MuhurtaNow

Gita Govindam Chapter 11 - Sananda Damodara

Sri Krishna · Traditional devotional text

॥ ഏകാദശഃ സര്ഗഃ ॥ ॥ സാനംദദാമോദരഃ ॥

സുചിരമനുനയനേ പ്രീണയിത്വാ മൃഗാക്ഷീം ഗതവതി കൃതവേശേ കേശവേ കുംജശയ്യാമ് । രചിതരുചിരഭൂഷാം ദൃഷ്ടിമോഷേ പ്രദോഷേ സ്ഫുരതി നിരവസാദാം കാപി രാധാം ജഗാദ ॥ 59 ॥

॥ ഗീതം 20 ॥

വിരചിതചാടുവചനരചനം ചരണേ രചിതപ്രണിപാതമ് । സംപ്രതി മംജുലവംജുലസീമനി കേലിശയനമനുയാതമ് ॥ മുഗ്ധേ മധുമഥനമനുഗതമനുസര രാധികേ ॥ 1 ॥

ഘനജഘനസ്തനഭാരഭരേ ദരമംഥരചരണവിഹാരമ് । മുഖരിതമണീമംജീരമുപൈഹി വിധേഹി മരാലവികാരമ് ॥ 2 ॥

ശൃണു രമണീയതരം തരുണീജനമോഹനമധുപവിരാവമ് । കുസുമശരാസനശാസനബംദിനി പികനികരേ ഭജ ഭാവമ് ॥ 3 ॥

അനിലതരലകിസലയനികരേണ കരേണ ലതാനികുരംബമ് । പ്രേരണമിവ കരഭോരു കരോതി ഗതിം പ്രതിമുംച വിലംബമ് ॥ 4 ॥

സ്ഫുരിതമനംഗതരംഗവശാദിവ സൂചിതഹരിപരിരംഭമ് । പൃച്ഛ മനോഹരഹാരവിമലജലധാരമമും കുചകുംഭമ് ॥ 5 ॥

അധിഗതമഖിലസഖീഭിരിദം തവ വപുരപി രതിരണസജ്ജമ് । ചംഡി രസിതരശനാരവഡിംഡിമമഭിസര സരസമലജ്ജമ് ॥ 6 ॥

സ്മരശരസുഭഗനഖേന കരേണ സഖീമവലംബ്യ സലീലമ് । ചല വലയക്വണീതൈരവബോധയ ഹരമപി നിജഗതിശീലമ് ॥ 7 ॥

ശ്രീജയദേവഭണിതമധരീകൃതഹാരമുദാസിതവാമമ് । ഹരിവിനിഹിതമനസാമധിതിഷ്ഠതു കംഠതടീമവിരാമമ് ॥ 8 ॥

സാ മാം ദ്രക്ഷ്യതി വക്ഷ്യതി സ്മരകഥാം പ്രത്യംഗമാലിംഗനൈഃ പ്രീതിം യാസ്യതി രമ്യതേ സഖി സമാഗത്യേതി ചിംതാകുലഃ । സ ത്വാം പശ്യതി വേപതേ പുലകയത്യാനംദതി സ്വിദ്യതി പ്രത്യുദ്ഗച്ഛതി മൂര്ച്ഛതി സ്ഥിരതമഃപുംജേ നികുംജേ പ്രിയഃ ॥ 60 ॥

അക്ഷ്ണോര്നിക്ഷിപദംജനം ശ്രവണയോസ്താപിച്ഛഗുച്ഛാവലീം മൂര്ധ്നി ശ്യാമസരോജദാമ കുചയോഃ കസ്തൂരികാപാത്രകമ് । ധൂര്താനാമഭിസാരസത്വരഹൃദാം വിഷ്വങ്നികുംജേ സഖി ധ്വാംതം നീലനിചോലചാരു സദൃശാം പ്രത്യംഗമാലിംഗതി ॥ 61 ॥

കാശ്മീരഗൌരവപുഷാമഭിസാരികാണാം ആബദ്ധരേഖമഭിതോ രുചിമംജരീഭിഃ । ഏതത്തമാലദലനീലതമം തമിശ്രം തത്പ്രേമഹേമനികഷോപലതാം തനോതി ॥ 62 ॥

ഹാരാവലീതരലകാംചനകാംചിദാമ-കേയൂരകംകണമണിദ്യുതിദീപിതസ്യ । ദ്വാരേ നികുംജനിലയസ്യഹരിം നിരീക്ഷ്യ വ്രീഡാവതീമഥ സഖീ നിജഗാഹ രാധാമ് ॥ 63 ॥

