hmaa-'si̍ mi̠tro̍-'si su̠shevo̠ brahmaa(3)-ntvagm raa̍ja-nbra̠hmaa-'si̠ varu̍no-'si sa̠tyadha̠rmendra̍sya̠ vajro̍-'si̠ vaartra̍ghna̠stena̍ me raddhya̠ disho̠-'bhya̍yagm raajaa̍-'bhoo̠-thsushlo̠kaam(4) suma̍nga̠laam(4) satya̍raa̠jaa(3)n । a̠paa-nnaptre̠ svaaho̠rjo naptre̠ svaahaa̠-'gnaye̍ gri̠hapa̍taye̠ svaahaa̎ ॥ 32 ॥ (sa̠tyaujaa̎-shchatvaari̠gm̠shachcha̍) (a. 16)

aa̠gne̠yama̠shtaaka̍paala̠-nnirva̍pati̠ hira̍nya̠-ndakshi̍naa saarasva̠ta-ncha̠rum va̍thsata̠ree dakshi̍naa saavi̠tra-ndvaada̍shakapaala-mupaddhva̠sto dakshi̍naa pau̠shna-ncha̠rugg shyaa̠mo dakshi̍naa baarhaspa̠tya-ncha̠rugm shi̍tipri̠shtho dakshi̍nai̠ndra-mekaa̍dashakapaala-mrisha̠bho dakshi̍naa vaaru̠na-ndasha̍kapaala-mma̠haani̍rashto̠ dakshi̍naa sau̠mya-ncha̠ru-mba̠bhru-rdakshi̍naa tvaa̠shtrama̠shtaaka̍paalagm shu̠ntho dakshi̍naa vaishna̠va-ntri̍kapaa̠lam vaa̍ma̠no dakshi̍naa ॥ 33 ॥ (aa̠gne̠yagm hira̍nyagm saarasva̠tam-dvicha̍tvaarigmshat ) (a. 17)

sa̠dyo dee̎kshayanti sa̠dya-ssoma̍-nkreenanti pundarisra̠jaa-mpra ya̍chchhati da̠shabhi̍-rvathsata̠rai-ssoma̍-nkreenaati dasha̠peyo̍ bhavati sha̠ta-mbraa̎hma̠naah pi̍banti saptada̠shagg sto̠tra-mbha̍vati praakaa̠shaava̍ddhva̠ryave̍ dadaati̠ sraja̍-mudgaa̠tre ru̠kmagm hotre-'shva̍-mprastotripratiha̠rtribhyaa̠-ndvaada̍sha pashthau̠hee-rbra̠hmane̍ va̠shaa-mmai̎traavaru̠naaya̍rsha̠bha-mbraa̎hmanaachchha̠gm̠sine̠ vaasa̍see neshtaapo̠tribhyaa̠g̠ sthoori̍ yavaachi̠ta-ma̍chchhaavaa̠kaayaa̍-'na̠dvaaha̍-ma̠gneedhe̍ bhaarga̠vo hotaa̍ bhavati shraaya̠nteeya̍-mbrahmasaa̠ma-mbha̍vati vaarava̠nteeya̍ magnishtomasaa̠magm saa̍rasva̠tee-ra̠po gri̍hnaati ॥ 34 ॥ (vaa̠ra̠va̠nteeya̍-ncha̠tvaari̍ cha)(aa18)

