Gita Govindam Chapter 3 - Mugdha Madhusudana
Sri Krishna · Traditional devotional text
॥ ತೃತೀಯಃ ಸರ್ಗಃ ॥ ॥ ಮುಗ್ಧಮಧುಸೂದನಃ ॥
ಕಂಸಾರಿರಪಿ ಸಂಸಾರವಾಸನಾಬಂಧಶೃಂಖಲಾಮ್ । ರಾಧಾಮಾಧಾಯ ಹೃದಯೇ ತತ್ಯಾಜ ವ್ರಜಸುಂದರೀಃ ॥ 18 ॥
ಇತಸ್ತತಸ್ತಾಮನುಸೃತ್ಯ ರಾಧಿಕಾ-ಮನಂಗಬಾಣವ್ರಣಖಿನ್ನಮಾನಸಃ । ಕೃತಾನುತಾಪಃ ಸ ಕಲಿಂದನಂದಿನೀ-ತಟಾಂತಕುಂಜೇ ವಿಷಸಾದ ಮಾಧವಃ ॥ 19 ॥
॥ ಗೀತಂ 7 ॥
ಮಾಮಿಯಂ ಚಲಿತಾ ವಿಲೋಕ್ಯ ವೃತಂ ವಧೂನಿಚಯೇನ । ಸಾಪರಾಧತಯಾ ಮಯಾಪಿ ನ ವಾರಿತಾತಿಭಯೇನ ॥ ಹರಿ ಹರಿ ಹತಾದರತಯಾ ಗತಾ ಸಾ ಕುಪಿತೇವ ॥ 1 ॥
ಕಿಂ ಕರಿಷ್ಯತಿ ಕಿಂ ವದಿಷ್ಯತಿ ಸಾ ಚಿರಂ ವಿರಹೇಣ । ಕಿಂ ಧನೇನ ಜನೇನ ಕಿಂ ಮಮ ಜೀವನೇನ ಗೃಹೇಣ ॥ 2 ॥
ಚಿಂತಯಾಮಿ ತದಾನನಂ ಕುಟಿಲಭ್ರು ಕೋಪಭರೇಣ । ಶೋಣಪದ್ಮಮಿವೋಪರಿ ಭ್ರಮತಾಕುಲಂ ಭ್ರಮರೇಣ ॥ 3 ॥
ತಾಮಹಂ ಹೃದಿ ಸಂಗತಾಮನಿಶಂ ಭೃಶಂ ರಮಯಾಮಿ । ಕಿಂ ವನೇಽನುಸರಾಮಿ ತಾಮಿಹ ಕಿಂ ವೃಥಾ ವಿಲಪಾಮಿ ॥ 4 ॥
ತನ್ವಿ ಖಿನ್ನಮಸೂಯಯಾ ಹೃದಯಂ ತವಾಕಲಯಾಮಿ । ತನ್ನ ವೇದ್ಮಿ ಕುತೋ ಗತಾಸಿ ನ ತೇನ ತೇಽನುನಯಾಮಿ ॥ 5 ॥
ದೃಶ್ಯತೇ ಪುರತೋ ಗತಾಗತಮೇವ ಮೇ ವಿದಧಾಸಿ । ಕಿಂ ಪುರೇವ ಸಸಂಭ್ರಮಂ ಪರಿರಂಭಣಂ ನ ದದಾಸಿ ॥ 6 ॥
ಕ್ಷಮ್ಯತಾಮಪರಂ ಕದಾಪಿ ತವೇದೃಶಂ ನ ಕರೋಮಿ । ದೇಹಿ ಸುಂದರಿ ದರ್ಶನಂ ಮಮ ಮನ್ಮಥೇನ ದುನೋಮಿ ॥ 7 ॥
ವರ್ಣಿತಂ ಜಯದೇವಕೇನ ಹರೇರಿದಂ ಪ್ರವಣೇನ । ಕಿಂದುಬಿಲ್ವಸಮುದ್ರಸಂಭವರೋಹಿಣೀರಮಣೇನ ॥ 8 ॥
ಹೃದಿ ಬಿಸಲತಾಹಾರೋ ನಾಯಂ ಭುಜಂಗಮನಾಯಕಃ ಕುವಲಯದಲಶ್ರೇಣೀ ಕಂಠೇ ನ ಸಾ ಗರಲದ್ಯುತಿಃ । ಮಲಯಜರಜೋ ನೇದಂ ಭಸ್ಮ ಪ್ರಿಯಾರಹಿತೇ ಮಯಿ ಪ್ರಹರ ನ ಹರಭ್ರಾಂತ್ಯಾನಂಗ ಕ್ರುಧಾ ಕಿಮು ಧಾವಸಿ ॥ 20 ॥
ಪಾಣೌ ಮಾ ಕುರು ಚೂತಸಾಯಕಮಮುಂ ಮಾ ಚಾಪಮಾರೋಪಯ ಕ್ರೀಡಾನಿರ್ಜಿತವಿಶ್ವ ಮೂರ್ಛಿತಜನಾಘಾತೇನ ಕಿಂ ಪೌರುಷಮ್ । ತಸ್ಯಾ ಏವ ಮೃಗೀದೃಶೋ ಮನಸಿಜಪ್ರೇಂಖತ್ಕಟಾಕ್ಷಾಶುಗ-ಶ್ರೇಣೀಜರ್ಜರಿತಂ ಮನಾಗಪಿ ಮನೋ ನಾದ್ಯಾಪಿ ಸಂಧುಕ್ಷತೇ ॥ 21 ॥
ಭ್ರೂಚಾಪೇ ನಿಹಿತಃ ಕಟಾಕ್ಷವಿಶಿಖೋ ನಿರ್ಮಾತು ಮರ್ಮವ್ಯಥಾಂ ಶ್ಯಾಮಾತ್ಮಾ ಕುಟಿಲಃ ಕರೋತು ಕಬರೀಭಾರೋಽಪಿ ಮಾರೋದ್ಯಮಮ್ । ಮೋಹಂ ತಾವದಯಂ ಚ ತನ್ವಿ ತನುತಾಂ ಬಿಂಬಾದರೋ ರಾಗವಾನ್ ಸದ್ವೃತ್ತಸ್ತನಮಣ್ದಲಸ್ತವ ಕಥಂ ಪ್ರಾಣೈರ್ಮಮ ಕ್ರೀಡತಿ ॥ 22 ॥
ತಾನಿ ಸ್ಪರ್ಶಸುಖಾನಿ ತೇ ಚ ತರಲಾಃ ಸ್ನಿಗ್ಧಾ ದೃಶೋರ್ವಿಭ್ರಮಾ-ಸ್ತದ್ವಕ್ತ್ರಾಂಬುಜಸೌರಭಂ ಸ ಚ ಸುಧಾಸ್ಯಂದೀ ಗಿರಾಂ ವಕ್ರಿಮಾ । ಸಾ ಬಿಂಬಾಧರಮಾಧುರೀತಿ ವಿಷಯಾಸಂಗೇಽಪಿ ಚೇನ್ಮಾನಸಂ ತಸ್ಯಾಂ ಲಗ್ನಸಮಾಧಿ ಹಂತ ವಿರಹವ್ಯಾಧಿಃ ಕಥಂ ವರ್ಧತೇ ॥ 23 ॥