॥ ഗീതം 21 ॥

മംജുതരകുംജതലകേലിസദനേ । വിലസ രതിരഭസഹസിതവദനേ ॥ പ്രവിശ രാധേ മാധവസമീപമിഹ ॥ 1 ॥

നവഭവദശോകദലശയനസാരേ । വിലസ കുചകലശതരലഹാരേ ॥ 2 ॥

കുസുമചയരചിതശുചിവാസഗേഹേ । വിലസ കുസുമസുകുമാരദേഹേ ॥ 3 ॥

ചലമലയവനപവനസുരഭിശീതേ । വിലസ രസവലിതലലിതഗീതേ ॥ 4 ॥

മധുമുദിതമധുപകുലകലിതരാവേ । വിലസ മദനരസസരസഭാവേ ॥ 5 ॥

മധുതരലപികനികരനിനദമുഖരേ । വിലസ ദശനരുചിരുചിരശിഖരേ ॥ 6 ॥

വിതത ബഹുവല്ലിനവപല്ലവഘനേ । വിലസ ചിരമലസപീനജഘനേ ॥ 7 ॥

വിഹിതപദ്മാവതീസുഖസമാജേ । ഭണതി ജയദേവകവിരാജേ ॥ 8 ॥

ത്വാം ചിത്തേന ചിരം വഹന്നയമതിശ്രാംതോ ഭൃശം താപിതഃ കംദര്പേണ തു പാതുമിച്ഛതി സുധാസംബാധബിംബാധരമ് । അസ്യാംഗം തദലംകുരു ക്ഷണമിഹ ഭ്രൂക്ഷേപലക്ഷ്മീലവ-ക്രീതേ ദാസ ഇവോപസേവിതപദാംഭോജേ കുതഃ സംഭ്രമഃ ॥ 64 ॥

സാ സസാധ്വസസാനംദം ഗോവിംദേ ലോലലോചനാ । സിംജാനമംജുമംജീരം പ്രവിവേശ നിവേശനമ് ॥ 65 ॥

॥ ഗീതം 22 ॥

രാധാവദനവിലോകനവികസിതവിവിധവികാരവിഭംഗമ് । ജലനിധിമിവ വിധുമംഡലദര്ശനതരലിതതുംഗതരംഗമ് ॥ ഹരിമേകരസം ചിരമഭിലഷിതവിലാസം സാ ദദാര്ശ ഗുരുഹര്ഷവശംവദവദനമനംഗനിവാസമ് ॥ 1 ॥

ഹാരമമലതരതാരമുരസി ദധതം പരിരഭ്യ വിദൂരമ് । സ്ഫുടതരഫേനകദംബകരംബിതമിവ യമുനാജലപൂരമ് ॥ 2 ॥

ശ്യാമലമൃദുലകലേവരമംഡലമധിഗതഗൌരദുകൂലമ് । നീലനലിനമിവ പീതപരാഗപതലഭരവലയിതമൂലമ് ॥ 3 ॥

തരലദൃഗംചലചലനമനോഹരവദനജനിതരതിരാഗമ് । സ്ഫുടകമലോദരഖേലിതഖംജനയുഗമിവ ശരദി തഡാഗമ് ॥ 4 ॥

വദനകമലപരിശീലനമിലിതമിഹിരസമകുംഡലശോഭമ് । സ്മിതരുചിരുചിരസമുല്ലസിതാധരപല്ലവകൃതരതിലോഭമ് ॥ 5 ॥

ശശികിരണച്ഛുരിതോദരജലധരസുംദരസകുസുമകേശമ് । തിമിരോദിതവിധുമണ്ദലനിര്മലമലയജതിലകനിവേശമ് ॥ 6 ॥

വിപുലപുലകഭരദംതുരിതം രതികേലികലാഭിരധീരമ് । മണിഗണകിരണസമൂഹസമുജ്ജ്വലഭൂഷണസുഭഗശരീരമ് ॥ 7 ॥

ശ്രീജയദേവഭണിതവിഭവദ്വിഗുണീകൃതഭൂഷണഭാരമ് । പ്രണമത ഹൃദി സുചിരം വിനിധായ ഹരിം സുകൃതോദയസാരമ് ॥ 8 ॥

അതിക്രമ്യാപാംഗം ശ്രവണപഥപര്യംതഗമന-പ്രയാസേനേവാക്ഷ്ണോസ്തരലതരതാരം പതിതയോഃ । ഇദാനീം രാധായാഃ പ്രിയതമസമാലോകസമയേ പപാത സ്വേദാംബുപ്രസര ഇവ ഹര്ഷാശ്രുനികരഃ ॥ 66 ॥

ഭവംത്യാസ്തല്പാംതം കൃതകപടകംഡൂതിപിഹിത-സ്മിതം യാതേ ഗേഹാദ്ബഹിരവഹിതാലീപരിജനേ । പ്രിയാസ്യം പശ്യംത്യാഃ സ്മരശരസമാകൂലസുഭഗം സലജ്ജാ ലജ്ജാപി വ്യഗമദിവ ദൂരം മൃഗദൃശഃ ॥ 67 ॥

॥ ഇതി ശ്രീഗീതഗോവിംദേ രാധികാമിലനേ സാനംദദാമോദരോ നാമൈകാദശഃ സര്ഗഃ ॥

About Gita Govindam Chapter 11 - Sananda Damodara

The eleventh canto of Jayadeva's Gita Govinda, "Sananda Damodara", Krishna rejoicing, brings Radha and Krishna together after their long separation. Having won the doe-eyed Radha over with his pleading, Krishna goes to his bower of flowers; Radha's friend, seeing her beautifully adorned, urges her to go to him without delay, and Radha comes to the bower, where the two meet in joy.

Written by: Jayadeva (12th century)

When to chant: In Odissi and other dance, in bhajans and concerts, and in the Gita Govinda seva at the Jagannath temple, Puri.

Did you know?

  • Jayadeva (12th century) composed the Gita Govinda in Sanskrit, and its songs are still sung daily before Lord Jagannath at Puri.
  • The colophon names this canto as part of "Radhika milana", the union with Radha.

Frequently asked questions

What does "Sananda Damodara" mean?

"Krishna rejoicing", as he is united with Radha.

What happens in this canto?

Radha's friend urges her to go to Krishna, and they meet in the bower.

Who wrote the Gita Govinda?

Jayadeva, in the 12th century.

Offered for worship and study, not as prediction. Non-commercial.