aa̠gne̠ya-ma̠shtaaka̍paala̠-nnirva̍pati̠ hira̍nya̠-ndakshi̍nai̠ndra-mekaa̍dashakapaala-mrisha̠bho dakshi̍naa vaishvade̠va-ncha̠ru-mpi̠shangee̍ pashthau̠hee dakshi̍naa maitraavaru̠nee-maa̠mikshaa̎m va̠shaa dakshi̍naa baarhaspa̠tya-ncha̠rugm shi̍tipri̠shtho dakshi̍naa-''di̠tyaa-mma̠l̠.haa-nga̠rbhinee̠maa la̍bhate maaru̠tee-mprishni̍-mpashthau̠hee-ma̠shvibhyaa̎-mpoo̠shne pu̍ro̠daasha̠-ndvaada̍shakapaala̠-nnirva̍pati̠ sara̍svate satya̠vaache̍ cha̠rugm sa̍vi̠tre sa̠tyapra̍savaaya puro̠daasha̠-ndvaada̍shakapaala-ntisridha̠nvagm shu̍shkadri̠ti-rdakshi̍naa ॥ 35 ॥ (a̠gne̠yagm hira̍nyamai̠dramri̍sha̠bho vai̎shvade̠va-mpi̠shangee̍ baarhaspa̠tyagm-sa̠ptacha̍tvaarigmshat) (a. 19)

aa̠gne̠ya-ma̠shtaaka̍paala̠-nnirva̍pati sau̠mya-ncha̠rugm saa̍vi̠tra-ndvaada̍shakapaala-mbaarhaspa̠tya-ncha̠ru-ntvaa̠shtrama̠shtaaka̍paalam vaishvaana̠ra-ndvaada̍shakapaala̠-ndakshi̍no rathavaahanavaa̠ho dakshi̍naa saarasva̠ta-ncha̠ru-nnirva̍pati pau̠shna-ncha̠ru-mmai̠tra-ncha̠rum vaa̍ru̠na-ncha̠ru-nkshai̎trapa̠tya-ncha̠rumaa̍di̠tya-ncha̠rumutta̍ro rathavaahanavaa̠ho dakshi̍naa ॥ 36 ॥ (aa̠gne̠yagm sau̠mya-mbaa̍rhaspa̠tyam-chatu̍strigmshat) (a. 20)

svaa̠dvee-ntvaa̎ svaa̠dunaa̍ tee̠vraa-ntee̠vrenaa̠-'mritaa̍-ma̠mrite̍na sri̠jaami̠ sagm some̍na̠ somo̎-'sya̠shvibhyaa̎-mpachyasva̠ sara̍svatyai pachya̠svendraa̍ya su̠traanne̍ pachyasva pu̠naatu̍ te pari̠sruta̠gm̠ soma̠gm̠ soorya̍sya duhi̠taa । vaare̍na̠ shashva̍taa̠ tanaa̎ ॥ vaa̠yuh poo̠tah pa̠vitre̍na pra̠tyam somo̠ ati̍drutah । indra̍sya̠ yujya̠-ssakhaa̎ ॥ ku̠vida̠m yava̍manto̠ yava̍-nchi̠-dyathaa̠ daantya̍nupoo̠rvam vi̠yooya̍ । i̠hehai̍shaa-nkrinuta̠ bhoja̍naani̠ ye ba̠r̠hisho̠ namo̍vrikti̠-nna ja̠gmuh ॥ aa̠shvi̠na-ndhoo̠mramaa la̍bhate saarasva̠ta-mme̠shamai̠ndramri̍sha̠bha-mai̠ndra-mekaa̍dashakapaala̠-nnirva̍pati saavi̠tra-ndvaada̍shakapaalam vaaru̠na-ndasha̍kapaala̠gm̠ soma̍prateekaah pitarastripnuta̠ vada̍baa̠ dakshi̍naa ॥ 37 ॥ (bhoja̍naani̠-shadvigm̍shatishcha) (a. 21)