ಭ್ರೂಪಲ್ಲವಂ ಧನುರಪಾಂಗತರಂಗಿತಾನಿ ಬಾಣಾಃ ಗುಣಃ ಶ್ರವಣಪಾಲಿರಿತಿ ಸ್ಮರೇಣ । ತಸ್ಯಾಮನಂಗಜಯಜಂಗಮದೇವತಾಯಾಂ ಅಸ್ತ್ರಾಣಿ ನಿರ್ಜಿತಜಗಂತಿ ಕಿಮರ್ಪಿತಾನಿ ॥ 24 ॥
[ಏಷಃ ಶ್ಲೋಕಃ ಕೇಷುಚನ ಸಂಸ್ಕರಣೇಷು ವಿದ್ಯತೇ]
ತಿರ್ಯಕ್ಕಂಠ ವಿಲೋಲ ಮೌಲಿ ತರಲೋತ್ತಂ ಸಸ್ಯ ವಂಶೋಚ್ಚರದ್- ದೀಪ್ತಿಸ್ಥಾನ ಕೃತಾವಧಾನ ಲಲನಾ ಲಕ್ಷೈರ್ನ ಸಂಲಕ್ಷಿತಾಃ । ಸಂಮುಗ್ಧೇ ಮಧುಸೂದನಸ್ಯ ಮಧುರೇ ರಾಧಾಮುಖೇಂದೌ ಸುಧಾ- ಸಾರೇ ಕಂದಲಿತಾಶ್ಚಿರಂ ದಧತು ವಃ ಕ್ಷೇಮಂ ಕಟಾಕ್ಷೋರ್ಮ್ಮಯ ॥ (25) ॥
॥ ಇತಿ ಶ್ರೀಗೀತಗೋವಿಂದೇ ಮುಗ್ಧಮಧುಸೂದನೋ ನಾಮ ತೃತೀಯಃ ಸರ್ಗಃ ॥
About Gita Govindam Chapter 3 - Mugdha Madhusudana
The third canto of Jayadeva's Gita Govinda is called "Mugdha Madhusudana", Krishna bewildered. Krishna, the enemy of Kamsa, holds Radha in his heart and leaves the other women of Vraja; full of regret that Radha has gone away hurt, he searches for her along the banks of the Yamuna, and in the song "Mamiyam chalita vilokya" laments that she left when she saw him surrounded by others, and longs for her forgiveness.
Written by: Jayadeva (12th century)
When to chant: In Odissi and other dance, in bhajans and concerts, and in the Gita Govinda seva at the Jagannath temple, Puri.
Did you know?
- Jayadeva (12th century) composed the Gita Govinda in Sanskrit, and its songs (ashtapadis) are still sung daily before Lord Jagannath at Puri.
- Each song has eight couplets, which is why they are called ashtapadis.
Frequently asked questions
What does "Mugdha Madhusudana" mean?
"Krishna bewildered", searching for Radha.
Who wrote the Gita Govinda?
Jayadeva, in the 12th century.
Where is it sung daily?
Before Lord Jagannath at Puri.
Offered for worship and study, not as prediction. Non-commercial.
More devotional texts