agnaa̍vishnoo̠ mahi̠ ta-dvaa̎-mmahi̠tvam vee̠ta-nghri̠tasya̠ guhyaa̍ni̠ naama̍ । dame̍dame sa̠pta ratnaa̠ dadhaa̍naa̠ prati̍ vaa-nji̠hvaa ghri̠tamaa cha̍ranyet ॥ agnaa̍vishnoo̠ mahi̠ dhaama̍ pri̠yam vaa̎m vee̠tho ghri̠tasya̠ guhyaa̍ jushaa̠naa । dame̍dame sushtu̠tee-rvaa̍vridhaa̠naa prati̍ vaa-nji̠hvaa ghri̠tamuchcha̍ranyet ॥ pra no̍ de̠vee sara̍svatee̠ vaaje̍bhi-rvaa̠jinee̍vatee । dhee̠naa-ma̍vi̠trya̍vatu । aa no̍ di̠vo bri̍ha̠tah - [bri̍ha̠tah, parva̍taa̠daa] 38

parva̍taa̠daa sara̍svatee yaja̠taa ga̍ntu ya̠jnam । hava̍-nde̠vee ju̍jushaa̠naa ghri̠taachee̍ sha̠gmaa-nno̠ vaacha̍musha̠tee shri̍notu ॥ briha̍spate ju̠shasva̍ no ha̠vyaani̍ vishvadevya । raasva̠ ratnaa̍ni daa̠shushe̎ ॥ e̠vaa pi̠tre vi̠shvade̍vaaya̠ vrishne̍ ya̠jnai-rvi̍dhema̠ nama̍saa ha̠virbhi̍h । briha̍spate supra̠jaa vee̠rava̍nto va̠yagg syaa̍ma̠ pata̍yo rayee̠naam ॥ briha̍spate̠ ati̠ yada̠ryo arhaa̎-ddyu̠ma-dvi̠bhaati̠ kratu̍ma̠jjane̍shu । ya-ddee̠daya̠chchhava̍sa- [ya-ddee̠daya̠chchhava̍sah, ri̠ta̠pra̠jaa̠ta̠ tada̠smaasu̠] 39

-rtaprajaata̠ tada̠smaasu̠ dravi̍na-ndhehi chi̠tram ॥ aa no̍ mitraavarunaa ghri̠tai-rgavyoo̍timukshatam । maddhvaa̠ rajaagm̍si sukratoo ॥ pra baa̠havaa̍ sisrita-njee̠vase̍ na̠ aa no̠ gavyoo̍ti-mukshata-nghri̠tena̍ । aa no̠ jane̎ shravayatam yuvaanaa shru̠ta-mme̍ mitraavarunaa̠ have̠maa ॥ a̠gnim va̍h poo̠rvya-ngi̠raa de̠vamee̍de̠ vasoo̍naam । sa̠pa̠ryanta̍h purupri̠ya-mmi̠tra-nna kshe̎tra̠saadha̍sam ॥ ma̠kshoo de̠vava̍to̠ ratha̠- [ratha̍h, shooro̍ vaa pri̠thsu] 40

-shshooro̍ vaa pri̠thsu kaasu̍ chit । de̠vaanaa̠m ya inmano̠ yaja̍maana̠ iya̍kshatya̠bheedaya̍jvano bhuvat ॥ na ya̍jamaana rishyasi̠ na su̍nvaana̠ na de̍vayo ॥ asa̠datra̍ su̠veerya̍mu̠ta tyadaa̠shvashvi̍yam ॥ naki̠shta-nkarma̍naa nasha̠nna pra yo̍sha̠nna yo̍shati ॥ upa̍ ksharanti̠ sindha̍vo mayo̠bhuva̍ eejaa̠na-ncha̍ ya̠kshyamaa̍na-ncha dhe̠nava̍h । pri̠nanta̍-ncha̠ papu̍ri-ncha [papu̍ri-ncha, shra̠va̠syavo̍ ghri̠tasya̠] 41

shrava̠syavo̍ ghri̠tasya̠ dhaaraa̠ upa̍ yanti vi̠shvata̍h ॥somaa̍rudraa̠ vi vri̍hata̠m vishoo̍chee̠mamee̍vaa̠ yaa no̠ gaya̍-maavi̠vesha̍ । aa̠re baa̍dhethaa̠-nnir-ri̍ti-mparaa̠chaih kri̠ta-nchi̠dena̠h pra mu̍mukta-ma̠smat ॥ somaa̍rudraa yu̠va-me̠taanya̠sme vishvaa̍ ta̠nooshu̍ bhesha̠jaani̍ dhattam । ava̍ syata-mmu̠nchata̠m yanno̠ asti̍ ta̠nooshu̍ ba̠ddha-nkri̠tameno̍ a̠smat ॥ somaa̍pooshanaa̠ jana̍naa rayee̠naa-njana̍naa di̠vo jana̍naa prithi̠vyaah । jaa̠tau vishva̍sya̠ bhuva̍nasya go̠pau de̠vaa a̍krinvanna̠mrita̍sya̠ naabhi̎m ॥ i̠mau de̠vau jaaya̍maanau jushante̠mau tamaagm̍si goohataa̠-maju̍shtaa । aa̠bhyaamindra̍h pa̠kvamaa̠maasva̠nta-sso̍maapoo̠shabhyaa̎-njanadu̠sriyaa̍su ॥ 42 ॥ (bri̠ha̠tah-shava̍saa̠-ratha̠h-papu̍ri-ncha-di̠vo jana̍naa̠-pancha̍vigmshatishcha) (a. 22)

(anu̍matyaa-aagne̠ya-mai̎mdraa̠gnama̠gnaye̠-somaa̍ya-pratipoo̠rusha-mai̎mdraagnam-dhaa̠tre baa̍rhaspa̠tya-ma̠gnaye̠-r-'thato̠-devee̎h-sa̠midha̠gm̠-soma̠sye-ndra̍sya -mi̠tra-aa̎gne̠yagm-sa̠dya-aa̎gne̠yagm-maa̎gne̠yagg-svaa̠dvee-ntvaa-'gnaa̍vishnoo̠-dvaavigm̍shatih । )

(anu̍matyai̠-yathaa-'sa̍ti̠-devee̍raapo-mi̠tro̍-'si̠-shooro̍ vaa̠-dvicha̍tvaarigmshat । )

(anu̍matyaa, u̠sriyaa̍su)

(i̠sha, aapo̍, de̠vasyaa, ''da̍de, devaasu̠raa, ssantvaa̍, paakaya̠jna, manu̠matyaa, a̠shtau) (8)

॥ hari̍h om ॥

॥ krishna yajurvedeeya taittireeya samhitaayaa-mprathamakaande ashtamah prashna-ssamaaptah ॥

1.8 - అనుమత్యై పురోడాశమష్టాకపాలం - కృష్ణ యజుర్వేద తైత్తిరీయ సంహితా పాఠః గురించి

This is the eighth and last prashna of the first kanda of the Krishna Yajurveda Taittiriya Samhita, which gives the mantras of the Rajasuya, the royal consecration. It opens: "For Anumati, a cake on eight potsherds", and goes on through the many offerings and ceremonies of the Rajasuya, including the anointing of the king with waters from many sources and his symbolic conquest of the directions.

మూలం: Krishna Yajurveda, Taittiriya Samhita 1.8

ఎప్పుడు పఠించాలి: In Vedic chanting and in traditional study of the Taittiriya Samhita.

మీకు తెలుసా?

  • The Rajasuya is the great Vedic rite for consecrating a king, famous from Yudhishthira's Rajasuya in the Mahabharata.
  • Anumati is the goddess of divine favour, linked with the day before the full moon.

తరచుగా అడిగే ప్రశ్నలు

What does this prashna cover?

The mantras of the Rajasuya, the royal consecration.

Who is Anumati?

The goddess of divine favour.

Which Veda is it from?

The Krishna Yajurveda, Taittiriya Samhita 1.8.

ఆరాధన, అధ్యయనం కోసం అందించబడింది, జోస్యంగా కాదు. వాణిజ్యేతరం.